ẸMHUOGHAAPH ỊTUUGHA PHỌ 33
ẠḌUOR PHỌ 4 “Jehovah Is My Shepherd”
Meeraam Mọ A Jehova Ạphomhoghian Ni Nyịnha
“Mị ụsighe ẹphomhoghian ọḅar kụ iḍurom bọ inyinha.”—JER. 31:3.
EGBON
Ịyaar phọ eḍighi bọ kụ yira komeeraam bọ mọ a Jehova ụphomhoghian ni iyira ḅịlhe r’ịdi yira koḍighi kụ okuphom owol ẹphomhoghian phọ ọdi.
1. Eeghe kụ iḍighi kụ nạ ạḅogh bọ loor ạngo a Jehova? (Mịin kẹn afoto phọ.)
NẠ ẠATUGHIAN ni mem mọ nạ ạḅogh bọ loor ạna ạngo a Jehova? Nạ usopha oḍighi ịduon phọ loor esi dị nạ malhegheri kụ ạḅilhe ạpomoghian nyọdi. Nạ uguanhaan mọ nạ kạsighe ogbi phọ ọdi kụ aḍighi ẹḅel sịphe aghuḍum mọ ạna, ḅịlhe mọ nạ kạkiom ni ghisigh ạpomoghian ghan nyọdi r’oomo ekpom ạna, r’oomo aghuḍum ạna, r’oomo olhoghi ạna ḅịlhe r’oomo ịnyaam ạna. (Mạk 12:30) Kụ k’amem mọ ạmuphe phọ, ẹphomhoghian phọ ạna esi ọdi rekpạr ghan bịn. Nạ kạpagharanhaan ika eḍighi mạar dị oye apuru nyịnha mọ, “Nạ ạkar ri ạpomoghian a Jehova?” Nạ kápiemhi mem ọḅem mọ, “Mị ạpomoghian nyọdi apuemhi tọrobo oye r’ạtorobo ịyaar!”
Nạ ạatughian ni ẹphomhoghian phọ nạ ạmhoogh bọ ạghi esi a Jehova mem mọ nạ ạḅogh bọ loor ạna ạngo nyọdi kụ aḍiiny mụum ḍụghum? (Mịin ẹkpigh phọ 1)
2-3. A Jehova rạwa mọ okuphom owol eeghe, kụ yira kọoḅeghion eeghe sịen ẹmhuoghaaph phọ ẹphen phọ? (Jeremiah 31:3)
2 Nạ kạpagharanhaan ika eḍighi mạar dị oye apuru nyịnha mọ, “Nạ ragbi mọ a Jehova ạkar ri ạphomhoghian nyịnha?” Nạ kạakpukian ni ọphagharanhaan kụ eeni ạatughian mọ nạ ọ́kpeanhaan dị a Jehova kạpomoghian ḍụghum? Oniin ọnyo umaranhi dị alhoghoma mọ ụ́pomoghian nyọdi mem ẹghoroghor aḅẹm mọ: “Mị ạpomoghian ni a Jehova, kụ iikia ílo ịlo ịpe phọ. Kụolo mị ragbor ghan ni kookia mụghumo a Jehova ụphomhoghian aani ni ịmhi?” Nạ kalegheri bọ ika mọ a Jehova ạphomhoghian aani ni nyịnha?
