EMHUOGHAẠPH ITUUGHẠ PHỌ 14
AḌUỌR PHỌ 8 Jehovah Is Our Refuge
“Nyinha R’aloor Kụ Isaḅạr Nyopọ Nyinha Keeseeny Bọ”
“Kụ mị r’otọ amhị, kooseeny ghan aZihova.”—JOSH. 24:15.
EGBON
Oghiọm ayira olhoghi riphigh phọ yira otụ bọ osaḅạr okumu aZihova.
1. Yira koḍighi eeghe orue omhoọgh ogey oḅaạl olhoghi, kụ eeghe kụ iḍighi? (Isaiah 48:17, 18)
ODẸ k’akẹ phọ ayira uphomhoghiạn iyira agey, kụ rawạ mọ oghelhọm ghuḍum nyiidiphọ ḅilhẹ r’epẹ ghisigh. (Eccl. 3:12, 13) Odị unmoom iyira sighalhanyạ orue oḍighi iikiạ araraạr, kuolọ iyira u/lhẹm mọ otooghị ghan ongọ siloor ayira obobọ ophighinhaan siloor ayira siigbu ilọ eru igey r’ikarạph. (Eccl. 8:9; Jer. 10:23) AZihova alegheri ni mọ tutụ yira komoọgh ogey oḅaạl olhoghi, pọ yira omoọgh okumu odị r’orọl idị emhoọgh muḅọph r’asiigbu phọ odị.—Bạl Isaiah 48:17, 18.
2. Eeghe kụ edị aSetan rawạ mọ omheeraam, aZihova maḍighi eeghe ilọ iphẹn phọ?
2 ASetan rawạ mọ omheeraam mọ yira kotue ni omoọgh oḅaạl olhoghi dị aZihova u/lo, ḅilhẹ mọ omhạr awe kotue ni otooghị ongọ siloor abidị bịn iiḅaghamhị ke/tọl. (Gen. 3:4, 5) Omạ omiteom mọ ipẹ aSetan aghaạph bọ eḍighi okpẹ, aZihova angọ ogẹl mọ awe otooghị ongọ siloor abidị eẹny ekulha amem. Nyiidiphọ, yira moru omiịn mọ itooghị omhạr awe mebi we. Ḍieriphọ aḍighaạgh phọ, areḍeenhaan alhephiri r’anmariịr dị omhoọgh oḅaạl olhoghi loor iduọn bidị okumu bọ aZihova emuza ni siphẹ aBaibul phọ. Kụ oḅẹl siphẹ aḍita phọ abidị pọ aZizọs. Ophụr ooḅeghiọn riphigh phọ odị atụ bọ asaḅạr okumu aZihova. Kụ ogbi nuụn ooḅeghiọn iyaạr phọ eḍighi bọ kụ Odẹ k’akẹ phọ ayira akpeanhaạn bọ dị yira kokumu. Kụ yira okureri esi ooḅeghiọn ariphigh phọ yira otuạn bọ osaḅạr okumu aZihova.
IYAẠR PHỌ AZIZỌS ATỤ BỌ ASAḄẠR OKUMU AZIHOVA
3. ASetan aḅenhị Zizọs oḍighi eeghe, kụ aZizoṣ asopha eeghe osopha?
3 Mem mọ aZizọs arọl bọ siẹn ade phọ, iwạ ni mọ odị asaḅạr oye dị odị kakumu. AZizọs aḍiiny bọ muụm i/bia bịn aSetan aḍeenhaan nyodị oomo itooghị aḅirinhi phọ, kụ aḅẹm mọ onọ kangọ Zizọs eḍighi maạr dị akpuḍian angọ nyodị. Kụ aZizọs aphagharanhaạn nyodị mọ: “Setan, ḍuạ siẹn ghisigh amị. Ogẹ ni pạ aḍinyạ iigbia phọ mọ, ‘Nạ kakpuḍian ghan angọ eghuan [aZihova Enhaạn] phọ anạ, kụ aaseeny ghan nyodị bịn.’” (Mat. 4:8-10) Eeghe kụ iḍighi kụ aZizọs asopha bọ okumu aZihova? Ooḅeghiọn iniin ariphigh.
