Pe Iwek Gin Mo Omi Ibed Bor Ki Jehovah

1-3. (a) Pingo Yocwa obedo lanen maber pa ngat ma oyero yo me kwo maber? (b) Omyero wiwa opo i kom gin ango i kare me moko tam?

LOK ni ‘yero’ gin moni obedo lok madit mada. Ngat ma tye ki kit kwo ma en twero yerone, twero yero ki dok olo doro kit ma kwone myero obed kwede. Me laporre: Ket kong ni laco mo ma tye ka wot i yo onongo yone opokke aryo. Mene ma en biyerone? Ka laco meno ngeyo ka ma en mito cito iye, ci yo acel nongo tere kuno ento acel nongo tere ka mapat.

² Baibul tye ki lanen mapol pa jo ma gurwatte ki gin ma kit meno. Me laporre, Kain oyero ka en myero etim gin ma lubbe ki kinigane nyo me diyo kinigane piny. (Acak. 4:6, 7) Yocwa oyero ka en mito tic pi Lubanga me ada nyo woro lubanga me goba. (Yoc. 24:15) Yub pa Yocwa onongo tye me bedo macok ki Jehovah; pi meno, en oyero yo ma otere i yubbe. Kain onongo pe tye ki yub ma kit meno, omiyo en oyero yo ma otere ka mabor ki Jehovah.

³ I kare mukene, watwero bedo ki tam ma tye calo yo aryo ma opokke ma omyero wayer acel. Ka tye kit meno, ci wii myero opo pi gin ma imito, nyo yubbi​—me kelo deyo i kom Jehovah i gin ducu ma itimo ki me kwero gin mo keken ma twero miyo ibedo bor ki en. (Kwan Jo Ibru 3:12.) I pwony man ki ma lubo, wabineno yo abiro me kwo, ma omyero pe wawek gin mo omi wabed bor ki Jehovah.

DOG TIC KI GIN MA IMITO TIMONE PI KWONI

4. Pingo yenyo kwo obedo gin ma pire tek?

⁴ Lukricitayo omyero gukonye kekengi ki dong jo me otgi. Baibul nyutu ni ka ngat mo pe mito miyo jami ma mitte bot jo me ode nongo rac loyo ngat ma pe oye. (2 Tec. 3:10; 1 Tem. 5:8.) Tye ni, dog tic obedo gin ma pire tek i kwo, ento ka pe wagwokke, ci dog ticwa kacel ki gin ma wamito timone pi kwowa twero miyo wabedo mabor ki Jehovah. I yo ango?

5. Jami ango ma pire tek ka watye ka ngiyo i tic ma kimito miyowa?

⁵ Ket ni itye ka yenyo tic. Ka i kwo ka ma tic nok iye, iromo bedo ki atematema me ye tic ma okwongo nen​—tic mo keken​—ma ongolle. Ento mono, ka dog ticce pe rwatte ki cik me Baibul kono? Ka tye ni cawa me ticce nyo wot ma iwoto i tic i kabedo mukene balo ticci macalo Lakricitayo nyo teri mabor ki jo me odi kono? Omyero mono iye ticce, kun itamo ni tic ma pe rwatte ber loyo bedo labongo tic? Po ni, yero yo marac twero miyo ibedo mabor ki Jehovah. (Ibru 2:1) Kadi bed itye ka yenyo tic nyo pud itye ka ngiyo i tic ma itimo i kare-ni, iromo moko tam me ryeko nining?

6, 7. (a) Yub ango ma ngat moni twero bedo kwede madok i kom dog tic? (b) Yub ango ma miyo wabedo macok ki Jehovah, dok pingo?

⁶ Kit ma kitito kwede angec, wi myero otam pi gin ma imito. Penye kekeni ni, ‘Kwene ma amito ni ticci otera iye?’ Ka ineno dog tic calo yo me cobo jami ma mitte​—me konyo in kekeni kacel ki jo me oti i tiyo tic pa Jehovah​—ci Jehovah bigoyo laane i yelleni. (Mat. 6:33) Wi Jehovah pe cung woko ka irwenyo dog ticci nyo i peko me cente ma obino atura. (Ic. 59:1) En “ngeyo laro dano ma gilworo Lubanga ki i ayelayela.”​—2 Pet. 2:9.