3 A Jehova rạwa mọ kuphom owol mọ ọdi ạphomhoghian ni nyịnha. (Bạl Jeremiah 31:3.) Ọkar ọghaaph, a Jehova kụ aḍur bọ nyịnha ạlhoghoma. Mem mọ nạ ạḅogh bọ loor ạna ạngo nyọdi aḍiiny mụum, ọdi ạngo ni nyịnha ịikia inmo—ẹphomhoghian ọḅar phọ ọdi. Kụ ịpe phọ rẹma ghan mọ ọdi ạkar kụ ạphomhoghian nyịnha, kụ nyịnha kạ́wilhe. Ẹphomhoghian ọḅar phọ ọdi renyu ghan nyọdi ọmhiin abuuseenyom ọdi, ẹḅaramaam bọ nyịnha ịdipho awe dị ọkaraghi oḍighi bụo ọdi. (Mal. 3:17) A Jehova rạwa mokuphom ni owol mọ ọdi ạphomhoghian ni nyịnha ịdipho aPọl. R’ạkpo oḅio ạ Pọl ạge mọ: “Mị maIegheri ni akuphom owoI mọ ịyaar iyira kị́gbarion sịphe ẹphomhoghian phọ ọdi—m’aḍuugh m’aghuḍum; m’ạruukpaany Ẹnaan m’ịkpana ạraraar dị edi ẹpe k’ạke; m’ịIo ạnyiidipho m’ịlo edi ghisigh; m’ịlo edi ạnyu; m’ịlo edi ude. Sịphe oomo ạraraar phọ ọlem bọ r’eniin ílo dị ketue ịgbarion iyira sịphe ẹphomoghian phọ Ẹnaan ịphomoghian bọ iyira.” (Rom 8:38, 39) Sịen ẹmhuoghaaph phọ ẹphen phọ yira kọoḅeghion ịyaar phọ eḍighi bọ kụ ẹwa bọ mọ omheeraam okuphom owol mọ a Jehova ụphomhoghian ni iyira ḅịlhe r’ịyaar dị kịlhoghonhaan iyira ḍịghaagh oḍighi ịduon phọ.
ỊYAAR PHỌ ẸWA BỌ MỌ OMHEERAAM MỌ A JEHOVA ỤPHOMHOGHIAN NI IYIRA
4. Eeghe kụ eniin ikeḍi dị a Setạn raḍighinhom ghan, kụ ika kụ ịdi yira kotue ọmerenyan?
4 Omheeraam mọ a Jehova ụphomhoghian ni iyira keḍighi ịdi yira kotue okaran eniin ikeḍi a Setạn. (Efẹ. 6:11) A Setạn kaḍighi ni oomo ịlo ọdi katue oḍighi ịdi yira kọbilhe okumu a Jehova. Ikeḍi a Setạn pọ oḍighi ịdi awe komeeraam mọ a Jehova iyira ụ́phomhoghian. Legheri mọ a Setạn rápeghom ghan ephegh tọrobo eepoogh dị ọdi ạmhoogh. Ọdi ragbor ghan kazuoghom mem lọ yira odugh—eeni mem lọ yira oḅonyonhu ozuan ịlo ạraraar dị yira oḍighi ẹpe ọmhan, mem lọ yira osoman ịpaanhaan, ọbobo mem lọ yira ọmhoogh iikia ịlo ịpe aghisigh phọ kạtol bọ. (Prov. 24:10) A Setạn ạkigh ạnamdika dị rạwa ghan ẹnham ozuoghom. Kụ iḍighi kụ ọdi ragon ghan mem lọ yira oḅonyonhu ozuan kụ atu oḍighi ịdi yira kọbilhe okumu a Jehova. Kụolo eḍighi mạar dị yira okuphom owol mọ a Jehova ụphomhoghian ni iyira, pọ yira kọnyaaghian ni ọmherenyan a Setạn r’ikeḍi phọ ọdi.—1 Pit. 5:8, 9; Jems. 4:7.
5. Uḍighi ika kụ ẹmhan bọ mạar dị yira kologhoma mọ a Jehova ạpomoghian ni ạḅilhe ụsereghian iyira?
5 Omheeraam mọ a Jehova ụphomhoghian ni iyira riḍur ghan iyira kẹgbiemhi nyọdi. Uḍighi ika kụ yira kọḅem bọ ịduon phọ? A Jehova ụlhemhom iyira ẹephua ọphomhoghian ghan ạbunhon r’olhoghoma aani ẹphomhoghian ạbidi. Mem dị awe ụphomhoghian iyira, yira rọpomoghian aani ghan bịdi. Mem dị yira olhoghoma mọ a Jehova ạsereghian ni ạḅilhe ụphomhoghian iyira, kinyu iyira ọphomhoghian aani ọdi. (1 Jọn 4:19) Ịduon ẹphomhoghian phọ yira ọmhoogh bọ esi ọdi rekpạr bọ, kụ ịdi ẹphomhoghian phọ ọdi ạmhoogh bọ aru esi ayira rẹkpar aani ghan. Ạ Bạịbul phọ ạkar ụḅenhi iyira mọ: “Iḍuraan etuman Ẹnaan. Ọdi kaḍuraan aani ni ituman inyina.” (Jems 4:8) Ika kụ ịdi yira kotue omeeraam mọ a Jehova ụphomhoghian ni iyira?
