Ingxenye 1 Izinkolelo ZobuKristu

Ukutadisha kwakho iBhayibheli noFakazi BakaJehova kukujwayelanise neqiniso. Akungatshazwa ukuthi izinto ozifundile ziye zakusiza ukuba ube nobuhlobo obuhle noNkulunkulu futhi zakunikeza ithemba lokuphila kwesikhathi esizayo nezibusiso emhlabeni oyipharadesi ngaphansi koMbuso kaNkulunkulu. Ukholo onalo eZwini likaNkulunkulu luye lwaqiniswa, futhi ngokuzihlanganisa nebandla lobuKristu, usuthole izibusiso eziningi kakade. Usuyaqonda ukuthi uJehova usebenzelana kanjani nabantu bakhe namuhla.—Zak. 8:23.

Njengoba manje ulungiselela ukubhapathizwa, uzozuza ekubukezeni izinkolelo zeBhayibheli eziyisisekelo okuzosingathwa abadala bebandla. (Heb. 6:1-3) Kwangathi uJehova angaqhubeka ebusisa yonke imizamo yakho yokumazi, futhi kwangathi angakunika umvuzo awuthembisile.—Joh. 17:3.

1. Kungani ufuna ukubhapathizwa?

2. Ubani uJehova?

• “UJehova unguNkulunkulu weqiniso emazulwini phezulu nasemhlabeni phansi. Akekho omunye.”—Dut. 4:39.

• “Wena, ogama lakho linguJehova, wena wedwa ungoPhezukonke emhlabeni wonke.”—IHu. 83:18.

3. Kungani kubalulekile ngawe ukuba usebenzise igama likaNkulunkulu?

• “Khona-ke, kumelwe nithandaze ngale ndlela: ‘Baba wethu osemazulwini, malingcweliswe igama lakho.’”—Math. 6:9.

• “Ngoba wonke umuntu obiza igama likaJehova uyosindiswa.”—Roma 10:13.

4. Yimaphi amanye amagama asetshenziswe eBhayibhelini achaza uJehova?

• “UJehova, uMdali wemikhawulo yomhlaba, unguNkulunkulu kuze kube nini nanini.”—Isaya 40:28.

• “Baba wethu osemazulwini.”—Math. 6:9.

• “UNkulunkulu uluthando.”—1 Joh. 4:8.

5. Yini ongayinika uJehova uNkulunkulu?

• “Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho nangawo onke amandla akho.”—Marku 12:30.

• “NguJehova uNkulunkulu wakho okumelwe umkhulekele, futhi nguye yedwa okumelwe unikele kuye inkonzo engcwele.”—Luka 4:8.

6. Kungani ufuna ukuba qotho kuJehova?

• “Hlakanipha, ndodana yami, wenze inhliziyo yami ijabule, ukuze ngimphendule ongiklolodelayo.”—IzAga 27:11.

7. Uthandaza kubani, futhi uthandaza egameni likabani?

• “Ngiqinisile impela [mina, Jesu] ngithi kini, uma nicela noma yini kuBaba uyoninika yona egameni lami.”—Joh. 16:23.

8. Yiziphi ezinye izinto ongazithandazela?

• “Khona-ke, kumelwe nithandaze ngale ndlela: ‘Baba wethu osemazulwini, malingcweliswe igama lakho. Umbuso wakho mawuze. Intando yakho mayenzeke nasemhlabeni, njengasezulwini. Siphe namuhla isinkwa sethu salolu suku; futhi usithethelele amacala ethu, njengoba nathi sibathethelele abanamacala kithi. Ungasingenisi esilingweni, kodwa usikhulule komubi.’”—Math. 6:9-13.

• “Yilokhu ukuqiniseka esinakho kuye, ukuthi, kungakhathaliseki ukuthi yini esiyicelayo ngokwentando yakhe, uyasizwa.”—1 Joh. 5:14.

9. Yini engenza uJehova angayilaleli imithandazo yomuntu?

• “Bayocela usizo kuJehova, kodwa ngeke abaphendule . . . njengoba nje benze ububi ezenzweni zabo.”—Mika 3:4.

