Yira Bịn Kụ U/lo

1-2. (a) Eeghe kụ iḍighi kụ mem dị yira osoman iiḅaghamhị, yira kotue bọ ni oḅẹm mọ yira bịn kụ u/lo? (b) Yira kooḅeghiọn eeghe siẹn emhuoghaạph phọ ephẹn phọ?

MEM dị yira osoman iboom iiḅaghamhị, rekịgh ghan mudị ogina ayira kụ odi olhoghi obạm oghuugh ogbo ophiịny dị oolhogh ramite. Toroboiperolbọ, ogina ayira bịn kụ ro/tọl ghan mem dị yira osoman iiḅaghamhị. Odẹ ephomhoghiạn phọ ayira Zihova, ramiịn ni iiḅaghamhị phọ yira osoman bọ kụ aguanhaan ni olhoghonhaạn ayira ḍighaạgh. AZihova aḅạ ni ikpo onhụ okparamhị aḅenhị rebenhẹ phọ odị mọ: “Mị kilhoghonhaạn ni inyinha ḍighaạgh.”—Isa. 41:10.

² Siẹn emhuoghaạph phọ ephẹn phọ, yira kooḅeghiọn ipẹ aZihova (1) ruuḅakị ghan bọ iyira, (2) ramiteom ghan bọ kungọ iyira, (3) rughoph ghan bọ iyira, ḅilhẹ (4) ruudereghị ghan bọ iyira. AZihova ungọ ni iyira okuphom owol mọ torobọ ipaanhaạn lọ yira osoman siẹn aghuḍum mọ ayira, odị iyira ku/phogh ugunhọm. R’amem r’amem odị iyira ku/ḅitonhaạn. Esi iduọn phọ, yira bịn kụ u/lo.

AZIHOVA RUUḄAKỊ GHAN IYIRA

3-4. Ika kụ idị aZihova ruuḅakị ghan iyira? (Psalm 48:14)

³ Bạl Psalm 48:14. AZihova o/wạ mọ yira kụ ooḅakị ghan siloor ayira. Kuolọ, ika kụ idị odị raaḅakị ghan rebenhẹ phọ odị rodon? Eniin eten dị aZihova raḍighi ghan iduọn phọ pọ dị eego esi aBaibul phọ. (Ps. 119:105) AZihova asighẹ Baibul phọ rutughemhiọm ghan iyira ilọ osopha ghan ogey osopha r’omhoọgh imạ araagharạ dị ringọ ghan iyira oḅaạl olhoghi nyiidiphọ r’oḍuom olhoghi aghuḍum k’agee-pọ ghisigh.a Esi omaạm, odị rutughemhị ghan iyira osạr ghan ikarạph abunhọn owilhenhaạn, ogbạ ghan agey oomo amem, r’ophomhoghiạn abunhọn k’ekpom. (Ps. 37:8; Hib. 13:18; 1 Pit. 1:22) Yira omhoọgh idọ araagharạ phọ Enhaạn iphẹn phọ, yira koḍighi ni bugey aburudẹ r’aburunhiin, burulom r’anmariịr, ḅilhẹ r’arighirị.

⁴ Oḅarạm isiphẹ, aZihova agẹ ni siphẹ aBaibul phọ reḍeenhaan abunhọn awe dị osoman ghan iiḅaghamhị iduọn ayira. (1 Kọr. 10:13; Jems 5:17) Mem dị yira aạl ipẹ emitenhaan bọ bidị kụ osighẹ oḍighinhom iyaạr ituughạ phọ, kilhoghonhaạn iyira ḍighaạgh eghom ephughạn pọ iyạl areten. Eḅẹl phọ, yira komiịn mọ ogina ayira bịn kụ u/lo, mọ abunhọn mosoman ghan ni iniin phọ iiḅaghamhị phọ, kụ urue ni okaran. (1 Pit. 5:9) Kụ edị emhunhenhiom iyạl, yira kotuughạ ilọ orue okaran iiḅaghamhị ayira.—Rom 15:4.