EEGHE KỤ KỊLHOGHONHAAN IYIRA ḌỊGHAAGH OMHEERAAM MỌ A JEHOVA ỤPHOMHOGHIAN NI IYIRA?
6. Yira kọoḅereghi ghan ịlo eeghe orue omheeraam mọ a Jehova ụphomhoghian ni iyira?
6 Tọlhonhaan ghan esi ịiḅereghi. (Luk 18:1; Rom 12:12) Lọm ghan a Jehova ịbadi amem ḍio phọ ọlhoghonhaan ạna ḍịghaagh ọmhiin aloor ạna eten phọ ẹpe ọdi ạmhiin bọ nyịnha. Ọkar agey, mem dị olhoghi ạna ụ́pọ, redugh ghan ni ookia mụghumo a Jehova ạkar ri ạphomhoghian nyịnha. Kụolo legheri mọ a Jehova ạbugh ni apu olhoghi phọ ạna. (1 Jọn 3:19, 20) Ọdi alegheri ni ịlo ạna apu nyịnha; ọdi rạmiin ghan ni imạ araagharạ ạna dị nạ kőrue ọmhiin. (1 Sam. 16:7; 2 Chron. 6:30) Esi ịduon phọ, kákiilhaan “ookuanhaan” ọdi ịpe nạ alhoghoma bọ, r’ọlhom ghan mọ ọdi ạlhoghonhaan nyịnha ḍịghaagh ọmhiin mọ ọdi ạphomhoghian ni nyịnha. (Ps. 62:8) Kụ ạzo ghan ịdi ẹdaphan ịiḅereghi phọ ạna esi ọsighe oḍighinhom ạraraar phọ ẹdaphan bọ sịen.
7-8. Ika kụ ịdi ọko sụor phọ ụlhoghonhaan iyira ḍịghaagh ọmhiin mọ a Jehova ụphomhoghian ni iyira?
7 Meeraam ikpo ọnhu phọ a Jehova. A Jehova aphum ni we phọ ogẹ bọ Bạịbul phọ ọkar ọghaaph ọdo oye phọ ọdi aru bọ. Ọoḅeghion ẹma eten phọ ọko sụor phọ ạghaaph bọ ịlo a Jehova. Ọdi ạghaaph mọ “A Jehova atuman ni bụo amukum olhoghi phọ; ọdi rạpel ghan ni bụphe ụ́moọgh mun bọ oḍuom olhoghi.” (Ps. 34:18, ịge dị edi ude) Mem lọ nạ aḅonyonhu azuan, nạ atue ni ạatughian mọ oginha ạna bịn kụ odi. Kụolo a Jehova agunhaan ni mọ mem dị ẹrol ịduon phọ, ọdi atuman ni nyịnha loor esi dị ọdi ạmiin ni mọ nạ ạkar kụ amoghi ọlhoghonhaan ạḍighaagh ọdi. Esi ạḍinhon ạḍuor, aDevid ạge mọ: “Nạ ạge ni ọnhu amem dị mị mamhoghi.” (Ps. 56:8) A Jehova rạmiin ghan ni mem dị nạ asomhan eephinha r’ẹ́ḅaạl olhoghi. Ọdi ạmoogh ni ogbolhomaam ạna ạḅilhe ạmiin ịpe remitenhaan bọ nyịnha. Ẹḅilhe ẹkigh mụdi ọdi ạge ọnhu amem dị nạ amhoghi ạlogh ḍịnya kụ rạatughian ghan tọrobo amem dị nạ alhoghoma eephinha kụ amhoghi. A Psalm 139:3 eḅẹm mọ: “Nạ [a Jehova] alegheri ni oomo areten phọ amhị.” A Jehova ạmiin ni oomo areten phọ ạna, kụolo ọdi ragbon ghan igey phọ bịn. (Hib. 6:10) Eeghe kụ iḍighi? Loor esi dị ọdi ạsereghian ni tọrobo ikuph dị nạ ạlhogh oḍighi ạraraar dị ẹḅeraan nyọdi.a
