EMHUOGHAẠPH ITUUGHẠ PHỌ 5
Yoor kodạph Nyinhạ
“Yoor kodạph nyinhạ, loor esi dị yoor onaghạn m’Enhaạn edi r’anyinha awe phọ.”—ZECH. 8:23.
AḌUỌR PHỌ 26 You Did It for Me
OGHAẠPH OOKARAGHa
Eḍighi eghuan dị aḍieriphọ iyool phọ (“ḍioph awe phọ”) koḍighan buẹn mosagharạn bọ (“onyọ aJu phọ”) ooḅereghị aZihova (Miịn siikpịgh phọ 1-2)
1. AZihova aḅẹm mọ eeghe kụ kemite siẹn amem mọ ayira?
AZIHOVA aghaạph ilọ amem mọ ayira mọ: “Ḍioph awe esi oomo arunhụ aḍiaḅạ isiẹn areelhe phọ kokpạph ni, ii, bidị kokpạph ni okparamhị asuomạ onyọ aJu, kụ oḅẹm ghan mọ: ‘Yoor kodạph nyinhạ, loor esi dị yoor onaghạn m’Enhaạn edi r’anyinha awe phọ.’ ” (Zech. 8:23) Onyọ “aJu” phọ amerenyạn buphẹ Enhaạn masagharạn bọ uwaloor iigbia phọ. Okol kẹn bidị mọ “Izrạl phọ [Enhaạn].” (Gal. 6:16) “Ḍioph awe” phọ omerenyạn buphẹ omhoọgh bọ oḍuomolhoghi orọl isiẹn ade phọ k’agee-pọ. Bidị olegheri mọ aZihova kụ asaḅạr egu abuẹn osagharạn bọ uwaloor phọ, ḅilhẹ ologhoma mọ eḍighi eghuan oḍighan abidị ooḅereghị aZihova.
2. Ika kụ idị “dioph awe” phọ “kodạph” bọ buẹn osagharạn bọ uwaloor phọ?
2 Buẹn omhoọgh bọ oḍuomolhoghi orọl isiẹn ade phọ, kotue ni ‘odạph’ buphẹ osagharạn bọ uwaloor phọ, etigheri iduọn i/dugh bọ olhegheri asiḍien oomo phọ abidị odi bọ siẹn ade phọ ḍio arodonb. Ika? ABaibul phọ aḅẹm mọ “Ḍioph awe” phọ “kokpạph ni okparamhị asuomạ onyọ aJu kụ oḅẹm ghan mọ: ‘Yoor kodạph nyinhạ, loor esi dị yoor onaghạn m’Enhaạn edi r’anyinha awe phọ.’ ” Ii, aBaibul phọ akol siẹn phọ oniin onyọ aJu. Kuolọ ikpo onhụ phọ “nyinhạ” ḅilhẹ “r’anyinha awe phọ” eḍeenhaan mọ ko/niin oye bịn. Iphẹn phọ eḍeenhaan mọ onyọ aJu phọ o/ḍighi oniin oye bịn, kuolọ oomo egu abuẹn osagharạn bọ uwaloor phọ. Buẹn u/sagharạn aani bọ uwaloor phọ, oḍighan ni buphẹ osagharạn bọ rokumu aZihova. Toroboiperolbọ, u/sighẹ bidị idiphọ abuḍiemhiom abidị, loor esi dị bidị olegheri mọ aKraist bịn kụ oḍiemhiom.—Mat. 23:10.
3. Ighẹn asipuru kụ edị kopanyanhaạn siẹn emhuoghaạph phọ ephẹn phọ?
3 Eḍighi bọ edị aKristẹn phọ abuphẹ osagharạn bọ uwaloor phọ, osugha bọ ni siẹn igbo phọ ayira ḍio arodon, eeni ibadị kookia ni mọ: (1) Ika kụ idị buphẹ osagharạn bọ uwaloor phọ kologhoma ghan? (2) Ika kụ idị yira kozoọm ghan buphẹ role ghan bọ abrẹd r’amiim aMemorial phọ? (3) Yira kologhoma ika eḍighi maạr dị onhụ abạl abuphẹ role ghan bọ rapogh obụgh obụgh? Emhuoghaạph phọ ephẹn phọ kepanyanhaạn ni sipuru phọ ipẹ phọ.
