Ọdaphan Jọn

8 12 Kụ a Jizọs ạḅilhe ạḅenhi bịdi mọ: “Mị kụ ạḍiḅaal aḅirinhi phọ. Tọrobo oye lọ ụdaph ịmhi kátelhe ni bịn esi ufiri, kạmoogh ghụn ḍịḅaal phọ rẹngo ghan bọ ghuḍum.” 13 Kụ ạbuo ạ Fạrisi phọ ọḅenhi nyọdi mọ: “Nạ kụ rạkaaph ghan ịlo aloor ạna; ịpe nạ rạkaaph ghan bọ kị́ne.” 14 Kụ a Jizọs ạphagharanhaan bịdi mọ: “Ghạlhamo mị kụ rạkaaph ni ịlo aloor ạmhi, bịn ịpe mị rạkaaph ghan bọ ịne ni, loor esi dị mị alegheri ni ekpisi phọ mị ạḅua bọ aru r’ẹpe mị rạki bọ. Kụolo nyinha ílegheri ekpisi phọ mị ạḅua bọ aru r’ẹpe mị rạki bọ. 15 Nyinha repogh ghan oye ạnyu r’ạnyu kụ esophonhaan ọoruen; kụolo mị rásophonhaan ghan oye ọoruen. 16 Kụ ghạlhamo mị usoph ni ọoruen, ọoruen phọ ạmhi aḍighi ni elhiom ọoruen, loor esi dị oginha ạmhi bịn úlo, Ọde phọ urom bọ ịmhi odi ni r’ạmhi. 17 Kụ ọge kẹn ni sịphe Olhogh phọ anyinha mọ: ‘Ạsiagba ịyal awe kụ ẹḅoph pọ rọgba ni agey.’ 18 Mị rạkaaph ghan ni ịlo aloor ạmhi, kụ Ọde phọ urom bọ ịmhi kụ omhunhenhiom ịyal oye phọ rạkaaph ghan bọ ịlo ạmhi.” 19 Kụ bịdi opuru nyọdi mọ: “Odi ẹghen Ọde phọ ạna?” Kụ a Jizọs ạphagharanhaan bịdi mọ: “Nyinha ílegheri Ọde phọ ạmhi r’ạmhi. Mọ nyinha ilhegheri ịmhi, ọbo nyinha milegheri ni Ọde phọ ạmhi.” 20 Ọdi ạghaaph rạraar phọ ịphen phọ mem dị ọdi odi rạtughemhi ẹpe rosereghi ghan bọ rookoom ikpoki phọ sịphe otu ịiḅereghi phọ. Kụolo oye ósiph nyọdi, ịdi eḍighi bọ amem mọ ọdi kẹ̋teeny.

21 Kụ ọdi ạḅilhe ạḅenhi bịdi mọ: “Mị rạḍua, kụ nyinha kịwa ni ịmhi, kụolo nyinha kemughom ni ịkaraph phọ anyinha. Ẹpe mị rạki bọ nyinha kétue etu.” 22 Kụ ạbuo a Ju phọ omhiigh ọḅem mọ: “Ịphen ọdi ạḅilhe bọ rạkaaph mọ, ‘Ẹpe mị rạki bọ nyinha kétue etu,’ tọ rạ́wa oghiigha aloor ọdi?” 23 Kụ ọdi ạghiom ghisigh ạḅenhi bịdi mọ: “Nyinha ạbuo ịsien ade phọ; Mị ọlo ẹpe k’ạke phọ. Nyinha ạbuo aḅirinhi phọ ọphon phọ; Mị kọ́lo aḅirinhi phọ ọphon phọ. 24 Pọ kụ ịyaar phọ mị ịḅenhi bọ inyinha mọ: Nyinha kemughom ni ịkaraph phọ anyinha. Eru mạar dị nyinha ímeeraam mọ mị oye phọ ọpo mị rạkaaph ghan bọ mọ mị atu, pọ nyinha kemughom ni ịkaraph phọ anyinha.” 25 Kụ bịdi opuru nyọdi mọ: “Nạ ọkar ạnhian?” Kụ a Jizọs ạphagharanhaan mọ: “Mị ụtu eeghe kụ rịḅaanhaan bọ inyinha nụun? 26 Mị ạmoogh ni ịbadi ạraraar ọghaaph ịlo anyinha r’ịbadi ạraraar ọtuan oogbo ịiruen. Kụ ọkar ọghaaph, Ọpo urom bọ ịmhi rạkaaph ghan ịpe eru bọ ịne, kụ ọkar ạraraar phọ ịpe mị ạnhaghan bọ ọnhu ọdi kụ ẹdi mị rạkaaph ghan bọ sịen aḅirinhi phọ.” 27 Bịdi útue ụnaghanhan mọ ọdi ạghaaph ghan ịlo Ọde phọ. 28 Kụ a Jizọs ạḅenhi bịdi mọ: “Mem dị nyinha rephoophe Ọony phọ oye ẹghimhom ạnyu, kụ nyinha egbi olhegheri mọ mị kụ ọdi phọ ni, ḅịlhe mọ mị ráḍighi ghan tọrobo ịyaar dị mị rạwa bịn; kụolo ịpe Ọde phọ ụtughemhi bọ ịmhi kụ ẹdi mị rạkaaph ghan. 29 Ọpo urom bọ ịmhi odi ni r’ạmhi; ọdi ịmhi ụ́wilhe, loor esi dị mị raḍighi ghan ịpe ẹḅeraan bọ nyọdi oomo amem.” 30 Kụ ịduon ọdi rạkaaph bọ rạraar phọ ịphen phọ, ịbadi ụmhoogh ni omheeraam ọghi esi ọdi.