5. Abuọ anhiạn kụ edị aZihova asighẹ ruuḅakiọm ghan iyira?

⁵ AZihova asighẹ kẹn bumor r’abumaranhi phọ kụ ruuḅakiọm ghan iyira.b Esi omaạm, abupoghom eghir rogbor ghan ni koghị oophoghogh rookpomhoghan okparamhị abumor r’abumaranhi phọ. Araghaạph phọ abidị rekparamhị ghan ni omheeraam mọ ayira keḅilhẹ eḍighi idị yira kopamanạm muḅọph phọ ayira amhạn bọ maạr. (Iiḍ. 15:40–16:5) Ikumor awe arookpomhoghan phọ rolọgh ghan ni inyaạm ologhonhaạn aḍighaạgh torobọ okaaphọm okuamhị oḍuraan otuman aZihova. (1 Pit. 5:2, 3) Aburudẹ r’aburunhiin rooḅakị ghan ni dọl aruwaloor anmụny phọ abidị, kolhoghonhaạn bidị ḍighaạgh omhoọgh iitughiạn dị emhoon. Bidị rotughemhị ghan kẹn nmụny abidị aạl ghan aBaibul, oghị ghan ituughạ, r’omite ghan epẹ erugh phọ. (Prov. 22:6) Abumaranhi dị osi omhanhanhaạm rologhonhaạn ghan ni ḍighaạgh iḍoọgh abumaranhi esi ophighinhaan abidị imạ eḍeenhaan, ongọ ghan abidị iromhoghiom dị keloghonhaạn ḍighaạgh eḅilhẹ ekparamhị bidị.—Taị. 2:3-5.

6. Yira koḍighi eeghe kụ omooghọm suọ iiḅakiọm mọ aZihova?

⁶ AZihova maḍighi oomo ipẹ ekpeanhaạn bọ ongọ ayira iiḅakiọm mọ yira omhoghi bọ. Yira koḍeenhaan ika mọ yira osereghiạn ni iphẹn odị muḍighinhaan bọ iyira? Proverbs 3:5, 6 eḅẹm mọ: “Ḍuomolhoghi aZihova r’oomo ekpom anạ, kụ ka/beḍenhọm onhaghanhạn aḍughụm olọ anạ.” Yira oḍighi iduọn phọ, odị “kaalemhi ni reten phọ [ayira].” Iduọn phọ pọ, odị kulhoghonhaạn iyira ḍighaạgh oḍuạ esi iniin iiḅaghamhị kụ yira okelhọm ghuḍum oḅaạl olhoghi. P’eeghe idị olhoghi ayira aḅaạl iduọn aZihova amiteom bọ iiḅakiọm ephomhoghiạn dị kilhoghonhaạn iyira ḍighaạgh!—Ps. 32:8.

AZIHOVA RAMITEOM GHAN NI KUNGỌ IYIRA

7. Eeghe kụ iniin araraạr dị aZihova ramiteom ghan kungọ iyira? (Filipai 4:19)

⁷ Bạl Filipai 4:19. Epel iiḅakiọm mọ, aZihova aḅilhẹ kẹn rasẹph ghan ikuph phọ ayira omhoọgh iyaạr olhe, iinmenan, r’otu orọl. (Mat. 6:33; 2 Tẹs. 3:12) Ii eḍighi ni eseeriom otuạn araraạr orolhọm ooḅaghamhiạn aloor, kuolọ aZihova uromha iyira mọ ku/moọgh oboom ooḅaghamhiạn aloor. (Mat. 6:25.) Eeghe kụ iḍighi? Loor esi dị, Odẹ phọ ayira ra/gunhọm ghan rebenhẹ phọ odị okpẹ bọ oḍuomolhoghi mem lọ bidị omhoghi raraạr orolhọm. (Mat. 6:8; Hib. 13:5) Yira kotue ni oḍuom olhoghi oguanhaan phọ odị omiteom ghan ongọ ayira.

