EMHUOGHAẠPH ITUUGHẠ PHỌ 31
“Ikim Ni Bịn I/pighironu Ghan”
“Iiḅi asiya amị, loor iduọn phọ, ikim ni bịn i/pighironu ghan.”—1 KỌR. 15:58.
AḌUỌR PHỌ 122 Be Steadfast, Immovable!
OGHAẠPH OOKARAGHa
1-2. Ika kụ edị onyọ aKristẹn katue akịgh otu anyụ dị aphoph k’epẹ anyụ? (1 Korịnt 15:58)
LHẠ phọ 1978, kụ edị olhọgh otu anyụ dị aphoph anyụ iboom epẹ Tokyo, Japan. Awe uukia ghan mughumọ otu phọ katue ni amerenyạn ophiigha ade phọ ragbor ghan bọ kamite emhạ phọ epẹ phọ. Eeghe kụ edị abuphẹ olhọgh bọ otu phọ oḍighi omhiịn mọ otu phọ atue ni amerenyạn ophiigha ade? Bidị ulhọgh otu phọ eten dị otu phọ amhiigh ḅilhẹ katue ameerạ ghalhamọ ade phọ kụ iphiigha ni. Kotue ni osighẹ onyọ aKristẹn otomaạm otu anyụ phọ opọ phọ. Ika?
2 Ewạ dị onyọ aKristẹn kamiigh kụ aḅilhẹ ayoghoyoghọ. Odị amoghi omheerạ okpạr kụ oghị aghisigh ophamhanhạm iilhogh phọ ḅilhẹ r’asiigbu phọ aZihova. (Bạl 1 Korịnt 15:58.) Odị “ranyạ ghan ni oḍighi ilọ oḅẹm,” kụ ra/bi ghan. Ḍieriphọ aḍighaạgh phọ, odị aḍighi kẹn oye dị ayoghoyoghọ obobọ raḍeenhaan ghan onhaghanhạn aḍughụm torobọ amem dị ewạ. (Jems. 3:17) Onyọ aKristẹn dị amhaạr aaleeny eten phọ ephẹn phọ ka/gbagarạ iboom kụ ka/ḍighi kẹn oyegheyeghẹ oye. Siẹn emhuoghaạph phọ ephẹn phọ, yira kooḅeghiọn ipẹ yira kotue bọ omeerạ giph. Yira kooḅeghiọn kẹn oogh areten dị aSetan rakparaghạ ghan odughe aḍimheerạ phọ ayira r’idị yira kotue okel ikuph phọ odị.
IKA KỤ EDỊ YIRA KOTUE OPAMANHẠM ḌIMHEERẠ PHỌ AYIRA?
3. Eeghe iilhogh Ongoọm-Iilhogh phọ Apelheghiom bọ kụ edi Iiḍighi 15:28, 29?
3 Idiphọ Ongoọm-Iilhogh dị Apelheghiom, aZihova ramiịn ghan ni mọ iilhogh phọ odị eegholhaan ni dị awe konaghanhạn. (Isa. 33:22) Esi omaạm, mem oḅẹl oghiil aKristẹn phọ, aloor phọ repogh bọ ughaạph ni oghol reten dị ewạ mọ onyọ aKristẹn amheerạ giph: (1) esi ooseeny ogina aZihova, kụ oghel ooḅereghị ikaanheẹn araraạr, (2) esi onhaghanhạn olhogh phọ aZihova mọ iḅaạl eḍighi iyaạr iigbia, ḅilhẹ (3) r’esi odaphạn Itọ phọ aZihova ilọ orolhạn esi dị u/ḅaạl. (Bạl Iiḍighi 15:28, 29.) Ika kụ edị aKristẹn rodon kotue opamanhạm ḍimheerạ phọ abidị ilọ iraạr phọ araraạr phọ iphẹn phọ?
