Ka ma Kikwanyo Iye Pwony pi Yub me Cokke
© 2023 Watch Tower Bible and Tract Society of Pennsylvania
JANUARI 1-7
LONYO MA TYE I LOK PA LUBANGA | YUBU 32-33
Kwecwiny pi Jo ma Tye ka Lweny ki Par
it-1-E 710
Eliu
Eliu onongo pe poko kin dano dok pe tiyo ki nying mogo ma pe opore me boro ngat moni. En oniang ni en bene onongo kicweye ki lobo calo Yubu dok ni Won Twer Ducu aye obedo Lacwecce. Eliu onongo pe tye ki cwiny me bwuro Yubu ento en oloko ki Yubu macalo larem me ada, kun lwongo Yubu ki nyinge. Ento Erifaji, Bildad, ki Jopar pe gulwongo Yubu ki nyinge.—Yubu 32:21, 22; 33:1, 6.
Tika Ineno Goro pa Dano Kit ma Jehovah Neno Kwede?
8 Watwero nyuto cwiny me kica ka wiwa opo ni omegiwa ki lumegiwa mogo gigoro pi pekki ma gitye ka wok ki iye calo two, lyeto ma a ki bot lupacogi ma pe luye, nyo turcwiny. Gin ma kit man bene romo timme i komwa nino mo. Ma peya Luicrael gudonyo i Lobo ma Kiciko Pire-ni, onongo gilucan dok gigoro i lobo Ejipt, ma oweko kipoyo wigi ni ‘cinggi pe obed nwang’ i kom omegigi ma lucan. Jehovah onongo mito ni guter lucan macalo jo ma gupore me nongo kony.—Nwo. 15:7, 11; Levi 25:35-38.
9 Ma ka ngolo kop nyo bedo ki akalakala, omyero wami kony i yo me cwiny bot jo ma gitye i kwo matek. (Yubu 33:6, 7; Mat. 7:1) Me lapore: Ka won pikipiki mo opoto ci owane, dok kitero i ot yat, tika ludaktari kong gitemme me niang ka en aye oweko peko man otimme? Pe, gin girune ka miye kony ma mitte. I yo acel-li bene, ka laye lawotwa mo odoko goro pi peko ma en tye kwede, gin ma pire tek ma myero wakwong timone aye me miye kony i yo me cwiny.—Kwan 1 Jo Tecalonika 5:14.
10 Ka watero kare me tam matut i kom kwo pa omegiwa ki lumegiwa, ci watwero neno gorogi i yo mapat. Tam i kom lumege ma dong gubedo ka ciro aunauna ma a ki bot lupacogi pi mwaki mapol. Mogo ginen calo gimwol dok gigoro, ento gin mono pe ginyuto niye matek kacel ki tekcwiny? Ka ineno lamego mo ma cung pire kene ma kelo latinne nyo lutinone i cokke, tika niyene pe cuko cwinyi? Nyo tam i kom lutino ma mwakagi tye apar ki wiye ma gicung matek i ada kadi bed luwotgi diyogi me timo jami maraco i cukul. Ka wamwol, ci wabiniang ni jo magi ma ginen goro-ni gitye “lulonyo i niye” i kin jo ma pe gigoro.—Yak. 2:5.
Kare Mene ma Opore me Lok?
17 Laco me angwenne ma olimo Yubu obedo Eliu, ma wat pa Abraim. En oling mot i cawa ma co adek mukene-ni onongo gitye ka lok. Labongo akalakala mo, en ociko ite ka winyo lok ma guloko pien lacen en obedo ki kero me nyuto kica dok bene omiyo tira ma okonyo Yubu me loko tamme. (Yubu 33:1, 6, 17) Gin ma onongo pire tek loyo bot Eliu obedo ilo nying Jehovah, ento pe keto deyo i kome kekene nyo i kom dano mukene. (Yubu 32:21, 22; 37:23, 24) Ki i lanen pa Eliu, wapwonyo ni i kare mogo, omyero waling alinga kun wawinyo lok. (Yak. 1:19) Wapwonyo bene ni ka watye ka miyo tira, mitiwa ma pire tek loyo myero obed me kelo deyo bot Jehovah, ento pe i komwa kekenwa.
18 Watwero nyuto ni watye ki pwoc pi mic me lok ka walubo tira me Baibul madok i kom kit ma myero walok kwede ki kare mupore me lok. Solomon, kabaka maryek adada, ocoyo ni: “Lok ma giloko kakare obedo calo jabu ma gimwono i kom ryal.” (Car. 25:11) Ka waciko itwa ka winyo lok pa jo mukene dok watamo ma peya waloko, ci lokwa bibedo calo gin mo ma kiyubo ki jabu kacel ki ryal—ma welle tek dok leng. Dong, kadi bed waloko madwong nyo manok, lokwa bidongo jo mukene, dok cwiny Jehovah bibedo yom i komwa. (Car. 23:15; Ep. 4:29) Man aye pud dong yo maber loyo ma watwero nyuto kwede pwoc pi mic man mua ki bot Lubanga-ni!