8. AZihova aḍighinhaan Devid eeghe?

⁸ Tuutughiạn ipẹ aZihova alhoghonhaạn bọ ḍighaạgh Devid. Mem mọ odị atuạn bọ Uw-emhạ phọ Sọl asuma, aZihova amiteom ghan ni angọ nyodị r’awe phọ odị raraạr orolhọm mọ bidị omhoghi bọ. Mem dị aDevid aatughiạn bọ ipẹ aZihova alhoghonhaạn bọ nyodị ḍighaạgh siạ phọ ipẹ phọ, odị agẹ mọ: “Mị uḍighi ni obumoọny kụ nyiidiphọ mị okumor oye, mị marọl li siẹn aḅirinhi phọ abia, kụ mị kekulha ko”mhiịn ghan dị Enhaạn aghel buọ aruukuan phọ obobọ anmụny abidị olhọm eḍien kụ olhe.” (Ps. 37:25) Eeni nạ r’aloor mamhiịn ni dị aZihova amiteom raraạr orolhọm angọ rebenhẹ odị.

9. AZihova ramiteom ghan ika kangọ we phọ odị rodon mem dị ekperenhom iiḅaghamhị emite? (Miịn kẹn sifoto phọ.)

⁹ Mem ekperenhom iiḅaghamhị aZihova ramiteom ghan ni kẹn kangọ we phọ odị. Esi omaạm, mem dị igbakurọ erọl mem aKristẹn oḅẹl okuron asiạ phọ, aKristẹn dị orọl rikpisi kirokirọ usogh ni raraạr oghiomaạn bumor r’abumaranhi phọ ekuom bọ. (Iiḍ. 11:27-30; Rom 15:25, 26) Arebenhẹ aZihova rodon roḍeenhaan aani ni eniin phọ eegharạ inmo phọ. Mem dị ekperenhom iiḅaghamhị emite, r’ephomhoghiạn aZihova ranyu ghan ni we phọ odị omiteom ongọ abuphẹ odi bọ ekpisi phọ iiḅaghamhị phọ emite bọ raraạr idiphọ eḍien, muụm ophughọl, iinmenan, r’asirooghọ. Ekụ abuphẹ rodoghoḍi ghan bọ ruutu phọ roselhemhi ghan ni ruutu abumor r’abumaranhi phọ ḅilhẹ r’asiKindọm Họl. Kụ abumor r’abumaranhi phọ roo/binyemhiom ghan oodereghị r’okparamhị abumor r’abumaranhi phọ iiḅaghamhị phọ emitenhaan bọ.c

10-11. Nạ atuughạ eeghe esi eḍeenhaan phọ aBorys?

¹⁰ AZihova ramiteom ghan kẹn ni kangọ we dị k”omhiigh ooḅereghị odị. Kụ yira rotuughaạny ghan kẹn nyodị esi owạ ghan aroopoogh olhoghonhaạn aḍighaạgh buphẹ r’ayira u/ḅọph bọ omheeraam. (Gal. 6:10) Kụ iphẹn phọ rengọ ghan ni imạ ogbaanhaạn we. Ooḅeghiọn eḍeenhaan uw-emhụ oniin askul epẹ Ukraine dị oghol mọ Borys. Ii, odị k/onyọ Ogbaanhaạn AZihova, kuolọ odị alhoghonhaạn ghan ni ḍighaạgh nmụny dị oḍighi Bugbaanhaạn siphẹ askul phọ kụ aḅilhẹ alhọgh ghan eegu omheeraam mọ abidị. Mem dị eghạm esi emhạ phọ odị odi ghan bọ, odị asuma ni aghị pakirị eelhe phọ dị ephọ, kụ abumor r’abumaranhi phọ olhoghonhaạn nyodị ḍighaạgh. Onyebel roten, aBorys aghị aani ni aMemorial phọ. Mem dị aBorys aatughiạn ipẹ oḍighinhaan bọ nyodị, odị aḅẹm mọ: “Abugbaanhaạn phọ ukạr kụ ulhoghonhaạn imhị ḍighaạgh kụ omhaạr kẹn uphogh imhị. Mị akạr kụ rasẹph Bugbaanhaạn AZihova.”

