Ti ki Trak me Tito Kwena Maber-ri
1. Jo pa Lubanga dong gutiyo ki trak nining?
1 Lucaden pa Jehovah dong gutiyo ki trak pi kare malac me tito pi kwena maber. I mwaka 1880, C. T. Russell ki jo ma en otiyo kwedgi gucako goyo Bible Students’ Tracts, dok kibedo ka miyo trak magi bot jo ma gikwano Watch Tower wek gupok bot lwak. Trak onongo obedo gin ma pire tek mumiyo i mwaka 1880 omego C. T. Russell ocako dul me tito kwena me Ker dok ocoyo nying dul meno i te cik. Nyig lok man ni “trak” ki keto kacel ki nying meno, ni Zion’s Watch Tower Tract Society, ma dong i kare-ni kilwongo ni Watch Tower Bible and Tract Society of Pennsylvania. I mwaka 1918, Lutino Kwan me Baibul onongo dong gupoko trak makato milion 300 kulu. I kareni bene trak pud tye gin tic ma pire tek me miyo caden.
2. Pingo tic ki trak dok yot mada?
2 Gin Mumiyo Gitiyo Maber: Trak kiyubo i yo mamwonya dok ma ywayo miti pa dano. Lok ma iye kitito macek cek, kun miyo ngec ma gudo cwiny dano. Trak ywayo tam dok gudo cwiny rwod ot ma gwok lworo kwano magajin nyo buk. Trak miyone yot, kadi bed lutit kwena manyen nyo lutino gitwero miyone. Medo i kom meno tingo trak ki tic kwede dok yot.
3. Tit gin ma otimme acel ma ingeyo nyo ma kicoyo pire i bukkewa ma nyuto ni trak obedo gin tic maber.
3 Dano mapol gucako ngeyo lok me ada ki i trak. Me labolle, i lobo Haiti dako mo oneno trakwa acel ma opoto i dye gudo me boma. En okwanyo, okwano, ci odange ki yomcwiny kun waco ni “Dong anongo lok me ada!” I ngeye en ocito i Ot me Ker, ocako kwano Baibul, ci onongo batija—man ducu otimme pi teko pa Lok pa Lubanga ma tye i trak.
4. Yub ango ma watwero ketone ka trak aye obedo gin ma watero i tic me pwony i dwe moni?
4 Tic i Ot ki Ot: Kit macalo trak obedo gin me tic maber tutwal pi miyo caden-ni, dong bibedo i kin bukke ma wabiterone i dwe mogo, cakke i Novemba. Mitiwa pe bibedo mere me poko trak keken, ento wabitic kwede bene me cako lok. Ka dano mo onyuto miti tyen mukwongo me limwa, nyo ka wadok cen, waromo nyuto kit me kwano Baibul kun watiyo ki buk me Baibul Pwonyo nyo buk mukene. Waromo cako tic ki trak nining i ot ki ot? Trak acel acel loko jami mapat pat, ci mitte ni wange ma wabitic kwede-ni maber.
5. I tic me ot ki ot watwero miyo trak nining?
5 Trak ma watiyo kwede ki gin ma waloko myero obed ma rwatte ki kwo me wang ticwa. Waromo cako lok ki miyo trak bot rwod ot. Pot karatac me ngeye ma nen mwonya mada-ni twero tugo mitine. Nyo waromo nyuto trak mapol ci waweko en yero moni ma cwinye mito-ni. Ka watye ka tic i wang tic mogo ka ma dano twero bedo ki akalakala me jolowa i otgi nyo ma gikwero yabo botwa doggolagi, waromo mako trak i yo ma rwod ot twero neno cal ma i ngeye maber, nyo waromo penye ka watwero rwako mo i te doggolane wek wawiny tamme i kom gin ma trak loko. Ka wi lok madit me trak tye ki lapeny, watwero penyo rwod ot me miyo tamme i kom lapeny meno. Waromo bene penye ki lapeny ma rwatte ma twero tugo mitine me lok. Watwero bene kwano lok ma tye i trak ki rwod ot kun watiyo ki lapeny ma nongo kicoyo i trak ci wamine kare me gamone. Waromo kwano wang Baibul mogo ma wayerogi me tic kwede. Ka dong wanyamo lok mogo ki i trak meno, ci watwero dolo te lokwa ki moko nino mukene ma wabidok kwede ka lim. Ka kacokke pol kare giweko bukkewa i odi ka ma dano gipe gang, bedo ber ka guweko i yo ma pe nen ka maleng bot jo mukene.
6. Watwero tic ki trak me miyo caden i teng gudo nining?
6 Miyo Caden i Teng Gudo: In tika dong itiyo ki trak miyo caden i teng gudo? Jo mukene giwoto oyotoyot ma nongo pe gimito cung ka lok kwedwa. Niang mitigi twero bedo tek. Ma ka miyogi magajin ma watye kwede ma pe wangeyo ka gibikwanone, pingo pe wami botgi trak aye? Pien nge trak tye mamwonya mada dok lokke cek, romo tugo cwiny dano me kwanone pi dakika mo manok. Ento ka pe gitye ka rune, watwero nyamo lok mogo ma tye i trak kwedgi.
7. Tit gin mutimme i kare miyo caden ma pe kiyubbe iye kun kitiyo ki trak.
7 Miyo Caden ma Pe Iyubbe Iye: Yot mada me lok ki dano ma nongo pe wayubbe kun watiyo ki trak. Omego mo acel ka a ki paco rwako trak mogo i jebane. Ka orwatte ki dano mo calo lacatwil, en kwanyo trak ma tye i jeba-ni ci miyo bote. I kare ma luot mo gulimo Boma me New York, gin guniang ni gibirwatte ki dano ma gia ki i lobbe mapat pat. Pi meno gin gukwanyo buk me Nations ki trak i leb mapat pat. Ka giwinyo dano mo ma loko leb mukene ma tye ka cato wil i nget yo, nyo ma obedo piny i ka ngetgi, nyo i ot cam, ci gimiyo bote trak i leb ma en loko.
8. I yo ma nining ma trak tye calo kodi?
8 “Co Kodini:” Trak kitwero porone ki kodi. Lapur coyo mere kodi ento pe ngeyo mene ma bitwi. Latitlok 11:6 wacci: “Co kodini i odiko, dok i otyeno bene kit meno pe ijuk cingi ka tic; pien pe ingeyo mene ma bicek mabup, man nyo maca, nyo ka gwok gin aryo ducu gibibedo marom ci gicek maber.” Dong, wamedde wunu ki “nyayo ngec” kun watiyo ki gin tic maber man me miyo caden.—Car. 15:7.
[Boro buk i pot karatac 3]
Kit macalo trak obedo gin me tic maber tutwal pi miyo caden-ni, dong bibedo i kin bukke ma wabiterone i dwe mogo, cakke i Novemba