Ọdaphan Jọn
3 Oniin ọnyo ạ Fạrisi ạrol li dị oghol mọ a Nikodimọs, ọdi oniin ọtooghia ạbuo a Ju phọ. 2 Ọdi aru ni ạteeny Jizọs ḍughul kụ ạḅenhi mọ: “Rạbạị, yoor olegheri ni mọ nạ ọtughemhia dị Ẹnhaan kụ arom loor esi dị oye kátue aḍighi ịiḍaany phọ ịphen nạ raḍighi ghan bọ emuton dị Ẹnhaan odi r’ọdi.” 3 Kụ a Jizọs ạḅenhi nyọdi mọ: “Mị ạkar rạḅenhi ghan nyịnha mọ, oye kátue ạmiin Ọmhar phọ Ẹnhaan emuton lọ ọḅilhe ọmhar nyọdi.”* 4 Kụ a Nikodimọs apuru nyọdi mọ: “Kọḅilhe ọmar ika oye dị mạkpo? Ọdi kátue mụn aḍigh ọkuruḅaka onhiin ọdi omhunhenhiom ịyal amem dị kọḅilhe ọmar, katue ni?” 5 Kụ a Jizọs ạphagharanhaan nyọdi mọ: “Mị ạkar rạḅenhi ghan nyịnha mọ, oye kátue aḍigh Ọmhar phọ Ẹnhaan emuton dị ọsighe mụum r’uwaloor iigbia phọ kụ ọmharam nyọdi. 6 Ọpo oye kụ ạmhar bọ pọ oye, kụ ọpo ọsighe bọ uwaloor iigbia phọ kụ ọmharam pọ uwaloor. 7 Kíḍighi iikia esi ạna ịduon mị ạḅenhi bọ nyịnha mọ: Ọmoogh ọḅilhe ọmhar anyinha. 8 Ookugh rakugh ghan ni kạghi tọrobo ekpisi lọ rạwa, kụ nạ rạnaghan ghan ni oghur phọ, kụolo nạ rálegheri ghan ekpisi phọ ạḍua bọ ratu r’ẹpe rạki bọ. Ịpe kụ ịdi edianhaan kẹn tọrobo oye lọ mọsighe uwaloor iigbia phọ kụ ọmharam.”
9 Kụ a Nikodimọs apuru nyọdi mọ: “Ịphen phọ kemite bọ ika?” 10 Kụ a Jizọs mọ: “Nạ ọtughemhia sịen Izrẹl kụ rạraar phọ ịphen phọ nạ ólhegheri? 11 Mị ạkar rạḅenhi ghan nyịnha mọ, yoor rọkaaph ghan rạraar phọ ịpe yoor olhegheri bọ, kọḅilhe ọghaaph ịpe eru bọ ịne ịlo ạraraar phọ yoor ọmhiin bọ, kụolo nyinha rémeeraam ghan rạraar phọ yoor rọkaaph ghan bọ. 12 Mị mịḅenhi bọ inyinha rạraar ịsien ade phọ kụ nyinha ímeeraam bọ, eḍighi mạar dị mị ịḅenhi inyinha ịpe k’ạke phọ nyinha kemeeraam bọ ika? 13 Ọḅaram ịsien, oye ólho dị mạghi ghan ẹpe k’ạke emuton Ọony phọ oye ạḅua bọ ẹpe k’ạke aru. 14 Kụ ịdipho a Mozis aphoophe bọ ẹkaraph ịyaar phọ ẹpe ẹdala phọ, kụ ịdi kopoophe aani Ọony phọ oye, 15 pịdi tọrobo oye dị amheeraam nyọdi ạmoogh ghuḍum k’agee-pọ.
16 Ẹnhaan ạphomhoghian ni aḅirinhi phọ iboom dị tụtu ạngo oginha Ọony phọ ọdi,* pịdi tọrobo oye lọ ạmhoogh omheeraam ạghi esi ọdi kápe kụolo kạmoogh ghuḍum k’agee-pọ. 17 Ẹnhaan órom Ọony phọ ọdi mọ aru aagbo ịiruen ạngo aḅirinhi phọ, arom ghụn mọ aru pịdi eego esi ọdi aḅirinhi phọ ọmoogh pẹlieeny. 18 Kósoph ọoruen ọngo oye dị ạmhoogh omheeraam ạghi esi ọdi. Kụolo oye lọ ụ́moogh omheeraam ụki esi ọdi pọ mosoph ni ọoruen ọngo, loor esi dị ọdi kọ̋mhoogh omheeraam ọghi esi aḍien oginha Ọony phọ Ẹnhaan.* 19 Ẹphen kụ ịyaar phọ kọtuan bọ oogbo ịiruen phọ: ạḍiḅaal phọ meḍigh aḅirinhi phọ, kụolo awe ọpomoghian ufiri kpạripe r’ạḍiḅaal, loor esi dị bịdi roḍighi yogh ghan ịkaraph ạraraar. 20 Ịdi eḍighi bọ oye dị raḍighi yogh ghan ịkaraph ạlogh ḍien ḍịḅaal, kụ ráḍigh ghan esi dị ạḍiḅaal edi ọbo kẹyegheron ghan bọ rạraar phọ ọdi raḍighi bọ. 21 Kụolo ọpo raḍighi ghan bọ ịpe ẹnhighe bọ raḍigh ghan ni esi dị ạḍiḅaal edi, pịdi eganhanha mọ ạraraar phọ ọdi raḍighi ghan bọ ẹdaphan ni ịpe Ẹnhaan rạwa bọ.”
