Иисус Христос иԥсҭазаара иазкны Абиблиа иану иашоума?

Абиблиа иаҳәо

Аевангелист Лука иҩит Иисус иԥсҭазаара «зегь бзианы иҭҵааны, иҟаз шыҟаз еишьҭаргыланы» аҩра дшалагаз (Лука 1:3).

Шьоукы ишьақәдырӷәӷәоит Иисус данынхоз аамҭазы инхоз Матфеии, Марки, Лукеи, Иоанни иԥсҭазаара иазкны ирҩыз аԥшьбатәи ашәышықәсазы ҳ. ҳ. аан иԥсахын ҳәа.

Аха XX ашәышықәса алагамҭазы Иоанн иҟынтә Аевангелие цыԥҵәахак Египет ирыԥшааит. Иахьа уи Раилендз 457 (P⁵²) ипапирус ҳәа еицырдыруеит, насгьы Манчестер (Англиа) иҟоу Џьон Раилендз ибиблиотекаҿы ишьҭоуп. Уа иану атексти иахьа ҳхы иаҳархәо Абиблиақәа рҿы Иоанн 18:31—33, 37, 38 иануи акоуп.

Иахьатәи аамҭазы уи ижәытәӡатәиу напыла иҩу Ақьырсиантә Бырзен Ҩырақәа рцыԥҵәаха ауп. Аҵарауаа аӡәырҩы ирҳәоит уи 125 шықәса шыҟаз ҳ. ҳ. аан иҩын ҳәа, даҽакала иуҳәозар, аоригинал анҩыз ашьҭахь 25 шықәса анҵы. Ара иану атексти акыршықәсақәа рышьҭахь иҩыз анапылаҩырақәеи еиқәшәоит.