Novemba

Ka in lanyodo, kony lutinoni me yubo lagam ma rwatte ki mwakagi. I kare mukene, kinyamo lok madongo, calo peko ma tye i nyom nyo tim carocaro, ento pud itwero nongo paragraf acel nyo aryo ma latin twero lok iye. Medo i kom meno, kony lutinoni me niang pingo pe kitwero cimogi kare ducu ka guilo cinggi. Tito jami magi twero konyogi pe me bedo ma cwinygi otur ka kiyero jo mukene i cawa ma nongo gin guilo cinggi. (1 Tem. 6:18) Wan ducu watwero yubo lagam ma kelo deyo bot Jehovah dok cuko cwiny Lukricitayo luwotwa. (Car. 25:11) Kadi bed kicel kicel watwero tito gin mo mutimme i kwowa, myero wagwokke ki lok tutwal i komwa kekenwa. (Car. 27:2; 2 Kor. 10:18) Me ka meno, watute me keto tamwa i kom Jehovah, Lokke, ki jone.—Yabo 4:11. w23.04 24-25 ¶17-18

Mar bene mitte adada wek wabed ma wangwa twolo kun wagwokke. (Mat. 22:​37-39) Mar pi Lubanga konyowa me diyo cwinywa i tic me tito kwena kadi bed timo man twero kelo ayela i komwa. (2 Tem. 1:​7, 8) Kit macalo wanyuto mar kadiwa bot jo ma pe gitiyo pi Jehovah, wamedde ki tito kwena kun bene wamiyo caden ki cim kacel ki coyo waraga. Wamedde ki bedo ki gen ni nino mo dano giromo lokke ci gicako timo gin ma atir. (Ejek. 18:​27, 28) Marwa pi luwotwa kwako maro Lukricitayo luwotwa. Wanyuto mar meno ki ‘cuko cwinywa kekenwa, dok wakonnye bene kekenwa wek wadong i cwinywa.’ (1 Tec. 5:11) Calo lumony ma gitye ka lweny cok ki luwotgi, wacuko cwiny luwotwa. Wan pe wacwero cwiny omegiwa ki lumegiwa akaka dok pe waculo wang gin marac ki gin marac. (1 Tec. 5:​13, 15) Wanyuto bene marwa ki woro omege ma gidoro kacokke.—1 Tec. 5:12. w23.06 10 ¶6; 11 ¶10-11

Yo acel ma watwero jingo kwede niyewa aye obedo ki lwodo lok i kom ginkok. Ginkok moko botwa ni cikke pa Lubanga bicobbe. Ka watamo matut i kom tyen lok ma oweko kimiyo ginkok, ki kit ma Jehovah ojalle kwede, wajingo niyewa ni cikke pa Lubanga pi kwo ma pe tum i lobo manyen wang ma ocobbe. Pingo wawaco kit meno? Ngo ma Jehovah ojalo? Jehovah ocwalo latin Kayone ma en maro dok ngat macok kwede loyo ki i polo wek kinywale macalo dano ma pe ki roc. I kare ma Yecu tye i lobo, en ociro kwai pekki mapatpat. Lacen, en odeno can dok oto to malit adada. Jehovah pud dong oculo wel madit ya! Lubangawa ma lamar-ri onongo pe biye ni Wode oden can dok oto wek wabed mere ki kwo maber pi kare manok keken. (Jon 3:16; 1 Pet. 1:​18, 19) Pien Jehovah omiyo Wode me amara me konyowa, En bineno ni otwere piwa me kwo pi naka i lobo manyen. w23.04 27 ¶8-9

Tika Jehovah tye ki miti me cero jo muto? Labongo akalakala mo keken, en tye ki miti. En oweko luco Baibul mapol gucoyo pi cikkene me nicer ma bitimme i anyim. (Ic. 26:19; Yabo 20:​11-13) Dok ka Jehovah ocikke me timo gin mo, en bicobone bene. (Yoc. 23:14) Ki lok ada, Jehovah tye ki miti me cero jo ma guto. Tam kong i kom lok ma Yubu owaco. En onongo tye ki gen ni kadi bed eto, Jehovah bibedo ki miti me nene doki. (Yubu 14:​14, 15) Jehovah bene winyo kit meno i kom luticce ducu ma guto. En tye ki miti madwong me dwokogi cen i kwo, ma nongo komgi yot dok cwinygi yom. Jehovah winyo nining i kom dano bilion mapol ata ma guto labongo nongo kare me pwonyo lok ada madok i kome? Lubangawa ma lamar-ri mito cerogi bene. (Tic 24:15) En mito ni gunong kare me doko lureme wek gunong kwo ma pe tum i lobo.—Jon 3:16. w23.04 9 ¶5-6

