Ọdaphan Luk
8 Ịphen phọ reten, íbia bịn a Jizọs ạḅua egbogh ẹmha ạgba egbogh ẹmha ạḅilhe ạḅua ẹbam ẹmha ạgba ẹbam ẹmha, agbeelhom ghan iiḅi ịinhaghan ịlo Ọmhar phọ Ẹnhaan, kụ a Ḍioph r’ Ịyal phọ ụrol li r’ọdi. 2 Kụ abuniin ạnmariir dị ọdi aphorogh ịkaraph aruwaloor dị ẹrol loor phọ r’ạbudi ọdi aakonhom ụrol aani ni r’ọdi. Bụen phọ pọ a Meri phọ ọmhagh ghan bọ mọ ạ Mạgdạlin, ọpo ophorogh bọ oḍual ịkaraph aruwaloor omiteom loor phọ; 3 ra Joạnạ ạnhir phọ a Kuza, oye phọ rapogh ghan bọ otu phọ ạ Hẹrọd; ra Suzạnạ; r’ạbunhon ịbadi ạnmariir dị ọsighe ghan rạraar dị bịdi ọmhoogh ọlhoghonhaan ḍịghaagh Jizọs r’abutelhedom mọ ọdi.
4 Mem dị aḍiboom aḍita awe r’ạbuphe ọḅua bọ rạmha kịrokiro ọghi ọteeny nyọdi ookpomhoghan, ọdi ạtughemhiom ni bịdi ọghaaph ọmaanhiom, mọ: 5 “Oḅephom ozo ạghi ni ọzuph ikpo ịizupha ọdi, ịduon ọdi rạzuph bọ, iniin imhelheghu ọgbal eten kụ awe ọozeghi, kụ ịnhun eru eekpophi. 6 Iniin imhelheghu ạnyu aḍighiigh, kụ rẹraarogh bịn ẹnhuughi loor esi dị ạmuum ọ́rol esi phọ. 7 Ịnhon imhelheghu esi iitoor, kụ iitoor phọ eḍum bọ r’ạbidi ẹze. 8 Kụolo ịnhon imhelheghu ḍịma ade, kụ rẹraarogh kụ emhuum epu ọnhu ịpe ọzuph bọ 100 amem.” Ọdi rọghaaph ịphen phọ rọmhan kụ ạḅem r’ẹḍogh dị ẹghi ạnyu mọ: “Ọlo ạmhoogh reḅeri ạnhaghan.”
9 Kụolo ạbumatuan phọ ọdi upuru ni nyọdi ẹmhu ọghaaph ọmaanhiom mọ ọphon phọ. 10 Kụ ọdi ạḅem mọ: “Nyinha kụ ẹdi mọngo eepoogh ọnhaghanhan ạraraar ịbooghian Ọmhar phọ Ẹnhaan, kụolo ịdi egbolhomaam bụeripho, oomo ạraraar phọ bịdi ọnhaghan bọ eḍighi rạghaaph ọmaanhiom bịn. Pọ kụ ịyaar phọ ghạlhamo bịdi uphogh ni, kọ́miin ịyaar, kụ ghạlhamo bịdi ụnhaghan ni, kọ́naghanhan ẹmhu ịyaar phọ. 11 Ẹphen kụ ẹmhu ọghaaph ọmaanhiom mọ: Ekpo ẹezupha phọ pọ ekpo ọnhu phọ Ẹnhaan. 12 Ịpe emhelheghu bọ ọgbal eten phọ pọ ạbudi mọnhaghan ekpo ọnhu phọ kụ Eru phọ aru ạsighe ekpo ọnhu phọ sịphe arokpom mọ ạbidi, ọbo bịdi komeeraam ghan bọ ọḅilhe ọmoogh pẹlieeny. 13 Ịpe emhelheghu bọ ạnyu aḍighiigh phọ, pọ ạbudi ọsighe ekpo ọnhu phọ r’ibo mem dị ọnhaghan, kụolo sịnhi úsi. Bịdi romeeraam ghan ekulha amem bịn, kụolo ọdegh ophogh rọteeny bịdi bịn omeel ọḍua. 14 Ịdi egbolhomaam ịpe emhelheghu bọ esi iitoor phọ, ạbuen phọ ạbudi mọnhaghan ekpo ọnhu phọ, kụolo oboom ọoḅaghamhian aloor, r’ikpoki, r’ẹedugha aḅirinhi phọ ẹgbaragbaramhi bịdi, kụ eghiigh ekpo ọnhu phọ ẹmhan bịn bịdi ụ́tue umuum igey iimhuumha. 15 Ịdi egbolhomaam ịpe emhelheghu bọ ḍịma ade phọ, ạbuen phọ ạbudi ọnhaghan ekpo ọnhu phọ r’egey ekpom kụ ọpham agey, ọkparam mem ịiḅaghamhi ọḅilhe omhuum iimumha.