4. Ika kụ edị yira kotue ongọ aZihova iiḅereghị dị i/dia? (Ogananami 4:11)
4 Yira rooḅereghị ghan ogina aZihova, kụ yira okel ooḅereghị ikaanheẹn araraạr. AZihova atọ aḅenhị we phọ Izrạl mọ ooḅereghị ghan ogina odị bịn. (Deut. 5:6-10) Mem mọ Eru phọ edẹgh bọ Zizọs ephogh, odị aḅẹm mọ aZihova bịn kụ ogina oye dị akpẹ ooseeny. (Mat. 4:8-10) Esi iduọn phọ, yira roo/ḅereghị ghan ikaanheẹn araraạr. Yira kẹn roo/seeny ghan we—mughumọ abuḍiemiom aruukụ iiḅereghị, buọ itooghị phọ, obobọ abunhọn dị oolheghaan—yira roo/ḅereghị ghan bidị idiphọ arumhụgh. Yira odi gạ aZihova kụ odị bịn kụ edị yira rooḅereghị ghan loor esi dị odị kụ alhẹm “oomo araraạr.”—Bạl Ogananami 4:11.
5. Uḍighi ika kụ yira rodạph ghan bọ olhogh phọ aZihova egbolhomaam bọ ghuḍum r’iḅaạl?
5 Yira opamhanhạm olhogh phọ aZihova mọ iḅaạl r’aghuḍum iyaạr iigbia. Eeghe kụ iḍighi? Loor esi dị aZihova aḅẹm mọ iḅaạl emeerạ esi aghuḍum, eḍighi bọ imạ inmo dị eḍuạ esi odị kụ eru. (Lev. 17:14) Mem mọ aZihova aḅẹm bọ mọ awe omhiigh obạ inhạm, odị atọ ni mọ bidị iḅaạl ku/bạ. (Gen. 9:4) Odị aḅilhẹ ni aghaạph ilọ iphẹn phọ siphẹ olhogh phọ odị angọ bọ we phọ Izrạl. (Lev. 17:10) Mem oḅẹl oghiil aKristẹn phọ, odị anyu ni loor phọ repogh bọ otọ mọ oomo aKristẹn “oghel . . . iḅaạl.” (Iiḍighi 15:28, 29 NWT) Yira rodạph ghan ni olhogh phọ ophọn phọ mem dị yira rosopha odọ arookonhom dị yira kosighẹ.b
6. Eeghe ikuph kụ edị yira rolọgh ghan orọl r’asiigbu phọ aZihova?
6 Yira roḍighi ghan ni oomo ilọ yira kotue ophamhanhạm asiigbu phọ aZihova. (Hib. 13:4) Esi oghaạph omaaniọm, otelhedom mọ aPọl uroma iyira mọ “ipueghị, eroḅoIoghi” riisi aloor phọ anyinha—iduọn phọ pọ, oḍighi oomo ilọ yira kotue osiemhi eekunha ikarạph aruuphuạ phọ ayira. Yira okel ophogh ghan obobọ oḍighi ghan araraạr dị kekọm ipesi. (Kọl. 3:5; Job 31:1) Mem dị yira osoman odẹgh ophogh, yira rokem ghan ni kokpor ogbolhẹ torobọ iitughiạn obobọ eḍighinhom iyaạr dị keepụ siya phọ ayira r’Enhaạn.
7. Eeghe kụ edị yira kosopha oḍighi, kụ eeghe kụ iḍighi?
7 AZihova rawạ mọ yira onhaghanhạn nyodị ‘r’oomo ologhi ayira.’ (Rom. 6:17) Iiḅakiọm mọ odị eḍighi ilọ asuọ ayira, kụ yira ko/tue onme iilhogh phọ odị. (Isa. 48:17, 18; 1 Kọr. 6:9, 10) Yira rolọgh ghan ni ikuph oḍighi idị keḅeraạn aZihova ḅilhẹ r’omhoọgh eniin ephoghom mọ okọ suọr pho amhoọgh bọ kụ agbeelhom bọ mọ: “Mị maḅẹm mọ mị kaako ghan iilhogh phọ anạ, tutụ eteẹny ḍio aḍuugh phọ amhị.” (Ps. 119:112) Toroboiperolbọ, aSetan kakparaghạ ni odughe aḍimheerạ phọ ayira. Ika kụ edị odị raḍighi ghan bọ iduọn phọ?