Yenyo Lonyo me Cwiny
Medde Ki Nyikke Cok Bot Jehovah
10 I yo acel-lu, pore gire me tamo pi kit ma wanen kwede. Ento pe omyero watemme ki tekwa ducu me rwenyo jami ducu ma nyuto ni watye ka tii. Jami magi gubedo lanyut me teggi, wore ken, ki lengo ma pe nen ki woko. Me laporre, Baibul waco ni: “Lwar wic aye lalukana me deyo pa ludongo, ka ce obino pi kwo ma tye atir.” (Car. 16:31) Meno aye kit ma Jehovah nenowa kwede, dok omyero watemme me nenne kekenwa kit ma en nenowa kwede. (Kwan 1 Petero 3:3, 4.) Pi meno, tika bedo me ryeko me keto kwowa ka mading pi wok ki i ayango mogo matino tino nyo nongo kony me ot yat wek wanen maleng? “Yomcwiny pa Rwot [Jehovah]” aye ka ma lengowa ma pe nen a ki iye, labongo paro pi mwaka nyo yotkomwa. (Nek. 8:10) Wabibedo ki yotkom kikome ma wanen maleng i lobo manyen keken. (Yubu 33:25; Ic. 33:24) Ka kare meno peya obino, nyuto ryeko ki niye bikonyowa me bedo macok ki Jehovah kun wabedo ki kit ma watye kwede i kare-ni labongo par mo.—1 Tem. 4:8.
JANUARI 8-14
LONYO MA TYE I LOK PA LUBANGA | YUBU 34-35
Ka Nen Calo Jami Maraco Tye ka Timme i Kom Jo Mabeco
Lubanga Mono Kite Tye Nining?
Lubanga kare ducu timo gin ma atir. Ki lok ada, “Lubanga pe twero timo gin marac kadi ki acel. Won Twer Ducu pe timo gin mo ma pe tye atir!” (Yubu 34:10) Ngolo koppe ducu tye atir, kit ma laco jabuli owaco kwede i kare ma tye ka lok bot Jehovah ni: “In aye ingolo kop pa rok ducu maromrom.” (Jabuli 67:4) Kit macalo ‘Jehovah neno cwiny dano,’ lugoba pe gitwero bwolle ento en kare ducu niang ada me lok moni ci ngolo koppe kakare. (1 Camuel 16:7) Medo i kom meno, Lubanga neno tim me ngolo kop alenga ki camucana ducu ma tye ka timme i wi lobo, dok en ocikke ni cokcok-ki, “jo maraco gibityekogi woko ki i lobo.”—Carolok 2:22.
Gin Ango ma Bibedo Pe ka Ker pa Lubanga Ocako Loc?
5 Gin ango ma Jehovah bitimone? I kare-ni, Jehovah pud omiyo kare ki lutim maraco me loko kitgi. (Icaya 55:7) Kadi bed ni dong kicok jwero lobo man, ento pud peya kingolo kop me agikki i wi lutim maraco. Ento ngo kono ma bitimme i kom jo ma gukwero lokke ki jo ma gucwako lobo man nio wa i twon can madit? Jehovah ocikke me jwero lutim maraco ki i lobo. (Kwan Jabuli 37:10.) I kare-ni, jo mapol gupwonyo kit me kano jami maraco ma gitimo, dok pol kare pe gipwodogi. (Yubu 21:7, 9) Ento Baibul poyo wiwa ni: Lubanga “ciko wange pi neno gin ma dano tiyo, ci neno ka ma en cito iye ducu. Pe tye muto mo nyo piny ma ocido licuc ka ma lutim maraco gitwero kanne iye.” (Yubu 34:21, 22) Pi meno, pe tye yo mo ma watwero kane kwede ki bot Jehovah. En twero neno gin mo keken ma lutim maraco gitimo. I nge Armagedon, wabiyenyogi ki ka ma onongo gibibedo iye ento pe wabinongogi. Gibibedo pe matwal!—Jabuli 37:12-15.
Tika Ibiweko Gin mo Gengi ki Lubo Kor Yecu?
19 Tika waneno peko acel-li i kare-ni? Ada, waneno. Jo mapol i kare-ni gikwerowa pien pe wadonyo i tim me wibye. Gimito ni wabol kwir i kare me yer. Ento wan waniang ni ki i neno pa Jehovah, ka wayero latela ma dano me loyowa, ci nongo wakwere woko. (1 Cam. 8:4-7) Jo mapol bene gitamo ni omyero wager cukul ki odi yadi dok watim jami mogo me konyo dano ma i kabedowa. Gikwero kwenawa pien wan watute matek me tito kwena, ento pe me cobo pekki me lobo man pi tutunu.
20 Watwero gwokke nining ki i gin ma romo balo niyewa? (Kwan Matayo 7:21-23.) Tic ma pire tek loyo botwa myero obed tic ma Yecu ocikowa ni watim. (Mat. 28:19, 20) Pe myero wawek tim me wibye ki cobo pekki me lobo man owir tamwa woko. Wamaro dano dok waparo pi pekkigi, ento wangeyo ni yo maber loyo me konyo jo macok kwedwa obedo ki pwonyogi lok i kom Ker pa Lubanga kacel ki konyogi me dongo wat macok ki Jehovah.
Yenyo Lonyo me Cwiny
Wek Cwiny me Dyereni Okel Deyo Bot Jehovah!