16 “Oye ólho dị kạsu ọtozi kụ ạsighe ịyaar akpereghiom ọbobo ạlogh ọdurukpata, kpạripe ghụn kạḅam ạnyu ọmheremhiom ọtozi pịdi awe dị oḍigh otu phọ ọmiin ḍịḅaal phọ. 17 Ịyaar ílo dị ạaghi kụ kéganhanha, kụ ịyaar ílo dị omhiigha loor okpereghi dị kólegheri ḅịlhe kókpegheron dị awe kọmiin. 18 Esi ịduon phọ, ịmaar ephogh eten phọ ẹpe nyinha rẹnaghan ghan bọ, loor esi dị tọrobo oye lọ ạmhoogh kọngo ni ịnhon ọḅaram, kụolo oye lọ ụ́moogh, ghạlhamo r’ịpe ọdi ạatughian bọ mọ ọno ạmoogh bịn kọboor ri nyọdi.”
19 Kụ onhiin phọ ọdi r’abumor ọdi uru ni ọmhiin ọdi, kụolo útue usi sịphe ọdi odi bọ loor esi aḍita awe phọ. 20 Kụ oye aru ạḅenhi nyọdi mọ: “Onhiin ạna r’abumor ạna ọmeera ẹpe erugh rọwa omhiin ạna.” 21 Kụ ọdi ạphagharanhaan bịdi mọ: “Onhiin ạmhi r’abumor ạmhi pọ ạbuen phọ rọnaghan ghan bọ ekpo ọnhu phọ Ẹnhaan kọḅilhe ọdaph.”
22 Eniin aḍio ọdi r’ạbumatuan phọ ọdi uḍigh ni oghuugh, kụ ọdi ạḅenhi bịdi mọ: “Ọḅeeny ọphoripho ạga ọodu phọ.” Kụ bịdi ọzoghi onyeenhe. 23 Ịduon bịdi ọzoghi bọ rọki kụ ọdi amhiigh ọnhaanhi. Kụ ọgbagara oghim aghim sịphe ọodu phọ, kụ ạmuum amhiigh oḍiku oghuugh phọ dị tụtu ạwa oḅi. 24 Esi ịduon phọ bịdi ụghi ni ọsumeeny nyọdi, kụ ọḅenhi mọ: “Ọtughemhia, Ọtughemhia, yoor rope o!” Kụ ọdi aḅetenhu kụ amhooghaam oghim mọ r’ọgbagara oolhogh phọ, bịn oghim mọ óghim mụn, kụ oomo esi phọ ẹpho. 25 Kụ ọdi ạḅenhi bịdi mọ: “Omheeraam mọ anyinha odi ẹghen?” Kụ bịdi ụmhoogh ni oboom oghiilhaan kụ eḍighi iikia esi ạbidi, kụ oniin apuru ghan nyoniin mọ: “Ọphon phọ ọghen ọdo oye? Ọdi rạngo ghan ni ịto oghim mọ r’ạmuum mọ, kụ rẹnaghanhan ghan ni nyọdi.”