• “Amehlo kaJehova aphezu kwabalungileyo, nezindlebe zakhe zisekunxuseni kwabo; kodwa uJehova umelene nabenza izinto ezimbi.”—1 Petru 3:12.

10. Ubani uJesu Kristu?

• “USimoni Petru ephendula wathi: ‘UnguKristu, iNdodana kaNkulunkulu ophilayo.’”—Math. 16:16.

11. Kungani uJesu eza emhlabeni?

• ‘INdodana yomuntu ayizelanga ukukhonzwa, kodwa ukukhonza nokunikela umphefumulo wayo ube yisihlengo sabaningi.’—Math. 20:28.

• “Nakweminye imizi [mina, Jesu] kumelwe ngishumayele izindaba ezinhle zombuso kaNkulunkulu, ngoba yilokhu engathunyelwa kona.”—Luka 4:43.

12. Ungakubonisa kanjani ukubonga ngomhlatshelo kaJesu?

• “Wafela bonke ukuze labo abaphilayo bangabe besaziphilela bona, kodwa baphilele lowo owabafela wabuye wavuswa.”—2 Kor. 5:15.

13. UJesu unaliphi igunya?

• “Nginikwe lonke igunya ezulwini nasemhlabeni.”—Math. 28:18.

• “[UNkulunkulu] wamphakamisela esikhundleni esiphakeme futhi ngomusa wamnika igama elingaphezu kwawo wonke amanye amagama.”—Fil. 2:9.

14. Ingabe uyakholelwa ukuthi iNdikimba Ebusayo YoFakazi BakaJehova ‘iyinceku ethembekile neqondayo’ emiswe uJesu?

• “Ngubani ngempela oyinceku ethembekileyo neqondayo emiswe inkosi yayo phezu kwabendlu yayo, ukuze ibanike ukudla kwabo ngesikhathi esifanele?”—Math. 24:45.

15. Ingabe umoya ongcwele ungumuntu?

• “Ingelosi yaphendula yathi kuye: ‘Umoya ongcwele uzokwehlela phezu kwakho, amandla oPhezukonke akusibekele. Ngenxa yaleso sizathu, lokho okuzelwe kuyobizwa ngokuthi kungcwele, iNdodana kaNkulunkulu.’”—Luka 1:35.

• “Ngakho-ke, uma nina, nakuba nibabi, nikwazi ukunika abantwana benu izipho ezinhle, kangakanani-ke ngoBaba osezulwini, uyobanika umoya ongcwele labo abawucela kuye!”—Luka 11:13.

16. UJehova uwusebenzise kanjani umoya wakhe ongcwele?

• “Ngezwi likaJehova amazulu ngokwawo enziwa, nalo lonke ibutho lawo ngomoya womlomo wakhe.”—IHubo 33:6.

• “Nizokwamukela amandla lapho umoya ongcwele ufika phezu kwenu, futhi nizoba ofakazi bami . . . ezingxenyeni ezikude kakhulu zomhlaba.”—IzE. 1:8.

• “Asikho isiprofetho semiBhalo esivela kunoma iyiphi incazelo yomuntu ngokwakhe. Ngoba isiprofetho asikaze silethwe ngentando yomuntu, kodwa abantu bakhuluma okuvela kuNkulunkulu ngoba babeqhutshwa umoya ongcwele.”—2 Pet. 1:20, 21.

17. Uyini uMbuso kaNkulunkulu?

• “UNkulunkulu wezulu uyomisa umbuso ongeke neze uchithwe. Futhi lowo mbuso ngeke udluliselwe kwabanye abantu. Uyochoboza uqede yonke le mibuso, wona uqobo ume kuze kube nini nanini.”—Dan. 2:44.

18. UMbuso kaNkulunkulu uyokuzuzisa kanjani?

• “Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.”—IsAm. 21:4.

19. Wazi kanjani ukuthi izibusiso zoMbuso zizofika maduzane?

• “Abafundi beza kuye ngasese, bathi: ‘Sitshele, ziyokwenzeka nini lezi zinto, futhi siyoba yini isibonakaliso sokuba khona kwakho nesesiphelo sesimiso sezinto?’ Ephendula uJesu wathi kubo: ‘. . . Isizwe siyovukela isizwe nombuso uvukele umbuso, futhi kuyoba khona ukusweleka kokudla nokuzamazama komhlaba ezindaweni ngezindawo. Lezi zindaba ezinhle zombuso ziyoshunyayelwa emhlabeni wonke owakhiwe ngenjongo yobufakazi ezizweni zonke; khona-ke ukuphela kuyofika.’”—Math. 24:3, 4, 7, 14.