Itwero jingo genni nining? Me labolle, ka itye ki gen me kwo pi naka i lobo, kwany kare me kwano kacel ki lwodo lok ma Baibul tito i kom Paradic. (Ic. 25:8; 32:​16-18) Tam i kom kit ma kwo bibedo kwede i lobo manyen. Go ni dong itye kunnu. Ka kare ducu wakwanyo kare me goyo i wiwa kit ma kwo bibedo kwede i lobo manyen, ci wabiwinyo calo pekkiwa “pe pek, bedo pi kare manok mo keken.” (2 Kor. 4:17) Gen ma Jehovah omini twero konyi me ciro peko. En dong otyeko mini jami ducu ma mitte wek inong teko ki bote. Dong ka imito teko me cobo tic ma itye kwede, me ciro peko mo, nyo me medde ki bedo ki yomcwiny, leg bot Jehovah dok itim kwed piri keni me nongo kony. Jol cuko cwiny ma a ki bot omege ki lumege. Bed ka kwanyo kare me tam i kom genni pi anyim. Ka itimo jami magi, ci ibinongo ‘teko ducu ma rwatte ki twero me deyone [Lubanga], wek icir can ducu kun idiyo cwinyi i yo ducu ki yomcwiny.’—Kol. 1:11. w23.10 17 ¶19-20

Watye ki tyen lok mapol me miyo pwoc bot Jehovah i legawa. Watwero pwoye pi gin mo keken maber ma watye kwede, pien mic ducu mabeco gia ki bot Jehovah. (Yak. 1:17) Me labolle, watwero nyuto pwocwa pi kit ma lobo nen kwede mamwonya, kacel ki cwec ducu maleng mapatpat. Watwero bene pwoye pi kwowa, lupacowa, luremwa, kacel ki gen ma watye kwede. Dok wamito pwoyo Jehovah pi ye ni wabed ki wat macok kwede. Twero mitte ni watute matek me tam i kom tyen lok ma watye kwede me bedo ki pwoc bot Jehovah. Jo mapol i kare-ni pe gimiyo pwoc. Dano pol kare gitamo keken i kom gin ma gitwero nongone makato tam i kom kit ma gitwero nyuto kwede pwoc pi jami ma gitye kwede. Ka wacako bedo ki tam ma kit meno, ci man twero weko legawa pong ki penyo pi jami ma wamito keken. Wek legawa pe obed kit meno, mitte ni wamedde ki dongo kacel ki nyuto pwoc pi jami ducu ma Jehovah timo piwa.—Luka 6:45. w23.05 4 ¶8-9

Macalo Wonwa ma lamar, Jehovah cwinye pe bedo yom ka watye ka deno can. (Ic. 63:9) Kadi bed kit meno, en pe gengo pekkiwa ducu, ma Baibul poro ki pii ma i kulu nyo leb mac. (Ic. 43:2) Ento, en ocikke ni ebikonyowa ka ‘watye ka wok’ ki i pekki magi. Dok kadi bed wakat ki i peko ma nining i kare-ni, en bineno ni wagwoko watwa kwede obedo matek. Jehovah bene miniwa cwiny mere maleng me konyowa me ciro pekki. (Luka 11:13; Pil. 4:13) Macalo adwogine, watwero bedo ki gen ni kare ducu wabibedo ki gin ma mitte kikome me kanyo pekki ki me medde ki bedo lugen bote. Jehovah mito ni wagene. (Ibru 11:6) I kare mukene, pekkiwa twero nurowa adada. Watwero bene cako bedo ki akalakala ka ce Jehovah bikonyowa. Ento Baibul cuko cwinywa ni ki teko pa Lubanga, watwero ‘kalo wi cel.’ (Jab. 18:29) Dong me ka weko akalakala magi bedo ka dongo i cwinywa, omyero waleg ki niye matek kun wageno ni Jehovah bigamo legawa.—Yak. 1:​6, 7. w23.11 22 ¶8-9