8 Dị eego esi ariisi ạ Bạịbul phọ ịphen phọ rịiḍereghi ghan bọ iyira, ẹkar ẹkigh mụdi a Jehova rạḅem ghan mọ: “Mị rạwa mọ legheri mọ mị ạphomhoghian nyịnha kụ ạḅilhe raphogh ghan nyịnha.” Kụolo ịduon yira mọoḅeghion bọ ẹpe ọmhan, a Setạn rạwa mọ meeraam mọ a Jehova nyịnha ọ́phomhoghian. Eḍighi mạar dị nạ raakia ghan ni eeni amem mụghumo a Jehova ạphomhoghian ni nyịnha, pọ puruan loor mọ, ‘Ạnhian kụ ịdi mị kameeraam—ọde oomo ọkpe phọ ọbobo Ẹnhaan phọ ọkpe rạ́gba ghan bọ?’—Jọn 8:44; Ps. 31:5.
9. Eeghe okuphom owol kụ ịdi a Jehova ạngo bụphe ọphomhoghian bọ nyọdi? (Exodus 20:5, 6)
9 Tụutughian ịpe a Jehova raloghoma ghan bọ ịlo ạbuphe ọphomhoghian bọ nyọdi. Ọoḅeghion ịpe a Jehova ạḅenhi bọ Mozis r’awe phọ Izrẹl. (Bạl Exodus 20:5, 6.) A Jehova aguanhaan mọ ọdi kạkiom ni ghisigh aḍeenhaan ẹphomhoghian ọḅar bụphe ọphomhoghian bọ nyọdi. Ịphen phọ eḍeenhaan mọ loor ịduon a Jehova ụḅar bo iyira, ọdi kạ́bilhe ọphomhoghian abuseenyom mọ ọdi ọphomhoghian bọ nyọdi. (Neh. 1:5) Esi ịduon phọ, eḍighi mạar dị nạ raakia mụghumo a Jehova ạphomhoghian ni nyịnha, pọ puruan loor mọ, ‘Mị ạpomoghian ni a Jehova?’ Kụ ạatughian ịlo ịphen phọ: Eḍighi mạar dị nạ ạphomhoghian ni nyọdi kụ raḍighi ni oomo ịpe nạ katue bọ oḍighi ịpe ẹḅeraan bọ nyọdi, pọ kuphom ni owol mọ ọdi ạphomhoghian ni nyịnha agey. (Dan. 9:4; 1 Kọr. 8:3) Ịduon phọ pọ, eḍighi mạar dị nạ úukia mọ nạ ạpomoghian ni a Jehova, pọ káakia mọ ọdi ạphomhoghian ni nyịnha. Kuphom ni owol mọ ọdi ạphomhoghian ni nyịnha kụ nyịnha kạ́bilhe.
10-11. A Jehova rạwa mọ sịghe ika ẹkia ẹtagharan phọ? (Galetia 2:20)
10 Gbirima ghan ịlo ẹkia ẹtagharan phọ. Ẹkia ẹtagharan phọ kụ inmo dị ẹbugh epelhom dị a Jehova mạngo ghan we. (Jọn 3:16) Kụolo eḍighi inmo dị ọdi ạngo nyịnha r’aloor. Ọoḅeghion eḍeenhaan otelhedom mọ Pọl. Tụutughian mọ ọdi aḍighi yogh ni ịgbagara ịkaraph kụ agbi bọ oḍighi ọnyo ạ Krịstẹn, kụ ịwa kẹn mọ ọdi ạghiom ghisigh eenan émunughan ọdi. (Rom 7:24, 25; 1 Tim. 1:12-14) Ghạlhamo r’ịduon phọ ni, ọdi ạmhiin ẹkia ẹtagharan phọ ịdipho inmo dị a Jehova ạngo nyọdi. (Bạl Galetia 2:20.) Legheri mọ a Jehova kụ aphum Pọl ọge ikpo ọnhu phọ ịpe phọ. Ḅịlhe mọ tọrobo ịyaar dị edi sịphe ạ Bạịbul phọ ụge ịlo oromhoghiom ayira. (Rom 15:4) Ikpo ọnhu phọ ạ Pọl eḍeenhaan ịpe a Jehova rạwa bọ mọ nạ sịghe ẹkia ẹtagharan phọ—ịdipho inmo dị Ọdi ạngo nyịnha. Nạ ạsighe ẹkia ẹtagharan phọ eten phọ ẹphen phọ, kẹkparamhi ni omheeraam mọ ạna mọ a Jehova ạphomhoghian ni nyịnha.