• “Ezinsukwini zokugcina kuyofika izikhathi ezibucayi okunzima ukubhekana nazo. Ngoba abantu bayokuba abazithandayo, abathanda imali, abazazisayo, abazidlayo, abahlambalazi, abangalaleli abazali, abangabongiyo, abangathembeki, abangenalo uthando, abangafuni sivumelwano, abanyundeli, abangenakho ukuzithiba, abanolaka, abangenalo uthando lokuhle, abakhapheli, abanenkani, abakhukhumele, abathandi benjabulo kunokuba abathandi bakaNkulunkulu, abanesimo sokuzinikela kokuhlonipha uNkulunkulu kodwa bewaphika amandla ako.”—2 Thim. 3:1-5.

20. Ubonisa kanjani ukuthi uMbuso ubalulekile kuwe?

• “Ngakho, qhubekani nifuna kuqala umbuso nokulunga kwakhe.”—Math. 6:33.

• “UJesu wathi kubafundi bakhe: ‘Uma umuntu efuna ukungilandela, makazidele athathe isigxobo sakhe sokuhlushwa angilandele njalo.’”—Math. 16:24.

21. Ubani uSathane namademoni?

• “Nina nivela kuyihlo uDeveli . . . Yena wayengumbulali wabantu kusukela ekuqaleni.”—Joh. 8:44.

• “Waphonswa phansi udrako omkhulu, inyoka yokuqala, lowo obizwa ngokuthi uDeveli noSathane, odukisa umhlaba wonke owakhiwe; waphonswa phansi emhlabeni, nezingelosi zakhe zaphonswa phansi kanye naye.”—IsAm. 12:9.

22. USathane ummangalele ngani uJehova nalabo abamkhonzayo?

• “Owesifazane wathi enyokeni: ‘Singazidla izithelo zemithi yensimu. Kodwa ngokuqondene nokudla izithelo zomuthi ophakathi nensimu, uNkulunkulu uthé, “Ningadli kuwo, cha, ningawuthinti ukuze ningafi.”’ Inyoka yathi kowesifazane: ‘Ngokuqinisekile ngeke nife. Yingoba uNkulunkulu uyazi ukuthi ngalo kanye usuku enidla ngalo kuwo nakanjani amehlo enu ayovuleka futhi nakanjani niyoba njengoNkulunkulu, nazi okuhle nokubi.’”—Gen. 3:2-5.

• “USathane wamphendula uJehova wathi: ‘Isikhumba ngesikhumba, futhi umuntu uyokhipha konke anakho ngenxa yomphefumulo wakhe.’”—Jobe 2:4.

23. Ungabonisa kanjani ukuthi ukumangalela kukaSathane kungamanga?

• “[Khonza uNkulunkulu] ngenhliziyo ephelele.”—1 IziKr. 28:9.

• “Ngeke ngiziphuce ubuqotho bami ngize ngiphangalale!”—Jobe 27:5.

24. Kungani abantu befa?

• “Ngomuntu oyedwa isono sangena ezweni nokufa kwangena ngesono, futhi kanjalo ukufa kwasakazekela kubantu bonke ngenxa yokuthi bonke bonile.”—Roma 5:12.

25. Siyini isimo sabafileyo?

• “Abaphilayo bayazi ukuthi bayokufa; kodwa abafileyo bona abazi lutho.”—UmSh. 9:5.

26. Liyini ithemba ngabafileyo?

• “Kuyoba khona uvuko lwabalungile nabangalungile.”—IzE. 24:15.

27. Bangaki abantu abaya ezulwini ukuze babuse noJesu?

• “Bheka! iWundlu limi eNtabeni iZiyoni, kumi kanye nalo abayizinkulungwane eziyikhulu namashumi amane nane kulotshwé igama lalo negama likaYise emabunzini abo.”—IsAm. 14:1.