3 Laco mo matidi ma nyinge Eliu onongo tye ka winyo lok pa Yubu gin ki co adek-ki. I kare ma gutyeko lokgi, Eliu openyo Yubu lok madok i kom Jehovah ni: “Ka timmi tye atir, nongo imiyo gin ango bote? Gin ango ma en gamo ki i cingi?” (Yubu 35:7) Tika Eliu bene onongo tye ka wacone ni wayelle nono me tic pi Jehovah? Pe. Jehovah pe omiyo tira ki Eliu ento ki co adek-ki. Eliu onongo tye ka lok i kom gin mukene. En onongo tye ka waco ni Jehovah pe jenge i kom worowa. Jehovah tye ki jami ducu. Pe tye gin mo ma watwero timone ma twero medo lonyone nyo tekone. Ki lok ada, gin mo keken maber nyo kero ducu ma watye kwede a ki bot Lubanga, dok en neno kit ma watiyo kwede.
JANUARI 15-21
LONYO MA TYE I LOK PA LUBANGA | YUBU 36-37
Gin Muweko Itwero Geno Cikke pa Lubanga pi Kwo ma Pe Tum
w15-E 10/1 13 para. 1-2
Tika Ada Watwero Nongo Lubanga?
LUBANGA BEDO NAKANAKA: Baibul pwonyo ni Lubanga “bedo nakanaka.” (Jabuli 90:2) I yo macek, Lubanga pe ki acakkine ki dong agikkine. Dano pe twero niang “wel mwaka ma en ori kwede.”—Yubu 36:26.
Adwogi maber ma itwero nongone: Lubanga ocikke me mini kwo ma pe tum ka ingeye maber. (Jon 17:3) Onongo watwero geno cikke meno nining ka onongo Lubanga pe bedo nakanaka? ‘Kabaka ma bedo nakanaka’ keken aye twero cobo cikke ma kit meno.—1 Temceo 1:17.
Tika Itye ki Pwoc pi Mic ma Jehovah Miniwa?
6 Pii ma watwero tic kwede tye madwong ata i wi lobo pien bor pa lobo ki i kom ceng tye ma rwatte nitap ka kipimo. Kono onongo kidir lobo manok tung ka ma ceng tye iye, onongo pii ducu ma i lobo biyenyo ci tum woko, kun weko lobo dong malyet dok mutwo calo got ma gin makwo mo pe iye. Ka onongo kiywa lobo woko manok ki i kom ceng, pii ducu ma i lobo bimake pee, kun weko kabedo ducu i lobo doko pee keken. Pien Jehovah oketo lobo-ni i kabedo mupore, pii ma i lobo-ni twero gwoko kwo. Ceng lyeto pii ma i nam madongo ki ma tye i ngom ci pii meno duny malo doko pol. Mwaka ki mwaka, ceng weko aura pii lita milion mapol ata duny cito i yamo. Pii man bedo i wi yamo pi nino apar ma peya ocwer macalo kot nyo lupwu. I agikkine pii man dok mol dok cen i nam madongo nyo kulu ci dok duny cito malo. Jehovah oyubo lwore pa pii kit man wek lobo obed ki pii kare ducu. Man moko ni Jehovah ryek dok tek.—Yubu 36:27, 28; Latit. 1:7.
Gwok Genni Macalo Lakricitayo Obed Matek
16 Genwa me nongo kwo ma pe tum obedo mic ma pire tek adada mua ki bot Lubanga. Watye ka kuro anyim mamwonya adada—ma watye ki gen matek ni bibino. Gen meno bedo calo lajuk mel, ma weko pe watagge dok wamedde ki ciro can, kanyo aunauna, nyo kadi wa kemme ki to. Bedo calo otok nyonyo, ma gwoko tamwa wek wakwer gin marac dok wamok matek i kom gin ma atir. Genwa ma jenge i kom Baibul nyikowa cok bot Lubanga dok nyuto tut pa marre piwa. Wanongo adwogi maber adada ka wagwoko genwa matek.
Yenyo Lonyo me Cwiny
it-1-E 492
Nywako Lok
I kare me Baibul, onongo kikwango ngec ki tam i yo mapol mapatpat. Pol kare, kwena ma kwako kabedo moni nyo ma a ki ka mukene onongo kimaro kwangone ki dog. (2Cam 3:17, 19; Yubu 37:20) Gurup pa jo ma gitye ka wot onongo ginywako kwena mapol mua ki i kabedo maboco ka gucung i boma mo ka nongo cam, pii ki dong jami mukene ma mitte. Kit macalo lobe ma i Acia, Afrika, ki dong Ulaya gurumo lobo Palestina dyere, man oweko lobo Palestina onongo pong ki luwot ma gua nyo gicito i kabedo maboco mapatpat. Pi meno, jo ma gibedo i Palestina onongo gitwero nongo ngec i kom jami ma pigi tego ma tye ka timme i lobe mukene. Kwena me lobogi nyo ma a ki i lobe mukene onongo kimaro nongone ki i cuk ma i boma.
JANUARI 22-28
LONYO MA TYE I LOK PA LUBANGA | YUBU 38-39
Tika Ikwanyo Kare me Ngiyo Cwec?
Tika Itye Atera me Kuro Jehovah?