11 P’eeghe ịdi yira rọseph a Jehova orom a Jizọs mọ aru sịen ade phọ umhughanhaan iyira! Kụolo ẹnhon ephiph phọ a Jizọs ạtuan bọ aru sịen ade phọ pọ ọḅenhi awe igey phọ ịlo Ẹnhaan. (Jọn 18:37) Igey phọ ịpe phọ ẹḅaramaam eten phọ ẹpe a Jehova ạkar bọ alhoghoma ịlo ạnmuny phọ ọdi.
ỊDI A JIZỌS AḌIGHI ỊDI YIRA KOMEERAAM MỌ A JEHOVA ỤPHOMHOGHIAN NI IYIRA
12. Uḍighi ika kụ yira komeeraam bọ oomo ịpe a Jizọs ạghaaph bọ ịlo a Jehova?
12 Mem mọ a Jizọs ạrol bọ sịen ade phọ, ịḅeraan ghan ni nyọdi ọḅenhi awe ọdo oye phọ a Jehova aru bọ. (Luk 10:22) Yira omeeraam ni oomo ịpe a Jizọs ạghaaph bọ ịlo a Jehova. Eeghe kụ iḍighi? Loor esi dị a Jizọs kụ mạrol ghan ra Jehova esi ạsimuonir ạsia kụ agbi bọ oru ịsien ade phọ. (Kọl. 1:15) Ọdaphan ịpe ọdi mạmhiin bọ, a Jizọs alegheri ni ịdi a Jehova ạphomhoghian nmụny r’ạnmanyaan phọ Ọdi ọkpe bọ oḍuom olhoghi oomo ịsien aḅirinhi phọ. Ika kụ ịdi a Jizọs ạlhoghonhaan ḍịghaagh bụnhon omheeraam mọ Ẹnhaan ẹpomoghian ni bịdi?
13. Ika kụ ịdi a Jizọs rạwa mọ yira ọmhiin a Jehova?
13 A Jizọs rạwa mọ yira ọmhiin a Jehova eten phọ ẹpe ọdi ạmhiin bọ. Sịphe ịge ạ Gọspẹl phọ, epel li 160 amem a Jizọs ạmhagh bọ a Jehova mọ “Ọde.” Mem dị ọdi rạḅenhi butelhedom mọ ọdi ịlo a Jehova, ọdi aḍighinhom ghan ikpo ọnhu phọ “Ọde phọ anyinha” ọbobo “Ọde phọ anyina odi bọ k’ạke.” (Mạt. 5:16; 6:26) Ịyaar ịtuugha dị edi Mạtiu 5:16 ẹḅem mọ: “Ạrebenhe Ẹnhaan iḍiodi phọ ụmhagh ghan a Jehova igbogh asiḍien ịdiphọ Ẹnhaan ‘Oomo Ịikpo,’ ‘Ọpo Apelheghiom bọ,’ ḅịlhe ‘Ogbogh Ọlemia,’ kụolo ịduon a Jizọs agbor ghan bọ aḍighinhom ekpo ọnhu phọ ‘Ọde’ eḍeenhaan mọ a Jehova ạmoogh siya dị ẹkpulhan r’ạrebenhe phọ ọdi.” Eegholhaan ni mọ a Jizọs rạwa mọ yira ọmhiin a Jehova ịdipho Ọde dị ạphomhoghian ịbam ạnmuny ọdi. Ọoḅeghion ịyal ariisi sịphe ạ Bạịbul phọ dị a Jizọs ạmhagh a Jehova mọ “Ọde.”