IKA KỤ IDỊ BUPHẸ OSAGHARẠN BỌ UWALOOR PHỌ KOLOGHOMA GHAN?
4. Odaphạn 1 Korịnt 11:27-29, ighẹn iphụr arurụ kụ edị buẹn osagharạn bọ uwaloor phọ kokiririom opogh, kụ eeghe kụ iḍighi?
4 Buphẹ osagharạn bọ uwaloor phọ okiririom ni ophogh iphụr arurụ phọ ogẹ bọ siphẹ 1 Korịnt 11:27-29. (Bạl.) Ika kụ idị oye kale abrẹd r’amiim aMemorial phọ eten “omuton eephoogh”? Amem dị oye phọ alhe abrẹd phọ r’amiim mọ kuolọ ra/daphạn mun siigbu elhiom eḍighinhom iyaạr phọ aZihova. (Hib. 6:4-6; 10:26-29) Abuẹn osagharạn bọ uwaloor phọ olhọgh elhegh mọ bidị omoọgh orọl adọl dị ekpẹ oḍuomolhoghi omhiịn mọ bidị omoọgh ni “ruunmo phọ [Enhaạn]” ilọ ogheeI k’akẹ dị eego esi aZizọs Kraist.—Fil. 3:13-16.
5. Ika kụ idị buphẹ osagharạn bọ uwaloor phọ kologhoma ghan?
5 Uwaloor iigbia phọ aZihova raḍighi ghan idị arebenhẹ phọ odị kosooromhi loor, kparipẹ r’ophoophe aloor. (Efẹ. 4:1-3; Kọl. 3:10, 12) Kụ iḍighi kụ buẹn osagharạn bọ uwaloor phọ ku/loghoma ghan mudị bunọ k’unhighẹ opu bueriphọ. Bidị olhegheri mọ aZihova o/ngọ bidị uwaloor iigbia dị apu olọ abueriphọ iyool phọ. Bidị ro/loghoma ghan mọ bunọ kụ unhaghanhạn Baibul phọ opu bunhọn. Ḅilhẹ bidị ro/ḅenhị ghan oye mọ mosagharạn aani nyinhạ uwaloor iigbia phọ, kụ iḍighi kụ mọ amhiigh olhe aani abrẹd r’amiim aMemorial phọ. Bidị osooromhi ni loor olọgh elhegh mọ aZihova kụ rasaḅạr ghan buẹn kokeel bọ k’akẹ.
6. Odaphạn 1 Korịnt 4:7, 8, ika kụ idị i/wạ mọ aKristẹn phọ abuẹn osagharạn bọ uwaloor phọ oḅo?
6 Ii, buẹn osagharạn bọ uwaloor iigbia phọ ologhoma mọ eḍighi ni eghuan omhạgh aani abidị ogheelhom k’akẹ, kuolọ bidị ro/gon ghan mọ abunhọn ozoọm bidị eten dị egbatanhaạn. (Fil. 2:2, 3) Bidị olegheri mọ mem mọ aZihova asaḅạr bọ bidị, i/ḍighi edị oomo awe kụ olhegheri. Kụ iḍighi kụ, re/ḍighi ghan iikia esi oye dị osagharạn uwaloor iigbia phọ, eḍighi maạr dị awe u/meeraam mọ mosagharạn nyodị. Odị alegheri kẹn mọ aBaibul phọ aḅẹm ni mọ yira kuu/gboronhom ghan omheeraam oye dị aḅẹm mọ Enhaạn m’engọ nyinhọ eepoogh dị egbatanhaạn. (Ogan. 2:2) Onyọ aKristẹn dị mosagharạn ka/wạ oḍighi idị awe kolegheri odọ oye dị odị aru, ḅilhẹ ka/ḅenhị torobọ oye dị odị amhiịn mọ mosagharạn aani nyinhọ. Ḅilhẹ odị kaa/bagaam.—Bạl 1 Korịnt 4:7, 8.
