Mi Caden i Ka Cato Wil ki Tekcwiny
1. Pingo pe omyero wapar tutwal ka walworo miyo caden ka ma kitimo iye biacara?
1 In mono ilworo miyo caden ka ma kitiyo iye tic me biacara? Ka tye kit meno, ci pe ipar, pien kadi wa Paulo ma onongo latit kwena ma cwinye tek, kare mukene otute me ‘bedo ki tekcwiny’ me tito kwena. (1 Tec. 2:2) Piny kany wabinyamo pekki ma wanongo ki yo mogo ma watwero cobogi.
2. Pingo pe omyero wapar pi wango cwiny lucat wil?
2 Tika Galo Ticgi pi Kare Manok Bimiyo Gikeco? I ka cato wil mapol, lutic ticgi tye me konyo ngat mo keken, ci dong gingeyo ni i kine mukene ticgi romo galle manok. Pol kare gijolo in i yo me lirem kun nongo gitamo ni ibedo lawil. Rukke i yo me woro, ki nyuto mar ki cwiny me lirem, bicuko cwinygi me jolowa ki woro.
3. Watwero gwokke ki wango i luwil mukene nining?
3 Tika Bimitte ni Acak Lok i Nyim Luwil Mapol? Ka twere, yer cawa ma tic pe omako iye dano magwar, calo cawa ma nongo pud kiyabo dukan ayaba. Kur wang ma ladit tic nyo lacat tye kene ci iwot ilok kwede. Mi pwony macek cek.
4. Ngo ma watwero wacone ka watye ka tic i ka cato wil?
4 Ngo ma Myero Alok Iye? Ka lutic tye mapol, lok bot ngat ma loyo wigi. Iromo wacci: “Nongo lucatwil i pacigi tek mada, pi meno watye ka limowu i ka ticwu. Angeyo ni wutye ka tic, ci abiloko macek cek keken.” Me wek pe kiterwa calo lucat bukke, bedo ber ka pe waloko i kom mic ma kimiyo me cwako ticwa nikwanyo ka kipenyowa pire. Ma lubbe ki kit ma ka cato wil meno tye kwede, itwero penyo ladit tic wek ilok macek cek ki lutic mukene-ni bene. Nwo pwony acel-lu botgi. Ka ngat moni tye ki tic mapol, mi pwony macek ci iwek bote trak. Ka pe itwero lok ki lutic, gwok nyo kitwero ye ni iwek bukke ka ma dano bedo iye kun nongo giwoto ki kuro ticgi.
5. Watye ki tyen lok ango me miyo caden i ka cato wil ki tekcwiny?
5 Yecu ki Paulo gutito lok ki tekcwiny bot dano ma gitye i ka tiyo biacara, in bene itwero timo kit meno. (Mat. 4:18-21; 9:9; Tic 17:17) Leg Jehovah wek omini cwiny ma opye mot, kacel ki tekcwiny. (Tic 4:29) I kabedo me cato wil, ibinongo dukan manok keken ma dano pe iye, pi meno pingo pe itute me tito kwena i ka cato wil?