4-5. Eeghe kụ iniin ariphigh phọ aZizọs atụ bọ asopha okumu aZihova?
4 Ekpanhạ ephigh phọ aZizọs atụ bọ kụ asopha okumu aZihova pọ ephomhoghiạn. Ii, odị akạr kụ apomoghiạn aZihova Odẹ phọ odị. (Jọn 14:31) Oḅarạm isiẹn, aZizọs asopha okumu aZihova loor esi dị ipẹ kụ ikpeanhaạn oḍighi. (Jọn 8:28, 29; Ogan. 4:11) Odị alegheri ni mọ aZihova kụ azin aghuḍum, akpẹ oḍuom olhoghi, kụ amaạr kẹn onmo inmo. (Ps. 33:4; 36:9; Jems 1:17) AZizọs alegheri mọ oomo amem aZihova ragbạ ghan agey, kụ odị kẹn kụ angọ bọ nyodị torobọ iyaạr dị odị amhoọgh. (Jọn 1:14) Ḍieriphọ aḍighaạgh phọ, aSetan o/rọl idiphọ aZihova. Odị kụ akọm bọ ḍuugh. Odị aḍighi ogbaạm okpẹ dị amhoọgh ekpooko ḅilhẹ rawạ ghan ilọ aloor odị bịn. (Jọn 8:44) Loor iduọn odị alhegheri bọ ni odọ oye phọ aSetan aru bọ, odị oo/tughiạn r’amem odạph aSetan ogbagharạn aZihova.—Fil. 2:5-8.
5 Enhọn ephigh phọ aZizọs atuạn bọ asopha okumu aZihova, pọ olhegheri mọ imạ araraạr keḍuạ ni emite eḍighi maạr dị odị aḅạr aZihova. (Hib. 12:2) Odị alhegheri ni mọ odị aḅạr aZihova pọ keḅaalhamhị ḍien Odẹ phọ odị, kụ emiteom eepoogh ooḍighion oomo imhinhimhiịn phọ aSetan makọm bọ.
ARIPHIGH PHỌ EKPẸ BỌ OOSEENY AZIHOVA
6-7. Eeghe kụ iḍighi kụ ibadị rodon roo/ḅereghị ghan bọ aZihova, kuolọ eeghe kụ iḍighi kụ odị akpeanhaạn bọ ni ooseeny?
6 Ibadị rodon roo/ḅereghị ghan aZihova loor esi dị bidị k”olhegheri imạ araagharạ phọ odị ḅilhẹ r’imạ araraạr phọ odị maḍighinhaan bọ bidị. Bidị okighimaạm aani we phọ aPọl aghaạph bọ iiḅi iinhaghạn phọ aḅenhị epẹ Atẹns.—Iiḍ. 17:19, 20, 30, 34.
7 APọl aḅenhị we phọ Atẹns mọ egey Enhaạn phọ “kụ rangọ ghan oomo araraạr ghuḍum r’aḍiphooghu r’ilọ rowạ.” Odị aḅarạm mọ: “Esi odị kụ edị yira odi bọ kụ roteIhe.” Enhaạn kụ olemhiạ, ḅilhẹ odị “kụ aḍighi idị oniin ogbogh odẹ bịn kụ amaraghị bọ buọ oomo areeIhe aIeenye aḅirini phọ,” esi iduọn phọ, odị akạr akpeanhaạn dị yira kooseeny.—Iiḍ. 17:25, 26, 28.