7. Eeghe araraạr kụ edị buẹn osagharạn bọ uwaloor iigba phọ ro/ḍighi ghan, kụ eeghe kụ iḍighi?
7 AKristẹn phọ abuẹn osagharạn bọ uwaloor phọ roo/tughiạn ghan orọl r’ogina abudị osagharạn aani, dị eghịgh mudị bidị omoọgh ekụ elọ abidị. Bidị ro/kị ghan owạ abuẹn osagharạn aani bọ uwaloor phọ, ilọ omhoọgh araghaạph dị egbolhomaam osagharạn phọ abidị obobọ omhoọgh ekụ ituughạ aBaibul elọ abidị. (Gal. 1:15-17) Amuuḅọph ka/tọl eḍighi maạr dị buẹn osagharạn bọ uwaloor phọ oḍighi raraạr phọ iphẹn phọ. Kebe ghụn elhebiri ekị esi uwaloor iigbia phọ rangọ ghan bọ we phọ Enhaạn eephọ r’amuuḅọph.—Rom. 16:17, 18.
EKPẸ OZOỌM GHAN IKA BUPHẸ OSAGHARẠN BỌ UWALOOR IIGBIA PHỌ?
Yira ku/zoọm ghan buphẹ osagharạn bọ uwaloor iigbia phọ obobọ bunhọn abudị ophạm roopoogh arukumuan mudị aruw-emhụ (Miịn ekpịgh phọ 8)f
8. Eeghe kụ iḍighi kụ ewạ bọ ni ogona aloor ilọ eten phọ epẹ yira kozoọm ghan bọ buphẹ role ghan bọ abrẹd phọ r’amiim aMemorial phọ? (Miịn igẹ dị edi ude.)
8 Ekpẹ dị yira kozoọm ghan ika bumor r’abumarani phọ abuphẹ osagharạn bọ uwaloor iigbia phọ? Ke/nighẹ dị yira kooraraghiạn ghan onyọ umor iboom, ghalhamọ r’onyọ abuẹn osagharạn bọ ni uwaloor iigbia phọ. (Mat. 23:8-12) ABaibul phọ uroma iyira mọ “[otuughaạny] omeeraam” ikumor awe phọ, kuolọ iyira u/ḅenhị osighẹ oye idiphọ uw-emhụ ayira. (Hib. 13:7) Ii, aBaibul phọ aḅẹm ni mọ abuniin okpeanhaạn ni “oIe ghan iyạI abaạy ikpoki,” iduọn phọ pọ ongọ ghan eghuan dị emhanhạm. Kuolọ aloor esi dị bidị “omaạr ropogh” ookpomhoghan phọ ḅilhẹ okpạr ḍighaạgh “oghaạph ghan r’otughemị ghan,” ka/loor idị bidị oḍighi budị mosagharạn. (1 Tim. 5:17) Eḍighi maạr dị yira ooraraghiạn ghan ḅilhẹ ooseeny iboom buẹn osagharạn bọ uwaloor phọ, etue ni eefolhomhi bidị.c Dị ekạr eeph, keḍighi idị bidị kopoophe loor. (Rom. 12:3) Onyọ ayira o/lho dị kawạ oḍighi idị oniin umor phọ aKraist osagharạn bọ uwaloor phọ kaḍighi igbogh ikarạph!—Luk 17:2.