22 Ịphen phọ reten kụ a Jizọs r’ạbumatuan phọ ọdi ọghi ẹpe ạraaghanha phọ a Judia, kụ ọdi ạrol ẹpe phọ r’ạbidi aḍiinye ghan we mụum. 23 Kụ ạ Jọn aḍiinye aani ghan we mụum ẹpe Inọn, ekpisi dị etuman Selim, loor esi dị amuboom ạmuum ạrol li esi phọ, kụ awe uru ghan bịn kụ ọdi aḍiinye ghan mụum; 24 mem mọ ọpo phọ kọ̋lhogh Jọn ikoli.
25 Ạbumatuan phọ ạ Jọn ụugbaghanhaan ghan ni r’ọnyo a Ju ịlo ọghaaph ọḅaal aloor, dị ẹdaphan eḍighinhom ịyaar ạbuo a Ju phọ. 26 Ịphen phọ reten kụ ạbumatuan phọ oru ọteeny Jọn kụ ọḅenhi mọ: “Rạbạị, mịin, oye phọ ạrol bọ r’ạna ẹpe ẹḅeenyom Ọphiiny ạ Jọdạn, ọpo nạ ụḅenhi bọ iyoor ịlo ọdi, raḍiinye we mụum, kụ oomo awe rọki ghan ọteeny ọdi.” 27 Kụ ạ Jọn ạḅenhi bịdi mọ: “Oye kátue ạmoogh r’eniin ịyaar emuton dị Ẹnhaan kụ ạngo nyọdi. 28 Nyinha r’aloor ịnhaghan ni dị mị ạḅem mọ, ‘Mị kụ kạ́ Krạịst phọ, kụolo urom ịmhi oḍia aghisigh ọdi.’ 29 Ọpo rapin bọ ạnhir phọ kụ ạmhoogh ạnhir phọ. Kụolo mem dị ọyaghiri ọpo rapin bọ ạnhir phọ ạmheera kụ ạnhaghan ẹḍogh ọpo rapin bọ ạnhir phọ, rạmoogh ghan ni iboom ibo. Iginha phọ kẹn kụ ịdi ibo phọ ạmhi memhunhughan. 30 Awe phọ rọdaph bọ nyọdi kọbugh ghan bịn, kụolo bụen rụdaph bọ ịmhi kokom ghan bịn.”
31 Ọpo ạḅua bọ ẹpe k’ạke phọ kụ aru kụ apu oomo ạbueripho. Ọpo ạḅua bọ sịen ade phọ kụ aru pọ ọlo ịsien ade phọ, kụ rạkaaph ghan ịlo ạraraar ịsien ade phọ. Ọpo ạḅua bọ ẹpe k’ạke phọ kụ aru kụ apu oomo ạbueripho. 32 Ọdi rạkaaph ghan ịpe eru bọ ịne ịlo ạraraar phọ ọdi mạmhiin bọ ạḅilhe ạnhaghan, kụolo oye rámeeraam ghan ịpe ọdi rạkaaph bọ. 33 Kụ oye dị amheeraam ịpe ọdi rạkaaph bọ pọ mamheeraam* mọ ịpe Ẹnhaan rạkaaph bọ ịne ni. 34 Ọpo Ẹnhaan arom bọ rạkaaph ghan rạraar phọ Ẹnhaan mạghaaph bọ, ịdi eḍighi bọ Ẹnhaan rábeephom ghan ịkaraph uwaloor iigbia phọ ọdi.* 35 Ọde phọ ạpomoghian Ọony phọ kụ mạḅogh oomo ạraraar ạlogh ḍịghaagh ọdi. 36 Ọpo ạmhoogh bọ omheeraam ạghi esi Ọony phọ kạmoogh ghuḍum k’agee-pọ; kụ ọpo ạḅaar bọ ẹmhu ạghi esi Ọony phọ kạ́miin ghuḍum, kụ ạghelhe phọ Ẹnhaan kạ́ḍua esi ọdi.