26 Kụ bịdi ọghi osul ekool awe phọ ạ Gẹrạsạ edi bọ ọphoripho ạga Ọphiiny Ạbazi phọ ạ Gạlili. 27 A Jizọs rophun ạnyu ade, bịn oye dị ọkaraph uwaloor odi loor phọ ạḅua ẹpe ẹmha phọ aru ạteeny nyọdi. Mebia ni oye phọ ọphon phọ ạkpolhoghian bọ ạsuoma, kụ olhoghi otu ọ́rol ghan, ạrol ghan esi dị roḍiighi ghan we. 28 Ọdi rọmhiin Jizọs kụ ạlo, kụ akpuḍian ghisigh ọdi, kụ ạḅem r’ẹḍogh dị ẹghi ạnyu mọ: “Jizọs, Ọony Ẹnhaan phọ Apelheghiom bọ, nạ rụwa ghan ịmhi eeghe? Seseeny, ịmhi kụ́mhiinhe.” 29 (Ịdi eḍighi bọ a Jizọs ạḅenhi ghan ọkaraph uwaloor phọ mọ amite loor oye phọ. Kụ ọkaraph uwaloor phọ maḍigh ni loor oye phọ ịbadi amem,* kụ ugbor ghan ni ọphaḍiom nyọdi izime ọḅilhe ọlhogh olhool kụ oseere ghan oye dị kapogh nyọdi, kụolo ọdi arunyi ghan ni izime phọ ạḅilhe awunhughi olhool phọ, kụ ọkaraph uwaloor phọ aḍighi ghan ịdi ọdi ạghi ghan rikpisi dị awe úlo.) 30 Kụ a Jizọs apuru nyọdi mọ: “Ḍien ạna ughol ika?” Kụ ọdi mọ: “Ọolhoogh,” loor esi dị ịbadi ịkaraph aruwaloor meḍigh loor oye phọ. 31 Kụ ịkaraph aruwaloor phọ ẹeḅereghian ghan Jizọs mọ kúporogh bụno ụlogh ooni phọ ạkel bọ iboom mọ.* 32 Mem mọ ọpo phọ aḍita arophoropo ịrol li ạnyu ẹeḅaraph ẹḅal ghan ịḅal, kụ ịkaraph aruwaloor phọ ẹeḅereghian nyọdi mọ amheera bụno ọghi oḍigh olhoghi arophoropo phọ, kụ ọdi amheera. 33 Kụ ịkaraph aruwaloor phọ emiteghu loor oye phọ ẹghi eḍigh loor arophoropo phọ, kụ aḍita arophoropo phọ eghiil ẹghi ẹpe iigbom ẹeḅaraph phọ bịn esumughu ẹpe ọodu phọ emhuughu. 34 Kụ abupoghom rophoropo phọ rọmhiin ịphen emite bọ, kụ oghiil ọghi ẹpe ẹmha phọ r’ẹpe ạsiraaghanha phọ ọḅenhi we ịphen phọ.
35 Kụ awe ọghi ọmhiin ịpe memite bọ. Kụ bịdi oru ọteeny Jizọs kụ ọmhiin oye phọ ịkaraph aruwaloor phọ mẹḅua bọ loor phọ dị mamhoon, kụ aanmenian ạrol ude ruwol a Jizọs, kụ eḍigh ḍiigu esi ạbidi. 36 Kụ bụphe ọmhiin aani bọ ọghaaph ọḅenhi bịdi ịpe ookonhom bọ oye phọ ịkaraph aruwaloor phọ ẹrol bọ loor phọ. 37 Kụ aḍiboom aḍita awe ọḅua ekool awe phọ ạ Gẹrạsạ oru ọoḅereghian Jizọs mọ ạḍua ẹpe phọ, loor esi dị bịdi ụmhoogh ni oboom oghiilhaan. Kụ ọdi ạghi aḍigh oghuugh ọḍua. 38 Kụolo oye phọ ịkaraph aruwaloor phọ ẹḅua bọ loor phọ ạaḅereghian ghan ọdaph aani ọdi, kụ a Jizọs ómheera, ạḅenhi ghụn oye phọ mọ: 39 “Keel, ạḅenhi ghan we ịpe Ẹnhaan maḍighinhaan bọ nyịnha.” Kụ ọdi ạḅua, kụ amhiigh ogbeelhom ịpe a Jizọs maḍighinhaan bọ nyọdi oomo ẹmha phọ.