8. Eeghe iyaạr kụ edị aZihova ka/tue ni bịn aḍighi, kụ odị aḍighi eeghe oḍeenhaan mọ odị uphomhoghiạn iyira?
8 Idiphọ Olemhiạ r’Uw-emhoọgh Itooghị oomo aḅirinhi phọ, aZihova mutue ni akpaariọm we ooḅereghị odị. Kuolọ aZihova ka/ḍighi idiphọ r’amem. Kparipẹ ghụn, odị ungọ iyira riphigh dị eḍeenhaan mọ odị odi ghan ni, ḅilhẹ apomhoghiạn torobọ onyọ ayira agey. Odị rawạ kẹn dị ibadị awe koḍighi righirị odị k’agee-pọ. (1 Tim. 2:3, 4) Loor ephigh phọ ephẹn phọ, aZihova mutughemhị iyira otughemhị aani abunhọn ilọ arigbiom mọ odị ḅilhẹ r’inhọn imạ araraạr dị odị kaḍighinhaan omhạr awe. (Mat. 10:11-13; 28:19, 20) Odị mungọ iyira ookpomhoghan dị yira kotọl ooḅereghị nyodị r’abupoghom dị uphomhoghiạn iyira omhaạr ophogh ayira.—Iiḍ. 20:28.
9. Ighẹn areten kụ edị aZihova aḍeenhaan ephomhoghiạn oomo awe?
9 Ephomhoghiạn phọ aZihova eḍighan bọ ni elhegh eganana ni esi ipẹ odị razoọm ghan bọ r’ephomhoghiạn ghalhamọ r’awe dị u/meeraam mọ Enhaạn edi ghan ni. Esi omaạm: K’asimuonịr asiạ epẹ omhạn, ibadị awe mosopha odaphạn asiigbu igey r’ikarạph ilọ abidị kparipẹ r’onhaghanhạn aZihova. Ghalhamọ r’iduọn phọ ni, aZihova rangọ ghan ni bidị raraạr dị bidị omhoghi orolhọm r’oghelhọm aghuḍum. (Mat. 5:44, 45; Iiḍ. 14:16, 17) Odị angọ ni bidị eepoogh omhoọgh eghunotu elọ abidị, righirị dị ophomhoghiạn bidị, r’oghelhọm iiḍighi araghaạgh abidị. (Ps. 127:3; Eccl. 2:24) Ariphigh phọ iphẹn phọ eḍeenhaan mọ aZihova apomhoghiạn ni oomo omhạr awe. (Ex. 34:6) Uguạ ooḅeghiọn nuụn iniin ariphigh phọ yira otụ bọ kụ osaḅạr okumu aZihova r’asuọ phọ radaphạn ghan bọ.
ARIPHIGH PHỌ YIRA OTỤ BỌ OSAḄẠR OKUMU AZIHOVA
10. (a) Eeghe kụ ekpanhạ iyaạr phọ yira otuạn bọ rokumu aZihova? (Mat. 22:37) (b) Ika kụ idị nạ mamhooghọm suọ osạr owilhenhaạn phọ aZihova? (Psalm 103:13, 14)
10 Idiphọ aZizọs, ekpanhạ iyaạr phọ yira otuạn bọ kụ rokumu aZihova pọ ephomhoghiạn. (Bạl Matiu 22:37.) Esi iduọn phọ, mem dị yira otuughạ ilọ imạ araagharạ phọ odị, riḍur ghan iyira ketumeri nyodị. Odị unhaghanhạn iyira aḅilhẹ r’asạr ghan kuwilhenhaạn iyira. Esi omaạm, mem mọ awe phọ Izrạl oḅaạr bọ emhụ oghị esi odị, odị kụ aḅilhẹ aaḅereghiạn ghan bidị mọ bidị: “Owilhẹ orọl adọl ikarạph, onme reten phọ r’iḍighinhom araraạr phọ abidị.” (Jer. 18:11) AZihova alegheri ni mọ yira u/munhughan, ḅilhẹ mọ ulhemọm iyira oposọ. (Bạl Psalm 103:13, 14.) Mem dị nạ agbirima ilọ osạr owilhenhaạn phọ aZihova r’imạ araagharạ phọ odị, nyinhạ re/nyu ghan okumu odị k’agee-pọ ḍughụm?