IKA KỤ EDỊ ASETAN RAKPARAGHẠ GHAN ODUGHE OSOPHA PHỌ AYIRA?
8. Ika kụ edị aSetan raḍighinhom ghan igbiphoghọm odughe osopha phọ ayira?
8 Igbiphoghọm. Eru phọ rasighẹ ghan ni iigamaniạn ḅilhẹ r’inyuughiom kaḍighinhom odughe osopha phọ ayira. Aḍiigbu odị pọ “aạny” ayira, ophiemhi asiya phọ ayira r’aZihova. (1 Pit. 5:8) Upaarọgh ni, okuphogh, oḅilhẹ ozẹ Kristẹn oḅẹl okuron asiạ phọ, loor osopha ophamhanhạm aḍimheerạ phọ abidị. (Iiḍighi 5:27, 28, 40; 7:54-60) ASetan akị ni ghisigh asighẹ raḍighinhom igbiphoghọm rodon. Iphẹn phọ ekạr kụ eganana esi igbiphoghọm mọ abumor r’abumaranhi phọ ayira osoman bọ epẹ Russia ḅilhẹ r’inhọn areelhe. Kụ abunhọn rogbiphoghọm kẹn ni bumor r’abumaranhi phọ.
9. Kaạph amaaniọm iyaạr phọ ewạ bọ mọ ogona loor esi iikelheghian.
9 Ikpaarioghọm. Etigheri igbiphoghọm, aSetan raḍighinhom ghan kẹn ni “ikeḍi.” (Efẹ. 6:11) Omhiịn idị emitenhaan umor phọ Bob, odị amheel li e/moon dị emhoghi mọ aạy nyodị. Kụ odị aḅenhị riil arookonhom mọ m’iḅaạl nyinhọ ku/lọgh. Kụ oyil arookonhom mọ amheera ni otuụgh oḍighi ipẹ aBob aghaạph bọ. Kuolọ, ḍughul phọ aḍiphẹ eḅaạl kobaạy bọ nyodị, onhọn oyil arookonhom mọ aru ni ateẹny Bob mem dị abuọ eghunotu phọ odị mogheel. Odị aḅenhị Bob mọ obọ ko/lọgh nyodị iḅaạl kuolọ mọ bidị kopạm ni iḅaạl phọ otumom, ro/legheri ghan bọ. Eeni oyil arookonhom mọ aatughiạn mọ eeni aBob kanme ni olhoghi odị siẹn abuọ eghunotu phọ odị u/lo bọ r’odị. Kuolọ aBob aphamhanhạm ni ḍimheerạ phọ odị, kụ odị aghaạph akparamhị mọ r’amem r’amem oye nyinhọ iḅaạl ku/lọgh.
10. Uḍighi ika kụ iitughiạn awe aḅirinhi phọ eḍighi bọ ḍiphil? (1 Korịnt 3:19, 20)
10 Iitughiạn awe aḅirinhi phọ. Yira omhoọgh iitughiạn awe phọ abuphẹ oghel bọ siigbu phọ aZihova pọ yira kẹn komiigh aani kẹn ni oghel asiigbu phọ aZihova. (Bạl 1 Korịnt 3:19, 20.) “Olegheri iyaạr” aḅirinhi phọ ophọn phọ ranyu ghan we oḅaạr emhụ oghị esi aZihova. Abuniin aKristẹn epẹ Pagamom r’aTiatira umheel li oḍighanhaan ikarạph iiḅereghị ikaanheẹn araraạr ḅilhẹ r’adọl ipesi awe emhạ phọ epẹ phọ. AZizọs aḅaạm ni eten dị egbagarạ iyạl phọ arookpomhoghan phọ ipẹ phọ loor iduọn bidị oḅoronhom bọ ipesi. (Ogan. 2:14, 20) Rodon, yira osoman ni inyuughiom ikarạph ephoghom araraạr. Abuọ eghunotu ayira r’arighirị otue ni ukpaariọm iyira ootughiạn mọ yira ko/tue odaphạn siigbu phọ aZihova, mọ iilhogh phọ odị ipel iyira loor ooko. Esi omaạm, bidị otue ni oḅẹm mọ i/beeph orọl adọl ipesi ḅilhẹ mọ asinhị iilhogh aBaibul phọ i/moọgh mun iyaạr oḍighinhom.