9. Ika kụ idị iyira koḍeenhaan mọ yira olọgh ni eegu Kristẹn phọ abuphẹ osagharạn bọ uwaloor iigbia phọ?
9 Ika kụ idị yira kotue oḍeenhaan mọ yira olọgh ni eegu buphẹ aZihova masagharạn bọ uwaloor iigbia phọ? Yira ku/puru ghan ipẹ osagharạn bọ bidị uwaloor phọ. Ipẹ phọ iyira i/gbolhomaam, esi iduọn phọ yira u/moọgh elhiom olhegheri ipẹ phọ. (1 Tẹs. 4:11; 2 Tẹs. 3:11) Kuu/tughiạn mọ mosagharạn aani uwaloor phọ bunhọn abuọ eghunotu abidị, idiphọ olom, anhịr, burudẹ r’aburunhiin abidị. Oye ra/le ghan erua oḍuomolhoghi ogheel k’akẹ phọ. Enhaạn kụ rangọ ghan. (1 Tẹs. 2:12) Yira kuu/puru yogh ghan kẹn sipuru dị ketue ni epin olhoghi abunhọn awe. Esi omaạm, yira ku/puru ghan anhịr onyọ umor dị osagharạn uwaloor phọ ipẹ odị kaloghoma bọ orọl isiẹn ade phọ k’agee-pọ dị olom odị u/lo aani. Loor esi dị yira olegheri ni mọ siphẹ omhoom aḅirinhi phọ, aZihova “kagbaanyamhị ni eephuạ atorobọ iyaạr lọ repooghu.”—Ps. 145:16.
10. Ika kụ idị yira kotue okoph siloor ayira eḍighi maạr dị yira owilhẹ ‘oophughemi ghan abunọn’?
10 Yira rokoph aani ghan sighuḍum ayira, eḍighi maạr dị yira u/zoọm ghan buphẹ osagharạn bọ uwaloor phọ idiphọ awe dị omhạn maạr opelheghiom. Ika? Loor esi dị aBaibul phọ uḅenhị iyira mọ abuniin abidị otue ni omeel oḍuạ. (Mat. 25:10-12; 2 Pit. 2:20, 21) Eḍighi maạr dị yira “roophughemi ghan bunọn,” ghalhamọ r’abuẹn osagharạn bọ ni uwaloor phọ obobọ onyọ umor dị aaleghaan obobọ buphẹ mokumu bọ aZihova k’amem dị mebia, etue ni inyu iyira osighẹ abidị idiphọ emhụgh. (Jud 16.) Bịn eḍighi maạr dị bidị oḍighi igbogh ikarạph obobọ owilhẹ ookpomhoghan phọ, omheeraam mọ ayira esi aZihova atue ni aaphoọm obobọ yira otue ni obilhẹ okumu aZihova.
EWẠ NI MOOḄAGHAMHIẠN LOOR ILỌ ONHỤ ABẠL ABUPHẸ ROLE GHAN BỌ ḌUGHỤM?
11. Eeghe kụ memite idị egbolhomaam onhụ abạl abuphẹ role ghan bọ abrẹd r’amiim aMemorial phọ?
11 Ibadị asiạ epẹ omhạn, onhụ abạl abuphẹ olhe ghan bọ abrẹd r’amiim aMemorial phọ asoorom ghan bịn. Kuolọ siạ dị ke/bia, onhụ abạl phọ rabụgh ghan bịn torobọ asiạ. Ewạ ni dị yira kooḅaghamhiạn loor ilọ iphẹn phọ ḍughụm? Eeye. Omhiịn raraạr phọ eḍighi bọ kụ i/wạ bọ ooḅaghamhiạn aloor.
12. Eeghe kụ iḍighi kụ i/wạ bọ m’ooḅaghamhiạn loọr ilọ onhụ abạl abuẹn role ghan bọ abrẹd r’amiim aMemorial phọ?
12 AZihova “alegheri ni buphẹ oru bọ we phọ odị.” (2 Tim. 2:19) Abumor phọ rogbi ghan bọ we phọ role ghan bọ abrẹd r’amiim aMemorial phọ, u/legheri okạr abuphẹ osagharạn bọ uwaloor phọ, aZihova bịn kụ alhegheri. Kụ iḍighi kụ, onhụ abạl phọ aḅaramaạm ni buphẹ opu bọ oḅẹm mọ osagharạn aani ni bunọ. Esi omaạm, abuniin dị olhe ghan mowilhẹ olhe phọ. Eeni e/moon obobọ iboom iitughiạn kụ rekọm ghan idị buniin rootughiạn ghan mọ bunọ kotooghị aani r’aKraist epẹ k’akẹ. Eegholhaan ni mọ yira u/legheri okạr onhụ abuẹn osagharạn bọ uwaloor phọ osugha bọ siẹn ade phọ.