Man pud dong obedo lwod mamwonya ya me tito gin ma mar obedo! Lok ma i Ginacoya man tye me cuko cwiny bot jo munyomme: Wutwero bedo ki mar ma pe gik i kinwu. Mitte ni jo munyomme gutute matek me mare i kingi pi kare me kwogi ducu. Me labolle, mac me wang oo twero medde ki lyel pi naka keken ka ngat mo tye ka cwakone. Ka ngat mo pe obedo ka timo meno, ci mac meno to woko. Kit meno bene, mar ma tye i kin laco ki dakone twero medde ki bedo matek ka gijingo wat i kingi. I kare mogo, jo munyomme gitwero winyo ni margi tye ka kwe woko, tutwalle ka gitye ka kato ki i peko me can lim, two, nyo lyeto me gwoko lutino. Pi meno, me weko “leb mac pa Jehovah” medde ki lyel, laco ki dakone omyero gutute me bedo ki wat matek ki Jehovah. w23.05 20-21 ¶1-3

Me dongo tekcwiny, ngo ma myero watim? Lunywalwa gitwero cuko cwinywa me bedo ki tekcwiny, ento pe gitwero miniwa tekcwiny calo obedo ginaleya. Dongo tekcwiny tye calo dongo diro manyen. Yo acel ma itwero dongo kwede diro meno aye ki neno gin ma lapwonyi timo ci iporo lanenne. I yo acel-lu, watwero pwonnye me nyuto tekcwiny ki neno kit ma jo mukene ginyuto kwede kit man kun walubo lanengi. Calo Daniel, mitte ni wange Lok pa Lubanga maber. Omyero wabed ki wat macok ki Jehovah kun waloko kwede kare ducu dok watite gin ma tye i cwinywa. Dok mitte ni wagen Jehovah, kun wamoko ni kare ducu en bikonyowa. Dong kadi bed kitem niyewa, wabibedo ki tekcwiny. Jo ma ginyuto tekcwiny pol kare ginongo woro ki bot jo mukene. Gin bene giromo konyo jo mukene me ngeyo Jehovah. Ki lok ada, watye ki tyen lok mabeco me dongo tekcwiny. w23.08 2 ¶2; 4 ¶8-9

Nyig lok me leb Grik ma kigonyo ni “wubed ki wang mabit me neno,” onongo kitiyo kwede me tito kit ma dano temo kwede nyonyo calo jabu nyo ryal me moko ni pe kirubo ki nyonyo mukene. Pi meno, mitte ni watem gin ma wawinyo nyo ma wakwano me moko ka tye lok ada. Pire bibedo tek ma loyo piwa ka wawoto ki nyikke cok ki twon can madit atika-ni. Me ka ye jami ducu ma dano waco latowang, watiyo ki niangowa me poro gin ma wakwano nyo ma wawinyo ki gin ma Baibul nyo dul pa Jehovah waco. Ka watimo meno, ci lok goba nyo diro pa cen maraco pe bibwolowa. (Car. 14:15; 1 Tem. 4:1) Macalo gurup, jo pa Jehovah gibibwot ki i twon can madit atika-ni. Ento wan ducu ki acel acel pe wangeyo gin ma bitimme i komwa diki. (Yak. 4:14) Kadi bed kit meno, kadi wakat ki i twon can madit atika ma wakwo nyo wato woko ma pudi, Lubanga biminiwa mot me kwo ma pe tum ka wamedde ki bedo lugen. Walego ni wan ducu waket cwinywa i kom genwa mamwonya-ni dok wabed ma wayubbe pi nino pa Jehovah! w23.06 13 ¶15-16

Pe wangeyo kit ma lok pa lunebi mogo me Baibul bicobbe kwede kikome. (Dan. 12:​8, 9) Ento kadi bed pe waniang maber kit ma lok pa lanebi moni bicobbe kwede, meno pe tyen lokke ni pe bicobbe. Watwero bedo ki gen ni Jehovah bikonyowa me niang gin ma myero wange i cawane kikome, kit ma en obedo ka timo kwede i kare mukato angec. Lobe gibimiyo lok angeya ni, “kuc tye, piny okwe mot, gin mo marac pe.” (1 Tec. 5:3) I nge meno, gamente ma i wi lobo-ni gibilokke i kom dini goba, ci gijwero woko. (Yabo 17:​16, 17) Ka dong, gibioto lweny i kom jo pa Lubanga. (Ejek. 38:​18, 19) Jami magi aye bitugo lweny me agikki ma kilwongo ni Armagedon. (Yabo 16:​14, 16) Watwero bedo ki gen matek ni jami magi bitimme macok cok-ki. Ka wawoto ki kuro kare meno, wamedde wunu ki nyuto pwocwa bot Wonwa me polo ki keto cwinywa me niang lok pa lunebi me Baibul kun bene wakonyo jo mukene me timo meno. w23.08 13 ¶19-20

