Ka ma Kikwanyo Iye Pwony pi Yub me Cokke
© 2023 Watch Tower Bible and Tract Society of Pennsylvania
MARCI 4-10
LONYO MA TYE I LOK PA LUBANGA | JABULI 16-17
‘Jehovah Aye Miya Jami Ducu Mabeco’
Wun Jo Matino, Wutwero Bedo ki Kwo Maber
MAK LUREM ME ADA
11 Kwan Jabuli 16:3. Daudi onongo ngeyo kit me nongo lurem mabeco. En oyero jo ma gimaro Jehovah me bedo lureme, dok man omine ‘yomcwiny mada.’ En olwongo lureme ni gubedo “jo maleng” pien onongo gitute me kwo ma lubbe ki cik pa Jehovah. Laco jabuli mukene bene onongo winyo kit meno ka odok i kom yero lurem, man oweko en ocoyo ni: “An larem dano ducu ma lwori, ki jo ma gilubo cikki.” (Jabuli 119:63) Kit ma wanyamo kwede i pwony mukato-ni, in bene itwero nongo lurem mabeco i kin jo ma gimaro dok gilubo cik pa Jehovah. Dok bene ngene kene ni luremi omyero pe gubed lulwakki keken.
w14-E 2/15 29 para. 4
‘Bed ka Neno Ber pa Jehovah’
Daudi owero ni: “[Jehovah] aye dulla ma gipokka, en kikopo ma abimato; kwona ducu tye i cingi. Wang apokki me potona opoto i kabedo ma yomo cwinya.” (Jab. 16:5, 6) Daudi onongo tye ki pwoc pi ‘dul ma kipokke,’ ma en aye bedo ki wat maber ki Jehovah ki dong mot me tic pire. Calo Daudi, watwero wok ki i kwo matek, ento watye bene ki mot mapol i yo me cwiny! Pi meno, omyero wamedde ki bedo ki yomcwny pi woro me ada dok wabed ki pwoc pi ot pa Jehovah i yo me cwiny.
w08-E 2/15 3 para. 2-3
Bed Cok ki Jehovah Kare Ducu
2 Wan ducu watwero nongo pwony mapol ki i gin mutimme i kom jo ma gingene ma kiloko i komgi i Baibul—calo Abraim, Cara, Moses, Ruth, Daudi, Esta, lakwena Paulo, ki dong jo mukene. Ento bene watwero nongo pwony ki i gin mutimme i kom jo ma pe gingene tutwal ma kicoyo lok komgi i Baibul. Lwodo lok i kom gin ma kicoyo i Baibul twero konyowa me kwo ma lubbe ki lok pa laco jabuli man ni: “Kare ducu angeyo ni Rwot [Jehovah] tye kweda. Pe gibidira woko cen, pien en tye yo tung cinga ma lacuc.” (Jab. 16:8) Watwero niang lok man nining?
3 Lamony pol kare mako pala lucwanne ki cinge tung acuc, man onongo miyo kwot ma en omako i cinge tung acam pe gwoko cinge tung acuc. Ento en pud twero nongo gwok ki bot lareme ma tye ka lweny i ngete tung acuc. Ka wiwa bedo ka po i kom Jehovah kare ducu dok watimo gin ma en mito, ci en bigwokowa. Kong dong wanen kit ma kwano lok ma kicoyo i Baibul twero jingo niyewa wek ‘kare ducu wabed cok ki Jehovah.’