11. Eeghe kụ edị ewạ mọ oghel, iduọn yira omheerạ bọ giph?
11 Eeni amem, yira otue ni ootughiạn mọ iiḅakiọm mọ rongọ ghan bọ ii/gholhaan agey onhaghanhạn ḅilhẹ r’odaphạn. Eeni yira otue kẹn ni osoman odẹgh ophogh ‘o/tenom ghan okụ.’ (1 Kọr. 4:6) Abuḍiemiom aruukụ iiḅereghị phọ orọl bọ siḍio phọ aZizọs usoor ri olhogh phọ ophọn phọ. Bidị usighẹ ghan iilhogh ilọ abidị oḅarạm ghan iilhogh phọ Enhaạn bịn eḍighi idị ekparanhaạn we phọ ooko. (Mat. 23:4) AZihova rungọ ghan iyira iiḅakiọm dị eegholhaan dị eego esi Ekpo Onhụ phọ odị ḅilhẹ r’oḍighom mọ. Yira u/moọgh ephigh otuạn oḅarạm iyaạr siphẹ itọ phọ aZihova. (Prov. 3:5-7) Esi iduọn phọ, yira ro/ḍighi ghan kopeelhe ipẹ ogẹ bọ siphẹ aBaibul phọ obobọ kolhoghoḍị iilhogh ilọ ayira dị abumor r’abumaranhi phọ kodaphạn.
12. Ika kụ edị aSetan rasighẹ ghan kaḍighinhom ‘iikeleghian’?
12 Iikelheghian. ASetan rasighẹ ghan ni kaḍighinhom ‘iikeleghian’ ḅilhẹ “r’itughemị eghoroghọr” aḅirinhi phọ kaakelheghiom aḅilhẹ akọm madia igbo awe. (Kọl. 2:8) Siphẹ oḅẹl okuron asiạ phọ, iikelheghian phọ iphẹn phọ iḅaramaạm ni olhegheri iyaạr aḅirinhi phọ, itughemhị abuọ aJu phọ dị i/moọgh muḅọph r’aBaibul phọ, ḅilhẹ r’itughemhị phọ mọ aKristẹn omoọgh odạph Olhogh phọ aMozis. Iphẹn phọ iḍighi iikelheghian loor esi dị esighẹ we eḍuanhạm esi azin osụ-olhoghi phọ, Zihova. Rodon aSetan asighẹ ni igbe iinhaghạn phọ ḅilhẹ r’intanẹt phọ k’alheenye iinhaghạn dị i/tu inẹ dị eḍuạ esi abuọ itooghị phọ. Yira ukạr kụ omhiịn iphẹn phọ mem ezẹgh aKOVID-19 phọ.c Abugbaanhaạn AZihova odaphạn bọ iiḅakiọm oḍighom mọ, ukpetenhaan ni oboom ooḅaghamhiạn aloor phọ abuphẹ olher bọ rurụ ongọ iinhaghạn dị i/tu inẹ omhoọgh bọ.—Mat. 24:45.
13. Uḍighi ika kụ emhoghi bọ dị yira kogona loor esi araraạr dị kigbaragbaramhị iyira?
13 Araraạr dị ketue egbaragbaramhị oye. Ewạ mọ yira ‘osọn ghan ipẹ esooran bọ.’ (Fil. 1:9, 10) Araraạr dị kigbaragbaramhị iyira etue ni esighẹ muboom amem ḅilhẹ r’inyaạm dị yira omhoọgh oḍighinhom iphigh araraạr dị kingọ iyira suọ. Oopho araraạr—idiphọ olhe eḍien, ophughọl amiim, oozaghamiạn aloor, ḅilhẹ r’oḍighi ayira—etue ni igbaragbaramhị iyira eḍighi iyaạr dị yira ogbon bidị idiphọ ikpanhạ araraạr siphẹ aghuḍum mọ ayira. (Luk 21:34, 35) Oḅarạm isiphẹ, torobọ aḍio yira ronaghạn ghan ni ibadị iinhaghạn ilọ igiri e/meera r’araghaạph ilọ imirighan itooghị. Ku/meera mọ iphẹn phọ igbaragbaramhị iyira. Iduọn kụ i/lo, yira otue ni oḍigh agạ siphẹ ekpom mọ ḅilhẹ r’olhoghi phọ ayira. ASetan rasighẹ ghan oomo phọ areten phọ iphẹn yira moghaạph bọ oghol kaḍighinhom odughe osopha phọ ayira oḍighi ipẹ enhighẹ bọ. Ooḅeghiọn nyiidiphọ idị yira kotue okel ikeḍi phọ odị kụ omeerạ gbakikiph.