I kare ma lakwena Paulo obedo ka nyamo lok madok i kom niye, gen, ki mar, en odolo te lokke ki waco ni, “[kit] ma pire dit ma katogi ducu en aye mar.” (1 Kor. 13:13) Pingo Paulo owaco kit meno? I kare me anyim, pe dong bimitte ni wabed ki niye i kom cikke pa Lubanga ma kwako lobo manyen pien nongo jami ma wabedo ka genogi dong gucobbe woko. Ento kare ducu bimitte ni wabed ki mar pi Jehovah ki pi dano. Ki lok ada, marwa pigi bimedde ki dongo pi naka. Medo i kom meno, ka wamaro utmegiwa, wanyuto ni wabedo Lukricitayo me ada. Yecu owaco bot lukwenane ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) Medo i kom meno, nyuto mar pi luwotwa konyowa me bedo ma waribbe. Paulo owaco ni mar “tweyo jami ducu, ribogi kacel.” (Kol. 3:14) Lakwena Jon ocoyo bot luye luwote ni: “Dano ma maro Lubanga myero omar ominne bene.” (1 Jon 4:21) Ka wanyuto mar pi luye luwotwa, wanyuto bene ni wamaro Lubanga. w23.11 8 ¶1, 3

Baibul oporo kwowa macalo Lukricitayo ki pyem ngwec. Lungwec ma gityeko ngwec man maber gibinongo mot me kwo ma pe tum. (2 Tem. 4:​7, 8) Myero watute matek me medde ki ngwec, tutwalle kit macalo dong watwero neno dog tol-li. Lakwena Paulo otitiwa gin ma bikonyowa me cobo ngwecwa. En otitiwa ni omyero “wabolu gin mogo mapek-gu woko ducu, . . . wek waringu dong ngwec pyem ma tye i nyimwa, kun waciro.” Tika onongo Paulo tye ka waco ni pe tye yec mo keken ma Lakricitayo myero oting? Pe. Me ka meno, en onongo tye ka waco ni myero wabol yec mo keken ma pe mitte. Kodi yec meno twero gengowa ki ngwec maber dok weko waol woko. Me medde ki ngwec, omyero waniang oyotoyot ka watye ka tingo kodi yec meno ci wabol woko cutcut. Ento ki tungcel, pe wamito bolo jami ma myero wating. Ka watimo man, ci pe kibiye ni wamedde ki ngwec.—2 Tem. 2:5. w23.08 26 ¶1-2

Nyuto niango bene konyowa me woro tam pa jo mukene. Me labolle, lumegiwa mukene gimaro wero doggi ento mukene pe gimaro. Lukricitayo mogo gimato kongo i yo mupore, ento mukene giyero pe me matone kulu. Lukricitayo ducu gitye ki miti me bedo ma komgi yot ento giyero yo mapatpat me nongo cango. Ka kare ducu watamo ni tamwa keken aye tye atir dok watemme me diyo omegiwa ki lumegiwa me timo gin ma wamito, man weko wabalo cwiny omegiwa dok wakelo apokapoka i kacokke. (1 Kor. 8:9; 10:​23, 24) Me labolle, Jehovah pe wacciwa kodi bongo ango ma omyero waruki, ento en ominiwa cik ma igi lac me aluba. Omyero warukke i yo ma nyuto ni wan wabedo lutic pa Lubanga, kun nongo wanyuto niango, woro, kacel ki ‘wic ma kwiri.’ (1 Tem. 2:​9, 10) Pi meno, pe omyero warukke i yo ma weko dano giketo tamgi mukato kare woko i kom kit ma wanen kwede. Cik ma igi lac me Baibul bene konyo luelda pe me keto cik ma meggi ka odok i kom cital ruk kacel ki yer wic. w23.07 23-24 ¶13-14

Jehovah onyutiwa kit ma watwero bedo kwede ki anyim ma opong ki yomcwiny. Jo ma gijolo lwongo pa “dako ma laming” giyelle me nongo yomcwiny ki i tim tarwang. I agikkine, ‘gibito giyikogi i lyel.’ (Car. 9:​13, 17, 18) Jo ma gijolo lwongo ma a ki bot dako ma cung pi ‘ryeko me ada’ gibibedo ki anyim mapat! (Car. 9:1) Watye ka pwonnye me maro gin ma Jehovah maro ki me kwero gin ma en dag. (Jab. 97:10) Dok watye ki yomcwiny pien watwero lwongo jo mukene me nongo pwony ki bot ‘ryeko me ada.’ Watye calo lutic ma gitye “ka lwongo dano ki i kabedo ma tye malo twatwal ma i gang madit, kun giwacci: ‘Wubin kany, wun luming!’” Mot ma wan kacel ki jo ma gijolo lwongowa ginongo pe gik i kare-ni. Mot magi rii pi naka, pien ‘wabibedo kwo’ pi naka ka wamedde ki ‘bedo ki niang matut.’—Car. 9:​3, 4, 6. w23.06 24 ¶17-18