Yenyo Lonyo me Cwiny
Wun Jo Matino, Wutwero Bedo ki Kwo Maber
16 Kwan Jabuli 16:2, 4. Kit ma wapwonyo kwede i pwony mukato, waneno ni ka walubo cik kacel ki cik ma igi lac, ci wanongo bedo agonya me ada. Wapwonye me maro jami mabeco ki dago jami maraco. (Amoc 5:15) Daudi owaco ni ‘gin maber ducu’ a ki bot Jehovah. Ber pa Jehovah nen i ticce ducu, dok jami mabeco ducu ma watye kwede a ki bote. Daudi otute matek me lubo lanen pa Lubanga kun maro jami ma Jehovah maro. En bene opwonye me dago jami ma Lubanga wacci rac. Gin acel i kin jami magi obedo woro lubange me goba, man obedo woro ngati mo nyo gin mo keken mapat ki Jehovah. Woro lubange me goba dwoko rwom pa dano piny dok kwanyo deyo ma myero obed pa Jehovah keken ci miyo bot ngat mukene nyo gin mo mukene.—Icaya 2:8, 9; Niyabo 4:11.
MARCI 11-17
LONYO MA TYE I LOK PA LUBANGA | JABULI 18
‘Jehovah En Lalarra’
w09-E 5/1 14 para. 4-5
Yomcwiny pa Jehovah Aye Tekowa
Baibul bene poro Jehovah ki jami mogo ma pe gikwo. Me labolle, Baibul waco ni en obedo “Got matek pa Icrael,” ki “cel gogo matek.” (2 Camuel 23:3; Jabuli 18:2; Nwoyo Cik 32:4) Pingo kiporo Jehovah ki jami magi? Kit macalo got madit cung matek dok pe gitwero dirone ka mo, in bene itwero nongo gwok maber loyo ducu ki bot Lubanga Jehovah.
5 Buk me Jabuli opong ki lapor mapol ma nyuto kit mapatpat ma Jehovah tye kwede. Me labolle, Jabuli 84:11 waco ni Jehovah tye macalo ‘ceng ki kwot’ pien en aye Wang It me dero, kwo, teko, ki dong gwok. Ki tungcel, Jabuli 121:5 wacci ‘Jehovah tye calo tipo ma iywe iye tung cingi ma lacuc.’ Kit macalo tipo mangic twero gwoki wek ceng pe owangi, Jehovah bene twero gwoko jo ma wore ki i lyeto me atematema, kun umogi calo iwacci tye ka umogi ki tipo me ‘bwome.’—Icaya 51:16; Jabuli 17:8; 36:7.
Kit ma Jehovah Konyowa me Ciro Peko ma Nongo Cwinywa Yom
5 I kare-ni, watwero nongo cuko cwiny ki i lok pa Lubanga man ni: ‘En bitimowu kica cutcut ka owinyo kokowu.’ (Ic. 30:19) Icaya otitiwa ni Jehovah bitero ite dok winyo kokowa ka wakok bote, dok en bigamo legawa oyotoyot. Icaya omedo ni: “ka owinyo ci en bigamo dogwu.” Lok magi cuko cwinywa ni Wonwa tye ki miti madwong me laro jo ma gilege pi kony. Ngeyo lok man konyowa me kanyo peko ki yomcwiny.
Bed ki Pwoc pi Motti me Lega
1 LACWE polo ki lobo, ominiwa mic mo ma pire tek adada. En ye ni waleg bote. Tam kong: Watwero tito lok ma tye i cwinywa bot Jehovah i cawa mo keken dok i leb mo keken labongo kong keto yub me lok kwede con. Watwero lega bote ki i wi kitanda me ot yat nyo ki i ot buc, kun nongo watye ki gen ni Wonwa ma lamar-ri biwinyo legawa. Pe waneno mic man calo gin ma konye pe.
Kit me Lweny ki Par
2. Tam matut. Ka itamo i kom jami ma otimme i kwoni, tika itamo i kom pekki mogo ma ibedo ki kero me kanyone pi kony pa Jehovah keken? Ka watamo i kom kit ma Jehovah ogwokowa kacel ki luticce mukene i kare ma okato angec, wabedo ki wic ma opye mot dok genwa i kome medde. (Jab. 18:17-19) Laelda mo ma nyinge Joshua owaco ni, “Acoyo piny legana mapol ma Lubanga otyeko gamogi. Man konya weko wiya po i kom kare ma alego Jehovah pi gin moni ci en omina gin meno kikome.” Ada, ka watamo i kom gin ma Jehovah dong otimo piwa, wanongo teko me medde ki lweny ki parwa.
