EMHUOGHAẠPH ITUUGHẠ PHỌ 5
AḌUỌR PHỌ 108 Ephomhoghiạn Oḅạr Phọ Enhaạn
Araraạr Dị Yira Rokelhọm Loor Esi Ephomhoghiạn Phọ AZihova
“[AZizọs] Kraist aru siẹn aḅirini phọ ophẹI abuḍighinom ikarạph.”—1 TIM. 1:15.
EGBON
Raraạr dị yira rokelhọm loor esi ekiạ etagharạn phọ r’idị yira kotue oḍeenhaan mọ yira rosereghiạn ni ipẹ aZihova uḍighinhaan bọ iyira.
1. Yira koḍighi eeghe pidị olhoghi aZihova aḅaạl?
KETỌL ika esi anạ eḍighi maạr dị nạ angọ oye iyaạr dị emhạn maạr, dị keloghonhaạn nyodị ḍighaạgh kụ oye phọ asighẹ bịn alhọgh esi aseere? Dị iikia i/lo, olhoghi anạ ka/ḅaạl. Kuolọ olhoghi anạ kaḅaạl li eḍighi maạr dị oye phọ asẹph nyinhạ kụ asighẹ inmo phọ aḍighinhom! Ika kụ idị iphẹn phọ egbolhomaam aZihova r’ekiạ etagharạn phọ odị ungọ bọ iyira? AZihova angọ Oọny phọ odị mọ umhughanhaan iyira. Esi iduọn phọ, olhoghi aZihova kaḅaạl li eḍighi maạr dị yira oḍeenhaan mọ yira rosereghiạn ni inmo phọ ipẹ phọ r’ephomhoghiạn phọ odị muḍeenhaan bọ iyira!—Jọn 3:16; Rom 5:7, 8.
2. Yira kooḅeghiọn eeghe siẹn emhuoghaạph phọ ephẹn phọ?
2 Iduọn amem rekị bọ, yira kotue ni omiigh oḍighi araraạr dị keḍeenhaan mọ yira u/maghamhị mun maạr ekiạ etagharạn phọ. Eḍighi maạr dị yira oḍighi iduọn phọ, kekịgh mudị yira osighẹ inmo phọ Enhaạn ungọ bọ iyira bịn olọgh esi oseere bịn obulha. Orue oghiọm aghisigh osereghiạn ghan inmo phọ Enhaạn mungọ bọ iyira, ewạ dị yira kogbor ghan ootughiạn raraạr phọ Enhaạn r’aKraist muḍighinhaan bọ iyira. Siẹn emhuoghaạph phọ ephẹn phọ, yira kooḅeghiọn idị yira kotue oḍeenhaan mọ yira osereghiạn ni raraạr phọ aZihova muḍighinhaan bọ iyira. Ḅilhẹ r’araraạr dị yira rokelhọm loor ekiạ etagharạn phọ r’idị yira kokelhọm ghisigh. Yira kooḅeghiọn kẹn ni idị yira kotue oḍeenhaan mọ yira rosereghiạn ni ephomhoghiạn phọ aZihova muḍeenhaan bọ iyira siẹn kopạm bọ aMemorial phọ.
ASUỌ DỊ YIRA ROMOỌGH NYIIDIPHỌ
3. Eghẹn eten kụ edị yira romooghọm suọ ekiạ etagharạn phọ nyiidiphọ?
3 Nyiidiphọ yira romooghọm ni suọ ekiạ etagharạn phọ aKraist. Esi omaạm, loor esi ekiạ etagharạn phọ, aZihova rasạr ghan ikarạph ayira kuwilhenhaạn iyira. Odị rawạ ghan ni osạr ikarạph ayira owilhẹ ghalhamọ r’iduọn nyodị i/kpaariọm bọ. Okọ suọr phọ aḅẹm mọ: “Nạ aZihova anighẹ ni, kụ aḅilhẹ aakolhobian osạr ikarạph owilhenhaạn.”—Ps. 86:5; 103:3, 10-13.