¹¹ Yira kotue ni otuughaạny aani eḍeenhaan phọ aZihova esi oḍeenhaan ghan ephomhoghiạn we dị odi esi iiḅaghamhị, mughumọ yira r’abidị oḅọph ni omheeraam obobọ u/ḅọph. (Luk 6:31, 36) Yira oḍuom ni olhoghi mọ ephomhoghiạn phọ yira oḍeenhaan bọ bidị kenyu ni bidị omhiigh ooḅereghị aani aZihova. (1 Pit. 2:12) Yira komoọgh ni ibo phọ reḍuạ ghan bọ kemite oḍighi iiḅi bunhọn mughumọ bidị osaḅạr ooḅereghị aZihova obobọ u/saḅạr.—Iiḍ. 20:35.

AZIHOVA RUGHOPH GHAN NI IYIRA

12. Oghẹn odọ oghoph kụ edị aZihova aguanhaan oomo awe phọ odị? (Psalm 91:1, 2, 14)

¹² Bạl Psalm 91:1, 2, 14. AZihova aguanhaan oghoph ayira osighẹ esi atorobọ iyaạr dị kepuẹ siya phọ ayira r’odị ḍio arodon. Odị ka/meera r’amem mọ aSetan aapụ iserereẹny iiseeny. (Jọn 17:15) Kụ mem igbogh iiḅaghamhị phọ, yira okuphom ni owol mọ aZihova kulhoghonhaạn ni iyira ḍighaạgh oghiọm aghisigh ooḅereghị odị aḅilhẹ uphẹl iyira idiphọ odị maguanhaan bọ.—Ogan. 7:9, 14.

13. Ighẹn areten kụ edị aZihova rakoph ghan torobọ onyọ ayira?

¹³ Ika kụ idị aZihova rakoph ghan torobọ onyọ ayira? AZihova mungọ iyira Baibul phọ olhoghonhaạn ayira ḍighaạgh olhegheri ilọ eḍighi igey r’ikarạph. (Hib. 5:14) Yira odaphạn ipẹ yira otuughạ bọ siphẹ aBaibul phọ, yira kokoph ni siya phọ ayira r’aZihova oḅilhẹ okopha loor. (Ps. 91:4) Oḅarạm isiphẹ, aZihova asighẹ kẹn ookpomhoghan phọ odị rughophom ghan iyira. (Isa. 32:1, 2) Eḍighi maạr dị yira ooḍikuan ghan bumor r’abumaranhi phọ ayira ophomoghiạn bọ aZihova oḅilhẹ rodạph sinhị-iilhogh phọ odị, kikparamhị iyira eḅilhẹ inyaamhị iyira oghel ikarạph inyuughiom.—Prov. 13:20.

14. (a) Uḍighi ika kụ Enhaạn iyira ru/ghoph ghan bọ kasighẹ esi oomo iiḅaghamhị? (b) Psalm 9:10 ungọ iyira eeghe okuphom owol? (Miịn kẹn igẹ dị edi ude.)

¹⁴ Iḍiodi phọ, aZihova aghoph ghan ni rebenhẹ odị eeni amem asighẹ esi oḍighima iyaạr obobọ ḍuugh. Kuolọ koo/mo amem kụ edị odị aḍighi ghan iduọn phọ. Eeni amem “araraạr dị u/seere olhoghi” etue ni imitenhaan iyira. (Eccl. 9:11) AZihova mangọ ni ogẹl mọ awe omhiinhẹ oḅilhẹ ozẹ buniin arebenhẹ odị, oḍeenhaan mọ aSetan ogbaạm okpẹ. (Job 2:4-6; Mat. 23:34) Kụ iniin phọ kẹn kụ edi aani ḍio arodon. Ghalhamọ r’iduọn eeni aZihova ka/sighẹ bọ iiḅaghamhị phọ ayira, yira okuphom ni owol mọ r’amem odị ka/ḅitonhaạn we phọ odị ophomhoghiạn bọ nyodị.d—Ps. 9:10.