Yenyo Lonyo me Cwiny
it-1-E 432 para. 2
Lakerubi
Lukerubi magi onongo ginyuto ni Jehovah tye ka moni: “An abirwatte kwedi kunnu, ci abilok kwedi ki malo i wi kom me kica, ki i kin lukerubi ma gitye malo i wi canduk lok me caden-ni.” (Nia 25:22; Wel 7:89) Meno aye oweko kiwaco ni Jehovah “bedo i wi komkerre malo ka wi [nyo i kin] lukerubi.” (1Cam 4:4; 2Cam 6:2; 2Luker 19:15; 1Tekwaro 13:6; Jab 80:1; 99:1; Ic 37:16) Onongo kitiyo ki cal lukerubi macalo lanyut me gadigadi pa Jehovah ma en ngweco kwede (1Tekwaro 28:18), dok bwom lukerubi onongo konyo me miyo gwok ki dong me ngwec oyotoyot. Pi meno, Daudi ocoyo i werre kun tito ni cipid ma Jehovah obino kwede bote ka larre onongo bedo calo pa ngat ma “oito i wi lakerubi ci otuk kwede” kun “ringo madwir i dye yamo.”—2Cam 22:11; Jab 18:10.
MARCI 18-24
LONYO MA TYE I LOK PA LUBANGA | JABULI 19-21
“Polo ki Jami Ducu ma Tye Iye Ginyuto Deyo pa Lubanga”
w04-E 1/1 8 para. 1-2
Cwec Ducu Myero Gutit pi Deyo pa Jehovah
DAUDI wod pa Yece, odongo macalo lakwat i kabedo macok ki Beterekem. Nen calo en onongo maro neno polo ma opong ki lakalatwe ka en tye kene i dye tim ka gwoko romi pa wone! Labongo akalakala mo, wiye opo i kom jami ma en obedo ka nenogi-ni i kare ma cwiny maleng oweko en ocoyo dok owero wer ma tye i Jabuli me 19, ma waco ni: “Polo ki jami ducu ma tye iye ginyuto deyo pa Lubanga; dan polo bene nyuto tic me cinge. Ento dwangi winnye teretere i wi lobo ducu, ki lok ma giloko o wa i agikki piny.”—Jabuli 19:1, 4.
2 Jami ducu ma tye i dan polo gitito pi deyo pa Lubanga dyeceng ki dyewor kadi bed pe giloko. Ginacweya pe gijuko tito pi deyo pa Lubanga, dok wabedo ki ur ka watamo i kom kit ma cwec magi ma pe giloko-ni gitye ka tito kwede pi deyo pa Jehovah bot jo ma “i wi lobo ducu.” Kadi bed kit meno, caden ma cwec magi gimiyo pe romo. Kicuko cwiny jo ducu ma lugen me tito bene pi deyo pa Jehovah. Laco Jabuli mo ma pe kitito nyinge owaco ki luworo me ada lok man: ‘Wumi deyo ki teko bot Jehovah. Wumi deyo bot Jehovah muporo nyinge.’ (Jabuli 96:7, 8) Jo ma tye ki wat macok ki Jehovah gitye ki yomcwiny me keto tam man i tic. Ento miyo deyo bot Lubanga kwako gin ango?
cl-E 48 para. 4
Teko me Cwec pa ‘Lacwe Polo ki Lobo’!