14. Ika kụ ịdi a Jizọs aḍeenhaan mọ tọrobo ọnyo ayira ạman ni mạar esi Ọde k’ạke phọ ayira? (Mạtiu 10:29-31) (Mịin kẹn afoto phọ.)
14 Ẹḅel phọ, ọoḅeghion ikpo ọnhu phọ a Jizọs edi bọ sịphe Mạtiu 10:29-31. (Bạl.) Ạsimighor eḍighi ịbam ịnhun dị kétue ẹpomoghiạn ọbobo ẹeḅereghi a Jehova. Ghạlhamọ rịduon phọ ni a Jehova ạmaghamhi ni mạar tọrobo ạmighor dị tụtu kalegheri mem dị oniin ọnyo ạbidi amheel ude. P’eeghe ịdi ịphen phọ eḍeenhaan mọ ọdi ạkar kụ ạmaghamhi mạar tọrobo ẹbenhe ọdi dị ạphomhoghian kụ ạḅilhe r’ạaḅereghi nyọdi! Ịlo 1ikpo ọnhu phọ edi bọ ẹkpigh phọ 30 ẹḅem bọ mọ: “Ẹnaan ẹkar ri elegheri ọnhu ạsilaal dị edi rụmu anyina,” ịyaar ịtuugha ẹkpigh phọ 30 ẹḅem mọ: “Loor ịduon a Jehova alhegheri bọ ni ghạlhamo r’ẹbam ịyaar dị edi loor ayira, pọ ọdi ạkar ri ạmoogh ḍịḅeraan ạtorobo oye dị rạdaph Jizọs.” Ọkar agey, a Jizọs rạwa dị yira komeeraam mọ tọrobo ọnyo ayira ạman ni mạar esi Ọde k’ạke phọ ayira.
A Jehova ạmaghamhi ni mạar tọrobo ạmighor, kụ alegheri ni mem lọ amheel ude. Eḍighi mạar dị a Jehova ạmhaghamhi ni mạar sịmighor—nạ katue ni akuphom owol mọ ọdi ạphomhoghian ni nyịnha, loor ịduon nạ ạphomhoghian bọ kụ rạaḅereghi nyọdi! (Mịin ẹkpigh phọ 14)
15. Ikpo ọnhu phọ a Jizọs edi bọ Jọn 6:44 ẹtughemhi nyịnha eeghe ịlo Ọde k’ạke phọ ạna?
15 Ọoḅeghion ẹnhon esi dị a Jizọs ạḅilhe ạmhagh a Jehova mọ “Ọde”. (Bạl Jọn 6:44.) Ọde k’ạke phọ ạna kụ aḍur nyịnha ạḅilhe aḍighi ịdi nạ ạmhoogh ḍịḅeraan igey phọ. Uḍighi ika kụ ọdi aḍur bọ nyịnha ạlhogh sịen igey phọ? Loor esi dị ọdi ạmiin mọ nạ ạmoogh eeḅi ekpom. (Iiḍ. 13:48) Mem mọ a Jizọs ạḅa bọ ikpo ọnhu phọ edi bọ Jọn 6:44, eeni ọdi ạghaaph ghan aghol ikpo ọnhu phọ edi bọ Jerimạyạ 31:3 ọkpasi bọ ẹmhuoghaaph ịtuugha phọ ẹphen. Sịphe phọ a Jehova ạḅenhi we phọ ọdi mọ: “Mị ụsighe ẹphomhoghian ọḅar kụ iḍurom bọ inyinha.” (Jer. 31:3; poghom Hosea 11:4) Tụutughian ịdi ịphen phọ rẹma ghan, Ọde k’ạke phọ ayira ạkiom ni ghisigh rạmiin ghan eeḅi ekpom mọ nạ ạmhoogh bọ ghạlhamo r’ịduon nạ kạ́miin bọ.