13. ABaibul phọ akol li onhụ abạl abuphẹ osagharạn bọ uwaloor phọ kosugha bọ siẹn ade phọ, mem mọ igbogh iiḅaghamhị phọ kemiigh bọ ḍughụm?
13 Abuphẹ osagharạn bọ uwaloor phọ kotọl li siẹn inya asiagaạny aḅirinhi phọ mem mọ aZizọs katu bọ osighẹ abidị ogheelhom k’akẹ. (Mat. 24:31) ABaibul phọ aḅẹm ni mọ siḍio eekunha phọ, onhụ abạl abuphẹ osagharạn bọ uwaloor phọ kosugha bọ siẹn ade phọ kokom ni. (Ogan. 12:17) Kuolọ o/ghol onhụ abạl abuphẹ kosugha bọ mem mọ igbogh iiḅaghamhị phọ kemiigh bọ.
Yira kozọ ika eḍighi maạr dị oye amhiigh olhẹ abrẹd r’amiim aMemorial phọ? (Miịn ekpịgh phọ 14)
14. Odaphạn Rom 9:11, 16, yira otuughạ eeghe ilọ eten phọ epẹ rosaḅạr ghan bọ buẹn osagharạn bọ uwaloor iigbia phọ?
14 AZihova kụ rasopha ghan mem lọ ekpẹ osaḅạr olọ osagharạn uwaloor iigbia phọ. (Rom. 8:28-30) AZihova amhiigh osaḅạr abuphẹ osagharạn bọ uwaloor phọ mem mọ odị aḅeton bọ Zizọs siphẹ aḍuugh phọ. Ekịgh mudị usagharạn ni uwaloor phọ oomo abugey aKristẹn oḅẹl okuron asiạ phọ. Rukuron asiạ phọ edaphạn bọ siphẹ, ogbogh opol abuphẹ oghophora bọ mọ bunọ aKristẹn u/kạr umeeraam Kraist. Ghalhamọ r’iduọn phọ ni, siạ phọ ipẹ phọ aZihova asagharạn ni uwaloor iigbia phọ ephurukpu abuphẹ oḍighi bọ bugey aKristẹn phọ. Bidị urọl idiphọ igey ibiakpạ phọ aZizọs aḅẹm bọ mọ esi igbo ibiakpạ akeledeẹny phọ. (Mat. 13:24-30) Siẹn asiḍio eekunha phọ, aZihova akiọm ni ghisigh rasaḅạr bulọ koḍighom aani 144,000 phọ.d Kụ iḍighi kụ, eḍighi maạr dị Enhaạn asopha osaḅạr abuniin siẹn okạr eekunha phọ, pọ yira ko/tue opuru Enhaạn ḍipuru. (Bạl Rom 9:11, 16.)e Ogona loor obọ yira kokịgh aani ghan bọ we oḍighi phọ aZizọs aghaạph bọ aghol siphẹ oghaạph omaaniọm m’odị. Bidị ugum ghan ilọ eten phọ epẹ uwozo phọ azoọm bọ buphẹ osughanham bọ omhạn phọ.—Mat. 20:8-15.
15. Oomo abuphẹ osagharạn bọ uwaloor iigbia phọ k’uḍighi pakirị ‘ebenhẹ phọ asụ bọ olhoghi aḅilhẹ akpẹ oḍuomolhoghi,’ oghol bọ siphẹ Matiu 24:45-47 ḍughụm? Gbạ.