4 Gwok nyo in bene ingeyo ni ceng tye i kin lakalatwe. Ento en nen dit kato lakalatwe ma wanenogi i dan polo i dyewor-ri pien ceng dok cok ki lobo ka kiporo ki lakalatwe magi. Ceng lyet lakwene? Ceng lyet loyo pii ma oyenyo tyen 150,000 kulu. Ka kigwelo ceng ma rom ki leb kalam keken, ci kibolo i lobo, omyero icung i bor piny makato mairo 90 (nyo kilomita 140) wek lyetone pe oneki! Pi cekon acel acel, ceng cwalo woko teko ma rom ki teko pa nuclear bom milion miya mapol ma omwoc lawangacel.[5]
Cwec me Aura Nyuto Deyo pa Lubanga
“Wunen” Maber Tic Cing Jehovah: Yecu ocuko cwinywa ni “kong wunen winyo me polo” ki ni “kong wutam pi lenga me tim.” (Mat. 6:26, 28) Timo kit meno miyo wadongo niye ki genwa i kom Lacwec, dok miyo wabedo ki pwoc pi ryeko pa Jehovah, tekone me larowa, ki dong marre. Me ka weko ni jami me lobo man owir tammi, jal kareni dok itute me ngiyo cwec me aura pa Jehovah, kun ilwodo gin ma gitittiwa i kom Lubangawa.—Jab. 19:1.
Yenyo Lonyo me Cwiny
Itwero ‘Weko Kit me Kwoni Macon’
10 Mok piri keni ni rwom me kwo ma atir pa Jehovah aye ber loyo. Watwero nongo adwogi maber ki i jami ducu ma Jehovah penyowa me timo. Jo ma gikwo ma lubbe ki rwomme me kit ma atir gibedo ki woro i komgi kekengi, dok gitye ki tyen lok me kwo ki yomcwiny me ada. (Jab. 19:7-11) Ki tungcel, jo ma gikwero rwom me kwo pa Jehovah ginongo adwogi marac ma bino pi cobo tic me kit pa dano. Nen kong gin ma laco mo ma nyinge Elie owaco i kom kwero rwom me kwo ma atir pa Lubanga. En odongo i cing lunywal ma gimaro Jehovah. Ento i kare ma Elie tye ki mwaka apar ki wiye, en oyero lurem maraco. En ocako tic ki yadi calo jayigi-ni, odonyo i tim me tarwang ki kwalo kwo. Elie owaco ni enongo ni etye ka doko ngat ma ger medde ameda. En oye ni, “Ki lok ada, atimo jami ducu ma kipwonya ni pe atim macalo Lakricitayo.” Kadi bed kit meno, Elie wiye pe owil i kom gin ma opwonyo i kare ma en pud tidi. Lacen, en ocako kwano Baibul odoco. En oyelle matek me jwayo kite maraco-ni ci onongo batija i mwaka 2000. Kwo i yo ma lubbe ki rwom pa Jehovah okelo adwogi maber ango bote? Elie owaco ni: “I kare-ni dong atye ma wiya opye mot dok cwinya pe pida.” Kit ma gin mutimme man nyuto kwede, jo ma gikwero rwom me kwo ma Jehovah oketo, gikelo peko i komgi. Kadi bed kit meno, Jehovah tye atera me konyogi me timo alokaloka.
MARCI 25-31
LONYO MA TYE I LOK PA LUBANGA | JABULI 22
Baibul Otito Con Lok Mogo Madok i Kom To pa Yecu
Gin Gunongo Meciya!
16 Kitito ni binen calo Lubanga otenyo Meciya woko. (Kwan Jabuli 22:1.) Ma lubbe ki lok pa lanebi, “i kom cawa abongwen Yecu odange ki dwan ma longo ni: ‘Eloi, Eloi, lama cabaktani?’ ma te lokke ni, ‘Lubangana, Lubangana, itenya woko pingo?’” (Mar. 15:34) Yecu onongo gire pe orwenyo niyene i kom Wonne me polo. Lubanga otenyo Yecu i cing lumonene pien okwanyo Gwokke ma en miyo wek kitem Kricito i yo ducu. Dong koko ma Yecu okok kwede-ni ocobo lok ma tye i Jabuli 22:1.