Iwinyo nining ka latic lawoti nyo latin kwan lawoti mo openyi lapeny madok i kom niyeni? Tika lworo maki? Pol pa wan wabedo ki lworo manok. Ento lapeny ma kit meno twero konyowa me niang tam nyo niye pa ngat meno, dok miniwa kare me nywako kwede kwena maber. Ento i kare mukene, ngat mo twero penyi lapeny ki miti me pyem nyo laro lok kwedi. Meno pe myero owek wabed ki ur, pien jo mogo nongo guwinyo lok ma pe tye kakare madok i kom niyewa. (Tic 28:22) Medo i kom meno, watye ka kwo i “kare me agikki,” ma pol pa dano ‘pe gilubo cikkegi’ dok gubedo “jo ma ger.” (2 Tem. 3:​1, 3) Itwero pennye kekeni ni, ‘I yo ma nining ma atwero dok iye ki kica kacel ki woro ka ngat mo mito laro lok kweda i kom niyena?’ Ngo ma bikonyi me timo meno? Mwolo aye bikonyi. Ngat mamwol kiniga pe mako oyot dok twero jukke kene ka okemme ki laro lok malyet. w23.09 14 ¶1-2

I kare mukene wanongo tira ki bot dul pa Jehovah ma gwokowa. Me labolle, kicikowa i kom dongo cwiny me maro lim kacel ki timo jami ma twero weko waturo cik pa Lubanga. I kabedo magi bene wanongo adwogi maber ka walubo tira pa Jehovah. (Ic. 48:​17, 18; 1 Tem. 6:​9, 10) Labongo akalakala mo, Jehovah bimedde ki miniwa tira kun tiyo ki dano ma en ocimogi i kare me twon can madit atika-ni nio wa i kare me Loc me Mwaka Alip Acel pa Kricito. Tika wabimedde ki lubo tirane? Bibedo yot me timone ka walubo tira pa Jehovah i kare-ni. Pi meno, wamedde wunu ki lubo tira pa Jehovah, ma meno kwako tira ma oa ki bot co ma kicimogi me doro wiwa. (Ic. 32:​1, 2; Ibru 13:17) Waromo lubo Latelawa, Jehovah, ki cwinywa ducu pien en konyowa me weyo gin mo keken ma twero balo watwa kwede dok telowa i yo ma biterowa i kwo ma pe tum. w24.02 25 ¶17-18

Lakwena Paulo onongo cwinye yom me tic pi Jehovah, ento timo meno pe obedo yot. Paulo onongo pol kare woto i bor piny, dok wot onongo pe yot i kare meno. I wotte, Paulo kare mogo okato ki i “can mua i lwak kulu mupong ki pii” ki “can mua bot luyak.” I kare mukene bene lumonene gugoye ki odoo. (2 Kor. 11:​23-27) Dok utmege pa Paulo onongo pol kare pe ginyuto pwoc pi tutene me konyogi. (2 Kor. 10:10; Pil. 4:15) Gin ango ma okonyo Paulo me medde ki tic pi Jehovah? Paulo onongo opwonyo lok mapol madok i kom kit pa Jehovah ki i Ginacoya kacel ki i jami mutimme i kome. Paulo omoko ka maleng ni Lubanga Jehovah mare. (Rom. 8:​38, 39; Ep. 2:​4, 5) Dok en bene ocako maro Jehovah matek. Paulo onyuto marre pi Jehovah ki ‘konyo jo pa Lubanga, dok pud omedde ki konyogi.’—Ibru 6:10. w23.07 9 ¶5-6