AZIHOVA RUUDEREGHỊ GHAN NI IYIRA

15. Ika kụ idị iiḅereghị, Ekpo Onhụ phọ Enhaạn, ḅilhẹ abumor r’abumarani phọ ruudereghị ghan iyira? (2 Korịnt 1:3, 4)

¹⁵ Bạl 2 Korịnt 1:3, 4. Eeni amem yira rokururu ghan ni, rooḅaghamhiạn ghan ni loor obobọ rosoman ghan ni inhọn iiḅaghamhị. Eeni iduọn rokaạph bọ nạ asoman ni iiḅaghamhị dị mekọm idị nạ alhoghoma mọ ogina anạ bịn odi. Oye odi ni dị anhaghanhạn ipẹ nạ alhoghoma bọ ḍughụm? AZihova anaghanhạn ni. Odị ra/naghanhạn ghan ipẹ yira olhoghoma bọ bịn kuolọ odị “ruudereghị ghan [iyira] esi oomo iminimiịn” phọ ayira. Ika? Mem dị yira ooḅereghị aZihova, odị rungọ ghan iyira “eephọ phọ k’Enaạn epel bọ dị oye katue alegheri.” (Fil. 4:6, 7) Yira romoọgh ghan kẹn iidereghị mem dị yira aạl ikpo onhụ phọ aZihova siphẹ aBaibul phọ. Ikpo onhụ ephomhoghiạn, osụ olhoghi, r’oḍuomolhoghi phọ edi bọ siphẹ phọ rinyaamhị ghan iyira. Kụ mem dị yira oghị ituughạ, yira romoọgh ghan ni iidereghị dị eego esi ooḅughonhaan abumor r’abumaranhi phọ ḅilhẹ r’ikpo onhụ okparamhị phọ yira ronaghạn ghan bọ siphẹ aBaibul phọ.

16. Nạ atuughạ eeghe esi eḍeenhaan phọ aNathan r’aPriscilla?

¹⁶ Ooḅeghiọn eḍeenhaan aNathan r’aPriscilla dị odi ghan epẹ United States omhiịn ipẹ aZihova rasighẹ ghan bọ Baibul phọ kuudereghiọm iyira. Siạ dị meten, bidị usopha ni oghị ekpisi dị omhoghi bukaaphọm. Umor phọ Nathan aḅẹm mọ: “Yoor ukạr kụ oḍuom olhoghi mọ aZihova kasẹph ni ikuph phọ ayoor.” Toroboiperolbọ, mem mọ bidị osi bọ, iyạl phọ abidị umheel li e/moon ekperenhom ḅilhẹ kẹn u/miịn oḍighi oḍighi kụ omhoọgh ikpoki orolhọm. Esi iduọn phọ, bidị urigheel li, kuolọ iiḅaghamhị ikpoki phọ abidị i/si eekuna. Umor phọ Nathan aḅẹm mọ: “Mị uukia ni iyaạr phọ eḍighi bọ kụ Enhaạn iyoor u/sẹph bọ ipẹ yoor ootughiạn bọ. Kụ mị amhiigh ootughiạn mọ eeni siẹn mị maḍighi ikarạph.” Esighẹ rekị bịn aNathan r’anhịr odị Priscilla oru omhiịn mọ Enhaạn o/ḅitonhaạn bidị. Umor phọ Nathan aḅẹm mọ: “Mem mọ amuphẹ phọ, aBaibul phọ aḍighi idiphọ oyaghirị dị asụ olhoghi dị akparamhị ghan aḅilhẹ uuḅakị iyoor. Owilhẹ aḍikparamhinheẹn phọ kụ ogbon ipẹ aZihova ulhoghonhaạn bọ iyoor ḍighaạgh okparạm, inyaamhị ni iyoor okaran odẹgh ophogh dị yoor osomhan epẹ ghisigh.”