11. Ighẹn inhọn ariphigh kụ edị yira otuạn bọ osaḅạr okumu aZihova?
11 Enhọn ephigh phọ yira otụ bọ osaḅạr okumu aZihova, pọ loor esi dị eḍighi iyaạr dị ekpeanhaạn oḍighi. (Mat. 4:10) Ḅilhẹ kẹn yira olegheri mọ yira oḅạr aZihova, imạ araraạr kụ keḍuạ emite. Yira okumu aZihova oghiọm ghisigh, pọ keḅaalhamhị ḍien phọ odị, kụ emạ emiteom mọ aSetan ogbaạm okpẹ, eḅilhẹ eḍighi idị olhoghi aZihova kaḅaạl. Kụ eḍighi maạr dị yira osopha okumu aZihova rodon, yira komoọgh eepoogh okumu odị k’agee-pọ!—Jọn 17:3.
12-13. Eḍeenhaan phọ aJane r’aPam itughemhị iyira eeghe?
12 Yira kotue ni omoọgh ephomhoghiạn dị eḍiinyan okị esi aZihova ghalhamọ r’amem dị yira oḍighi iḍoọgh. Kụ ephomhoghiạn phọ epẹ phọ ketue ni etọl tutụ yira okpọ. Ooḅeghiọn eḍeenhaan iyạl anmụny onhiin dị oghol mọ aJane r’aPam.a AJane amhạn 11 asiạ kụ aPam amhạn 10 asiạ mem mọ bidị omhiigh bọ otuughạ aBaibul phọ. Ghalhamọ r’iduọn odẹ r’onhiin phọ abidị u/moọgh bọ ḍiḅeraạn otuughạ aBaibul phọ, bidị umheera ni mọ anmanyaạn phọ abidị otuughạ Baibul phọ r’Abugbaanhaạn phọ, kuolọ mọ eekunha awiki bidị kodạph ghan bidị okị siosị. AJane aḅẹm mọ, “araraạr phọ Abugbaanhaạn phọ utughemhị ghan bọ imhị ilhoghonhaạn imhị ḍighaạgh oghel ophughọl ghan igbagarạ asirooghọ r’ipesi phọ iigbo phọ amhị opesi ghan bọ.”
13 Mem dị aJane r’aPam romhanhạm, bidị uḍiiny ni muụm oḅilhẹ omhiigh okọy eten opọ oomo amem mọ ghalhamọ r’iduọn bidị ropogh bọ odẹ r’onhiin phọ abidị mokpọ bọ. Mem dị aJane aatughiạn oomo ipẹ aZihova maḍighinhaan bọ bidị, odị aḅẹm mọ: “Mị malhegheri mọ aZihova rapogh ghan ni righirị phọ odị. Kụ idiphọ 2 Timoti 2:19 eghaạph bọ, ‘[aZihova] alegheri ni buphẹ oru bọ we phọ odị.’” Iikia i/lo, aZihova rapogh ghan ni buphẹ osaḅạr bọ ophomhoghiạn r’okumu odị!
14. Ika kụ idị yira kotue oḅaalhamhị ḍien phọ aZihova? (Miịn kẹn sifoto phọ.)
14 Yira roḍighi ghan ni ipẹ yira kotue bọ oḅaalhamhị aḍien phọ aZihova. Ooḅeghiọn oghaạph omaaniọm: Oḅẹm mọ oyaghirị anạ amaạr iikiạ inmo, osạr owilhenhaạn, ḅilhẹ amoọgh igbiririph. Bịn ḍiniin aḍio nạ anhaghạn dị oye aghaạph mọ oyaghirị phọ anạ amoọgh egbagarạ ekpom ḅilhẹ mọ ra/gbạ ghan agey. Nạ kạdighi ika? Nạ ka/ḅoorian. Igina phọ kẹn, mem dị aSetan r’aḅuẹn odi bọ eeḍiạn odị rokparaghạ ophuẹ aḍien phọ aZihova, yira ro/ḅoorian ghan, yira rogbạ ghan ni komheremhị igey phọ ilọ aZihova. (Ps. 34:1; Isa. 43:10) Yira roḍeenhaan ghan mọ yira opomhoghiạn ni aZihova r’oomo ekpom esi ikpo-onhụ r’iḍighinhom araraạr.