IKA KỤ IDỊ YIRA KOKIỌM GHISIGH OMEERẠ OMIIGH?
Orue omheerạ omhiigh, tuutughiạn ilọ oḅọgh aloor phọ ḅilhẹ r’oḍiiny amuụm mọ anạ, tuughạ ghan Ekpo Onhụ phọ Enhaạn kụ agbirima ghan ipẹ nạ aạl bọ, moọgh ekpom dị emhiigh kụ aḍuom olhoghi aZihova (Miịn siikpịgh phọ 14-18)
14. Eeghe kụ eniin iyaạr dị kilhoghonhaạn iyira ḍighaạgh orọl agạ aZihova?
14 Tuutughiạn ilọ oḅọgh aloor phọ r’oḍiiny amuụm mọ anạ. Nạ ugbariọn radạ phọ iphẹn loor esi dị nạ uwạ omheerạ r’aZihova. Tuutughiạn iyaạr phọ elhoghonhaạn bọ nyinhạ ḍighaạgh okuphom owol mọ iphẹn kụ igey phọ. Nạ urue ni alhegheri aZihova, kụ iphẹn phọ ebughẹ eegu phọ ḅilhẹ r’ephomhoghiạn phọ nạ amhoọgh bọ aghị esi Odẹ k’akẹ phọ anạ. Kụ nạ aru amhoọgh omheeraam, kụ ipẹ phọ enyu nyinhạ okiton. Kụ ekpom anạ enyu nyinhạ oghel ikarạph iḍighinhom araraạr kụ oghị aghisigh orọl adọl dị emhoọgh muḅọph r’arigbiom mọ aZihova. Kụ olhoghi anạ aphooph ni mem mọ nạ aru bọ alhegheri mọ Enhaạn masạr ikarạph phọ anạ awilhenhaạn nyinhạ. (Ps. 32:1, 2) Kụ nạ amhiigh oghị ituughạ r’oḅilhẹ oghaạph oḅenhị aani abunhọn ilọ iikiạ araraạr phọ nạ matuughạ bọ. Idiphọ onyọ aKristẹn dị maḅọgh loor angọ aḅilhẹ aḍiiny muụm, nyiidiphọ nạ ratelhe eten aghuḍum mọ, kụ nạ aḅilhẹ asopha mọ nạ ka/bilhẹ eten phọ ephẹn phọ.—Mat. 7:13, 14.
15. Eeghe asuọ kụ odi esi aạl ghan r’oḅilhẹ ogbirima?
15 Tuughạ Ekpo Onhụ phọ Enhaạn kụ aḅilhẹ agbirima ipẹ nạ atuughạ bọ. Idiphọ asinhị dị eghị ude reloghonhaạn ghan bọ ḍighaạgh oreeny omheerạ omhiigh, kụ edị omheeraam dị akpạr esi aZihova, katue ulhoghonhaạn iyira ḍighaạgh orue omheerạ omhiigh. Oreeny phọ rapoph, asinhị phọ reḍigh ude keḅilhẹ erarạ. Mem dị yira otuughạ oḅilhẹ ogbirima, rekparamhị ghan omheeraam mọ ayira keḍiinyemhi okuphom owol phọ ayira mọ areten phọ Enhaạn kụ inhighẹ epeleghiom. (Kọl. 2:6, 7) Tuutughiạn ipẹ iromoghiom, iiḅakiọm, ḅilhẹ r’oghoph phọ aZihova elhoghonhaạn ḍighaạgh rebenhẹ phọ odị epẹ omhạn. Esi omaạm, Ezekiel akiririom ni aphogh ghan mem mọ ookpaạny phọ amhiigha bọ loor ratooghị otu iiḅereghị phọ pạ uḍien phọ. Uḍien phọ ophọn phọ akparamhị ni Ezekiel, kụ itughemhị iyira ilọ olhom ogheelhom asiigbu phọ aZihova ilọ iserereẹny iiseeny.d (Ezek. 40:1-4; 43:10-12) Yira kẹn romooghọm aani ghan ni suọ mem dị yira olhọgh mem otuughạ oḅilhẹ ogbirima ilọ araraạr ibooghiạn phọ edi bọ Ekpo Onhụ phọ Enhaạn.