7 Ka Baibul tye ka tito kit ma Jehovah ocweyo kwede lobo, loko i kom kit ma en omoko kwede “borre ki lacce,” oguro “tedi te gutine” dok ocibo “got me twokke.” (Yubu 38:5, 6) En bene okwanyo kare me ngiyo ticce maber. (Acak. 1:10, 12) Tika itwero goyo kit ma lumalaika guwinyo kwede i kare ma gubedo ka neno jami manyen ducu ma Jehovah ocweyo? Nen calo cwinygi obedo yom adada! Pi meno, gucako ‘dange ki yomcwiny.’ (Yubu 38:7) Gin ango ma wapwonyo? Otero mwaki alip mapol pi Jehovah me cweyo lobo, lacer, ki jami makwo ducu, ento i kare ma Jehovah oneno jami ducu ma en ocweyogi ki diro, en owaco ni gitye ‘mabeco tutwal.’—Acak. 1:31.
Nicer Nyuto Mar, Ryeko, ki Diyo Cwiny pa Lubanga
2 Me acel, Jehovah ocweyo Wode, Yecu. Ka dong, en otiyo ki Wode me kayo man me ‘cweyo jami mukene-ni ducu,’ ma i kine tye iye lumalaika bene. (Kol. 1:16) Yecu cwinye obedo yom me tic kacel ki Wonne. (Car. 8:30) Dok lumalaika bene cwinygi obedo yom adada. Guneno ki wanggi kit ma Jehovah ki Ladiro Ticce Yecu, gucweyo kwede polo ki lobo. Lumalaika gudok iye nining? Gin ‘gudange ki yomcwiny’ i kare ma kicweyo lobo, dok ngene kene ni gumedde ki pako Jehovah i kare ma en ocweyo jami mukene-ni, tutwalle dano. (Yubu 38:7; Car. 8:31) Cwec magi ducu ginyuto mar ki ryeko pa Jehovah.—Jab. 104:24; Rom. 1:20.
Pwony Lok i Kom Jehovah ki i Ngiyo Cwec
8 Jehovah opore me nongo genwa. Jehovah okonyo Yubu me dongo genne i Kome. (Yubu 32:2; 40:6-8) I lokke ki Yubu, Lubanga oloko i kom cwec mapatpat, calo lakalatwe, pol, kacel ki lutkot. Jehovah bene oloko i kom leyi mapatpat, calo jubi ki aguragura. (Yubu 38:32-35; 39:9, 19, 20) Jami magi ducu omoko ka maleng ni Lubanga tye ki teko adada kacel ki mar madwong ki ryeko ma lapore pe. Lok meno okonyo Yubu me dongo gen matek adada i kom Jehovah. (Yubu 42:1-6) I yo acel-lu, ka wakwanyo kare me ngiyo cwec, meno poyo wiwa ni Jehovah tek dok ryek makatowa tyen mapol adada. En bene twero dok bigiko pekkiwa ducu. Lok ada meno twero konyowa me jingo genwa i kome.
Yenyo Lonyo me Cwiny
it-2-E 222
Lami Cik
Jehovah aye Lami Cik. Jehovah keken aye pore me bedo Lami Cik i polo ki lobo ducu. En aye omiyo cik ma doro cwec ma pe kwo (Yubu 38:4-38; Jab 104:5-19), wa ki makwo ducu. (Yubu 39:1-30) Kit macalo dano bene obedo cwec pa Jehovah, omyero olub cik pa Jehovah ma doro lobo, dok kit macalo dano twero poko kin gin maber ki marac, twero tam, dok twero bedo ki wat maber ki Lubanga, en bene myero olub kit me kwo ma Lubanga mito. (Rom 12:1; 1Kor 2:14-16) Medo i kom meno, cik pa Jehovah bene doro cwecce me cwiny, ma gin aye lumalaika.—Jab 103:20; 2Pet 2:4, 11.
Cik pa Jehovah ma doro lobo pe kitwero turone. (Jer 33:20, 21) Cik pa Jehovah ma doro cwecce ma nen pe lokke dok genne adada ma oweko i kabedo mogo ma lucayan gitye ki ngec i kom cik meno, gitwero niang kit ma dwe ki cwec mogo ma i dan polo giwire kwede. Ngat ma timo olungtuke pa cik ma doro cwec nongo adwogi marac cutcut. I yo acel-li bene, cik pa Lubanga ma kwako rwom me kwo ma en mito pe lokke, dok ka ituro wang ma inongo adwogi marac kadi bed ni i kine mukene adwogi marac man pe bino cutcut calo ngat ma oturo cik ma doro cwecce. “Lubanga pe gituko kwede. Gin ma dano ocoyo, en aye bene en bikayo.”—Gal 6:7; 1Tem 5:24.
JANUARI 29–FEBUARI 4
LONYO MA TYE I LOK PA LUBANGA | YUBU 40-42
Pwony ma Wanongo ki i Gin Mutimme i kom Yubu
w10-E 10/15 3-4 para. 4-6
“Anga ma Ngeyo Tam” pa Jehovah?
4 Ka wawoto ki lwodo lok i kom jami ma Jehovah otimo, myero wagwokke ki ngolo kop i kom Lubanga ma lubbe ki kit ma dano neno kwede jami. Kicikowa pe me bedo ki kodi cwiny man i Jabuli 50:21: “Itamo ni gwok abedo ngat mo ma kite rom ki meri-ni.” Tye kit ma lakwan mo me Baibul owaco kwede mwaki 175 mukato angec ni: “Dano pol kare gingolo kop i kom Lubanga, dok gitamo ni Lubanga myero otim jami ma rwatte ki mitigi pien nongo gineno ni meno pore pigi.”