⁷ Ki tungcel, ka mitini tye me doko lalonyo kono? Gwok nyo meno twero wok maber. Kadi bed kit meno, wii myero opo ni kwo ma “wok” maber i yo me lonyo kit meno pe bino me nono​—wele dit ma pe itwero. (Kwan 1 Temceo 6:9, 10.) Keto tam ma okato kare i yenyo lonyo kacel ki gin ma watimo pi kwowa bimiyo wabedo mabor ki Jehovah.

8, 9. Ngo ma lunywal myero gutam pire ka odok i lok kom tam ma gibedo kwede i kom dog ticgi? Titti.

⁸ Ka ibedo lanywal, tam i kom kit ma lanenni gudo kwede lutinoni. Gin ango ma gineno ni pire tek loyo i kwoni​—gin ma itimo pi kwoni nyo luremwu ki Jehovah? Ka gineno ni rwom, yweka, ki lonyo aye gubedo jami mukwongo i kwoni, ci mono pe giromo lubo kori i wot i yo marac meno? Pe tika gitwero rwenyo woro ma gitye kwede i komi macalo lanywal? Lakricitayo mo ma pud bulu owaco ni: “Cakke con ma wiya twero po iye, babana tye ma olungo wiye i dog ticce. Kong onongo nen calo en tiyo matek pien mito ni wan jo me ode omyero wabed ki jami mabeco. En onongo mito ni wabed ki gwok muromo. Ento i mwaka mukato cokcok-ki, ginne olokke woko. En tiyo dok tiyo, ka i ngeye kelo jami me camo kwo ma ka kelo jami ma mitte pi kwo. Macalo adwogine, kingeyowa calo luot ma gitye ki cente madwong ma ka luot ma gicuko cwiny jo mukene i yo me cwiny. Onongo atwero yero ni en ominiwa kony i yo me cwiny ma kato i yo me cente.”

⁹ Lunywal, pe wubed mabor ki Jehovah ki keto tamwu tutwal doki i gin ma wutimo pi kwowu. Nyut bot lutinowu ni i ada wuye ni lonyo madit loyo ducu ma watwero bedo kwede obedo lonyo me cwiny pe me kom kun wutiyo ki lanenwu.​—Mat. 5:3.

10. Ngo ma dano ma pud tidi twero tamo pire ka tye ka yero gin me atima pi kwone?

¹⁰ Ka ibedo ngat ma tidi ma tye ka tamo pi gin ma myero itim pi kwoni, iromo yero yo matir me aluba nining? Kit ma dong kityeko nyamone kwede, omyero inge ka ma kwoni tye ka kemo iye. Nongo pwonye ka dong dog tic ma itye ka tamo pire-ni tika bimiyo boti kare me timo tic me Ker muromo, nyo bimiyi ibedo mabor ki Jehovah? (2 Tem. 4:10) Yubbi mono tye me poro kit me kwo pa jo ma yomcwinygi ito malo ci dwogo piny kun lubbe ki wel cente ma gitye kwede? Nyo ibiyero me poro tek cwiny ma Daudi obedo kwede i kare ma ocoyo ni: “Yam abedo latin, ento man dong adit; pud peya aneno gibwoto dano ma kite atir, kadi ki litinone bene pe aneno ka gilego kwon alega”? (Jab. 37:25) Po ni, yo acel biteri mabor ki Jehovah, ento yo mukene-ni biteri i kwo ma pud dong ber loyo. (Kwan Carolok 10:22; Malaki 3:10.) Yo mene ma ibiyero?a

MATO YAMO KI DOK GALOWANG

11. Ngo ma Baibul loko i kom mato yamo ki dong galowang, ento ngo ma myero obed i wiwa?

¹¹ Baibul pe dag ni dano onong yomcwiny, dok pe miyo gineno mato yamo ki dok galowang calo balo kare. Paulo ocoyo bot Temceo ni “Pwonnye me rweyo ler kom tye ki kony.” (1 Tem. 4:8) Baibul bene waco ni “kare me nyero” ki “me myel,” tye ki dok cuku cwiny dano me nongo yweyo muromo. (Latit. 3:4; 4:6) Ento ka pe igwokke, mato yamo kacel ki galowang twero miyo ibedo mabor ki Jehovah. I yo ango? Pekone polle cung i kom jami aryo​—kit galowang ma iyero ki wel cawa ma itero iye.

