Ukuqhathanisa Okubaluleke Kunakho Konke Okungenzeka Uyoke Ukwenze

INGABE ungumKristu? Uma kunjalo, uphakathi kwabantu abangaphezu kwezigidi eziyizinkulungwane ezimbili emhlabeni—cishe oyedwa kwabathathu—abathi bangabalandeli bakaKristu. Namuhla, kunezinkulungwane zezinkolo ezibizwa ngokuthi ezobuKristu, kodwa zihlukene ngenxa yezimfundiso ezingqubuzanayo nemibono engafani. Ngakho-ke, lokho okukholelwayo kungase kuhluke kakhulu kulokho abanye abathi bangamaKristu abakukholelwayo. Ingabe kunendaba ngempela ukuthi yini oyikholelwayo? Yebo kunendaba—uma ufuna ukuphila ngendlela yobuKristu efundiswa yiBhayibheli ngokwalo.

Abalandeli bakaJesu Kristu bokuqala babaziwa ngokuthi “amaKristu.” (IzEnzo 11:26) Sasingekho isidingo sokuzibiza ngelinye igama, ngoba inkolo yobuKristu yayiyodwa vo. Wonke amaKristu ayelandela izimfundiso neziyalezo zoMsunguli wobuKristu, uJesu Kristu. Linjani elakho isonto? Ingabe ukholelwa ukuthi lifundisa lokho okwafundiswa uKristu nalokho abalandeli bakhe ababekukholelwa? Ungaqiniseka kanjani? Yinye indlela ongaqiniseka ngayo—ukuqhathanisa elikufundisayo nokufundiswa iBhayibheli.

Cabanga ngalokhu: UJesu Kristu wayeyihlonipha kakhulu imiBhalo, eyibheka njengeyiZwi likaNkulunkulu. Wayengavumelani nalabo ababelulaza izimfundiso zeBhayibheli ngokuqhakambisa amasiko abantu. (Marku 7:9-13) Ngakho singaphetha kufanele ngokuthi abalandeli bakaJesu beqiniso kufanele basekele izinkolelo zabo eBhayibhelini. Ngakho umKristu ngamunye wenza kahle ngokuzibuza, ‘Izimfundiso zesonto lami ziyavumelana yini neBhayibheli?’ Ukuze uthole impendulo yalowo mbuzo, kungani ungaqhathanisi lokho okufundiswa isonto lakho nalokho okushiwo yiBhayibheli?

UJesu wathi indlela esikhulekela ngayo uNkulunkulu kumelwe isekelwe eqinisweni—iqiniso elitholakala eBhayibhelini. (Johane 4:24; 17:17) Umphostoli uPawulu wathi ukuze sisindiswe kumelwe sifinyelele “olwazini olunembile lweqiniso.” (1 Thimothewu 2:4) Ngakho kubalulekile ukuba izinkolelo zethu zisekelwe eqinisweni elinembile leBhayibheli. Uma kungenjalo, singaphunyukwa insindiso!

INDLELA ESINGAQHATHANISA NGAYO IZIMFUNDISO ZETHU NEBHAYIBHELI

Sicela ufunde le mibuzo eyisithupha elandelayo bese uphawula izimpendulo zeBhayibheli zaleyo mibuzo. Bheka amavesi eBhayibheli akhonjiwe bese ucabangisisa ngezimpendulo. Yibe usuzibuza, ‘Izimfundiso zesonto lami zinjani uma ziqhathaniswa nalokho okushiwo yiBhayibheli?’

Le mibuzo embalwa ingase ikusize wenze ukuqhathanisa okubaluleke kunakho konke oyoke ukwenze. Ungathanda yini ukuqhathanisa nezinye izimfundiso zesonto lakho nalokho okushiwo yiBhayibheli? OFakazi BakaJehova bangakujabulela ukukusiza uhlole amaqiniso eBhayibheli acacile. Ungacela omunye woFakazi ukuba akuqhubele isifundo seBhayibheli samahhala. Noma ungangena engosini yethu ethi, jw.org/zu.

1 UMBUZO: Ungubani uNkulunkulu?

IMPENDULO: UJehova, uYise kaJesu, unguNkulunkulu waphakade noMdali wezinto zonke ongumninimandla onke.

