Ka Can ma Poto Atura Otimme

Andrew, ma a ki i lobo Sierra Leone owaco ni: “Mukwongo wawinyo calo gen mo dong pe. Jami ducu ma onongo watye kwede oballe woko i muk pa ngom ki pong pa piny.”

David, ma a ki i cula nam me Virgin Islands owaco ni: “I nge kot ma ocwer magwar ki yamo lapiru, wadwogo cen gangwa. Pe tye gin mo ma onongo odong. Lok oloyowa woko. Nyara ogungu piny ka ocako koko.”

KA IKATO ki i can ma poto atura, itwero niang kit ma jo mukene ma gubwot giwinyo kwede: wigi cung, pe giye ni gin meno twero timme i komgi, wigi nywene, gibedo ki par, dok gileko lek maraco. Jo mapol ma gibwot giwinyo olo ki turcwiny matek mumiyo pe gibedo ki miti me medde ki kwo.

Ka irwenyo jamini ducu pi can ma poto atura, iromo winyo ni dong pe itwero kanyone. Iromo bene cako winyo calo kwoni konye pe. Ento, Baibul tito ni kwoni konye tye dok ni itye ki tyen lok mucwiny me bedo ki gen pi anyim maber.

NGEYO LOK ADA ME BAIBUL MIYOWA TYEN LOK ME MEDDE KI KWO

Latitlok 7:8 waco ni: “Agikki me jami ber kato acakkine.” Ka itye ka yelle ki kwo i nge can ma poto atura, itwero winyo calo gen mo dong pe. Ento ka iwoto ki yubo kwoni motmot, jami biyubbe.

Baibul otito pi kare mo ma “dwan mo me koko pe dok biwinnye . . ., kadi koko mo me can bene pe biwinnye.” (Icaya 65:19) Man bicobbe i kare ma kibiloko lobo ducu doko paradic i te loc me Ker pa Lubanga. (Jabuli 37:11, 29) Can ma poto atura dong pe bitimme. Arem mo keken i komwa nyo i cwinywa kibijwayone woko matwal, pien Lubanga Won Twer Ducu ocikke ni: “Pe dong gibipo pi jami macon, pe bene dano mo bitamo pigi.”—Icaya 65:17.

Tam kong: Lacwec tye ki yub me ‘kelo boti kare me anyim ma itye ki gen pire-ni’—kwo ki kuc labongo ayelayela mo i te loc me ker pa Lubanga. (Jeremia 29:11) Tika ngeyo lok ada man twero konyi me bedo ki tyen lok me kwo? Sally, ma kiloko i kome i pwony mukato-ni owaco ni, “Bedo ka poyo wi i kom jami mamwonya ma Ker pa Lubanga bitimone piwa i anyim twero konyi me jalo jami mutimme angec kun ikanyo pekki ma itye kwede i kare-ni.”

Pingo pe ikwany kare me pwonyo jami ma Ker pa Lubanga bitimone pi dano cokcok-ki? Ka itimo kit meno, ci ibibedo ki gen ni kadi bed ikato ki i can, ento kwoni pud pire tek, kun iwoto ki kuro lobo ma can ma poto atura bibedo pe iye. Ento pi kare-ni, Baibul miyowa tira ma twero konyi me ciro pekki ma bino macalo adwogi me can ma poto atura. Nen kong labol mogo.

Tyeng Mogo me Baibul ma Twero Konyi

Nong yweyo muromo.

“Wuywe manok.”—Marako 6:31.

Lukwed giwaco ni ka ikato ki i peko mo madit, “bedo labongo nino muromo. . . dok twero weko arem cwiny ki par ma iwinyo medde ameda dok bedo tek me bedo ki tam ma opye mot.” Pi meno tye me ryeko me nongo yweyo muromo.

Nywak kit ma iwinyo kwede.

“Par mapol gengo dano me bedo ki yomcwiny, lok maber me kica aye romo kweyo cwinye.”—Carolok 12:25.

Lok ki wati nyo laremi mo ma igeno. Medo i kom winyo lokki, wadini nyo luremi gitwero cuko cwinyi nyo bene gitwero mini kony.a

Ket tammi i kom jami mamwonya ma i anyim.

“Macalo en [Lubanga] yam ociko, watye ka kuro polo manyen ki lobo manyen, ka ma kit ma atir bedo iye.”—2 Petero 3:13.

a Ngat ma bedo ka winyo olo nyo par pi kare malac omyero onong kony ki bot daktar.