31 Kụ a Jizọs ạḅenhi bụo a Ju phọ momheeraam bọ nyọdi mọ: “Eḍighi mạar dị nyinha ẹdaph ghan ikpo ọnhu phọ ạmhi, pọ nyinha ọkar ạbumatuan ạmhi, 32 kụ nyinha kelegheri ni igey phọ, kụ igey phọ ịtagharan inyinha.” 33 Kụ bịdi ọphagharanhaan nyọdi mọ: “Yoor ạnmuny Ebrạhạm kụ yoor kőḍighi ghan rẹbenhe oye. Uḍighi ika kụ nạ ạḅem bọ mọ, ‘Nyinha kẹmoogh ẹtagharan’?” 34 Kụ a Jizọs ạphagharanhaan bịdi mọ: “Mị ạkar rịḅenhi ghan inyinha mọ, tọrobo oye dị raḍighi ghan ịkaraph pọ ẹbenhe ịkaraph. 35 Ọḅaram ịsien, ẹbenhe phọ rạ́tol ghan k’ọde otu phọ k’agee-pọ; ọony uwo otu phọ kụ rạtol ghan sịphe otu phọ k’agee-pọ. 36 Esi ịduon phọ, Ọony phọ kụ ịtagharan inyinha, pọ nyinha kẹkar ri ẹmoogh ẹtagharan. 37 Mị alegheri ni mọ nyinha ạnmuny Ebrạhạm. Kụolo nyinha rẹwa ghan reten oghiigh ạmhi, loor esi dị nyinha ímeeraam ekpo ọnhu phọ ạmhi. 38 Mị rạkaaph ghan ịlo ạraraar phọ mị ạmhiin bọ mem mọ mị ạrol bọ rạ Ọde phọ ạmhi, kụolo nyinha reḍighi ghan rạraar phọ ịpe nyinha ẹnhaghan bọ ọnhu ọde phọ anyinha.” 39 Kụ bịdi ọphagharanhaan nyọdi mọ: “Ebrạhạm kụ ọde ayoor.” Kụ a Jizọs ạḅenhi bịdi mọ: “Nyinha eru nmụny Ebrạhạm, ọbo nyinha miḍighi ghan rạraar phọ Ebrạhạm aḍighi ghan bọ. 40 Kụolo nyinha rẹwa ghan reten oghiigh ạmhi phọ ịḅenhi bọ inyinha igey phọ ịpe mị ạnhaghan bọ ọnhu Ẹnhaan. Ebrạhạm múḍighi ịyaar dị ẹrol ịduon. 41 Nyinha reḍighi ghan rạraar phọ ọde phọ anyinha raḍighi ghan bọ.” Kụ bịdi ọḅenhi nyọdi mọ: “íigo esi ọrolhan esi dị ụ́ḅaal* kụ ụmharaghi bọ iyoor; Ẹnhaan bịn kụ Ọde dị yoor ọmhoogh.”

