Tika Ibigeno Dini ka Odok i Lok me Cente?

Estellea onongo maro wot ka lega ki lutinone abiro. En owacci: “Awaco bot lapwony dinina ni amito kwano Baibul.” Ento en pe oye me pwonya. Man oweko agiko wot i lega. En omedde ni: “Ludito kanica gucona waraga ni ka pe aromo wot ka lega, ci myero acwal cente. Atamo kekena ni, ‘Ma nyutti pe giparo kadi ka pe acito ka lega, gin ma gimito aye centena.’”

Angelina, ma onongo obedo ladini tutwal-li, owaco ni: “I kanica ma alego iye-ni, kicwalo adita lwore kidek i kin dano i cawa me lega mica, dok kimito ni wabol cente. Cawa weng nongo gitye ka penyo pi cente. Atamo kekena ni, ‘Ludito kanica-ni pe gitye ki cwiny pa Lubanga.’”

Tika dini ma i kabedoni gitiyo kidiro nyo gidiyo dano adiya me miyo cente? Tika man rwatte ki gin ma Baibul pwonyo?

BAIBUL KONO PWONYO GIN ANGO?

Yecu ma en aye ocako kacokke pa Lukricitayo-ni, owacci: “Wun wugamo nono labongo cul mo, wumi bene nono labongo cul.” (Matayo 10:8) Kwena me Baibul pe myero kicul pire dok tye pi dano ducu ma gimito.

Lukricitayo me kare macon onongo ginongo cente pi jami ma mitte i kacokke nining?

Ngat acel acel miyo “kit macalo cwinye mito, labongo wangcwiny mo nyo dic mo. Pien Lubanga maro ngat ma miyo jamine ki yomcwiny.” (2 Jo Korint 9:7) Lakwena Paulo owacci: “Watittiwu lok me kwena maber ma oa ki bot Lubanga, kun watiyo dyeceng ki dyewor wek pe waket peko i kom ngat mo i kinwu.” (1 Jo Tecalonika 2:9) Paulo obedo ka yubo kema me konyo kor ticce me pwony.​—Tic pa Lukwena 18:2, 3.

LUCADEN PA JEHOVAH KONO?

Lucaden pa Jehovah gicokke i kabedo ma kilwongo ni Ot me Ker. Ginongo cente kikwene me gwokone? Pe giweko adita me bolo mot lwore i kin dano; ki bene pe gipoko baaca me kwayo kony me cente. Ma ka meno, ngat mo keken ma winyo ki i cwinye twero miyo mot me nyuto pwocce pi cam me cwiny kun keto i canduk me bolo mot i Ot me Ker.

Ngene kene ni goyo magajin man ki dong cwalone woko mito cente. Ento pe ibinongo ni kitye ka cwalo kwena mo keken i gajeti wek dano gujog cente. Gin ma pire tek aye poko ngec ma tye i Baibul.

In itamo ningo: Tika cwiny ma gitye kwede rwatte ki lok pa Yecu kacel ki lanen pa Lukricitayo ma gukwo i kare macon?