OKUSHIWO IBHAYIBHELI:

“Siyambonga uNkulunkulu uYise weNkosi yethu uJesu Kristu ngaso sonke isikhathi uma sinithandazela.”—Kolose 1:3.

“Uyakufanelekela, Jehova, yebo Nkulunkulu wethu, ukwamukela inkazimulo nodumo namandla, ngoba wadala zonke izinto.”—IsAmbulo 4:11.

Bheka neyabaseRoma 10:13; 1 Thimothewu 1:17.

2 UMBUZO: Ungubani uJesu Kristu?

IMPENDULO: UJesu uyiNdodana kaNkulunkulu eyizibulo. UJesu wadalwa, ngakho waba nesiqalo. UJesu uyazithoba kuNkulunkulu futhi wenza intando yaKhe.

OKUSHIWO IBHAYIBHELI:

“UBaba mkhulu kunami.”—Johane 14:28.

‘[UJesu] ungumfanekiso kaNkulunkulu ongabonakali, izibulo layo yonke indalo.’—Kolose 1:15.

Bheka noMathewu 26:39; 1 Korinte 15:28.

3 UMBUZO: Uyini umoya ongcwele?

IMPENDULO: Umoya ongcwele amandla kaNkulunkulu awasebenzisela ukufeza intando yakhe. Awuyena umuntu. Abantu bangaba nomoya ongcwele futhi ubanike amandla.

OKUSHIWO IBHAYIBHELI:

• “Njengoba u-Elizabethe ezwa ukubingelela kukaMariya, usana olwalusesibelethweni sakhe lwagxuma; u-Elizabethe wagcwala umoya ongcwele.”—Luka 1:41.

• “Nizokwamukela amandla lapho umoya ongcwele ufika phezu kwenu.”—IzEnzo 1:8.

• Bheka noGenesise 1:2; IzEnzo 2:1-4; 10:38.

4 UMBUZO: Uyini uMbuso kaNkulunkulu?

IMPENDULO: UMbuso kaNkulunkulu uhulumeni wasezulwini. UJesu iNkosi yoMbuso kaNkulunkulu. Maduzane lo Mbuso uzokwenza ukuba intando kaNkulunkulu yenziwe emhlabeni wonke.

OKUSHIWO IBHAYIBHELI:

“Ingelosi yesikhombisa yashaya icilongo layo. Kwaba khona amazwi amakhulu ezulwini, athi: ‘Umbuso wezwe ngempela usungumbuso weNkosi yethu nokaKristu wayo, iyobusa njengenkosi kuze kube phakade naphakade.’”—IsAmbulo 11:15.

Bheka noDaniyeli 2:44; Mathewu 6:9, 10.

5 UMBUZO: Ingabe bonke abantu abalungile baya ezulwini?

IMPENDULO: Cha. Kuneqembu elincane labantu abathembekile, elibizwa ngokuthi ‘umhlambi omncane,’ elikhethwe uNkulunkulu ukuba liye ezulwini. Liyobusa kanye noJesu njengamakhosi phezu kwaso sonke isintu.

OKUSHIWO IBHAYIBHELI:

“Ungesabi, mhlambi omncane, ngoba uYihlo ukwamukele ukuba aninike umbuso.”—Luka 12:32.

“Bayoba ngabapristi bakaNkulunkulu nabakaKristu, babuse njengamakhosi kanye naye.”—IsAmbulo 20:6.

Bheka nesAmbulo 14:1, 3.

6 UMBUZO: Iyini intando kaNkulunkulu ngomhlaba nangesintu?

IMPENDULO: Ngaphansi koMbuso kaNkulunkulu umhlaba uyoba ipharadesi futhi abantu abathembekile bayoba yimiqemane, bajabulele ukuthula kanye nokuphila okuphakade.

OKUSHIWO IBHAYIBHELI:

“Abamnene bayodla ifa lomhlaba, futhi ngempela bayothola injabulo enkulu ngokuchichima kokuthula.”—IHubo 37:10, 11.

“Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.”—IsAmbulo 21:3, 4.

Bheka neHubo 37:29; 2 Petru 3:13.