17. Ika kụ idị aZihova aadereghị umaranhi dị oghol mọ Helga? (Miịn kẹn afoto phọ.)

¹⁷ Abumor r’abumaranhi phọ ayira kotue ni oḅilhẹ uudereghị iyira enhọn eten. Ika? Ooḅeghiọn eḍeenhaan umaranhi dị oghol mọ Helga, dị odi ghan epẹ Hungary. Esi ibadị asiạ, odị asoman ni iiḅaghamhị dị ekọm ooḅaghamhiạn aloor engọ nyodị kụ alhoghoma mọ onọ o/mhoọgh maạr oḍighinhom. Kuolọ, mem dị odị aatughiạn ilọ amem mọ amuphẹ phọ, odị amhiịn mọ aZihova asighẹ bumor r’abumaranhi ookpomhoghan phọ odị kụ aadereghiọm nyodị. Umaranhi phọ Helga aḅẹm mọ: “AZihova rungọ ghan ni imhị inyaạm torobọ amem dị aloor amhị edugh loor oḍighi phọ amhị, loor ophogh obumoọny phọ amhị u/kuạ ghan bọ, r’inhọn iiḅaghamhị. Esi 30 asiạ epẹ omhạn, aḍio dị aZihova imhị u/ngọ ghan iidereghị i/tọl ghan idiphọ odị aguanhaan bọ. AZihova ragbor ghan ni kanyu bunhọn awe oru oḅaanhaạn amhị ikpo onhụ okparamhị r’osereghiạn. Ibadị amem, abumor r’abumaranhi phọ ugẹ ghan dom afon uruom imhị, ungọ ghan imhị ḍikpakarạ aḍinyạ okparamhị, obobọ uḅaanhaạn ghan imhị ikpo onhụ osereghiạn okạr amem mọ mị amhoghi bọ.”

18. Ika kụ idị yira kotue oodereghị bunhọn?

¹⁸ Yira omoọgh eepoogh otuughaạny aani aZihova esi oodereghị ghan abunhọn. Ika kụ idị yira kotue oḍighi iduọn phọ? Esi olher ghan arurụ ongọ, oḅạ ghan ikpo onhụ iidereghị, r’olhoghonhaạn ghan abidị ḍighaạgh. (Prov. 3:27) Yira roḍighi ghan ni oomo ipẹ yira kotue bọ oodereghị abulọ romiinhọm, ghalhamọ r’abuphẹ k”omhiigh bọ ooḅereghị aZihova. Mem dị amatuman ayira romoghi loor oye ephomhoghiạn abidị dị amhugh, loor e/moon, obobọ rooḅaghamhiạn loor, yira rokị ghan ni kophogh bidị, kolher rurụ ongọ, oḅilhẹ oḍeenhaan riisi aBaibul dị ketue ni ekparamhị bidị. Yira orue ni otuughaạny aZihova Enhaạn ‘azin oomo iidereghị’ phọ, pọ yira kotue ni ologhonhaạn aani ḍighaạgh bumor r’abumaranhi phọ okparaghạm iiḅaghamhị, ghalhamọ r’abulọ k”omhiigh ni ooḅereghị aZihova.—Mat. 5:16.

AZIHOVA ODI NI R’AYIRA OOMO AMEM

19. Eeghe araraạr kụ edị aZihova ruḍighinhaan ghan iyira, kụ ika kụ idị yira kotue otuughaạny nyodị?

¹⁹ AZihova akạr kụ amoọgh ogbolhomaam oomo abuphẹ ophomhoghiạn bọ nyodị. Odị iyira ru/phogh ghan kagunhọm mem lọ yira osoman iiḅaghamhị. Kụ idiphọ odẹ r’onhiin romaạr ghan bọ kophogh obumoọny abidị, kụ edị aZihova rapogh ghan rebenhẹ phọ odị. Odị ruuḅakị ghan ni iyira, kamiteom raraạr lọ yira omhoghi, kughoph iyira, kaḅilhẹ uudereghị iyira. Yira rotuughaạny ghan aZihova esi obakị ghan abunhọn kụ oḅilhẹ okparamhị abidị mem dị osoman iiḅaghamhị. Ii ghalhamọ r’iduọn yira kokiọm bọ ni ghisigh osoman iiḅaghamhị siẹn aḅirinhi phọ aSetan, yira kotue ni okuphom owol mọ aZihova odi ni olhoghonhaạn ayira ḍighaạgh oomo amem. AZihova aguanhaan mọ: “Ke/moọgh oghiilhaan, mị odi ni r’anyinha.” (Isa. 41:10) P’eeghe ikpo onhụ akpọ oḅio! Agey ni, yira bịn u/lo.