Nạ kalọgh ni ḍighaạgh oḅaalhamhị aḍien phọ aZihova? (Miịn ekpịgh phọ 14)b
15. Eeghe asuọ kụ edị otelhedom mọ aPọl amhoọgh loor iduọn odị aaḅenhion bọ raraạr siphẹ aghuḍum mọ odị? (Filipai 3:7, 8)
15 Yira rooḅenhion ghan ni raraạr siẹn aghuḍum mọ ayira orue okuamhị okumu aZihova eten phọ epẹ eḅeraạn bọ nyodị. Esi omaạm, otelhedom mọ aPọl awilhẹ ni ḍigbogh adọl orue odạph aZizọs r’okumu aZihova. (Gal. 1:14) Loor iduọn phọ, odị amhoọgh ni ekol siphẹ aghuḍum mọ odị, aḅilhẹ amhoọgh kẹn eepoogh otooghị r’aZizọs epẹ k’akẹ. R’amem odị o/lhoghoma saị esi osopha phọ odị okumu aZihova, kụ yira kẹn ko/loghoma aani saị.—Bạl Filipai 3:7, 8.
16. Yira otuughạ eeghe esi eḍeenhaan phọ aJulia? (Miịn kẹn sifoto phọ.)
16 Eḍighi maạr dị okumu aZihova kụ aḍighi ekpanhạ iyaạr siphẹ aghuḍum mọ ayira, pọ yira komoọgh ni ruunmo nyiidiphọ r’epẹ ghisigh. Ooḅeghiọn eḍeenhaan onyọ umaranhi dị oghol mọ Julia. Kụ odị agbi bọ onhaghạn igey phọ, aJulia aḍighi ghan onyanhị dị amhoọr ghan suọr otu asiosị k’eghoroghọr. Omoọr suọr dị aalheghaan amhiịn ni mọ aJulia amoọgh inmo asuọr, kụ atughemhị nyodị pidị odị akuamhị amhaạr. I/bia bịn olhegheriom Julia idiphọ ophelhegbe asuọr, kụ amhiigh oghị ghan igbogh ariisi omhoọr asuọr. Mem dị odị aghị ogbogh askul asuọr, oniin oọny dị aru aani askul phọ amhiigh ni oghaạph ilọ Enhaạn oḅenhị odị, kụ aḅenhị mọ Enhaạn amoọgh ni ḍien kụ okol mọ aZihova. I/bia bịn aJulia amhiigh otuughạ aBaibul phọ iyạl amem wiki phọ. Ekureriom mọ, odị asopha ni okumu aZihova kparipẹ r’oḍighi ophelhegbe asuọr. Osopha phọ opọ phọ o/dugh. Odị aḅẹm mọ, “ibadị awe uḅenhị ghan imhị mọ eḍighi elolhoghi owilhẹ inmo asuọr phọ amhị osopha okumu aZihova. Kuolọ mị uwạ ghan okumu aZihova r’oomo aghuḍum amhị.” AJulia alhoghoma ika ilọ osopha phọ odị asopha bọ esi 30 asiạ epẹ omhạn? Odị aḅẹm mọ: “Olhoghi amhị apọ, kụ mị aḍuom ni olhoghi mọ aZihova kungọ ni imhị oomo araraạr phọ mị rawạ bọ epẹ ghisigh.”—Ps. 145:16.
Mem dị okumu aZihova kụ aḍighi ekpanhạ iyaạr siẹn aghuḍum mọ ayira, yira kokelhọm ni ghuḍum dị amhoọgh ekol (Miịn ekpịgh phọ 16)c
KIỌM GHISIGH AKUMU AZIHOVA
17. Olhegheri mọ yira odi siḍio aruukunha phọ ketir ika we dị momhiigh okumu aZihova r’awe dị k”omhiigh?
17 Yira odi siḍio aruukunha phọ. Otelhedom mọ aPọl agẹ mọ: “Esughanam moọny enụm, bịn opọ ratu bọ katu ni. Odị kaa/binya.” (Hib. 10:37) Iphẹn pho itir iyira ika? Awe dị k”omhiigh okumu aZihova olhọgh elhegh mọ amem mọ esugha bọ osopha okumu aZihova i/bụgh mun. (1 Kọr. 7:29) Kụ eḍighi maạr dị yira momhiigh okumu aZihova, pọ olhegheri mọ yira kosoman ni odẹgh ophogh kirokirọ, kuolọ keḍighi “moọny enụm” amem bịn.