5 Omyero wagwokke adada ki tam ni jami ma Jehovah timo myero orwatte ki mitiwa. Pingo lok man pire tek? Ka watye ka kwano Baibul, twero nen calo jami mogo ma Jehovah otimo pe tye kakare pi roc ma watye kwede. Luicrael me kare macon bene gubedo ki kodi tam meno dok gubedo ki neno marac i kom kit ma Jehovah obedo ka terogi kwede. Nen ngo ma Jehovah owaco botgi: “Wun jo Icrael wuwacci, ‘Gin ma Rwot [Jehovah] tye ka timone-ni pe atir.’ Ento pe gin ma wun wutimo-ni aye ma pe atir dok pe kakare?”—Ejek. 18:25.
6 Gin ma twero konyowa pe me ngolo kop i kom Jehovah ma lubbe ki nenowa aye ka waniang ni watye ki ngec manok dok watye ki roc. Onongo mitte ni Yubu obed ki ngec man. I kare ma Yubu tye ka deno can, en orwenyo gen ducu dok obedo ka keto cwinye i kome kekene. En pe oketo cwinye i kom jami ma pigi tek loyo. Ento Jehovah okonye me neno jami i yo matut. I kare ma Jehovah openyo Yubu ki lapeny makato 70 mapatpat, dok Yubu pe ogamo mo i kingi, Jehovah onyuto ka maleng ni Yubu tye ki ngec manok. Yubu odok iye ki mwolo dok oloko nenone.—Kwan Yubu 42:1-6.
Ket Tammi i Kom Gin ma Pire Tek Loyo
12 Tika onongo nyuto ni Jehovah pe lakica i kare ma en oloko ki Yubu kit meno i nge deno can malit? Pe kumeno, Yubu bene pe otamo kit meno. Yubu oniang dok obedo ki pwoc i kom tira ma Jehovah omiye. En bene owaco ni: “Angut ma abuku koma woko ki apwa ki buru.” (Yubu 42:1-6) Ma pud meno pe otimme, Eliu kong okonyo Yubu me bedo ki neno matir. (Yubu 32:5-10) I nge winyo tira ma Lubanga omiyo i yo me mar, Yubu oloko nenone, dok Jehovah oweko jo mukene gungeyo ni cwinye onongo yom pi genne pa Yubu.—Yubu 42:7, 8.
‘Gen Lubanga Makwo’
17 Yubu obedo ngat acel i kin lutic pa Jehovah ma gumedde ki bedo ma cwinygi tek i kare me peko. I waragane ma ocoyo bot Luibru, lakwena Paulo oloko i kom jo mukene mapol dok olwongogi ni “lwak caden mapol.” (Ibru 12:1) Gin ducu gukato ki i pekki mapol; kadi bed kit meno, i kare me kwogi ducu gin gubedo lugen bot Jehovah. (Ibru 11:36-40) Tika ciro can ki tutegi matek obedo me nono? Labongo akalakala mo pe obedo me nono! Kadi bed i kare me kwogi pe guneno cobbe pa cikke pa Lubanga ducu, gin gumedde ki geno Jehovah. Dok pien onongo gingeyo ni gitye ki cwak pa Jehovah, gin gubedo ki gen ni gibineno cobbe pa cikke pa Jehovah. (Ibru 11:4, 5) Lanengi twero konyowa me medde ki geno Jehovah.
18 I kare-ni, watye ka kwo i lobo ma jamine tye ka balle medde ameda. (2 Tem. 3:13) Catan pud peya otyeko temo jo pa Lubanga. Labongo paro pi pekki ma tye ka bino i anyim, walego ni wan ducu wamoku tamwa me tic matek pi Jehovah, kun “waketo genwa i kom Lubanga makwo.” (1 Tem. 4:10) Wi opo ni adwogi mabeco ma Lubanga omiyo ki Yubu nyuto “kit ma Rwot [Jehovah] won kica timo kwede ber bot dano.” (Yak. 5:11) Dong, wan bene wamedde ki bedo lugen bot Jehovah, kun wageno ni en bimiyo mot “bot jo ma yenye.”—Kwan Jo Ibru 11:6.
Yenyo Lonyo me Cwiny
it-2-E 808
Ngala
Yubu obedo dano ma kite atir ma ogwoko gennene i kare ma kibedo ka ngalle matek. Ento en obedo ki neno ma pe tye kakare dok otimo gin marac, ma lacen oweko kimiye iye tira. Eliu owaco ki Yubu ni: “Anga mukene ma pore ki Yubu, ma mato ngala calo tye ka mato pii?” (Yubu 34:7, NWT) Yubu oketo tamme me nyuto ni epe ki bal mo keken, dok ni kite atir ma loyo Lubanga. (Yubu 35:2; 36:24) I kare ma “lurem” Yubu adek-ki gubedo ka ngalle marac, Yubu oneno calo jo meno tye ka ngalo en me ka ngalo Lubanga. Pi meno, onongo bedo calo Yubu omine kekene i cing lungala kun mato ngalagi calo mato pii ki yomcwiny. Lacen, Lubanga otito ki Yubu ni lungalla magi onongo gitye ka waco lok ma pe tye kakare i kom En ento pe Yubu. (Yubu 42:7) I yo acel-li, i kare ma Luicrael gupenyo pi kabaka, Jehovah owaco ki lanebi Camuel ni: “Gin pe gukwero in, ento gukwero an, ni pe abed kabaka ma loyogi.” (1Cam 8:7) Dok Yecu owaco ki lulub kore ni: ‘Jo me rok ducu bikwerowu [pe pi gin mo ma wutimo, ento] pi nyinga.’ (Mat 24:9) Ngeyo lok man bikonyo Lakricitayo me bedo ki neno mupore ka kitye ka ngalle dok man biweko en nongo mot pi diyo cwinye.—Luka 6:22, 23.
