Tika Ibigeno Dini ka Odok i Lok me Lweny?

Alberto obedo i mony pi mwaki ma romo apar kulu. En wiye po ni: “Lapwony diniwa oleggiwa gum, kun wacci ‘Lubanga tye kwedwu.’ Ento atamo ni, ‘Atye ka cito ka nek, kun Baibul wacci “Pe ineki.”’”

Ray onongo tye i dul mony ma gilwenyo i nam i Lweny me II me Wi Lobo. I nino mo acel en openyo lapwony dini ni: “In idonyo i yeya ci ilego pi lumony ni gulo lweny. Pe itamo ni lumonewa bene kilego pigi?” Lapwony dini ogamo ni kit ma Rwot tiyo kwede niang iye tek.

Ka pe iyeng ki lagam meno, nge ni pe itye keni.

BAIBUL KONO PWONYO GIN ANGO?

Yecu owacci cik acel pa Lubanga, ma pire tek tye ni “Mar lawoti macalo imarre keni.” (Marako 12:31) Tika Yecu owacci myero wanyut mar bot jiraniwa ma lubbe ki ka ma gibedo iye, nyo rokgi? Pe. En owaco bot lupwonnyene ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:34, 35) Mer i kingi onongo bibedo matek tutwal ma miyo bedo calo lanyut. Man onongo biweko gijalo kwogi pi luwotgi ma ka nekogi.

Lukricitayo me kare macon gulubo lok pa Yecu. Buk me The Encyclopedia of Religion wacci: “Tertullian ki Origen, ma onongo gitye i kin jo ma kilwongogi ni won me tipo i kare macon-ni, gumoko ni Lukricitayo me kare ca kigengogi ni pe gunek dano, dok man aye onongo cik ma gengogi me donyo i mony pa Luroma.”

LUCADEN PA JEHOVAH KONO?

Kit macalo Lucaden pa Jehovah gibedo i twok lobo ducu ni, jo mogo i kingi gibedo i lobbe ma nongo kukukuku tye i kingi. Ento gitemme ki tekgi me gwoko lanyut me mer ma tye i kingi-ni.

Me lapore, i 1994 ma lweny onongo tye i kin kaka me Hutu ki Tutsi i lobo Rwanda, Lucaden pa Jehovah pe gudonyo i lweny meno. Lucaden me kaka acel gugwoko luwotgi me kaka mukene kun giketo kwogi ka mading. I kare ma gimako Lucaden aryo ma gia ki i kaka me Hutu ma gugwoko omegigi me Tutsi, mony me Interahamwe ma kakagi Hutu guwaco botgi ni, “Wun myero kinekwu pien wukonyo Lututsi me lwi woko.” Tye me cwercwiny adada ni kineko omege aryo magi woko.​—Jon 15:13.

In itamo ningo: Tika gin ma Lucaden pa Jehovah gitimo rwatte ki gin ma Yecu owaco i kom cwiny me jalle ken ma bino pi mar?