Umhlaba OyiPharadesi Ususondele!

“Baba wethu osezulwini, malingcweliswe igama lakho; mawufike umbuso wakho; mayenziwe intando yakho emhlabeni njengasezulwini.”—Mathewu 6:9, 10, iBhayibheli lesiZulu elivamile.

LO MTHANDAZO odumile, abaningi abawazi ngokuthi uBaba Wethu noma uMthandazo WeNkosi, unika isintu ithemba. Kanjani?

Njengoba uMthandazo WeNkosi ubonisa, uMbuso kaNkulunkulu uyoqinisekisa ukuba intando kaNkulunkulu yenziwe emhlabeni njengoba yenziwa ezulwini. Futhi kuyintando kaNkulunkulu ukuba iPharadesi libuyiselwe. (IsAmbulo 21:1-5) Uyini ngempela uMbuso kaNkulunkulu, futhi uyolibuyisela kanjani iPharadesi emhlabeni?

Uhulumeni Wangempela

UMbuso kaNkulunkulu uwuhulumeni wangempela. Ukuze noma imuphi uhulumeni usebenze, kudingeka ababusi, imithetho nezikhonzi. Ingabe uMbuso kaNkulunkulu uyazifinyelela zonke lezo zinto ezifunekayo? Phawula izimpendulo zeBhayibheli kule mibuzo emithathu elandelayo:

Obani abangababusi eMbusweni kaNkulunkulu? (Isaya 33:22) UJehova uNkulunkulu umise iNdodana yakhe, uJesu Kristu, ukuba yengamele uMbuso. (Mathewu 28:28) Ngaphansi kwesiqondiso sikaJehova, uJesu ukhethe inani elinqunyiwe labantu kuzo “zonke izinhlanga nezilimi nabantu nezizwe” abazobusa kanye naye “njengamakhosi phezu komhlaba.”—IsAmbulo 5:9, 10.

Imiphi imithetho eshaywe uMbuso kaNkulunkulu okufanele izikhonzi zawo ziyithobele? Eminye yaleyo mithetho noma imiyalo idinga ukuba umuntu athathe isinyathelo. UJesu waveza owodwa obaluleke kunayo yonke, ethi: “‘Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho.’ Lona ngumyalo omkhulu kunayo yonke futhi ungowokuqala. Owesibili, onjengawo, yilo, ‘Kumelwe uthande umakhelwane wakho njengoba uzithanda wena.’”—Mathewu 22:37-39.

Eminye imithetho idinga ukuba izikhonzi zoMbuso kaNkulunkulu zigweme ukwenza izinto ezithile. Ngokwesibonelo, iBhayibheli lisho la mazwi acacile: “Ningazikhohlisi! Akukho muntu oziphethe kabi noma okhulekela izithombe noma ongathembekile emshadweni noma oyisikhohlakali noma oziphatha njengongqingili oyohlanganyela eMbusweni kaNkulunkulu. Futhi ngisho nesela noma umuntu ohahayo noma isidakwa nanoma ubani othuka futhi aphambe abanye.”—1 Korinte 6:9, 10, Contemporary English Version.

Obani abayizikhonzi zoMbuso kaNkulunkulu? UJesu wafanisa izikhonzi zoMbuso kaNkulunkulu nezimvu. Wathi: “[Ziyolalela] izwi lami, futhi ziyoba mhlambi munye, nomalusi munye.” (Johane 10:16) Ukuze umuntu abe isikhonzi soMbuso kaNkulunkulu, akumelwe nje agcine ngokusho ukuthi ulandela uMalusi Omuhle, uJesu, kodwa futhi kumelwe enze lokho uJesu akuyalayo. Wathi: “Akuyena wonke umuntu othi kimi, ‘Nkosi, Nkosi,’ oyongena embusweni wamazulu, kodwa lowo owenza intando kaBaba osemazulwini uyongena.”—Mathewu 7:21.

Ngakho-ke, labo abayizikhonzi zoMbuso kaNkulunkulu basebenzisa igama likaNkulunkulu, elithi Jehova, futhi bayalihlonipha, njengoba kwenza uJesu. (Johane 17:26) Balalela umyalo kaJesu wokuba bafundise abanye ‘ngalezi zindaba ezinhle zombuso.’ (Mathewu 24:14; 28:19, 20) Futhi babonisana uthando lwangempela.—Johane 13:35.

‘Ukuchitha Abachitha Umhlaba’

Izimo zamanje zezwe zibonisa ukuthi maduzane uMbuso kaNkulunkulu uzoletha izinguquko ezinkulu emhlabeni. Sikwazi kanjani lokho? Eminyakeni eyizinkulungwane ezimbili edlule, uJesu wachaza isibonakaliso esiyinhlanganisela esasiyobonisa ukuthi “umbuso kaNkulunkulu useduze.” (Luka 21:31) Njengoba kuboniswe esihlokweni esandulele, izici zaleso sibonakaliso zibonakala ngokucacile emhlabeni wonke.