12. Kodi jami ango ma myero itam pigi madok i kom kodi mato yamo kacel ki galowang ma iyero?

¹² Mukwongo, nen kong kite. Bed labongo akalakala mo ni itwero nongo mato yamo kacel ki galowang mabeco. Tye kono ni, pol pa galowang kacel ki mato yamo ma tye gimiyo dano tero jami ma Lubanga dag ni obedo ber. Man tye iye tim gero, tim tyet tyet, ki tim tarwang. Pi meno, omyero ingii kit mato yamo ki dong galowang ma idonyo iye. Gudu in mono nining? Tika dongo i cwinyi cwiny me tim gero, me pyem magwa, nyo me tero loboni calo gin madit loyo? (Car. 3:31) Mono tyeko centeni? Tika twero miyo jo mukene gipoto i bal? (Rom. 14:21) Kodi jo ango ma ibedo kwedgi i mato yamo ki galowang ma iyero? (Car. 13:20) Mono cuko cwinyi me timo jami maraco?​—Yak. 1:14, 15.

13, 14. Ngo ma myero itam pire madok i kom cawa ma itero i jami me yweyo wic?

¹³ Tam bene pi cawa ma itero i mato yamo kacel ki galowang. Penye kekeni ni, ‘Mono atero cawa malac i kodi jami magi ma miyo abedo ki kare manok me timo jami me cwiny?’ Ka iyero me tero cawa malac i mato yamo ki galowang, ci inongo ni cawa ma kit meno pe gonyo komi kit ma myero obed kwede. Ki lok ada, jo ma gimiyo jami ma kit meno bedo i kit mupore ginongo mitte loyo. Pingo? Cawa ma gitero i yweyo pe weko gibedo ki poto cwiny mo pien gingeyo ni nongo dong ‘gitimo gin ma pire tek loyo’ woko.​—Kwan Jo Pilipi 1:10, 11.

¹⁴ Kadi bed ni tero kare malac i yweyo wic romo nen calo ber, ento kwanyo yo meno twero terowa me bedo mabor ki Jehovah. Lamego mo me mwaka 20 ma nyinge Kim oneno opoko pii ki wange. En owaco ni “onongo abedo i camo pati ducu,” kun medo ni “i tum cabit ducu nongo gin mo madit tye ka timme​—Ceng Abic, Abicel, ki Ceng Cabit. Kombeddi, dong aneno ni jami ma pigi tego mapol tye me atima. Me laporre, macalo painia, aco cawa 12 me odiko pi cito i tic me pwony, meno miyo pe atwero bedo i namo ki luwota wa cawa abiro nyo aboro me dyewor. Angeyo ni pati ducu pe rac, ento twero bedo twon gin me wiro wi dano i jami mukene. Omyero kiwek gubed i kit mupore calo jami mukene.”

15. Lunywal gitwero konyo lutinogi me nongo mit pa mato yamo ma gonyo kom nining?

¹⁵ Tic me miyo jami ma mitte me kom, me woro Lubanga, ki ma weko lutino giwinyo maber tye i wi lunywal. Man tye iye miyo jami ma gonyo kom. Ka ibedo lanywal, pe ibed ngat ma gengo jo mukene me nongo yomcwiny dok neno jami ducu me yweyo wic calo gin marac. Ento, bed ma wangi twolo i kom jami ma twero ywayogi i tim maraco. (1 Kor. 5:6) Ka itamo con pi anyim, ci itwero nongo mato yamo ki galowang ma gonyo kom i ada pi jo me oti.b I yo ma kit meno, in ki litino ibiyero yo ma biterowu me bedo cok ki Jehovah.

WAT I KIN JO ME OT

16, 17. Peko ango ma kelo cwercwiny ma dong opoto i kom lunywal mapol, ki dok wangeyo nining ni Jehovah niang arem ma giwinyo?

¹⁶ Wat ma bedo i kin lanywal ki latinne cok adada mumiyo Jehovah otiyo ki wat man me poro kit ma en maro kwede jone. (Ic. 49:15) Pi man, tur cwiny obedo gin ma timme ka ce dano mo me amara ma i oti oweko Jehovah woko. Lamego mo ma nyare ki ryemo woko ki i kacokke owaco ni: “Cwinya otur ma pe wacce,” dok omedo ni “apenye kekena ni, ‘Pingo en oweko Jehovah?’ Abedo ka winyo calo obedo balla dok akok i koma.”