Gin Gunongo Meciya!
13 Daudi oloko macalo lanebi ni kibingalo Meciya. (Kwan Jabuli 22:7, 8.) Kingalo Yecu i kare ma kigurre i kom yat, pien Matayo owaco ni: ‘Jo ma gimol gikato ki ka ngete gubedo ka yete, kun giyengo wigi, ma giwacci, Nye, in ma imuko ot pa Lubanga woko, ci igero i nino adek-ki, dong ilarre keni ba! Ka ce in Wod pa Lubanga, lor woko piny ki i kom yat.’ I yo acel-lu bene, lulamdog madito, lupwony-cik, kacel ki ludongo gubedo ka ngale kun giwaco ni: ‘Yam bedo ka laro jo mukene, pe twero larre kene. En kabaka pa jo Icrael do; wek olor piny ki i kom yat, ci wabiye en. En geno Lubanga, wek Lubanga kong olare kombeddi, ka mitte; pien yam owacci, An a Wod pa Lubanga.’ (Mat. 27:39-43) Ento, Yecu okanyo lok magi ducu ki deyo. Man pud dong tye lanen maber botwa ya!
Gin Gunongo Meciya!
14 Kitito ni kibibolo kwir pi poko ginaruka pa Meciya. Laco Jabuli owaco ni: “Gipoko ginarukana woko i kingi, gibolo kwir pi bongona.” (Jab. 22:18) Meno aye gin mutimme, pien ‘i kare ma dong lumony pa Luroma guguro Yecu i kom yat, gupoko bongine woko i kingi kun gibolo iye kwir.’—Mat. 27:35; kwan Jon 19:23, 24.
Yenyo Lonyo me Cwiny
Tika Ibedo “Lanen Maber . . . i Lokki”?
12 Wan ducu watwero nywako i cokkewa ki wero wer ki dwan malongo kacel ki miyo lagam ma wayubo maber. (Jab. 22:22) Jo mogo ginongo ni tek me wero wer nyo miyo lagam i dye lwak. Tika meno aye kit ma iwinyo kwede? Ka tye kit meno, ci ibibedo ki miti me ngeyo gin ma okonyo jo mukene me loyo lworogi me wer nyo miyo lagam i cokke.
APRIL 1-7
LONYO MA TYE I LOK PA LUBANGA | JABULI 23-25
‘Jehovah Aye Lakwatta’
“[Jehovah] Aye Lakwat ma Kwayo An”
Jehovah telo romine. Romi pol kare girweny woko ka lakwatgi pe. I yo acel-lu, wan bene wamito kony wek wange yo matir ma myero walub i kwowa. (Jeremia 10:23) Daudi otito ni Jehovah tero jone i “olet maber” ki “wang pii mangic.” En telogi i ‘yo matir.’ (Tyeng 2, 3) Lok magi ma dok i kom lakwat-ti miniwa tekcwiny ni waromo geno Lubanga. Ka walubo tira pa Lubanga kit ma Baibul waco kwede, ci wabilubo yo ma keliwa yomcwiny ki kuc, dok miyo wawinyo agonya.
“[Jehovah] Aye Lakwat ma Kwayo An”
Jehovah gwoko romine. Labongo lakwat, romi gibedo lwor dok nongo gipe ki gwok. Jehovah waco bot jone ni pe myero gubed ki lworo, kadi bed ‘giwoto i nota me tipo to’—kare ma kwo nongo tek adada. (Tyeng 4) Jehovah gwokogi, dok bene nongo tye atera me konyogi. En romo miyo ryeko ki kero bot jo ma wore wek gucung matek i atematema.—Jo Pilipi 4:13; Yakobo 1:2-5.