16. Ika kụ edị ekpom dị emhiigh eghoph Bob? (Psalm 112:7)
16 Moọgh ekpom dị emhiigh. Uw-emhạ phọ Devid agbeelhom mọ onọ ka/toph ephomhoghiạn phọ odị amhoọgh bọ aghị esi aZihova mem mọ odị amhoọr bọ mọ: “Mị amoọgh oḍuom-ologhi dị amunughan, Sey Enhaạn.” (Ps. 57:7) Yira kotue ni omoọgh aani odọ ekpom dị emhunhughan iduọn phọ, kụ okpasị oomo oḍuomolhoghi phọ ayira esi aZihova. (Bạl Psalm 112:7.) Ooḅeghiọn idị iphẹn phọ elhoghonhaạn ḍighaạgh Bob phọ oghaạph bọ oghol epẹ omhạn. Mem mọ oḅenhị bọ nyodị mọ koseere ni iḅaạl phọ ogbạl loor iduọn ro/legheri ghan bọ, odị aagboronhom ni aphagharanhaạn mọ odị kaḍuạ ni otu arookonhom mọ opọ phọ eḍighi iyaạr dị bidị ookolhobian olhọgh odị iḅaạl. Ipẹ reten aBob aḅẹm mọ, “iyaạr imhị i/kikima ḅilhẹ mị u/moọgh kẹn ooḅaghamhiạn aloor.”
Eḍighi maạr dị yira omhoọgh omheeraam dị akpạr, pọ yira kokị ni ghisigh opamanhạm ḍimheerạ phọ ayira mem dị yira osoman odẹgh ophogh (Miịn ekpịgh phọ 17)
17. Eḍeenhaan phọ aBob itughemhị iyira eeghe? (Miịn kẹn afoto phọ.)
17 ABob arue ni amhoọgh ekpom dị emhiigh, loor esi dị odị masopha ophamhanhạm aḍimheerạ phọ odị kụ agbi bọ oghị otu arookonhom mọ. Eḅẹl phọ, odị awạ ghan oḍighi idị olhoghi aZihova kaḅaạl. Omhunhenhiom iyạl, odị amhiigha ni loor atuughạ ipẹ aBaibul phọ r’arinyạ ookpomhoghan phọ eghaạph bọ mọ aghuḍum r’iḅaạl eḍighi ilọ iigbia. Omhunhenhiom iraạr, odị akuphom owol mọ odaphạn itọ phọ aZihova kụ kengọ nyodị suọ eekunha phọ. Yira kotue kẹn ni omoọgh aani ekpom dị emhiigh etigheri odẹgh ophogh dị yira osoman.
R’akpọ oḅio aBarak r’ awe eghạm mọ odị roporogh ghan we eghạm mọ aSisera (Miịn ekpịgh phọ 18)