4. AZihova atuạn buọ anhiạn kụ amiteom bọ ekiạ etagharạn phọ? (Luk 5:32; 1 Timoti 1:15)
4 Abuniin awe otue ni ologhoma mọ bidị u/kpeanhaạn dị aZihova kasạr ikarạph abidị abilhenhaạn. Okạr oghaạph, oomo phọ ayira u/kpeanhaạn dị aZihova kasạr ikarạph ayira abilhẹ. Otelhedom mọ Pọl aḅẹm ni mọ onọ o/kpeanhaạn dị ‘kokol mọ otelhedom.’ Ghalhamọ r’iduọn phọ, odị aḅẹm ni mọ: “Kụ esi onmạ ighirigiir phọ Enaạn kụ mị odi bọ dọl phọ aḍiẹn mị odi bọ.” (1 Kọr. 15:9, 10) Mem dị yira okiton esi ikarạph, aZihova rasạr ghan ni ikarạph phọ ayira kawilhẹ. Eeghe kụ iḍighi? Loor esi ephomhoghiạn phọ odị, ke/kpạr ayira. Esi iduọn phọ, eḍighi maạr dị nạ raloghoma ghan mọ nạ o/kpẹ dị aZihova kasạr ikarạph anạ abilhẹ, pọ ka/bulha mọ odị amiteom ekiạ etagharạn phọ loor esi awe dị roḍighi ghan ikarạph kụ rowạ ni okiton.—Bạl Luk 5:32; 1 Timoti 1:15.
5. Ekpẹ ni dị oye kaatughiạn mọ aZihova amoọgh osạr ikarạph odị owilhẹ ḍughụm? Gbạ.
5 Onyọ ayira o/lho dị kaḅẹm mọ aZihova amoọgh osạr ikarạph odị owilhenhaạn loor idị odị makumu aZihova esi ibadị asiạ. Dị iikia i/lo, aZihova ra/bulha ghan raraạr dị yira moḍighinhaan nyodị. (Hib. 6:10) Ekiạ etagharạn phọ odị ungọ bọ iyira eḍighi inmo, kii/kpiạ igey araraạr dị yira moḍighi. Esi iduọn phọ, i/ḍighi elhiom ootughiạn mọ aZihova akpẹ osạr ghan ikarạph ayira owilhẹ loor esi ibadị araraạr phọ yira moḍighinhaan bọ nyodị. Eḍighi maạr dị yira ootughiạn iduọn phọ, pọ yira roḅẹm ghan mọ yira u/wạ ekiạ etagharạn phọ.—Poghom Galetia 2:21.
6. Eeghe kụ iḍighi kụ aPọl akuọm bọ loor rukumuan phọ aZihova?
6 APọl alhegheri ni mọ araraạr phọ odị aḍighi bọ kụ i/ḍighi bọ iyaạr phọ aZihova asạr bọ ikarạph phọ odị awilhẹ. Kuolọ eeghe kụ iḍighi kụ odị alhọgh bọ iboom inyaạm okumu aZihova? Odị aḍighi iduọn phọ oḍeenhaan mọ odị rasereghiạn ni onmạ ighirigiir phọ aZihova maḍeenhaan bọ nyodị. (Efẹ. 3:7) Idiphọ aPọl, yira okiọm ni ghisigh rokumu ghan aZihova r’oophugh, loor esi dị yira osereghiạn oomo araraạr phọ odị muḍighinhaan bọ iyira.
7. Eghẹn kụ enhọn eten dị yira romooghọm suọ ekiạ etagharạn phọ? (Rom 5:1; Jems 2:23)
7 Enhọn eten dị yira romooghọm suọ ekiạ etagharạn phọ nyiidiphọ pọ omhoọgh asiya dị ekpạr r’aZihova.a Idiphọ yira otuughạ bọ emhuoghaạph phọ eten bọ, yira u/moọgh siya r’Enhaạn mem mọ umhạr bọ iyira. Kuolọ loor esi ekiạ etagharạn phọ, yira kotue ni okelhọm ‘eephọ r’Enhaạn,’ oḅilhẹ oḍuraan otuman nyodị.—Bạl Rom 5:1; Jems 2:23.
8. Eeghe kụ iḍighi kụ yira rosereghiạn bọ eepoogh iiḅereghị phọ aZihova ungọ bọ iyira?
8 Eniin iyaạr dị yira rokelhọm loor esi asiya phọ ayira r’aZihova, pọ eepoogh iiḅereghị. AZihova ranaghạn ghan ni iiḅereghị arebenhẹ phọ odị mem dị ookpomhoghan r’amem dị torobọ onyọ abidị aaḅereghị. Iiḅereghị rilhoghonhaạn ghan iyira ḍighaạgh omhoọgh eephọ olhoghi. Kuolọ iiḅereghị eḅilhẹ kẹn ni rilhoghonhaạn ghan iyira ḍighaạgh enhọn eten. Reḍighi ghan idị asiya phọ ayira r’aZihova kekpạr. (Ps. 65:2; Jems 4:8; 1 Jọn 5:14) Mem mọ aZizọs arọl bọ siẹn ade phọ, odị agbor ghan ni aaḅereghị loor esi dị odị alhegheri ni mọ aZihova ranaghạn ni iiḅereghị phọ odị ḅilhẹ iiḅereghị phọ keloghonhaạn ḍighaạgh okparamhị asiya Odẹ phọ odị r’odị. (Luk 5:16) Olhoghi ayira aḅaạl li loor iduọn ekiạ etagharạn phọ meḍighi bọ idị yira kotue oḍigh righirị r’aZihova, kụ oḅilhẹ oḅaanhaạn nyodị dị eego esi iiḅereghị!