FEBUARI 5-11
LONYO MA TYE I LOK PA LUBANGA | JABULI 1-4
Nyut Cwakki pi Ker pa Lubanga
“Abiyengo Rok Ducu”
8 Dano gidok i kwena man nining? Pol pa dano gikwero woko. (Kwan Jabuli 2:1-3.) Rok gucako jemo ki kiniga. Gukwero jolo Laloc ma Jehovah oketo. Pe gineno kwena me Ker ma watito calo “kwena maber.” Ki lok ada, gamente mukene guketo kigeng i kom ticwa me tito kwena! Kadi bed pol pa luloc me lobe magi giwaco ni gitiyo pi Lubanga, ento pe giye jalo twerogi. Dong calo luloc ma i kare pa Yecu, luloc me kare-ni bene gijemo i kom Ngat ma Jehovah Owiro kun giketo aunauna i kom lulub kor Kricito.—Tic 4:25-28.
Cung Matek ma Pe Icwako Tung ka mo i Lobo Man ma Opokke-ni
11 Jami me kom. Ka watye ki miti madit pi jami me kom ma watye kwede ci twero bedo tek botwa adada me cung matek ma pe wacwako tung ka mo ka watye i atematema. Ruth, ma bedo i lobo Malawi, oneno ka meno timme i kom Lucaden mapol i kare ma guwok ki i aunauna i mwaka 1970 ki wiye. En owaco ni: “Onongo pe gitwero jalo kwo mayot ma onongo gitye kwede. Mogo gungweco i tim ento lacen gudonyo i pati me wibye ci gudok cen paco pien onongo pe gimito kwo matek macalo oring ayela.” Ki tungcel, jo pa Lubanga mapol gucung matek labongo cwako tung ka mo kadi bed ni kwo onongo tek nyo bene gurwenyo jamigi me kom ducu.—Ibru 10:34.
Yenyo Lonyo me Cwiny
it-1-E 425
Cung Jami
Obedo pok cam mogo matinotino calo bel nyo mucele ma gwoko nyig kodi magi. Kadi bed ni Baibul tiyo ki nyig lok man me cung pi jami mapatpat, ento nyig lok man bene nyuto gin mo ma onongo kimaro timone tutwal i kare macon, ma en aye dino nyig cam. I nge kac, pok kodi ma pe camme-ni nongo dong konye pe. Pi meno, onongo pore me tic ki nyig lok ni cung kodi me lok i kom gin mo ma yot, ma konye pe, dok ma pe mitte, gin ma myero kikwany ki i kin jami mabeco ci kibol woko.
Mukwongo onongo kidino nyig kodi me poko cunge ki i kom nyige. Ci i ngeye, kipyeto dok yamo bayo cunge tenge calo apwa ma yamo obayo. (Nen PYETO JAMI [WINNOWING].) Man nyuto kit ma Lubanga Jehovah bene poko kwede jo mungak ki i kin jone dok bolo kwede lutim maraco kacel ki rok ma jemo i kome. (Yubu 21:18; Jab 1:4; 35:5; Ic 17:13; 29:5; 41:15; Koc 13:3) Ker pa Lubanga binginyo lumonene matinotino dok kibibologi woko calo cung kal.—Dan 2:35.
Onongo kicoko cung cam ma konye pe-ni ci kiwango woko wek yamo pe dok oba odwok cen i kom nyig kodi mabeco. I yo acel-li, Jon Labitja bene otito pi kare ma kibityeko kwede dini goba ducu—Yecu Kricito ma en aye Ladin Nyig Kodi-ni, biguro bel kacel, ‘ento en biwango cunge ki mac ma pe to.’—Mat 3:7-12; Luka 3:17; nen DINO JAMI [THRESHING].
FEBUARI 12-18
LONYO MA TYE I LOK PA LUBANGA | JABULI 5-7
Medde ki Bedo Lagen Kadi Bed Jo Mukene Gutim Gin Ango
Kit me Nongo Teko ki i Ginacoya
7 Tika laremi mo nyo ngat mo me gangwu oteri marac? Ka tye kit meno, ci itwero nongo adwogi maber ki i kwano gin mutimme i kwo pa Abcalom wod pa Kabaka Daudi ma otero wonne marac dok otemo mayo ker ki bot wonne tektek.—2 Cam. 15:5-14, 31; 18:6-14.
8 (1) Legi. Tit ki Jehovah kit ma cwinyi tye ka cwer kwede pi kit ma kiteri kwede marac. (Jab. 6:6-9) Tite kit ma iwinyo kwede kikome. Ci ipeny Jehovah wek okonyi me nongo cik ma igi lac ma twero konyi me ngeyo gin ma myero itim.