40 A Jizọs aḅula bọ, aḍita awe phọ ughuraam ni nyọdi, loor esi dị oomo ạbidi ukori ghan nyọdi. 41 Kụ oye dị oghol mọ a Jeirọs, oḍiemhiom isịphe obughotu phọ aru ni akpuḍian ghisigh a Jizọs kụ amhiigh ọoḅereghian mọ aru k’ọno, 42 loor esi dị oginha ọnyanhi ọdi dị rạman 12 ạsia ramugh.
Kụ ịduon a Jizọs rạki bọ, aḍita awe phọ unyuughian ghan ni ọtiir nyọdi. 43 Kụ ạnhir dị ạmhoogh ẹzegh dị ịḅaal remite ghan loor phọ dị mẹrol li 12 ạsia, kụ oye kőrue ookonhom ạrol aani ni sịphe phọ. 44 Ọdi ạḅua ni ọmhan ạghi ạḅogh ịghelhe ạsuoma ạnyu phọ a Jizọs, kụ mem mem mọ bịn ịḅaal phọ esoph. 45 Kụ a Jizọs apuru mọ: “Ạnhian kụ ụḅogh bọ ịmhi?” Ịduon awe phọ rọparanhaan bọ, kụ a Pita ạḅem mọ: “Ọtughemhia, aḍita awe phọ ronyuughian ni kọtiir nyịnha.” 46 Kụolo a Jizọs ạḅem mọ: “Oye ụḅogh ni ịmhi, loor esi dị mị alegheri ni mọ ịikpo ẹḅua ni loor ạmhi.” 47 Ạnhir phọ rọmhiin mọ a Jizọs malhegheri ịpe ọdi aḍighi bọ, kụ aru akpuḍian ghisigh ọdi rapiigha, kụ ạghaaph sịphe ogbo awe phọ ịyaar phọ eḍighi bọ kụ ọdi ạḅogh bọ nyọdi r’ịpe ọdi amhoon bọ mem mem mọ. 48 Kụ ọdi ạḅenhi ạnhir phọ mọ: “Nyạnhi ạmhi, omheeraam mọ ạna maakonhom nyịnha. Keel r’ẹepho.”
49 Ọdi odi ni rạkaaph, bịn otelhedom oḍiemhiom ịsiphe obughotu phọ aru ạḅem mọ: “Ọnyanhi phọ ạna mamhugh; kạ́aḅaghamhi mụn Ọtughemhia phọ.” 50 A Jizọs rọnhaghan ịphen phọ kụ ạḅenhi Jeirọs mọ: “Kạ́moogh oghiilhaan, mọogh omheeraam bịn, ọnyanhi phọ ạna kaḍum ni.” 51 Kụ ọdi asi bọ sịphe otu phọ, ómheera mọ ọnhon oye ạdaph nyịnho aḍigh olhoghi emuton Pita, rạ Jọn ra Jems r’ọde r’onhiin ọnyanhi phọ. 52 Kụ oomo awe phọ umhoghi yogh ghan ni ọḅilhe ọgiphigha ghan rokpolhoghi ạbidi loor ọto ọnyanhi phọ. Esi ịduon phọ a Jizọs ạḅem mọ: “Kémoghi mụn, ọdi ómhugh, rạnaanhi ni.” 53 Bịdi rọnhaghan ịphen phọ kụ omhiigh ọmhilhogh r’ọgilaam ọdi, ịdi eḍighi bọ bịdi ulhegheri ni mọ ọnyanhi phọ mamhugh. 54 Kụ ọdi ạpham ḍịghaagh ọnyanhi phọ kụ ạḅem mọ: “Bạm ọnyanhi, ḅetenhu!” 55 Kụ ọnyanhi phọ ạḅilhe ạmhoogh ghuḍum,* kụ aḅetenhu mem mem mọ, kụ a Jizọs ạḅem mọ ọngo ịyaar dị kale. 56 Kụ olhoghi ọde phọ r’onhiin phọ ạḅaal li iboom, kụolo a Jizọs ạḅenhi bịdi mọ kụ́ḅenhi oye ịphen memite bọ.