¹⁷ Jehovah niang arem ma iwinyo i cwinyi. En bene ‘cwinye ocwer matek’ i kare ma ngat ma en okwongo cweyone ki dok jo mukene ma gukwo i kare ma onongo pii Aluka pud peya obino, gujemo i kome.’ (Acak. 6:5, 6) Twero bedo tek tutwal pi jo ma gin ma kit man peya otimme i komgi me niang kit ma lit kwede. Kadi bed kit meno, pe nyutu ryeko me weko yo marac ma dano me otwu ma kiryemo-ni okwanyo odiri mabor ki Jehovah. Dong itwero ciro cwercwiny malit ma bino ka dano mo me otwu oweko Jehovah nining?

18. Pingo lunywal pe myero guket bal i wigi ka latingi oweko Jehovah?

¹⁸ Pe ikok i komi kekeni pi gin ma nongo otimme-ni. Jehovah miyo ki dano kare me yero gin ma igi mito, dok dano acel acel me ot, ma odyere ci onongo batija myero ‘oting yec’ me ticce. (Gal. 6:5) Pi meno, Jehovah kwano bal-li i wi ngat ma obalo-ni​—pe in​— pi gin ma en oyero. (Ejek. 18:20) Pe ikok bene i kom jo mukene. Wor yub pa Jehovah me tira. Cung matek i kom Catan​—pe i kom lukwat ma gitiyo me gwoko kacokke.​—1 Pet. 5:8, 9.

19, 20. (a) Ngo ma lunyodo pa lutino ma kiryemogi ki i kacokke gitwero timone me ciro pekogi? (b) Gen ango ma lunyodo ma kit man gitwero bedo kwede?

¹⁹ Ki tung cel, ka ce iyero me bedo ki kec cwiny i kom Jehovah, ci ibibedo mabor ki en. Ada, gin ma luoti myero gunen aye ni icung matek me keto Jehovah mukwongo i jami ducu​—man kwako wa wat i kin wun lupaco. Me ciro peko man, gwok wati ki Jehovah. Pe ibed keni ma pe iribbe ki omegini ki lumegini ma Lukricitayo ma gigene. (Car. 18:1) Yab cwinyi bot Jehovah i lega. (Jab. 62:7, 8) Pe ibed ka yenyo yo me kubbe ki ngat ma dong kiryemo ki i kacokke-ni ki coyo bote ngec kun wok ki i cim cing nyo e-mail. (1 Kor. 5:11) Lung wii i timo jami me cwiny. (1 Kor. 15:58) Lamego ma lokke kiketo angec-ci omedo ni, “Angeyo ni myero amak tic pa Jehovah matek ki dok medde ki bedo matek i yo me cwiny wek ka nyara odwogo cen bot Jehovah, abed ki kero me konye.”

²⁰ Baibul waco ni mar “bedo ki gen i kare ducu.” (1 Kor. 13:4, 7) Pe rac me medde ki bedo ki gen ni ngat ma imaro-ni bidwogo cen. Mwaka ki mwaka, lubalo mapol gingut ci gidwogo cen i dul pa Jehovah. Jehovah pe neno ngutgi ki wang marac. Ma ka meno, en tye ‘atera me weko bal’​—Jab. 86:5.

YER KI RYEKO

21, 22. Imoko tammi ningo i lok madok i kom kit ma ibitiyo ki bedo agonya me moko tammi piri keni?

²¹ Jehovah ocweyo dano ki twero me moko tamgi pigi kengi. (Kwan Nwoyo Cik 30:19, 20.) Ento, adwogi pa bedo agonya man tye. Lakricitayo acel acel myero openye kekeni ni: ‘Yo mene ma atye ka wot iye? Tika dong aweko dog tic ki gin ma atimo pi kwona, mato yamo, ki galowang, nyo wat ma atye kwede ki lupacowa me miya bedo mabor ki Jehovah?’

²² Mar ma Jehovah tye kwede pi jone pe lokke. Yo acel keken ma twero miyo wabedo bor ki Jehovah aye ka wayero me lubo yo marac. (Rom. 8:38, 39) Ento, man pe myero otimme! Mok tammi pe me weko gin mo keken me miyo ibed bor ki Jehovah. Pwony ma lubo man obinyamo but kabedo angwen mukene ma itwero nyuto ni imoko tammi me timo gin man.