Jo mapol giye ni pire tek me bedo ki gamente, dok i kare mogo gilubo cik ma gamente oketo. Ento, jo magi bene i kare mogo pe giye lubo cik ma pe gimaro nyo ginongo ni diyogi. Baibul ye ni gamente pa dano tye ka kelo pekki mapol, tye i te loc pa Catan, dok ma cokcok-ki kibijwerone woko. (Jab. 110:​5, 6; Latit. 8:9; Luka 4:​5, 6) Wacciwa bene ni ‘ngat ma pyem ki luloc nongo tye ka pyem ki yub ma Lubanga oketo.’ Pi kombeddi, Jehovah oye ni gamente pa dano olo loc wek jami owot kore ki kore dok en mito ni wabed luwiny botgi. Pi meno, omyero ‘wacul gin ma myero bot ngat acel acel,’ ma i kine tye iye mucoro, woro, kacel ki bedo luwiny. (Rom. 13:​1-7) I kine mogo watwero neno cik moni calo diyowa, pe opore, nyo ni lubone tek tutwal. Ento wabedo luwiny bot luloc magi pien Jehovah owacciwa ni watim meno teke gin ma guwacciwa ni watim pe turo cik pa Lubanga.—Tic 5:29. w23.10 8 ¶9-10

I kare ma kinywalo Samson, jo Piliciti aye onongo gitye ka loyo rok me Icrael kun giuno Luicrael matek. (Lungol. 13:1) Luicrael gubedo ka deno can malit pi loc aconya pa Lupiliciti. Jehovah oyero Samson me “laro jo Icrael ki i cing jo Piliciti.” (Lungol. 13:5) Me cobo tic man, onongo mitte ni Samson ojenge i kom Jehovah. I nino mo acel, lumony pa Lupiliciti gubino me mako Samson ki i kabedo ma kilwongo ni Leki, ma nen calo onongo tye i Juda. Lworo omako co me Juda matek, pi meno gumoko tamgi me miyo Samson i cing lumonegi. Jo pa Samson kikome gutweye matek ki tol aryo manyen ci gukele bot jo Piliciti. (Lungol. 15:​9-13) Ento, “cwiny pa Rwot [Jehovah] obino opoto i kome ki tek” oweko Samson ocodo tol ma kitweye kwede-ni woko. Ci en “ocop i kom cogo cwak kana manyen,” okwanyo, dok otiyo kwede me neko co 1,000 me Piliciti!—Lungol. 15:​14-16. w23.09 2 ¶3-4

Kinyuto “tam [yub] pa Lubanga ma onongo yam tye con” motmot i Baibul. Jehovah twero yero yo mapatpat me cobo yubbe, dok kare ducu yubbe cobbe pien en ‘oketo jami ducu pi tyen lokke.’ (Car. 16:4) Dok adwogi me tic pa Jehovah birii pi naka. Yub pa Jehovah tye ningo, dok alokaloka ango ma en oketo me cobone? Lubanga otito bot laco ki dako mukwongo yubbe ma onongo en tye kwede pigi. En owaccigi ni, “Wunywal, wunya, wupong lobo, wulo bene; dok wulo wa . . . gin ducu makwo ma giwoto i wi lobo.” (Acak. 1:28) I kare ma Adam ki Kawa gujemo, dok guweko bal odonyo i lobo, meno pe ogengo Jehovah ki cobo yubbe. En oloko yo ma ebicobo kwede ki yubbe. Cutcut i nge meno, en omoko tamme ni ebiketo Kerre i polo ma bicobo yubbe pi dano ki pi lobo.—Mat. 25:34. w23.10 20 ¶6-7

Jehovah twero konyowa pe me ilo cingwa woko. Pol kare twero bedo yot me ilo cingwa woko, tutwalle ka dong walwenyo ki peko acel-li pi mwaki mapol. I kare mogo, gorowa twero nen calo tek adada ma loyo wa goro pa lakwena Petero woko. Ento Jehovah twero miniwa teko wek pe wail cingwa. (Jab. 94:​18, 19) Me labolle, laco mo obedo ka timo tim me tek gungu pi mwaki mapol ma peya en onongo ada. Lacen en oloko kwone kwicikwici dok ocako kwo ma lubbe ki rwom me kit ma atir ma tye i Baibul. Kadi bed kit meno, i kare mogo en pud lwenyo ki tam macilo. Gin ango ma okonye me diyo cwinye? En otito ni: “Jehovah okonya.” Dok omedo ni: “Ki kony pa cwiny maleng pa Jehovah . . . , apwonyo ni twerre me kwo i yo ma Jehovah mito . . . Jehovah obedo ki kare me tic kweda dok kadi bed atye ki roc, en pud medde ki konya.” w23.09 23 ¶12