16. (a) A Jizọs ụḅenhi iyira eeghe ịlo a Jehova, uḍighi ika kụ yira komeeraam bọ ni nyọdi? (b) Ika kụ ẹdi nạ katue ameeraam akuphom owol mọ a Jehova kụ Ọde phọ nạ ạkar bọ amhoghi? (Mịin igbe phọ “Ọde Phọ Oomo Ayira Omhoghi Bọ.”)
16 Ịduon a Jizọs ạmhagh ghan bọ a Jehova mọ Ọde phọ ayira, pọ ịduon phọ ọdi rụḅenhi ghan iyira mọ: “A Jehova óḍighi Ọde oginha ọdi bịn; aḍighi aani ni Ọde ạna. Kụ mị rạwa mọ kuphom owol mọ ọdi ạphomhoghian ni nyịnha ạḅilhe ạmoogh ḍịḅeraan ạna.” Esi ịduon phọ, eḍighi mạar dị eeni amem nạ raakia ghan mụghumo a Jehova ạphomhoghian ni nyịnha, pọ puruan loor mọ, ‘Ị́kpe dị mị kameeraam ikpo ọnhu Ọony phọ ạkar bọ alhegheri Ọde phọ ayira ḅịlhe rạgba ghan bọ agey ḍụghum?’—1 Pit. 2:22.
KỊOM GHISIGH AKUPHOM OWOL ẸPHOMHOGHIAN PHỌ A JEHOVA
17. Uḍighi ika kụ yira kọkiom bọ ghisigh ọkparamhi ghan omheeraam mọ ayira mọ a Jehova ụphomhoghian ni iyira?
17 Ẹwa ni dị yira kọkiom ghisigh okuphom owol mọ a Jehova ụphomhoghian ni iyira. Ịduon yira mọtuugha bọ ẹpe ọmhan, ạmulogh ḍien phọ ayira a Setạn aḍighi oye ikeḍi, kụ kaḍighi ni oomo ịlo ọdi katue ọmhiin mọ yira ọbilhe okumu a Jehova. Ọmhiin mọ ọdi adughe omheeraam mọ ayira, a Setạn kạkiom ni ghisigh aḍighi ghan ịdi yira kologhoma mọ a Jehova iyira ụ́phomhoghian. Kúmeera a Setạn ạkpar upu iyira!—Job 27:5.
18. Ika kụ ẹdi nạ kakuphom owol mọ a Jehova ạphomhoghian ni nyịnha?
18 Orue ọkparamhi omheeraam mọ ạna mọ a Jehova ạphomhoghian ni nyịnha, pọ kịom ghisigh ạaḅereghi ghan mọ ọdi ạlhoghonhaan nyịnha ḍịghaagh ọmhiin aloor ạna ịdipho ọdi ạmhiin bọ nyịnha. Tụutughian ịpe ạbugeom ạ Bạịbul phọ ọghaaph bọ ịlo ẹphomhoghian ọḅar phọ a Jehova. Gbirimha ịlo eten phọ ẹpe ọdi ramegheron ghan bọ kạghi esi ạbuphe ọphomhoghian bọ nyọdi; nạ káḍeenhaan nyọdi ẹphomhoghian kụ ạbilhe dị nyịnha úḍeenhaan aani. Tụutughian kẹn ịyaar phọ eḍighi bọ kụ ẹkia ẹtagharan phọ eḍighi bọ inmo dị a Jehova ạngo nyịnha r’aloor. Kụ aḍuom olhoghi ịpe a Jizọs ạghaaph bọ mọ a Jehova Ọde k’ạke ạna. Esi ịduon phọ, kụ oye apuru nyịnha mọ: “Nạ ragbi mọ a Jehova ạphomhoghian ni nyịnha?” nạ kạpagharanhaan ni r’ạkpo oḅio mọ: “Ii, ụphomhoghian ni ịmhi! Kụ mị raḍighi ni oomo ịlo mị katue ḍio etum ḍio oḍeenhaan mọ mị ạpomoghian ni nyọdi!”
ẠḌUOR PHỌ 154 Unfailing Love