Kuyobe sekulandelani? UJesu uyaphendula: “Ngaleso sikhathi kuyoba khona usizi olukhulu olungakaze lube khona kusukela ekuqaleni kwezwe kuze kube manje, cha, futhi olungasayikuphinde lube khona.” (Mathewu 24:21) Lena akuyona inhlekelele ebangelwa abantu. Kunalokho, uNkulunkulu othatha isinyathelo ‘sokuchitha abachitha umhlaba.’ (IsAmbulo 11:18) Abantu ababi, izenzo zabo zobugovu eziye zabeka le mbulunga engcupheni yokuchitheka, “bayonqunywa emhlabeni.” Kodwa abangasoleki, abakhonza uNkulunkulu ngendlela ayamukelayo, ‘bayosala kuwo.’—IzAga 2:21, 22.

Kuyafaneleka ukuba uJehova uNkulunkulu athathe isinyathelo esinjalo. Ngani? Cabangela lo mfanekiso: Ake sithi ungumnikazi wesakhiwo esinezindlu zokuhlala. Abanye babantu abahlala kuso baziphethe kahle futhi bayacabangela; bakhokha intela, bayazinakekela nezindlu zabo. Kodwa abanye bawuhlupho futhi banobugovu; bayenqaba ukukhokha intela, balimaza nesakhiwo. Naphezu kokuxwayiswa kaningi, bayaqhubeka bengaziphethe ngendlela efanele. Ubungenzani? Njengomnikazi wesakhiwo, ngokuqinisekile ubungabaxosha labo bantu ababi.

Ngokufanayo, uJehova uNkulunkulu, njengoMdali womhlaba nakho konke okukuwo, unelungelo lokunquma ukuthi obani ayobavumela ukuba bahlale kule mbulunga. (IsAmbulo 4:11) Injongo kaJehova embuliwe iwukuba asuse abantu ababi kulo mhlaba abangayinaki intando yakhe nabaphazamisa amalungelo abanye.—IHubo 37:9-11.

IPharadesi Elibuyiselwe

Maduze, uMbuso kaNkulunkulu osezandleni zikaJesu Kristu uzobusa umhlaba. UJesu wabiza lesi siqalo esisha ngokuthi “ukuvuselelwa kwazo zonke izinto.” (Mathewu 19:28, New International Version) Ziyoba njani izimo? Phawula izithembiso zeBhayibheli ezilandelayo:

IHubo 46:9. “Uqeda izimpi kuze kube semkhawulweni womhlaba.”

Isaya 35:1. “Ihlane nesifunda esingenamanzi kuyothaba, ithafa eliwugwadule liyojabula futhi liqhakaze njengesafroni.”

Isaya 65:21-23. ‘Umsebenzi wezandla zabo abakhethiweyo bami bayowusebenzisa ngokugcwele. Ngeke bakhandlekele ize, noma bazalele ukuhlupheka.’

Johane 5:28, 29. “Ihora liyeza lapho bonke abasemathuneni beyokhunjulwa futhi bayolizwa izwi [likaJesu] baphume.”

IsAmbulo 21:4. “[UNkulunkulu] uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.”

Izizathu Zokukukholelwa Lokhu

Ingabe uyazikholelwa izithembiso zeBhayibheli? IBhayibheli labikezela ukuthi abaningi babengeke bazikholelwe. Lithi: “Ezinsukwini zokugcina kuyofika abahleki bosulu . . . beqhubeka ngokwezifiso zabo siqu bethi: ‘Kuphi lokhu kuba khona kwakhe okuthenjisiwe? Phela, kusukela osukwini okhokho bethu abalala ngalo, zonke izinto ziqhubeka ngokufana ncamashí nasekuqaleni kwendalo.” (2 Petru 3:3, 4) Kodwa labo bahleki bosulu benza iphutha. Cabangela izizathu ezine kuphela zokuthi kungani ungakwethemba lokho okushiwo iBhayibheli:

(1) UNkulunkulu wake wangenela ezindabeni zomhlaba esikhathini esidlule. ISikhukhula sosuku lukaNowa siyisibonelo esivelele.—2 Petru 3:5-7.

(2) IZwi likaNkulunkulu lazibikezela ngokunembile izimo zamanje zembulunga yonke.

(3) Zonke izinto ‘aziqhubeki ngokufana ncamashí nasekuqaleni kwendalo.’ Ngezinga elingakaze libonwe ngaphambili emlandweni, umhlaba wethu ubhekene nokuwohloka kwesimiso sezenhlalo, sokuziphatha nesemvelo.

(4) Manje kushunyayelwa “izindaba ezinhle zombuso” emhlabeni jikelele, okubonisa ukuthi ‘ukuphela kuzofika’ maduzane.—Mathewu 24:14.

OFakazi BakaJehova bakumema ukuba ufunde nabo iZwi likaNkulunkulu, iBhayibheli, ukuze uzwe okwengeziwe ngethemba lokuphila okuphakade ngaphansi kokubusa koMbuso kaNkulunkulu. (Johane 17:3) Yebo, isintu silindelwe ikusasa eliqhakazile. Izikhathi ezingcono kakhulu zisemnyango! Ingabe uyoba ingxenye yaleli kusasa?

[Amazwi acashunwe esihlokweni ekhasini 7]

Labo abathi izinto zizoqhubeka ngendlela ebezilokhu zingayo benza iphutha elikhulu

[Isithombe ekhasini 8]

Ingabe uyoba ingxenye yaleli kusasa?