Wun omege matino, mitte ni wutute matek me doko Lukricitayo muteggi i yo me cwiny. Mitte ni iyer lanen mabeco me aluba, idong niang matut, ibed ngat ma genne, ipwony diro mapatpat ma bikonyi i kwo, dok iyubbe pi tic ma ibikemme kwede i anyim. Ka itamo pi jami ducu ma myero iti iye, ci itwero winyo calo ticce tek mukato kare woko. Ento itwero cobogi. Wi opo ni Jehovah tye atera me konyi. (Ic. 41:​10, 13) Ki lok ada, omege ki lumege me kacokke bene gibikonyi. Ka idoko kodi laco ma Jehovah mito-ni, ci kwoni bibedo me yomcwiny adada. Wamarowu matek wun omege matino! Walego ni Jehovah ogo laane i komwu ka wuwoto ki tute me doko co muteggi i yo me cwiny. w23.12 29 ¶19-20

Go kong ni itye ka namo kacel ki omege ki lumege mogo. Wubedo ka nongo mit pa yweyo wiwu, ci wumako cal kacel. Ci dok imako cal aryo mukene, wek okonyi ka ce cal mukwongo pe okatti maber. Dong itye ki cal adek. Ento i cal acel, ineno ni omego mo ojude woko. Ibirucone woko, pien itye ki cal aryo mukene mabeco ma nyuto dano ducu ma gitye ka bwunyo, kadiwa omego-ni. Pol kare, wiwa po i kom kare mabeco ma wabedo kwede ki omegiwa ki lumegiwa. Ento ket kong ni i kare meno, omego nyo lamego mo owaco nyo otimo gin mo ma ocwero cwinywa. Gin ango ma omyero watim ki niang manok meno? Omyero watute me rucone woko ki i wiwa kit ma waruco kwede cal ma pe ber. (Ep. 4:32) Watwero timo meno pien wiwa po i kom kare mabeco mapol ma wabedo kwede ki ngat meno. Meno aye jami ma wamito ni wiwa obed ka po iye. w23.11 12-13 ¶16-17

Me rukke maber dok i yo me mwolo, ruk pa dako ma Lakricitayo myero onyut ni en paro pi kit ma jo mukene giwinyo nyo gitamo kwede. Pud dong watye ki awaka madit i kom wun lumegiwa ma wurukke i yo ma nyuto woro pi jo mukene! Niang matut obedo kit mukene ma lumege ducu ma guteggi i yo me cwiny myero gunyut. Niang matut obedo ngo? Obedo kero me poko kin gin ma atir ki gin marac, ki me yero me timo gin ma atir. Nen kong labol pa Abigail dako pa Nabal. Cware omoko tam marac ma onongo biweko kineko jo ma i ode ducu. Abigail otimo gin mo cutcut. Pien en onyuto niang matut, olaro kwo pa jo mapol. (1 Cam. 25:​14-23, 32-35) Niang matut bene konyowa me ngeyo kare me lok ki kare me ling alinga. Dok konyowa me nyuto miti i kom jo mukene i yo mupore.—1 Tec. 4:11. w23.12 20 ¶8-9

Lakwena Paulo ocoyo lok meno bot kacokke ma i Roma. Omege ki lumege ma kunnu onongo gupwonyo lok i kom Jehovah ki Yecu, gunyuto niye, ci gudoko Lukricitayo. Pi meno, Lubanga ‘okwanogi ni kitgi atir pi niye,’ ci owirogi ki cwiny maleng. (Rom. 5:1) Onongo dong gitye ki gen mamwonya ma gingeyo ni bicobbe ada. Lacen Paulo ocoyo bot Lukricitayo ma kiwirogi ma gitye i kacokke ma i Epeco pi gen mamwonya ma kiminigi. Gen meno onongo kwako “mot me lonyo ki deyo madwong ma en [Jehovah] miyo bot jone.” (Ep. 1:18) Dok Paulo bene onyuto ki Lukricitayo ma i Kolocai ka ma gibinongo iye mot meno. En owaco ni ‘gin ma wageno meno kikano i polo piwu.’ (Kol. 1:​4, 5) Dong, gen pa Lukricitayo ma kiwirogi tye ni, kibicerogi me nongo kwo ma pe tum i polo, ka ma gibiloc iye kacel ki Kricito.—1 Tec. 4:​13-17; Yabo 20:6. w23.12 9 ¶4-5

