Ọdaphan Luk

3 Omhunhenhiom a 15 ạlha ịtooghi phọ ạ Tạịbirịọs Siza, mem mọ ạ Pọntịọs Pạịlet kụ aḍighi bọ opoghom a Judia, kụ ạ Hẹrọd* kụ aḍighi bọ ọtooghia ekool phọ ạ Gạlili, kụ a Filip umor phọ ọdi kụ aḍighi bọ ọtooghia ekool phọ Ituria ra Trạkonạịtis, ḅịlhe ạ Lạịseniạs kụ aḍighi bọ ọtooghia ekool phọ Ạbilini, 2 mem mọ Ạnạs ra Keyạfạs oḍighi bọ ruwo ẹmhu ạbupinyon rịkia phọ, adom mọ Ẹnhaan iru ni ẹteeny Jọn ọony phọ ạ Zẹkạrạyạ ẹpe ẹdala phọ.

3 Kụ ọdi ạghi oomo ạramha phọ etuman bọ Ọphiiny ạ Jọdạn agbeelhom ghan mọ oḍiiny ạmuum kụ kaḍeenhaan mọ oye makiton pịdi ọsar ịkaraph ọdi ọbilhenhaan, 4 ọdaphan ịpe ọge bọ sịphe ạḍinya oyil phọ Ạịzạyạ mọ: “Ụnhaghan ni ẹḍogh dị ẹlo ghan ẹpe ẹdala phọ mọ: ‘Iikolhobian eten phọ a Jehova!* Iselhe yogh reten phọ ọdi. 5 Ọmoogh oḅol ạtorobo eḍiiny, r’oolemhi ạtorobo ẹeḅaraph r’eegum; ọmoogh osele yogh ịkulhakulha areten phọ, r’oolemhi yogh igbughagbugha areten phọ; 6 kụ oomo awe kọmiin ni pẹlieeny phọ Ẹnhaan.’”*

7 Kụ ọdi amhiigh ọḅenhi aḍita awe phọ rotu bọ dị ọdi kaḍiinye bịdi mụum mọ: “Nyịnha ạnmuny ạsiḅom, ạnhian kụ ịphur inyinha rụru oghiil ọḍua esi ạghelhe phọ ratu bọ? 8 Imiigh omhuum iimhumha dị eḍeenhaan mọ nyinha mekiton. Kẹ́etughian ghan mọ, ‘Ebrạhạm kụ ọde ayoor.’ Loor esi dị mị rịḅenhi ghan inyinha mọ Ẹnhaan katue ni amiteom nmụny sịen asighiigh phọ ịphen phọ ạngo Ebrạhạm. 9 Ịduon rọkaaph bọ moseere akubu sịphe azin oreeny phọ. Esi ịduon phọ tọrobo oreeny lọ rámuum igey iimhumha, koler ri oguom nịan.”

10 Kụ aḍita awe phọ opuru ghan nyọdi mọ: “Yoor uḍighi eeghe?” 11 Kụ ọdi ạphagharanhaan bịdi mọ: “Oye lọ ạmhoogh ịyal ạrusuoma* ạngo aani nyoniin oye lọ ụ́moogh, kụ ọlo ạmhoogh ịyaar olhe ạngo aani ọlo ụ́moogh.” 12 Ạbubonyiom iisogh bịn uru ni dị koḍiinye bịdi mụum, kụ opuru nyọdi mọ: “Ọtughemhia, yoor uḍighi eeghe?” 13 Kụ ọdi ạḅenhi bịdi mọ: “Kẹ́boor ghan we iisogh dị epu ịpe ọḅem bọ mọ osogh ghan phọ.” 14 Kụ ạbuo ẹgham upuru aani ni nyọdi mọ: “Yoor uḍighi eeghe?” Kụ ọdi ạḅenhi bịdi mọ: “Kézirion ghan we ikpoki ọbobo ẹgba ọkpe ẹḅam ẹmhu oye, ịpe rịkpe ghan bọ inyinha ịgbaanyan ghan inyinha.”

15 Mem mọ ọpo phọ awe phọ ukori ghan dị ạ Krạịst phọ katu, kụ oomo ạbidi ọotughian ghan sịphe ilhoghi ạbidi ịlo ạ Jọn mọ, “Ọdi kụ ạ Krạịst phọ ḍụghum?” 16 Kụ ạ Jọn ạḅenhi bịdi mọ: “Ẹlo ạmhi, mị riḍiinye ghan inyinha mụum, kụolo ọpo upu bọ ịmhi ratu ni, kụ iḍigh arokoro ọdi bịn mị ụ́man ọkarion. Ọdi kiḍiinyeom inyinha uwaloor iigbia phọ r’ạnian. 17 Ọdi ạpam ni ọsalham mọ ọdi, kụ kạḅaalhamhi ni esi phọ ọdi rạtol ghan bọ kạsal rạraar phọ, kụ ọdi aakpomhoghi wit phọ ạlogh ẹpe otu phọ roseere ghan bọ rạraar phọ, kụolo roopho phọ ọdi kaguom nịan dị kótue oḍime.”

18 Kụ ạ Jọn ạghaaph kẹn ni ịbadi ịnhon ạraraar aromhaam we phọ ạḅilhe agbeelhom ghan iiḅi ịinhaghan phọ ạḅenhi bịdi. 19 Kụ ọdi ạḅaam ni Hẹrọd ọtooghia ekool phọ ịdi egbolhomaam Hẹrodiạs ạnhir umor phọ ọdi r’oomo ạsipioghom mọ ạ Hẹrọd. Kụ loor ịduon phọ 20 ạ Hẹrọd ạbughe ni sịpioghom mọ ọdi esi ọlhogh ạ Jọn ikoli.

21 Roḍiinye oomo awe phọ mụum rọmhan, kụ oḍiinye aani Jizọs. Ọdi odi ni rạaḅereghi, kụ ạsike phọ eghunyonhu, 22 kụ uwaloor iigbia phọ amite eye ịdipho okuru ghọzo asoorom nyọdi, kụ ẹḍogh ẹḅa ẹpe k’ạke phọ mọ: “Nạ Ọony ạmhi dị mị ạphomhoghian; eḍighinhom ịyaar phọ ạna ịḅeraan ni ịmhi iboom.”