“[Jehovah] Aye Lakwat ma Kwayo An”
Jehovah pito romine. Romi gijenge i kom lakwatgi pien en myero oyenyigi cam. Wamito kony i yo me cwiny ma Lubanga keken aye romo konyowa me cobone. (Matayo 5:3) Cwinywa yom ni Jehovah cinge lac i Miyo jami, pien keto meja ma opong ki cam bot luticce. (Tyeng 5) Baibul ki jami ma konyowa kwano Baibul, calo magajin man ma itye ka kwanone-ni, gitye cam me cwiny ma konyowa cobo mitiwa me cwiny me ngeyo tyen lok me kwo ki dong yub ma Lubanga tye kwede piwa.
Yenyo Lonyo me Cwiny
w11-E 2/15 24 para. 3
Mar Kit Matir ki Cwinyi Ducu
3 Ka watute ki cwinywa ducu me lubo rwom me kwo ma Lubanga mito ci wabiyomo cwinye. (Nwo. 32:4) Me timo meno, omyero wakwan Baibul wek wapwony lok i kom Lubanga Jehovah. Ka wamedde ki pwonyo lok mapol i kome, wabinyikke bene cok bote nino ki nino, dok man bikonyowa me medde ki bedo ki kwo matir. (Yak. 4:8) Omyero wajol bene tira ma nonge i lok pa Lubanga ka mitte ni wamok tam mo ma pire tek.
APRIL 8-14
LONYO MA TYE I LOK PA LUBANGA | JABULI 26-28
Gin ma Daudi Otimo me Medde ki Bedo Lagen
Tika Itye ki ‘Cwiny me Ngeyo’ Jehovah?
10 Cwinywa yom adada ni Lubanga okonyowa me niang lok madok i kom cwiny dano! Jo mukene gitwero pennye ni, ‘Ento pingo lok man tye gin ma pire tek bot Lucaden pa Jehovah i kare-ni?’ Man pe tere ni Lukricitayo mapol i kacokke gitye ka timo jami marac nyo ni gudoko “oduro maraco,” calo Lujudaya mapol i kare ca. Ma ka meno, lutic pa Lubanga i kare-ni gijalle dok gileng. Ento, tam kong i kom lega ma Daudi olego bot Jehovah ni: “Ngi kwona, ai Lubanga, wek ingi gin ma tye i cwinya; kong itema, wek ingi ka ma tamma tye iye. Inen ka kit mo marac tye i iya.”—Jab. 17:3; 139:23, 24.
11 Jehovah mito ni wan ducu myero wange en dok wabed ki wat macok kwede. Ma lubbe ki jo ma kitgi atir, Jeremia owaco ni: ‘Ai Jehovah me mony, in ingiyo jo ma kitgi atir, ingeyo gin ma tye i cwinygi ki gin ma gitamo.’ (Jer. 20:12) Ka Won Twer Ducu ngiyo cwiny jo ma kitgi atir, ci wan omyero pe wangine kekenwa? (Jabuli 11:5, NW.) Ka watimo kit meno, watwero niang ka ce mitte ni watim alokaloka i kitwa, yubwa, ki dong tamwa. Watwero niang ka mitte ni wakwany gin mo marac ma tye i cwinywa ma weko bedo tek me lubo cik pa Jehovah. Meno bedo calo watye ka timo ayango i cwinywa. Ka in bene iye ni pire tek me ngiyo cwinyi, ci ngo ma itwero ngiyone? Dok alokaloka ango ma itwero timone?—Jer. 4:4.