Nyig lok me leb Grik ma kigonyo ni “gwoko” onongo kitiyo kwede me lok i kom lumony ma gigwoko boma wek lumonegi pe gumonygi. Jo ma gibedo i boma meno onongo ginino mot ki kuc, pien gingeyo ni lumony tye ka gwoko dogcelgi. I yo acel-lu, ka kuc pa Lubanga tye ka gwoko cwinywa ki tamwa, wabedo ma wiwa opye mot pien wangeyo ni wabibedo maber. (Jab. 4:8) Calo Anna dako pa Elkana, kadi bed kwowa pe olokke cutcut, pud watwero bedo ki kuc. (1 Cam. 1:​16-18) Dok ka wiwa opye mot, pol kare wanongo ni yot me bedo ki tam ma atir kacel ki moko tam me ryeko. Gin ango ma omyero watim? Ka itye ka kato ki i peko mo malit, ci lwong ‘lagwok gang’ wek ogwok cwinyi ki tammi. Itwero timo man nining? Leg matek wang ma inongo kuc pa Lubanga. (Luka 11:9; 1 Tec. 5:17) Ka itye ka kato ki i peko mo madit, di cwinyi i lega, ci ibinongo kuc pa Lubanga ma bigwoko cwinyi ki tammi.—Rom. 12:12. w24.01 21 ¶5-6

Me lonyo nying Wonne, Yecu okanyo aunauna, yet, lok goba, ki goc ma kigoye kwede ducu. En ongeyo ni ebedo lawiny bot Wonne i jami ducu; onongo pe tye ki gin mo ma omyero lewic omake iye. (Ibru 12:2) En bene oniang ni Catan tye ka lweny kwede atir i dyewor meno. (Luka 22:​2-4; 23:​33, 34) Catan nen calo otamo ni ebituro gen pa Yecu woko; ento, yub pa Catan pe ocobbe kulu! Yecu onyuto ka maleng ni Catan obedo lagoba dok ni Jehovah tye ki lutic ma gigwoko gennegi kadi bed gitye ka kato ki i atematema matek nining! Tika imito yomo cwiny Kabakawa ma dong tye ka loc-ci? Medde ki pako nying Jehovah, kun ikonyo jo mukene me pwonyo lok i kom kite mamwonya ducu. Ka itimo kit meno, nongo itye ka lubo kor tyen Yecu. (1 Pet. 2:21) Calo Yecu, nongo itye ka yomo cwiny Jehovah kun inyuto ni Lamonene Catan obedo lagoba ma wiye tek! w24.02 11-12 ¶11-13

I mwaka abic mukato-ni, dano makato milion acel gunongo batija macalo Lucaden pa Jehovah. Ka idyero kwoni bot Jehovah, nongo iyero me doko lalub kor Yecu Kricito dok iketo tiyo miti pa Jehovah me bedo gin ma pire tek loyo i kwoni. Meno kwako gin ango? Yecu owaco ni: “Ka ce dano mo mito lubo kora, myero okwong kwerre kekene.” (Mat. 16:24) Macalo latic pa Jehovah ma odyere, bimitte ni ikwer gin mo keken ma pe yomo cwiny Jehovah. (2 Kor. 5:​14, 15) Meno kwako kwero “tic me kit pa dano,” calo tim tarwang. (Gal. 5:​19-21; 1 Kor. 6:18) Tika lubo cik magi biweko kwoni bedo matek? Kwoni pe bibedo tek ka imaro Jehovah dok iye ni cikke ducu tye pi ber bedoni.—Jab. 119:97; Ic. 48:​17, 18. w24.03 2 ¶1; 3 ¶4

Jehovah miyo cwiny mere maleng bot jo ma gitye ki cwakke. (Mat. 12:18) Watwero pennye kekenwa ni, ‘Tika anyuto nyig mogo ma nyak pi cwiny maleng i kwona?’ Tika idiyo cwinyi i kare-ni makato i kare ma onongo peya ingeyo Jehovah? Ki lok ada, ka imedde ki dongo nyig ma nyak pi cwiny maleng, meno weko ibedo ki gen ni Jehovah cwinye yom i komi! Jehovah tiyo ki wel me ginkok pa Kricito me timo kica bot jo ma gitye ki cwakke. (1 Tem. 2:​5, 6) Ento ket kong ni pe wawinyo ni watye ki cwak pa Jehovah, kadi bed watye ki niye i kom ginkok dok watyeko nongo batija? Wi opo ni, kare ducu pe watwero geno gin ma cwinywa wacciwa, ento watwero geno Jehovah. En neno jo ma gitye ki niye i kom ginkok ni kitgi atir, dok ocikke me goyo laane i komgi.—Jab. 5:12; Rom. 3:26. w24.03 30 ¶15; 31 ¶17