18. Ika kụ edị eḍeenhaan phọ aBarak itughemhị iyira oḍuom ghan olhoghi aZihova? (Miịn afoto oḅẹl opoḍi phọ.)
18 Ḍuom olhoghi aZihova. Ooḅeghiọn idị oḍuom olhoghi iiḅakiọm mọ aZihova engọ Barak suọ. Ghalhamọ r’iduọn bidị u/moọgh bọ ni isuarạm, isọph, obobọ inhọn araraạr eenhom eghạm, aZihova aḅenhị ni Barak mọ aghị eenhan oḍiemiom eghạm mọ aCanaan Sisera r’awe eghạm mọ odị omhooghọgh bọ ibadị araraạr eghạm. (Judg. 5:8) Kụ oyil-anhịr phọ Debora aḅenhị Barak mọ, odị asoor siphẹ eegum mọ aghị ateẹny Sisera r’900 arughuugh eghạm mọ odị. Kụ ghalhamọ r’iduọn ude eegum mọ kedughanhaan bọ ni rughuugh phọ iphẹn phọ oghiil loor iduọn eyaghaghạ bọ, aBarak adaphạn ni itọ phọ. Iduọn aBarak r’awe eghạm mọ odị rosoor bọ Eegum mọ aTabor, aZihova aḍighi ni idị ogbogh olophiạ amhiigh olhọph. Bịn arughuugh eghạm mọ aSisera eḅiighi siphẹ ooghạ phọ, bịn aZihova aḍighi idị aBarak akpạr apu. (Judg. 4:1-7, 10, 13-16) Eniin phọ eten phọ kẹn, aZihova kungọ ni iyira okpạr opụ eḍighi iyaạr dị yira oḍuom nyodị olhoghi kụ odaphạn ghan iiḅakiọm mọ odị rungọ ghan bọ iyira dị eego esi oḍighom mọ odị.—Deut. 31:6.
SOPHA OGHỊ AGHISIGH OPHAMHANHẠM AḌIMHEERẠ PHỌ ANẠ
19. Uḍighi ika kụ nạ kapamanhạm bọ ḍimheerạ phọ anạ?
19 Yira komoọgh ghan ni ipaanhaạn ophamhanhạm aḍimheerạ phọ ayira loor iduọn yira odi bọ siḍio aruukunha phọ. (1 Tim. 6:11, 12; 2 Pit. 3:17) Omhiịn mọ igbiphoghọm, ikpaarioghọm, iitughiạn awe aḅirinhi phọ, iikelheghian, ḅilhẹ r’araraạr dị regbaragbaramhị ghan we iyira i/phighemhi. (Efẹ. 4:14) Kparipẹ ghụn, omheerạ omhiigh, kụ oghị ghan ghisigh ophomhoghiạn oḅilhẹ onhaghanhạn ghan aZihova. Eniin phọ amem mọ, ewạ ni mọ yira oḍeenhaan ghan onhaghanhạn aḍughụm. Siphẹ emhuoghaạph phọ etum bọ siẹn, yira kooḅeghiọn emạ eḍeenhaan phọ aZihova r’aZizọs ilọ oḍeenhaan ghan onhaghanhạn aḍughụm.
AḌUỌR PHỌ 129 We Will Keep Enduring
a K’orụgh Adạm r’Iv, kụ edị aSetan rakparaghạ ghan oḍighi idị omhạr awe komeeraam mọ bidị kụ umhoọgh elhiom osopha ghan idị eru igey r’ikarạph. Odị rawạ mọ yira omhoọgh odọ aḍiitughiạn phọ aḍiphẹ phọ oghị esi iilhogh phọ aZihova ḅilhẹ r’iiḅakiọm oḍighom mọ. Emhuoghaạph phọ ephẹn phọ kilhoghonhaạn iyira ḍighaạgh omhiịn mọ yira u/kel iilhogh phọ aZihova idiphọ abumatuạn phọ aSetan. Kekparamhị kẹn osopha phọ ayira oghị aghisigh onhaghanhạn ghan aZihova.
b Olhegheri obughẹ idị onyọ aKristẹn katue apamanhạm olhogh phọ Enhaạn ilọ iḅaạl, pọ miịn esi ituughạ phọ 39 siphẹ aḍinyạ phọ Kelhọm Ghuḍum K’agee-pọ!
c Kiạ siphẹ jw.org amhiịn emhuoghaạph phọ “Protect Yourself From Misinformation.”
d Olhegheri obughẹ, miịn rumhuoghaạph phọ 13 r’14 siphẹ aḍinyạ phọ Pure Worship of Jehovah—Restored At Last!