18. AZizọs r’aZihova uroma iyira oḍighi eeghe?
18 AZizọs o/wạ mọ awe oḍighi bumatuạn odị bịn, kuolọ rawạ mọ oghiọm ghisigh odạph ghan nyodị. (Mat. 16:24) Esi iduọn phọ, eḍighi maạr dị nạ rakumu ghan ni aZihova k’asiạ phọ, pọ kiọm ni ghisigh aphamhanhạm oophiim mọ opọ phọ. Ewạ ni mọ olhọgh igey inyaạm oghiọm aghisigh okumu aZihova. Ii, re/dugh ghan, kuolọ nạ kamoọgh ni ḍisẹph r’ogbaanyạn nyiidiphọ, eḍighi maạr dị nạ aghiọm ghisigh aḍighi ghan iduọn phọ!—Ps. 35:27.
19. Ipẹ emitenhaan bọ Gene itughemhị iyira eeghe?
19 Ibadị rootughiạn ghan mọ okumu aZihova ekpạr epughạn. Idiphọ onyọ iḍoọgh, nạ raatughiạn ghan ni mọ araraạr ketenheghom nyinhạ eḍighi maạr dị nạ akumu aZihova ḍughụm? Oḍoọgh onyọ umor dị oghol mọ Gene aḅẹm mọ: “Mị ulhoghoma mọ mị ka/kelhọm ghuḍum eḍighi maạr dị mị aḍighi onyọ Ogbaanhaạn AZihova. Ighịgh mudị ibadị iigbo amhị ughelhọm ghan ibadị araraạr idiphọ oghiighị apati, olhegherian anmayaạn, ḅilhẹ r’ophegh ghan areephegh avidio dị eḍighi ilọ igamaniạn, mem dị elọ amị, mị odi ghan oghị ituughạ r’omite epẹ erugh phọ.” Iitughiạn phọ iphẹn phọ itir ika Gene? AGene aḅẹm mọ; “Mị umhiigh ni oḍighi yogh aani ikarạph araraạr phọ bidị roḍighi ghan bọ, mị ughelhọm ni ipẹ phọ oọny ekulha amem. Kuolọ imhị i/ngọ ogey oḅaạl olhoghi. Mị umhiigh ni ootughiạn ilọ igey aBaibul phọ mị magunhọm bọ, kụ mị asopha oḅilhẹ okumu aZihova r’oomo ekpom amhị. Egbi k’amem mọ opọ phọ, ekịgh mudị aZihova maphagharanhaạn ni torobọ iiḅereghị amhị.”
20. Eeghe kụ eḍighi osopha ayira?
20 Okọ suọr phọ aghaạph ilọ aZihova mọ: “Oḅaạl olhoghi odianhaan buphẹ nạ [aZihova] asaḅạr bọ, buphẹ nạ asighẹ bọ mọ oru orọl siphẹ otu eegu phọ anạ.” (Ps. 65:4) Idiphọ aJoshua, osopha aani mọ: “Mị r’otọ amhị, kooseeny ghan aZihova.”—Josh. 24:15.
AḌUỌR PHỌ 28 Oḍigh Arighirị r’aZihova
a Monme iniin asiḍien.
b ILỌ AFOTO: Oniin anhịr dị amhiịn buọ isophoghom dị roḅenhị yogh Bugbaanhaạn AZihova esi dị bidị ophạm aKonvensọn, atelhe akị esi dị Abugbaanhaạn phọ omheeraạm kạt, kụ aler rurụ angọ bidị iduọn bidị rokaạph bọ iiḅi iinhaghạn phọ koḅenhị nyodị.
c ILỌ AFOTO: Oḍighi oḍeenhaan ipẹ aJulia asopha bọ okumu aZihova kparipẹ r’oḍighi ophelhegbe asuọr dị aalheghaan.