ASUỌ DỊ YIRA KOMOỌGH GHISIGH
9. Eeghe asuọ kụ edị arebenhẹ Enhaạn komoọgh ghisigh loor esi ekiạ etagharạn phọ?
9 Eeghe asuọ kụ edị arebenhẹ aZihova komoọgh ghisigh loor esi ekiạ etagharạn phọ? AZihova kangọ bidị ghuḍum k’agee-pọ. Ibadị awe ootughiạn mọ ipẹ phọ ke/tue emite loor esi dị awe romuughu ghan. Kuolọ, aZihova alhẹm we morọl ghan k’agee-pọ. Mọ Adạm mu”piomạn bọ, obọ awe mu/mugh ghan. Ghalhamọ r’iduọn eghịgh bọ mudị ke/tue edugh dị awe kotọl k’agee-pọ, yira kotue ni okuphom owol mọ ipẹ phọ kemite ni loor esi ekiạ etagharạn phọ aZihova amiteom bọ dị eego esi oserereẹny aghuḍum Oọny phọ odị amhạn bọ maạr iboom.—Rom 8:32.
10. Abuphẹ osagharạn bọ uwaloor iigbia phọ r’aḍieriphọ iyool phọ kokelhọm eeghe ghisigh?
10 Ghalhamọ r’iduọn aghuḍum k’agee-pọ aḍighi bọ iyaạr dị yira kokelhọm ghisigh, aZihova rawạ mọ yira ootughiạn ghan ipẹ ketọl bọ. Buphẹ osagharạn bọ uwaloor iigbia phọ rootughiạn ghan ni ipẹ ketọl bọ orọl epẹ k’akẹ phọ otooghị r’aKraist. (Ogan. 20:6) Aḍieriphọ iyool phọ rootughiạn ghan kẹn ni ipẹ ketọl bọ mem dị bidị kotọl ḍimạ ade dị eephinha r’amukum olhoghi ke/tọl mun. (Ogan. 21:3, 4) Nạ aḍighom aani ni pakirị abueriphọ iyool phọ rogon bọ orọl isiẹn ade phọ k’agee-pọ ḍughụm? Iphẹn phọ re/mạ ghan mọ buphẹ rokeel bọ epẹ k’akẹ phọ kụ umhạn maạr opu buẹn kotọl bọ siẹn ade phọ! AZihova alhẹm we orọl isiẹn ade phọ k’agee-pọ. Kụ orọl isiẹn ade phọ k’agee-pọ keḍighi idị yira komoọgh oḅaạl olhoghi dị eekunha ke/tọl.
11-12. Ighẹn araraạr kụ edị yira rogon oghelhọm siphẹ Paradaịs? (Miịn kẹn sifoto phọ.)
11 Tuutughiạn idị aghuḍum anạ katọl mem dị nạ rakelhọm de dị meḍighi Paradaịs. E/moon r’aḍuugh ke/kọm mun ooḅaghamhiạn aloor engọ oye. (Isa. 25:8; 33:24) AZihova kagbaanyamhị ni oomo igey aruuphuạ phọ nạ amhoọgh bọ. Ighẹn imhoom araraạr kụ keḅeraạn nyinhạ otuughạ? Keḅeraạn nyinhạ otuughạ ilọ osạ ariiḍien dị nạ ko/sạ ghan ḍughụm? Otuughạ ilọ ophegh onẹ obobọ inhọn araraạr asuọr? Dị iikia i/lo, kowạ ni we dị omhaạr olhọgh aruutu, r’oḅeph iizo. Kowạ kẹn ni we dị kologhonhaạn ḍighaạgh osạ ariiḍien, omhaạr ophạm araraạr, r’oḅilhẹ ophogh ade phọ. (Isa. 35:1; 65:21) Aghuḍum k’agee-pọ phọ kaḍighi idị kidughanhaan iyira otuughạ araraạr phọ iphẹn phọ r’inhọn.