42 Kụ a Jizọs ạḅenhi bịdi mọ: “Mọ Ẹnhaan kụ Ọde anyinha ọbo nyinha mịphomhoghian ni ịmhi, loor esi dị mị ụḅua kạ Ẹnhaan kụ aru kụ mị odi ni sịen. Mị kụ úsopha ẹlo ạmhi bịn utu, Ọdi kụ urom ịmhi. 43 Uḍighi ika kụ nyinha ị́naghanhan bọ ịpe mị rạkaaph bọ? Loor esi dị nyinha ị́wa ọnhaghan ikpo ọnhu phọ ạmhi. 44 Eru phọ kụ ọde anyinha, kụ nyinha rẹwa ghan oḍighi ạraraar phọ ịpe ẹḅeraan bọ ọde phọ anyinha. K’emhiighom mọ ọdi aḍighi ọokom enu, kụ ọ́rol sịen igey phọ obia, loor esi dị igey phọ ílo loor ọdi. Ọdi rạgba ghan ọkpe, loor esi dị ọpo kụ ọdo oye dị ọdi aru. Ọdi ọgbaam ọkpe r’ọde ọkpe. 45 Nyinha ịmhi ímheeraam loor esi dị mị rịḅenhi ghan inyinha ịpe eru bọ ịne. 46 Ạnhian ọnyo anyinha kụ katue ạgba ịkaraph dị mị maḍighi ghan amiteom? Eru mạar dị mị rạkaaph ghan ni ịpe eru bọ ịne, uḍighi ika kụ nyinha ịmhi ímheeraam bọ? 47 Oye dị aḍighi ọony Ẹnhaan rạnaghan ghan ni ịpe Ẹnhaan rạkaaph bọ. Ẹnhaan kạ́ Ọde anyinha, pọ kụ ịyaar phọ nyinha rẹ́naghan ghan bọ ịlo ọdi ạghaaph.”

48 Kụ ạbuo a Ju phọ ọḅenhi nyọdi mọ: “Ẹphen kụ kị́yaar phọ yoor ọghaaph bọ mọ: ‘Nạ ọlo ạ Sạmeria ḅịlhe mọ ọkaraph uwaloor odi loor ạna’?” 49 Kụ a Jizọs ạphagharanhaan mọ: “Ọkaraph uwaloor ólho loor ạmhi, mị rakuenhi ghan ghụn Ọde phọ ạmhi, kụolo nyinha ịmhi ríghuenhi ghan. 50 Mị rạ́wa ghan eghuan ẹlo ạmhi; kụolo oye odi ni dị rạwa ghan eghuan phọ ẹpe phọ, kụ ọdi kụ oogboom ịiruen phọ. 51 Mị ạkar rịḅenhi ghan inyinha mọ, tọrobo oye lọ ạdaph ikpo ọnhu phọ ạmhi kạ́miin ni bịn ḍuugh.” 52 Kụ ạbuo a Ju phọ ọḅenhi nyọdi mọ: “Yoor mọkar ọmiin mọ ọkaraph uwaloor odi ni loor ạna. Ebrạhạm r’ariil phọ umhuughu ni, kụolo nạ rạḅem ghan mọ, ‘Tọrobo oye lọ ạdaph ikpo ọnhu phọ ạmhi kạ́miin ni bịn ḍuugh.’ 53 Nạ kụ upu Ebrạhạm ọde phọ ayoor ḍụghum? Ọdi r’ariil phọ bịn umhuughu ni. Nạ phọ ạnhian?” 54 Kụ a Jizọs ạphagharanhaan mọ: “Mị aghuenhi loor ạmhi, pọ eghuan phọ ạmhi ị́moogh mạar oḍighinhom. Ọde phọ ạmhi, ọpo nyinha rẹḅem ghan bọ mọ Ẹnhaan anyinha, kụ rughuenhi ghan ịmhi. 55 Nyinha ke̋lhegheri nyọdi, kụolo mị alegheri ni nyọdi. Kụ eḍighi mạar dị mị ạḅem mọ mị úlegheri nyọdi, pọ mị maḍighi ọgbaam ọkpe ịdipho anyinha. Kụolo mị alegheri ni nyọdi kụ mị rạdaph ghan ikpo ọnhu phọ ọdi. 56 Ebrạhạm ọde phọ anyinha abo ni iboom loor ịduon ragon bọ ọmhiin aḍio phọ ạmhi, kụ ạmhiin ni kụ ạmhoogh ibo.” 57 Kụ ạbuo a Ju phọ ọḅenhi nyọdi mọ: “Nạ kọ̋mhan 50 ạsia kụ nạ rạḅem ghan mọ nạ mạmhiin ghan ni Ebrạhạm?” 58 Kụ a Jizọs ạḅenhi bịdi mọ: “Mị ạkar rịḅenhi ghan inyinha mọ, mị odi ghan ni kụ ogbi ọmhar Ebrạhạm.” 59 Kụ bịdi ọsigheogh ikpo oroḅol ọdi, kụolo a Jizọs ạaghian ni kụ ạḅua sịphe otu ịiḅereghi phọ.