Izindlu ezinjengamatende ezibizwa ngama-yurt eSigodini SaseTash Rabat
AMAZWE NABANTU
Ukuvakashela EKyrgyzstan
IKYRGYZSTAN izungezwe izintaba ezimbozwe yiqhwa enkabeni ye-Asia, futhi incikene nemingcele yeKazakhstan, i-Uzbekistan, iTajikistan, kanye neChina. Cishe amaphesenti angu-90 alelizwe anezintaba. Indawo ephakeme kunazo zonke okhahlambeni lwaseTian Shan, engamamitha angu-7 439 ngaphezu kolwandle, iseKyrgyzstan. Indawo engaba ngamaphesenti amane ingamahlathi. Kuyaphawuleka ukuthi emhlabeni wonke iKyrgyzstan ingelinye lamazwe anamahlathi amakhulu azimilelayo ezihlahla zamantongomane abizwa ngokuthi ama-walnut.
OFakazi BakaJehova bafundisa izinkulungwane zabantu baseKyrgyzstan iBhayibheli
Ukungenisa izihambi nenhlonipho kuyizici ezivamile kubantu baseKyrgyzstan. Esikhundleni sokusebenzisa igama elithi “wena,” lapho kukhulunywa nomuntu omdala kusetshenziswa indlela enesizotha, uyasukunyelwa ezintweni zokuhamba zomphakathi ukuze ahlale futhi unikwa indawo ehlonipheke kunazo zonke etafuleni.
Imindeni ivame ukuba nezingane ezintathu noma ngaphezulu. Indodana encane ivame ukuhlala nabazali bayo, ngisho nalapho isishadile, ukuze ibanakekele lapho sebegugile.
Amantombazane afundiswa amakhono adingekayo kusukela esemancane, ukuze abe amakhosikazi akahle. Lapho eseneminyaka engaba ngu-16 asuke esekulungele ngokuphelele ukunakekela ikhaya. Umakoti unikwa izimpahla zokwaba. Lokhu kuhlanganisa izinto zombhede ezihlukahlukene, izinto zokugqoka kanye nokhaphethi owenziwe ngesandla. Umkhwenyana ukhokha ilobolo ngemali nangemfuyo.
Emicimbini nasemingcwabeni kuhlatshwa imvu noma ihhashi. Inyama iyahlukaniswa ibe izingxenye ezihlukahlukene futhi ingxenye ngayinye inomuntu eyabelwe yena. Umuntu ngamunye unikwa inyama ayabelwe, kuye ngokubudala nangesikhundla, nakuleli siko into ehamba phambili inhlonipho. Kube sekudliwa i-beshbarmak, okuyisidlo sendawo esidliwa ngezandla.
I-komuz uhlobo oluthandwayo lwensimbi yokudlala umculo