Kit me Pwony Kun Itiyo ki Brocuwa me Kwena Maber
1. Brocuwa me Kwena Maber kiyubo nining?
1 Kit ma wanyamo kwede i Ticwa Me Ker me Julai, gin tic acel ma pire tek ma watiyo kwede me pwonyo dano aye brocuwa me Kwena Maber Mua ki Bot Lubanga! Ginacoya ma kiketogi i brocuwa man pe kiloko i komgi, wek rwod ot oyab Baibul ci okwan atir ki iye. Pol pa bukkewa kicoyogi i yo ma dano twero kwanone kene ci niang lokke cut, ento brocuwa man kiyubo me anyama kacel ki lapwony. Pi meno, ka watye ka miyone bot ngat mo, bedo ber ka kong wanyuto bote kit ma wakwano kwede wek en onong yomcwiny ma bino pi pwonyo kwena maber me Baibul.—Mat. 13:44.
2. Waromo tic ki brocuwa me Kwena Maber nining i lim me acel?
2 I Lim me Acel: Iromo wacci: “Abino ka limmi pien pol pa dano gitye ki par pi anyim me lobo-ni. Mono itamo ni kwo i lobo-ni nino mo biyubbe? [Mine kare wek ogam.] Baibul tye ki kwena maber ma miyowa gen. Magi aye lapeny mogo ma Baibul gamo.” Mi brocuwa man bot rwod ot, ci iwek en oyer lapeny ma rwatte ki mitine ki i pok ngeye. Ci wuyab pwony meno dok inyute kit ma wakwano kwede kun wucako ki kwano paragraf mukwongo. Gin mukene ma iromo timo aye me penyo rwod ot lapeny ma tugo miti ki i pwony ma in aye iyero, ci inyutte kit ma brocuwa man twero konye me nongo lagam me Baibul. Ka pwony meno tye ki vidio ma rwatte i jw.org, lutit kwena mogo ginyuto vidio man bot rwod ot.
3. Tit kit ma waromo tic ki brocuwa me Kwena Maber pi kwan ki latin kwan.
3 Kit me Kwan ki Dano: (1) Kwan lapeny ma kiketo namba i acakkine dok kicoyo ki coc ma kikwoto, wek ikony rwod ot me keto tamme i lok ma pire tek. (2) Kwan paragraf ma lubo. (3) Kwan ginacoya ma kicoyo ki coc ma obuto abuta, ci ipeny lapeny ki diro wek ikony rwod ot me niang kit ma Ginacoya magi gamo kwede lapeny ma kiketo namba i acakkine. (4) Ka paragraf mukene tye i te lapeny meno, nwo yo me 2 ki 3. Ka vidio ma rwatte ki lapeny meno tye ento pud pe ituko vidio man pi rwod ot, tim ber inyut bote ma peya wutyeko nyamo lokwu. (5) I agikkine, peny rwod ot me gamo lapeny ma kicoyo ki coc ma kikwoto, wek inge ka en oniang maber.
4. Ngo ma bikonyowa me doko ludiro i tic ki gin tic ma pire tek man?
4 Nge kit me tic ki gin tic ma pire tek man. Ti kwede i kare mo keken ma opore. Cabit ducu ma peya icito ka kwan, tam pi latin kwanni ki yo maber loyo me konye, kun itiyo ki Ginacoya ma tye i pwony meno. (Car. 15:28; Tic 17:2, 3) Ka ngecci ki dironi medde ki dongo, ibinongo ni brocuwa man tye i kin jami ma imaro loyo pi pwonyo dano lok me ada!