Bed ki Gen Matek ni Itye i Ada
3 Niyewa pe myero ojenge i kom cwiny me mar ma Lukricitayo ginyuto keken. Pingo? Ket kong ni laye lawoti mo—man romo bedo laelda nyo lapainia mo—otimo bal madit. Nyo ket kong ni omego nyo lamego mo ocwero cwinyi adada? Nyo ngat mo ma ongak ocako waco ni wan wape i ada. Ka gin ma kit man otimme, tika ibijuko tic pi Jehovah woko? Pwony ma wanongo tye ni: Ka idongo niyeni i kom Lubanga kun ijenge i kom tic pa jo mukene me ka dongo wati ki Jehovah, ci niyeni bibedo legelege. Kit ma iwinyo kwede pi Jehovah ki jone twero konyi me dongo niye i rwom mo olo. Ento pire bene tek adada me kwano Baibul, niang gin ma itye ka pwonyone ki dok timo kwed wek imok piri keni ni gin ma itye ka pwonyone-ni obedo lok ada madok i kom Jehovah. Myero bene imok piri keni ni Baibul tye ki lok ada i kom Jehovah.—Rom. 12:2.
4 Yecu owaco ni, jo mukene gibijolo ada “ki yomcwiny,” ento niyegi bikwe woko i kare me atematema. (Kwan Matayo 13:3-6, 20, 21.) Twero bedo ni onongo pe guniang ni bedo lalub kor Yecu bino ki ariya kacel ki pekki mapatpat. (Mat. 16:24) Gwok nyo gutamo ni bedo Lakricitayo miyo ibedo labongo peko mo—kun nongo Lubanga bedo ka kwanyo pekkigi woko. Ento i lobo man ma opong ki roc-ci, peko wang ma obedo tye. Kwo twero lokke, ci weko irwenyo yomcwiny woko.—Jab. 6:6; Latit. 9:11.
Yenyo Lonyo me Cwiny
it-1-E 995
Bur Lyel
I Jo Roma 3:13 lakwena Paulo oloko i kom gin ma kicoyo i Jabuli 5:9, kun poro dog lutim maraco ki pa jo ma lugoba ki bur “lyel ma twolo.” Kit macalo kiketo kom dano muto i bur lyel ma twolo-ni, lok ma a ki i dog lutim maraco bene rac dok konye pe.—Por ki Mat 15:18-20.
FEBUARI 19-25
LONYO MA TYE I LOK PA LUBANGA | JABULI 8-10
“Abipaki, Ai [Jehovah]”!
Bed ki Pwoc pi Tic ma Itye Kwede i Ot pa Jehovah
6 Jehovah oyubo paco mamwonya adada piwa. Ma peya en ocweyo laco mukwongo, en kong oyubo lobo-ni pi dano. (Yubu 38:4-6; Jer. 10:12) Pien en lakica dok cinge yot, Jehovah ocweyo jami mabeco mapol me yomo cwinywa. (Jab. 104:14, 15, 24) I kine mogo, en okwanyo kare me tam i kom jami ma en ocweyo ci oneno ni gitye ‘mabeco tutwal.’ (Acak. 1:10, 12, 31) En omiyo deyo ki dano ki ketogi macalo ‘luloc ma loyo’ cwecce ducu ma i lobo. (Jab. 8:6) Lubanga mito ni dano ma gipe ki roc gunong mit pa gwoko cwecce mamwonya ma i lobo kany pi naka. Tika ikwanyo kare me pwoyo Jehovah pi yubbe mamwonya meno?
Tika Itye ki Pwoc pi Mic ma Jehovah Miniwa?
10 Yo acel ma wanyutu kwede ni wapwoyo mic me lok aye ka watito pi niyewa i kom Lubanga bot jo ma giye ni kwo ocakke pire kene. (Jab. 9:1; 1 Pet. 3:15) Jo ma gicwako pwony meno gimito ni waye ni lobo ki kwo ma iye ocakke pire kene. Ka watiyo ki Baibul kacel ki lok mogo ma wanyamo i pwony man, ci watwero cwako Wonwa me polo ki tito bot jo ma giye winyo lokwa tyen lok mumiyo waye ni Jehovah aye lacwe polo ki lobo.—Jab. 102:25; Ic. 40:25, 26.
Tika Ibedo “Lanen Maber . . . i Lokki”?
13 Wer ki cwinyi ducu. Tyen lok ma pire tek loyo mumiyo wawero wer i cawa me cokkewa obedo me pako Jehovah. Laminwa mo ma nyinge Sara tamo ni en pe ewero mamit tutwal. Kadi bed kit meno, en mito pako Jehovah ki wer. Pi meno, ka en tye ka yubbe pi cokke, en yubbe pi wer bene. En wero wer magi kun temo neno kit ma lok ma i wer ma kibiwero-ni kubbe kwede ki gin ma kibinyamo i cokke. En owaco ni, “Ka atamo i kom nyig lok ma i wer, pe aparo tutwal ka ce awero maber nyo pe.”
