Еиҿагылома Абиблиа иану?

Абиблиа иаҳәо

Мап, Абиблиа иану зегь еиқәшәоит. Ҵыԥҵәахақәак еиқәымшәошәа шәгәы иабар ҟалоит, аха ииашоу алкаа аҟаҵара ишәыцхраар алшоит ҵаҟа иаагоу апринципқәа:

1. Аконтекст шәазхьаԥшла. Автор иажәақәа зынӡа даҽа ҵакык роур ҟалоит, урҭ аконтекст иагәылхны иугар.

2. Еилышәкаа ахҭыс анызҵаз ихәаԥшышьа. Хҭыск ииашаны анҵаразы уи збаз еиуеиԥшым ажәақәа рхы иадырхәалар рылшоит, насгьы даҽа детальқәак азгәарҭалар ҟалоит.

3. Иҭышәҵаа уи аамҭазы иҟаз аҭоурыхтә фактқәеи аҵасқәеи.

4. Еилышәкаа ажәа даҽа ҵакык аҭаны рхы иадырхәоу ишыҟаҵәҟьоу акәу ишеилкаатәу.

5. Ишәхашәмыршҭлан аӡәы ак ҟаиҵеит ҳәа ианызар, уи еснагь иара ихаҭа иҟаиҵеит ҳәа шаанамгоa.

6. Ииашоу Абиблиа аиҭага шәхы иашәырхәала.

7. Адин иадҳәалоу ииашам агәаанагарақәеи адогмақәеи Абиблиаҿы рыԥшаара шәашьҭамлан.

Ҵаҟа иаагоу аҿырԥштәқәа иаҳдырбоит еиқәаҳаԥхьаӡаз апринципқәа шҳацхраауа Абиблиа иану еиҿагылозшәа анаҳбо.

Апринцип 1. Аконтекст шәазхьаԥшла

Анцәа абыжьбатәи амш азы иԥсы ашьара далагазар, аусура анаҩсгьы дызлаҿызи? Абиблиаҿы иануп «Анцәа игәы иҭеикыз зегь ишан, уи амш аҽны иԥсы ашьара далагеит» ҳәа (Аҟазаара 2:2—4). Ашара иазку арҭ ажәақәа рконтекст иҳаилнаркаауеит арҭ ажәақәа зызку адгьыли уа иқәуи зегь ршара мацара шакәу. «Саб уажәгьы аус иуеит» ҳәа Иисус ииҳәаз ажәақәа хыхь иаагоу ажәақәа ирҿагылаӡом, избанзар Иисус зыӡбахә имаз Анцәа дызҿыз даҽа усқәак ракәын (Иоанн 5:17). Урҭ аусқәа рахь иаҵанакуеит Анцәа иԥшьоу идоуҳа ала Абиблиа аҩра напхгара шазиуаз, ауаа дшырхылаԥшуаз, амҩа ишықәиҵоз (Аԥсалом 20:6; 105:5; 2 Пиотр 1:21).

Апринципқәа 2, 3. Еилышәкаа ахҭыс анызҵаз ихәаԥшышьеи уи аамҭазы иҟаз аҭоурыхтә фактқәеи аҵасқәеи

Дабеихәышәтәи Иисус илашәыз ахаҵа? Лука иҟынтә ажәабжь бзиа аҟны иануп Иисус илашәыз ахаҵа Иерихон даназааигәахоз ауп данихәышәтәыз ҳәа. Матфеи иҟынтә ажәабжь бзиа аҟны иаҳәоит алашәцәа ҩыџьа ыҟан, насгьы уи ахҭыс ахьыҟалаз Иисус иҵаҩцәеи иареи «Иерихон ианалҵуаз» ауп ҳәа (Лука 18:35—43; Матфеи 20:29—34). Арҭ аацҳарақәа хеибарҭәаауеит, избанзар иҟалаз ахҭыс ҩ-хәаԥшышьак рыла иаадырԥшуеит. Матфеи алашәцәа шаҟаҩ ыҟаҵәҟьаз дазааҭгылоит. Урҭ ҩыџьа ыҟан. Лука иакәзар, уи Иисус дзацәажәоз ауаҩы иӡбахә еиҳа дазааҭгылоит. Археологцәа ирыԥшааз ишьақәнарӷәӷәоит уи аамҭазы Иерихон ҩ-қалақькны ишыҟаз. Ажәытә уриатә қалақьи еиҳа иҿыцыз римтәи ақалақьи километраки бжаки раҟара рыбжьан. Иисус уи аџьашьахәы аныҟаиҵоз, урҭ аҩқалақьк рыбжьара дыҟазҭгьы ҟаларын.

