Ingcindezi Yokuba Ungathembeki
“Ukwethembeka kwezebhizinisi kuyinto eyisidala, futhi labo abazama ukuba qotho ngeke baphumelele neze.”—UStephen, e-U.S.A.
INGABE uyavumelana nalo mbono? Kuyavunywa ukuthi ngokuvamile ukungathembeki kuyazuzisa—okungenani okwesikhashana. Ngenxa yalokho, labo abazama ukuba qotho babhekana nokucindezelwa okukhulu kulezi zinto ezilandelayo.
Isilingo Somuntu Siqu. Ubani obengeke akujabulele ukuba nemali eyengeziwe noma izinto ezithile eziphambili? Lapho kuvela ithuba lokuzuza imali ngokungathembeki, kungase kube nzima ukukugwema.
● “Yimina engigunyaza imisebenzi yebhizinisi enkampanini engiyisebenzelayo. Kuvamile ukuba abantu bazame ukungifumbathisa. Ugibe lokuthola kalula imali lunamandla kakhulu.”—UFranz, eMpumalanga Ephakathi.
Ingcindezi Yokwandisa Inzuzo. Kule minyaka yamuva, emhlabeni jikelele amabhizinisi aye adonsa kanzima ngenxa yezimo zomnotho. Kufanele aphinde abhekane nezobuchwepheshe ezishintshashintsha njalo nokwanda kokuncintisana ezindaweni akuzo nasemhlabeni wonke. Izisebenzi zingase zibe nomuzwa wokuthi ukungathembeki kuyiyona ndlela yokufinyelela imigomo ebekwe abanikazi bezinkampani nabaphathi.
● “Sasicabanga ukuthi kufanele sikwenze. . . . Uma singakwenzi izokuwa inkampani ngenxa yethu.”—Reinhard Siekaczek, owaboshelwa ukufumbathisa.—I-New York Times.
Ukucindezelwa Abanye. Osebenza nabo noma amakhasimende ngezinye izikhathi bangase basikisele noma bakucindezele ukuba uhlanganyele nabo ekwenzeni ubuqili.
● “Umphathi wenkampani esisebenzelana nayo kakhulu wangitshela ukuthi uzoyeka ukusebenzelana nathi uma ngingamniki ‘intshontsho’—wayesho isifumbathiso.”—UJohan, eNingizimu Afrika.
Isiko Lendawo. Ezindaweni ezithile, kuyisiko ukuba isivumelwano sezebhizinisi sihambisane nokuphana izipho. Kuye ngobukhulu besipho nangezimo, kalula nje, imingcele yokusebenzelana ngokwethembeka kwezebhizinisi ingase ibe lufifi. Emazweni amaningi, isisebenzi sikahulumeni esikhohlakele singase sifune imali ngaphambi kokwenza umsebenzi waso futhi siyamukele ngokukhululekile inkokhelo ukuze uthole impatho ekhethekile.
● “Kuhlale kunzima ukwehlukanisa phakathi kwethiphu nesifumbathiso.”—UWilliam, eColombia.
Izimo Zendawo. Labo abahlala emazweni ampofu kakhulu noma emazweni lapho izinhlelo zikahulumeni ziwohlokile babhekana nobunzima obukhulu kakhulu. Ezindaweni ezinjalo, abantu abangafuni ukukhwabanisa noma ukweba bangase babhekwe njengabantu abangayondli kahle imikhaya yabo.
● “Ukungathembeki kubhekwa njengento evamile, edingekayo, futhi eyamukelekayo uma nje ungabanjwa.”—UTomasi, eCongo Kinshasa.
Indlela Okulimaza Ngayo Ukungathembeki
Ingcindezi yokungathembeki inethonya elikhulu. Ucwaningo olwenziwa kubaphathi e-Australia lwembula ukuthi abangu-9 kwabayishumi babheka ukufunjathiswa nenkohlakalo njengento “embi kodwa engagwemeki.” Labo okwakhulunywa nabo bathi bangazishaya indiva izindinganiso zokuziphatha ukuze bathole ibhizinisi noma bazuzise inkampani yabo.
Kodwa, ngisho nalabo abenza ukungathembeki ngokuvamile bazibona bethembekile. Bazithethelela kanjani izenzo zabo? I-Journal of Marketing Research iyabika: “Abantu benza ubuqili ukuze bazuze kodwa ngendlela yokuthi ekugcineni bazibone bengabantu abaqotho.” Ukuze bacindezele onembeza babo, abantu babeka izaba, balulaze noma bathethelele ukungathembeki kwabo ngezindlela ezihlukahlukene.
Ngokwesibonelo, ukungathembeki kungase kuchazwe ngezindlela ezikwenza kubonakale kungekubi. Amanga nokukhohlisa kuba yindlela “yokunqamulela” noma “yokuncintisana” nabanye. Ukufumbathisa kungase kuthiwe “kuwukusiza” noma “izindlela zokusheshisa izinto.”
Abanye bathethelela ukuziphatha okungabazekayo ngokunikeza izincazelo ezilulaza ubuqotho. UTom, osebenza emkhakheni wezezimali, uyaphawula: “Umbono wabantu ngokuba qotho uya ngokuthi yini abafuna ukuyenza ngobuqili kodwa ngaphandle kokwephula umthetho, kunokukhathazeka ngokuthi liyini ngempela iqiniso.” UDavid, owayeyisikhulu kwezamabhizinisi, uthi: “Nakuba ukungathembeki kugxekwa uma kutholakala, kubhekwa njengento eyamukelekayo uma umuntu engabanjwa. Abantu abangabanjwa babhekwa njengabahlakaniphile ‘abanamaqhinga.’”
Abaningi bangaze basho nokusho ukuthi ukungathembeki kubalulekile ukuze uphumelele. Usomabhizinisi osemnkantsh’ubomvu uyaphawula: “Isimo sengqondo sokuncintisana ngokuvamile senza abantu bathi, ‘Kufanele wenze noma yini edingekayo ukuze uthole umsebenzi.’” Kodwa ingabe lokho kuyiqiniso? Noma, ingabe labo abazama ukuthethelela ukungathembeki kwabo empeleni ‘bazikhohlisa ngokucabanga okungamanga’? (Jakobe 1:22) Cabanga ngezinzuzo zangempela zobuqotho okukhulunywa ngazo esihlokweni esilandelayo.
[Amazwi acashunwe esihlokweni ekhasini 5]
“Umbono wabantu ngokuba qotho uya ngokuthi yini abafuna ukuyenza ngobuqili kodwa ngaphandle kokwe-phula umthetho, kunokukhathazeka ngokuthi liyini ngempela iqiniso”
[Isithombe ekhasini 5]
Abaningi bathi ukungathembeki kubalulekile ukuze uphumelele