Yenyo Lonyo me Cwiny
it-1-E 832
Cing
Baibul waco ni Lubanga otiyo jami ducu ki cinge, me labolle, me coyo Cik Apar-ri i kom kidi apada (Nia 31:18; Nwo 9:10), me timo tango (Nia 8:18, 19), ki dong me cweyo polo (Jab 8:3). “Cing” Lubanga ma en otiyo kwede me cwec-ci bene kubbe ki cwiny mere maleng nyo tekone, kit ma kinyuto kwede i lok madok i kom cwec i buk me Acakki. Dok wang ginacoya man nyuto ni teko pa Lubanga (ruʹach, “cwiny pa Lubanga”) onongo tye ka twago wi pii. (Acak 1:2) Kadi bed kit meno, Ginacoya me Leb Grik konyowa me niang maber i kom nyig lok man ni cing Lubanga. Buk pa Matayo nyuto ni Yecu otiyo ki “cwiny pa Lubanga” me ryemo cen, dok Luka otito ni Yecu otiyo ki “cing Lubanga”—Mat 12:28; Luka 11:20.
FEBUARI 26–MARCI 3
LONYO MA TYE I LOK PA LUBANGA | JABULI 11-15
Go ni Itye i Lobo Manyen ma Opong ki Kuc
w06-E 5/15 18 para. 3
Wi Lok Madongo ma Kikwanyo ki i Buk me Jabuli
11:3—Te guti mene ma kibalo woko-ni? Man aye te guti ma kwo pa dano jenge iye—cik ki dong ngolo kop atir. Ka pe kitye ka lubo cik dok pe kingolo kop kakare, man kelo anywenanywena madwong adada i kin dano. Ka gin ma kit meno tye ka timme, ‘ngat ma kite atir’ myero oket genne ducu i kom Lubanga.—Jabuli 11:4-7.
Tika Twere me Kwo i Lobo ma Tim Gero Pe Iye?
Baibul nyutiwa ni Lubanga ocikke me giko tim gero woko ki i wi lobo ducu cokcok-ki. I kare-ni, lobo man ma opong ki tim gero-ni tye ka kuro “nino me ngolo kop ki tyeko dano ma pe gilworo Lubanga.” (2 Petero 3:5-7) Lutim gero dong pe gibiweko jo mukene deno can. Watwero bedo labongo akalakala mo nining ni Lubanga bigiko tim gero woko?
Baibul waco ni Lubanga “dag ngat ma maro timo tim bwami [nyo gero].” (Jabuli 11:5) Lacwecwa maro kuc ki ngolokop atir. (Jabuli 33:5; 37:28) Meno aye gin ma oweko en pe bineno lutim gero anena pi naka.
Tika Ibidiyo Cwinyi me Kuro Jehovah?
15 Pingo Daudi odiyo cwinye? En ominiwa lagamme i Jabuli 13 ka ma en openyo tyen angwen kulu ni: “Pi kare ma rom mene?” En owaco ni: “Ento an dong atyeko geno mar meri ma pe lokke; abibedo ki yomcwiny pi lar meri. Abiwero wer bot Rwot, pien otima maber atika.” (Jabuli 13:5, 6) Daudi onongo ngeyo ni Jehovah marre dok bibedo lagen bote kare ducu. En otamo i kom kit ma Jehovah okonye kwede i kare mukato angec, dok onongo tye ki miti me kuro kare ma Jehovah bigiko atematema ducu ma onongo en tye ka wok ki iye. Daudi onongo ngeyo ni pire tek me diyo cwinywa wek wanong mot pa Jehovah.
kr-E 236 para. 16
Ker-ri Bimiyo Miti pa Lubanga Cobbe i Lobo
16 Piny ma Opye Mot. I agikkine, wabineno ki wangwa cobbe pa lok mamwonya ma kitito pire i Icaya 11:6-9. Co, mon, ki lutino gibibedo ki kuc dok labongo lworo ka mo keken ma gicito iye i lobo-ni. Pe tye cwec mo, kadi bed dano nyo lee, ma bikelo lworo. Tam kong i kom kare ma ibineno lobo ducu macalo gangngi, ka ma itwero kwang i nam matino, madongo ki dong kulu ducu; ma iwoto i wi godi mapatpat; kun iwoto bene i bunga labongo lworo mo keken. Dok ka piny oyuto, pe ibibedo ki par mo. Lok ma tye i Ejekiel 34:25 bicobbe kakare, wek jo pa Lubanga “dong gubed i dye tim labongo ayela mo, kun bene gibuto wa i bunga.”
Yenyo Lonyo me Cwiny
Tika Dong Itimo Alokaloka i Kwoni?
12 Tye me cwercwiny ni jo ma gitimo jami ma Paulo oloko i komgi-ni gurumowa woko. Gin gitamo ni pe dong tiyo i kare-ni me bedo ka diyo dano ni gulub rwom me kwo matir nyo cik mogo. Lupwonye ki lunyodo mapol gidworo kor lutino dok giwaco ni gubed “agonya” me timo jami kit ma gimito. Jo macalo magi gitamo ni pe tye yo mo me poko kin gin matir ki marac. Kadi wa jo ma giwacci gibedo ludini gitamo ni gitye agonya me timo gin ma tye atir i wanggi labongo paro pi lubo cik pa Lubanga. (Jab. 14:1) Kodi cwiny man twero bedo twon ariya madit bot Lukricitayo me ada. Jo ma gibedo ma pe gigwokke giromo cako dongo kodi cwiny-nyi. Giromo cako kwero lubo tira ma dul pa Jehovah miyo ki bene ginguru i kom gin mo keken ma pe yomo cwinygi. Onyo gibedo ki akalakala i lubo tira ma Baibul miyo i kom galowang, tic ki Intanet, ki dong kwan i rwom mamalo.