Апринцип 4. Еилышәкаа ажәа даҽа ҵакык аҭаны рхы иадырхәоу ишыҟаҵәҟьоу акәу ишеилкаатәу

Иқәгахома адгьыл? Екклезиаст 1:4 аҿы иануп «адгьыл наӡаӡа иаанхоит» ҳәа. Шьоукы ргәы иаанагоит Абиблиа даҽа цыԥҵәахак аҿы «адгьыл иқәу-иныҟәнаго зегьы, иара адгьыл ахаҭагьы, леиқәыццышәуеит» ҳәа иану ажәақәа ари азхәыцра иаҿагылоит ҳәа (2 Пиотр 3:10, Асинодалтә еиҭага). Аха Абиблиаҿы ажәа «адгьыл» ишыҟаҵәҟьоу аҵакы амангьы иуԥылоит, даҽа ҵакык амангьы иуԥылоит. Ишыҟаҵәҟьоу аҵакы амоуп ҳапланета аӡбахә анцо, даҽа ҵакык амоуп адгьыл иқәынхо ауаа рыӡбахә анцо (Аҟазаара 1:1; 11:1). 2 Пиотр 3:10 аҿы зыӡбахә ҳәоу «адгьыл» ақәгара ҳапланета ақәгара акәӡам иаанаго, уа «ауаа цәгьақәа» рықәгара атәоуп иаҳәо (2 Пиотр 3:7).

Апринцип 5. Шәазхәыц аус ҟазҵаҵәҟьаз ҳәа зыӡбахә ҳәоуи уи ҟазҵаҵәҟьази дызусҭоу

Иҳәада Иисус Капернаум даныҟаз аруаа реиҳабы имаҵуҩы дихәышәтәырц азы? Матфеи 8:5, 6 рҿы иҳәоуп Иисус иахь инеиз аруаа реиҳабы ихаҭа иоуп ҳәа. Лука 7:3 аҿы иануп аруаа реиҳабы аиудеиаа реиҳабацәа Иисус иахь инаишьҭит ҳәа. Ара иану еиқәымшәошәа убар ҟалоит. Аха ишыҟаҵәҟьаз абас ауп: аиудеиаа реиҳабацәа аруаа ихьӡала ауп аҳәара шыҟарҵаз, убри аҟынтә аҳәара ҟазҵаҵәҟьаз аруаа реиҳаб иоуп. Ари анеилукаалак, аиҿагылара шыҟам абара цәгьахаӡом.

Апринцип 6. Ииашоу аиҭага шәхы иашәырхәала

Ауаа зегьы агәнаҳа ҟарҵома? Абиблиа излаҳәо ала, ҳара зегьы раԥхьатәи ауаҩы Адам иҟынтә агәнаҳа ҳҭынхеит (Римаа 5:12). Аха Абиблиа еиҭагақәак рҿы иануп ауаҩ бзиа «гәнаҳа ҟаиҵаӡом» ҳәа (1 Иоанн 3:6, Асинодалтә еиҭага). Аоригиналтә текст аҿы аҟаҵарба «агәнаҳа аҟаҵара» уажәтәи аамҭа аҿы игылоуп, уи абырзен бызшәаҿы акыраамҭа ицо акы аанарԥшуеит. Ҳазҵыҵыр ҳалымшо иаҳҭынхаз агәнаҳаи ауаҩы идырны акыраамҭа Анцәа изакәанқәа анеилеигои еиԥшӡам. Убри аҟынтә еиҭагақәак уи азҵаара аилкаара иҳацхраауеит. Урҭ рҿы иаагоуп еиҳа еилукаартә иҟоу ажәақәа, иаҳҳәап «агәнаҳа ҟашәҵалаӡом» (аиҭага «Адунеи ҿыц»).

Апринцип 7. Абиблиа ҭышәҵаала, адогматқәа ракәымкәа

Иисус Анцәа диаҟароума, мамзаргьы Иисус деиҵоу? Зны Иисус иҳәеит: «Саби сареи ҳаӡәуп» (Иоанн 10:30). Даҽазны абас иҳәеит: «Саб сара саасҭа деиҳауп» (Иоанн 14:28). Иисус ииҳәаз арҭ ажәақәа еиҿагылоушәа убар алшоит. Арҭ ажәеинраалақәа иашаны еилышәкаарц азы Анцәа х-хаҿык имоуп ҳәа иҟоу аҵара инақәыршәаны шәырмыхәаԥшлароуп. Еиҳа ииашахоит еилышәкаар Иеговеи Иисуси ирызкны Абиблиа иаҳәо. Абиблиа иҳаилнаркаауеит Иисус изы Иегова Аб мацара шиакәым, уи иара убас зымаҵ иуа Анцәа иоуп (Матфеи 4:10; Марк 15:34; Иоанн 17:3; 20:17; 2 Коринфаа 1:3). Уи иаҳнарбоит Иисус Анцәа дышиаҟарам.

«Саби сареи ҳаӡәуп» ҳәа Иисус ииҳәаз ажәақәа ахьаагоу аконтекст иҳаилнаркаауеит Иеговеи иареи рхықәкқәа шеиԥшыз, уи аганахьалагьы дара аӡәны ишыҟаз. Анаҩс Иисус иҳәеит: «Саби сареи аӡәк иеиԥш ҳшыҟоу» (Иоанн 10:38). Еицырзеиԥшыз ахықәкқәа иара убас Иисус иҵаҩцәеи иареи еиднакылон. Иара иҵаҩцәа рзы Анцәа диҳәон: «Сара урҭ уара уҟынтә исоуз ахьӡ-аԥша рысҭеит, даргьы уареи сареи ҳаиԥш аӡәыкны иҟаларц азы. Дареи сареи аӡәк иеиԥш ҳаҟоуп, иара убас уареи сареи аӡәк иеиԥш ҳаҟоуп» (Иоанн 17:22, 23).