15 Oomo abuphẹ omhoọgh bọ oḍuomolhoghi ogheel k’akẹ, kụ u/ḍighi aani pakirị ‘ebenhẹ phọ asụ bọ olhoghi aḅilhẹ akpẹ oḍuomolhoghi.’ (Bạl Matiu 24:45-47.) AZihova r’aZizọs osighẹ iyạl ikpo abumor kụ rotughemhiọm ibadị ḍio arodon, idiphọ erọl bọ siphẹ oḅẹl okuron asiạ phọ. Iyạl ikpo aKristẹn dị osagharạn uwaloor phọ kụ edị osighẹ ogeọm Igẹ Iigbia AGrik phọ. Ḍio arodon, iyạl ikpo aKristẹn dị osagharạn uwaloor iigbia phọ kụ uphạm oḍighi ongọ awe phọ Enhaạn “eḍien, mem lọ ekpẹ ongọ.”
16. Nạ atuughạ eeghe siẹn emhuoghaạph ph’ephẹn phọ?
16 Eeghe kụ edị yira motuughạ siẹn emhuoghaạph ph’ephẹn phọ? AZihova masopha ongọ aghuḍum k’agee-pọ ḍigbogh aḍita phọ kotọl bọ siẹn ade phọ ḅilhẹ r’iphurukpu abuphẹ kotooghị bọ r’aZizọs epẹ k’akẹ. AZihova kakpẹ ni iikpiạ oomo arebenhẹ phọ odị, onyọ “aJu” phọ ‘r’aḍioph awe’ phọ. Kụ odị rawạ mọ oomo phọ abidị odạph iniin phọ iilhogh phọ oḅilhẹ orọl dọl dị ekpẹ oḍuomolhoghi. Ewạ mọ oomo ayira osooromhi loor. Oomo ayira oḅophoghạn okumu nyodị. Ḅilhẹ oomo ayira kolọgh ni inyaạm ophamhanhạm eephọ siẹn ookpomhoghan phọ. Iduọn yira rokpụl bọ eekunha phọ, eḍighi idị oomo ayira kokiọm ghisigh okumu aZihova, ḅilhẹ odạph Zizọs idiphọ “[aḍiniin] aḍita.”—Jọn 10:16.
a Rolhool phọ, aḍio olhe eyaạl ootughianhạm aḍuugh phọ aKraist emeelhom Tuesday, April 7. Yira kosighẹ ika buphẹ role ghan bọ abrẹd phọ r’amiim aMemorial phọ? Ewạ ni m’ooḅaghamhiạn loor ilọ onhụ abạl abuphẹ role ghan bọ ḍughụm? Yira komiịn ni ophanyanhaạn asipuru phọ iphẹn phọ siẹn emhuoghaạph phọ ephẹn phọ, ekpasị bọ esi eniin edị emite siphẹ Watchtower aJanuary 2016.
b Odaphạn Psalm 87:5, 6, eeni ghisigh Enhaạn keganhanhamhi ni siḍien oomo abuphẹ kotooghị bọ r’aKraist.—Rom. 8:19.
c Miịn igbe phọ “Love ‘Does Not Behave Indecently’ ” siphẹ Watchtower, January 2016.
d Ii, obọ Iiḍighi 2:33 eḍeenhaan mọ rongọ ghan uwaloor iigbia phọ dị eego esi aZizọs, kuolọ aZihova kụ ramạ ghan torobọ onyọ abidị.
e Olhegheri idị epelhom siẹn, miịn “Questions From Readers” siphẹ Watchtower, May 1, 2007.
AḌUỌR PHỌ 34 Walking in Integrity
f ILỌ AFOTO OPOḌI: Gbiom olhoghi idị ketọl eḍighi maạr dị omeerạ enye emhụ agadạ phọ r’anhịr odị oghị ookpomhoghan eephugh bịn awe okoom osigheọgh asifoto. Keefolhomhi ni bidị!