12 P’eeghe ibo dị ketọl oomhaghạgh awe phọ abuphẹ koḅerion bọ! (Iiḍ. 24:15) Gbiom olhoghi idị ketọl oghiọm aghisigh otuughạ ilọ aZihova dị eego esi araraạr phọ odị alhẹm bọ. (Ps. 104:24; Isa. 11:9) Kụ edị enhighẹ epelhom, pọ nạ ka/piomạn ghan mun, esi iduọn phọ, ke/moghi mun mọ lọm aZihova osạr owilhenhaạn! Nạ katuạn ni raraạr dị nạ kakelhọm moọny amem nyiidiphọ bịn atoph ḍisẹph kirokirọ phọ rekori bọ nyinhạ? (Hib. 11:25) Eeye! Araraạr phọ ipẹ yira kokelhọm bọ ghisigh enighẹ epu torobọ iyaạr dị yira kotue okelhọm nyiidiphọ. Ka/bula mọ, moọny amem aZihova kaḍighi ni de phọ Paradaịs idiphọ odị maguan bọ. Kụ yira otọl ghan siphẹ phọ k’agee-pọ. Iphẹn phọ kemite loor iduọn aZihova uphomhoghiạn bọ iyira iboom, kụ amheera bọ mọ Oọny phọ odị umhughanhaan iyira!
Ighẹn araraạr kụ edị nạ ragon oghelhọm mem dị ade phọ meḍighi Paradaịs? (Miịn siikpịgh phọ 11-12)
ḌEENHAAN MỌ NẠ ASEREGHIẠN NI EPHOMHOGHIẠN PHỌ AZIHOVA
13. Yira koḍighi eeghe oḍeenhaan mọ yira rosereghiạn ni ephomhoghiạn phọ aZihova muḍeenhaan bọ iyira? (2 Korịnt 6:1)
13 Yira koḍighi eeghe kụ oḍeenhaan mọ yira rosereghiạn ni ekiạ etagharạn phọ aZihova amiteom bọ? Esi osighẹ arukumuan phọ aZihova oḍighi eḅẹl iyaạr siẹn aghuḍum mọ ayira. (Mat. 6:33) Kụ iphẹn phọ etu ni inẹ, loor esi dị aBaibul phọ bịn aḅẹm ni mọ aZizọs amhugh ‘obọ buphẹ odi bọ ko/tolonaạn mun loor abidị, kotolonaạn nyodị phọ bịn amhugh bọ kụ oghol bọ emhụ phọ abidị oḅeton siphẹ aḍuugh phọ.’ (2 Kọr. 5:15) R’amem r’amem yira ko/peghom ephegh onmạ ighirigiir phọ Enhaạn minmạ bọ iyira.—Bạl 2 Korịnt 6:1.
14. Yira koḍeenhaan ika mọ yira oḍuom ni olhoghi aZihova?
14 Yira kotue kẹn ni oḍeenhaan mọ yira rosereghiạn ni ephomhoghiạn phọ aZihova esi oḍuom odị olhoghi kụ oḅilhẹ odạph ghan iiḅakiọm odị. Ika kụ edị yira kotue bọ oḍighi iduọn phọ? Mem dị yira rowạ osopha osopha, idiphọ askul dị yira kokị obobọ oḍighi oḍigh, ewạ ni mọ omhiigha loor ooḅeghiọn iyaạr dị keḅeraạn aZihova. (1 Kọr. 10:31; 2 Kọr. 5:7) Mem dị yira oḍeenhaan mọ yira oḍuom olhoghi aZihova, omheeraam mọ ayira ḅilhẹ r’asiya phọ ayira r’odị kekpạr ri epu idị erọl ghan. Keḍighi kẹn ni idị yira kokuamhị okuphom owol mọ yira kotọl li k’agee-pọ.—Rom 5:3-5; Jems 2:21, 22.
