Nyutu Pwoc pi Mic Madit Loyo ma Lubanga Omiyo
1. Pingo watye ki pwoc madit bot Jehovah?
1 I kin ‘mic ducu mabeco’ ma Jehovah omiyowa, ginkok pa Wode aye pud dong dit loyo. (Yak. 1:17) Wanongo mot mapol pi ginkok man ma bene tye iye weko balwa-ni. (Ep. 1:7) Pi man, watye ki pwoc kare ducu. I kare me Nipo, wamito ni wabed ka lwodo lok i kom mic man ma pire tek tutwal-li.
2. Waromo dongo pwoc pi ginkok i cwiny jo me otwa ki dok i cwinywa kenwa nining?
2 Wudong Pwoc: Me dongo pwoc pa jo me odi, ma nongo odong cabit manok keken me kwero Nipo i Marci 30, pingo pe wuti ki otyeno me Woro Macalo Jo me Ot me kwano lok kom ginkok? Dok bene wulub yub me kwano Baibul pi kare me Nipo kacel macalo jo me ot nino ducu. Tam matut i kom adwogi maber ma ginkok okelo boti ki kit ma ineno kwede Jehovah, komi keni, jo mukene, ki dong anyim. Bibedo ber ka wupwonyo wero wer aryo manyen ma wabiwerogi i Nipo, wer namba 8 ki 109.—Jab. 77:12.
3. Wan waromo nyutu pwocwa nining?
3 Yo me Nyutu Pwoc: Bedo ki pwoc pi ginkok weko watito bot jo mukene pi Jehovah ki pi marre madit mumiyo ocwalo Wode. (Jab. 145:2-7) I dwe me Marci, April, ki Mai, jo me odi mukene ginyutu pwocgi ki keto yub wek ngat mo me otgi oti calo painia pi tutunu. Ka man pe twere, mono wuromo ‘tic ki kare ma tye’ me medo ticwu i ticwa me pwony? (Ep. 5:16) Bedo ki pwoc bene bimiyo wakonyo jo mukene me bedo tye i Nipo kacel kwedwa. (Yabo 22:17) Cak ryeyo nying jo ma myero idok cen ka limogi, lutino kwanni me Baibul, wadini, jo ma itiyo kacel kwedgi, ki jirani ma imito lwongogi, ci dong inywak i rwec ma kite dok pat me lwongo dano pi Nipo.
4. I yo ma nining ma waromo tic ki kare me Nipo ki ryeko?
4 Kare me Nipo miniwa kare mukene me nyutu pwocwa bot Jehovah pi mic ma en omiyo ki dano. Walego ni watiyu ki kare man me dongo ki dok nyutu pwocwa pi ginkok kacel ki “lonyo madwong pa Kricito ma tere pe tatte.”—Ep. 3:8.