Incwadi Evela E-Ireland

Ukufuna Ngokuzimisela

KWAKUWUSUKU olupholile. Kwakunamaconsi omkhemezelo efasiteleni lemoto ayengenza ngingayiboni kahle indawo ezungezile. Ngemva kokuhamba amakhilomitha angu-16, ngafika phezulu egqumeni elengame iWestport, idolobhana elingasogwini entshonalanga ye-Ireland. Ekugcineni, ilanga layihlakaza inkungu kwabonakala iziqhingana ezithe gqwa-gqwa echwebeni, ezinhle njengesimaragidu esiluhlaza njengesibhakabhaka. Ezimbalwa zazo zinabantu abahlala kuzo, kodwa abalimi bendawo bathutha imfuyo yabo ngezikebhe iyoklaba kwezinye zazo.

Kunokhahlamba olugudla ugu ukuya ngasentshonalanga. La magquma ambozwe inkomankome notshani ayefana nethusi eligqwalile njengoba ilanga seliyoshona. Buqamama kwakunegquma okuthiwa iCroagh Patrick, elaziwa endaweni ngokuthi iReek. Ngathubeleza emigwaqweni emincane eminyene yaseWestport, ngadlula iReek, ngaqonda endaweni abangavamile ukuyivakashela oFakazi BakaJehova.

Indoda engangiyoyibona yayingazi ukuthi ngiyeza ngalolo suku. Ngangithole incwadi ethi yayisanda kuthutha futhi ifuna ukuqhubeka nezingxoxo zeBhayibheli kanye noFakazi. Ngazibuza: ‘Kazi ingakanani? Ishadile noma ayishadile? Ithandani?’ Ngabheka esikhwameni sami ngihlola ukuthi nginalo yini iBhayibheli nezincwadi ezihlukahlukene ezisekelwe kulo. Ngacabanga ngalokho engangizokusho ukuze ngithuthukise isithakazelo sayo esigijimini soMbuso.

Ngase ngiyifulathele iReek. Kwakunezindonga zamatshe, iningi lazo elakhiwa ngesikhathi seNdlala Enkulu ekhulwini le-19, ezizungeze amasimu angenalutho ahamba ayosho lé olwandle. Phezulu, kwakunenyoni i-seagull eyayindiza yodwa yehla yenyuka. Buqamama, kwakunemithi ye-hawthorn ne-blackthorn, eyayigobile futhi isontekile kuhle kwamaxhegu, ifulathele umoya.

Awekho amakheli noma amagama emigwaqo kule ndawo yasemaphandleni. Ikheli lale ndoda laliyigama lesakhiwo nelesigceme.a Kodwa umgomo wami wokuqala kwakuwukuthola umuntu engangingaqiniseka ukuthi uyazi ukuthi wonke umuntu uhlala kuphi kule ndawo—indoda yeposi. Ngemva kwemizuzu engu-30, ngalithola iposi, okuyigumbi elalishintshwe laba ihhovisi komunye wale mizi. Emnyango kwakunophawu oluthi “Kuvaliwe.” Ngingapheli amandla, ngabuza esitolo sendawo futhi ngayalelwa indawo ethile engakulesi sigceme.

Ngemva kokuhamba amakhilomitha angu-8, ngayithola indawo engangiyifuna—ijika elibi elingakwesokudla eliwumngcingo ngakwesokunxele. Ngangqongqoza emzini oseduze nalapho. Kwavula owesifazane osekhulile futhi wangitshela ngokukhulu ukuziqhenya ukuthi usehlale kule ndawo konke ukuphila kwakhe kodwa kwakumdumaza ukuthi kufanele avume ukuthi wayengamazi lo muntu engangimfuna. Wathi uzomshayela ucingo wabe esethi angingene endlini.

Njengoba ayekhuluma ocingweni, wayelokhu engijeqeza, ngokungangabazeki ezibuza ukuthi kazi ngingubani futhi ngifunani. Ngaphawula umfanekiso omncane weNcasakazi uMariya ngasemnyango, odongeni kunesithombe esikhulu sikaKristu. Etafuleni lasekhishini kwakunobuhlalu berosari. Ukuze ngimkhulule, ngavele ngamtshela ukuthi: “Nginomyalezo wakhe obalulekile ovela kubangane bakhe.”

Umyeni wakhe wangena wahlala phansi waqala ukungixoxela ngomlando wale ndawo. Phakathi naleso sikhathi umkakhe akatholanga lutho lapho eshaya ucingo okokuqala futhi wathi mangilinde njengoba ayesathinta abanye abantu. Kubonakala sengathi akekho owayeke wezwa ngale ndoda noma lo muzi. Ngabheka iwashi lami. Isikhathi sase sihambile. Ngaqaphela ukuthi kwakuzomelwe ngibuye ngizame ngesinye isikhathi. Ngababonga bobabili ngosizo lwabo, ngabuyela emotweni, ngabe sengiqala uhambo olude lokubuyela ekhaya.

Ngabuya ngesonto elalandela. Kulokhu, ngathola indoda yeposi eyangiyalela kahle. Ngemva kwemizuzu engu-15, ngathola impambano-mgwaqo eyayingichazele ngayo. Ngajikela kwesokunxele ngehla ngenyuka izikhathi ezimbala, ngifuna uphawu olulandelayo, ibhuloho lamatshe elidala. Angizange ngilithole. Ekugcineni, ngabona uphawu lokugcina laphaya egqumeni, indlu engangichithe isikhathi esiningi ngiyifuna.

Ngazinika ithutshana lokucabanga ukuthi ngizozethula kanjani izindaba ezinhle. Ikhehla elithile lavula umnyango. Lathi: “Ngiyaxolisa, kodwa indlu oyifunayo nansiya.” Lakhomba indlu eyayisithwe yizihlahla. Njengoba kulindelekile, ngaya khona ngafike ngangqongqoza. Ngisalindile, ngabuka uLwandle i-Atlantic olungamamitha angamakhulu ambalwa ukusuka lapho. Kwase kunomoya ovunguzayo, futhi kwakunamagasi amhlophe ayeshaya ugu oluhlanzekile olungamakhilomitha amaningi ubude. Lwalungenamuntu futhi kungekho muntu nakule ndlu.

Ngaphindela kabili ngaphambi kokuba ngihlangane nensizwa ethile. Yathi: “Indlu oyifunayo yiyo le, kodwa umuntu obehlala la, insizwa oyifunayo isithuthile, futhi angazi ukuthi ithuthelephi.” Ngachaza ukuthi ngangiyifunelani futhi ngathola ukuthi le nsizwa yayingakaze ixoxe noFakazi BakaJehova. Yayike yagetshengwa futhi yayizibuza ukuthi kungani uNkulunkulu ayevumele lokhu kungabi nabulungisa nokunye kwenzeke. Yabajabulela omagazini bamuva INqabayokulinda ne-Phaphama! ababekhuluma ngayo kanye leyo ndaba.

ImiBhalo isiyala ukuba sizimisele ukwenza umzamo wokufuna abanjengezimvu. Ngokudabukisayo, angiyitholanga insizwa engangiyifuna. Noma kunjalo, angicabangi ukuthi ngadlala ngesikhathi. E-Ireland, baningi abafuna ukuzwa isigijimi soMbuso, futhi ngesibusiso sikaJehova, imbewu encane yeqiniso eyatshalwa kule nsizwa ingase ithele izithelo ngelinye ilanga.

[Umbhalo waphansi]