Abantu Banamuhla Abahlala Emigedeni
NGUMLOBELI WE-PHAPHAMA! ELESOTHO
BASEKHONA abantu abahlala emigedeni? Sathola abathile eLesotho, umbuso osezintabeni eningizimu ne-Afrika. Indawo abahlala kuyo, iHa Kome, iqhele ngebanga elingaba amakhilomitha angu-60 eMaseru, inhloko-dolobha yaseLesotho, isemagqumeni ancikene neziNtaba ezinkulu zaseMaluti. Phakathi nezinyanga zasehlobo, le mithambeka yezintaba ivame ukwembozwa yizimbali ezinhle ezibomvu tebhu. Njengoba zaziwa ngokuthi izinto zokuhlokoza umlilo ezivuthayo, lezi zimbali ezinhle zihluke ngokuphawulekayo kule ndawo egcwele uhlaza.
Lapha imikhaya eminingana isadla ngoludala. Yakha izindlu zayo ngaphakathi kwemigede esemithambekeni yentaba. Udonga lwangaphambili olunogqinsi lwenziwa ngezintingo nezinye izinto, njengomhlanga. Udonga luphahlekwa ngengxube yodaka nobulongwe. Lokhu kuyisivikelo ebusikeni baseLesotho obushubis’ umnkantsha, lapho izinga lokushisa lingehla libe ngaphansi kwezinga-qhwa. Ngaphakathi, kunendawo ethe ukushona phansi ebizwa ngokuthi i-ifo, okusho ukuthi “iziko,” okubaswa kuyo kufudumale uma kubanda.
Uphahla, udonga olungemuva, futhi ngokuvamile nezindonga ezisemaceleni kwakhiwa idwala lomgede. Kuhuqwa ngengxube yodaka nobulongwe, futhi kuyaphindwa unyaka ngamunye. Lokho kwenza idwala libe nombala omuhle futhi lingabi mahhadlahhadla. Ngaphakathi kuhlotshiswa ngezikhumba zezinkomo futhi kubuye kulalwe kuzo.
Isivakashi saseNtshonalanga siyithola ihluké ngokuqabulayo le ndlela yokuphila. Bavame ukwembatha izingubo zokulala ezimibalabala bagqoke nezigqoko zelala. Uvame ukubona abafana abangagqoke zicathulo belusile. Amadoda omuzi avame ukubonakala esebenza emasimini ommbila noma ezixoxela namanye.
Izinto zobuchwepheshe banamuhla ziyabonakala ngezinye izikhathi. Ukuzwakala kwendiza encane ngezikhathi ezithile nezimoto ezinkulu ezilethe izivakashi emigedeni kuyabajabulisa abancane nabadala kule ndawo. Bavame ukupheka phandle emlilweni waphansi ngamabhodwe ensimbi amnyama anemilenze emithathu. Ngenxa yokuswelakala kwezinkuni, babasa ngamalongwe, umhlanga nezinkuni ezimbalwa. Izinto zasendlini ezitholakala kule migede zihlanganisa itshe lokugaya ummbila nephini lokubonda insima.
ILesotho idume ngemidwebo yabaThwa, etholakala emigedeni ehlukahlukene nasemadwaleni kulo lonke leli zwe. AbaThwa ngabantu ababehlala kule migede yaseHa Kome kuqala. Imidwebo yabo ibonisa imisebenzi eminingi, kusukela ekudobeni ngezikebhe namanetha kuye ekusineni okuyinkimbinkimbi lapho abasinayo begqoka izifihla-buso zezilwane. Le midwebo inanezilwane, njengezimfene, amabhubesi, izimvubu, nezimpofu, inyamazane enkulu kakhulu. Eminingi imidwebo esemigedeni yaseHa Kome isiyagqwala. Sekusele imithonseyana nje eyisikhumbuzo sobuciko babaThwa.
Iqembu loFakazi BakaJehova lihlanganyela emsebenzini walo wokushumayela endaweni engekude kakhulu neHa Kome. Ngezikhathi ezithile, livakashela abantu abahlala kule migede, abaziwa ngomoya wabo wokwamukela izivakashi. OFakazi bavame ukwamukelwa ngendishi egcwele iphalishi lendawo elibizwa ngokuthi i-motoho. Abaningi eHa Kome bazamukela ngesasasa izincwadi zeBhayibheli. Bavame ukubonisa ukwazisa kwabo izincwadi ngokunikela ngemifino, amaqanda noma ezinye izinto emsebenzini wokufundisa woFakazi.
Laba bantu abahlala emigedeni namuhla banenhlonipho ejulile ngeBhayibheli futhi bayathanda ukubuza imibuzo eminingi ngokuphila, ukufa nezinkolelo zabo zendabuko. Umsebenzi woFakazi abakhuthele kuleyo ndawo uye wenza ukuba kube nezifundo zeBhayibheli eziningi. Ngale ndlela imbewu yeqiniso iye yathola inhlabathi evundile ezinhliziyweni zalaba bantu abathobekile.—Mathewu 13:8.
[Ibalazwe ekhasini 26]
(Ukuze ubone ukuthi indaba ihlelwe kanjani, bheka encwadini)
HA KOME