15. Ika kụ edị yira koḍeenhaan mem aMemorial phọ mọ yira rosereghiạn ni ephomhoghiạn phọ aZihova muḍeenhaan bọ iyira?
15 Eghẹn kụ enhọn eten dị yira kotue oḍeenhaan mọ yira rosereghiạn ni ephomhoghiạn phọ aZihova muḍeenhaan bọ iyira? Esi oḍighi oomo ipẹ yira kotue bọ siẹn aMemorial phọ oḍeenhaan aZihova mọ yira osereghiạn ni ekiạ etagharạn phọ. Mem dị yira rookolhobian ilọ aMemorial phọ, nạ katue ni aḅarạm iikolhobian omhaghạm awe dị kotu aani. (1 Tim. 2:4) Ḅenhị ni buphẹ nạ ramạgh bọ raraạr dị koḍighi siphẹ aMemorial phọ. Nạ atue ni aḍeenhaan bidị vidio phọ, AJizọs Atụ Eeghe Kụ Amhugh Bọ? obobọ Tuutughiạn Ḍuugh Phọ aJizọs edi bọ jw.org. Ikumor awe phọ olhọgh ni ikuph omhạgh awe dị moophoọm. Gbiom olhoghi ibo dị aZihova r’aruukpaạny phọ komoọgh ḅilhẹ r’ibo dị ketọl siphẹ ookpomhoghan phọ mem dị oyool aZihova dị aphe aḅula! (Luk 15:4-7) Siphẹ aMemorial phọ, omhiịn ni mọ yira omạgh aani bumor r’abumaranhi phọ r’awe lọ oru aani. Yira oḍeenhaan mọ yira opomhoghiạn ni bidị!—Rom 12:13.
16. Eeghe kụ iḍighi kụ yira kobughẹ bọ rukumuan phọ ayira epẹ erugh phọ mem aMemorial phọ?
16 Nạ katue ni abughẹ rukumuan phọ nạ rangọ bọ aZihova mem aMemorial phọ ḍughụm? Nạ aḍighi iduọn phọ, pọ nạ raḍeenhaan ghan mọ nạ asereghiạn ni oomo ipẹ Enhaạn r’aKraist muḍighinhaan bọ iyira. Iduọn yira robughẹ bọ rukumuan phọ ayira epẹ erugh phọ, iduọn kụ edị yira komiịn olhoghonhaạn aḍighaạgh phọ aZihova. Kụ ipẹ phọ kekparamhị oḍuom olhoghi phọ ayira esi odị. (1 Kọr. 3:9) Miịn kẹn mọ nạ adaphạn ni ibạl aBaibul aMemorial phọ edi bọ siphẹ aḍinyạ phọ, Ooḅeghiọn Igẹ Iigbia Phọ Torobọ Aḍio obobọ ipẹ edi bọ siphẹ Aḍinyạ Ituughạ Ogbo awiki phọ. Orue olhegheri obughẹ araraạr phọ emite bọ mem mọ amuphẹ phọ, nạ atue ni awaaghị raraạr ilọ ariisi aBaibul phọ.
17. Eeghe iyaạr kụ rengọ ghan aZihova ibo? (Miịn igbe phọ “Areten Oḍeenhaan Mọ Yira Osereghiạn Ni Ephomhoghiạn Phọ AZihova.”)
17 Eeni adọl anạ ke/meera mọ ḍighi oomo araraạr phọ omaaghị bọ siẹn phọ. Ka/bula mọ aZihova ra/sighẹ ghan iiḍighi phọ anạ katomaạm ilọ abunhọn, odị rapogh ghan ghụn ekpom mọ anạ. Olhoghi odị raḅaạl ghan mem dị nạ aḍighi oomo ipẹ nạ katue bọ oḍeenhaan mọ nạ asereghiạn ni ekiạ etagharạn phọ, eḍighi bọ inmo dị odị ungọ iyira.—1 Sam. 16:7; Mạk 12:41-44.
18. Eeghe kụ iḍighi kụ yira rosereghiạn bọ ephomhoghiạn phọ aZihova r’aZizọs uḍeenhaan bọ iyira?
18 Aloor esi ekiạ etagharạn phọ kụ edị aZihova rasạr ghan bọ ikarạph ayira kawilhẹ. Yira oḅilhẹ kẹn omoọgh eepoogh oḍighi arighirị odị r’omhoọgh aghuḍum k’agee-pọ. Eḍighi edị yira kokiọm ghisigh osereghiạn ghan ephomhoghiạn phọ aZihova, enyu bọ nyodị ookolhobian aḍisẹph kirokirọ oseenhaan ayira. (1 Jọn 4:19) Yira oḍeenhaan kẹn ni mọ yira osereghiạn ni ephomhoghiạn phọ aZizọs amhoọgh bọ aru esi ayira, epẹ enyu bọ nyodị omhughanhaan ayira!—Jọn 15:13.
AḌUỌR PHỌ 154 Unfailing Love
a AZihova asạr ri ikarạph arebenhẹ odị dị orọl mem mọ aZizọs ko/ru bọ siẹn ade phọ awilhenhaạn. AZihova aḍighi iduọn phọ loor esi dị odị akuphom owol mọ Oọny phọ odị kapạm ni omheeraam mọ odị asiemhi eekunha phọ. Esi aZihova, ighịgh mudị mokpẹ ekiạ etagharạn phọ ghalhamọ r’iduọn aZizọs ko/mhugh bọ.—Rom 3:25.