Tute me Kelo Kuc kun Ilwenyo ki Cwiny me Nyeko
9 Wamito kony pa cwiny pa Lubanga wek wagwokke ki cwiny me nyeko kun wadongo mwolo dok wabedo ma wayeng ki jami ma watye kwede. (Kwan Jo Galatia 5:16; Jo Pilipi 2:3, 4.) Cwiny maleng pa Jehovah twero konyowa me ngiyo mitiwa ki gin ma tye i cwinywa. Ki kony pa Lubanga, watwero kwanyo tam maraco woko ci waleyo kakare ki tam ma dongo dano. (Jab. 26:2; 51:10) Nen kong labol pa co aryo ma gulwenyo ki cwiny me nyeko, Moses gin ki Paulo
Myero Walok Lok Ada
15 Ka in pud ibedo dano matidi, romo bedo ni imito ni luwoti gumari. Ento pi miti man omiyo jo matino mukene gitye ka kwo kwo laiye aryo. Gitimme calo kitgi ber ka gitye kacel ki jo ganggi nyo jo me kacokke, ento kitgi lokke woko ka gitye ka nywako lok ki dano i Intanet nyo gitye kacel ki jo ma pe woro Jehovah. Guromo tic ki leb maraco, ruko ruk maraco, winyo wer macilo, mero ki kongo, tic ki yadi calo jayigi-ni, winnye me mit i mung, nyo timo jami mukene maraco. Nongo gitye ka bwolo lunyodogi, omegigi ki lumegigi, ki dong Jehovah. (Jabuli 26:4, 5) Ento Jehovah ngeyo ka watimme ni wawore kun kitungcel nongo watye ka timo jami ma en dag. (Marako 7:6) Me ka meno, bedo ber me timo gin ma carolok man waco: “Pe myero ibed ki mone i cwinyi i kom lubalo, ento medde ki lworo Rwot [Jehovah] nino ki nino.”—Carolok 23:17. (Nen lok ma tye i tere piny.)
ijwyp-E 42 para. 21
“Tika Ada Rac me Tic ki Leb Maraco?”
Gwokke ki galowang ma opong ki leb maraco. Baibul waco ni: “Bedo ki jo maraco balo kit mabeco.” (1 Jo Korint 15:33) “Jo maraco” magi pe kwako dano keken, ento kadi wa galowang—filim ma ineno, tuku me vidio ma ituko, ki dong wer ma iwinyo. Kenneth, ma tye ki mwaka 17, owaco ni: “Yot adada me wero wer ma imaro ma kitye ka tukune labongo paro ni wer meno opong ki leb maraco, tekki wer-re kok ma mit.”
Pingo Omyero Wacokke Kacel pi Woro Lubanga?
6 Ka wacokke kacel wanongo cuko cwiny. Kwo me kare-ni twero weko wadoko goro i tamwa, komwa, ki dong i yo me cwiny. Ento, cokke kacel cuko cwinywa dok jingowa i yo me cwiny. (Kwan Tic pa Lukwena 15:30-32.) I pol pa cokkewa wanyamo kit ma lok pa lunebi gitye ka cobbe kwede. Macalo adwogine, wabedo ki gen ni jami ma Jehovah ocikke pire i anyim wang ma gucobbe. Pe jo ma gimiyo pwony i wi abam keken aye ma gicuko cwinywa. Lukricitayo luwotwa ma gimiyo lagam ki ma giwero ki dwan mamit bene gicuko cwinywa. (1 Kor. 14:26) Ka waboko lok kacel ki utmegiwa ma peya cokke ocakke nyo i ngeye, meno bene weko wawinyo agonya dok wamarre i kinwa.—1 Kor. 16:17, 18.
13 Bedo tye i cokke weko wanyuto bot Jehovah ni wamito nyikke cok bote ki bot Wode. I cokkewa, Lapwonywa Jehovah pwonyowa kun tiyo ki Baibul. (Ic. 30:20, 21) Kadiwa jo ma pe luye ma gibino i cokkewa bene giye ni: “Adada, Lubanga gire tye i kinwu.” (1 Kor. 14:23-25) Jehovah tiyo ki cwiny mere maleng me telo kacokke ducu, dok bene pwony ducu ma wanongo ki i cokke a ki bote. Pi meno, ka watye i cokke, nongo watye ka winyo dwan Jehovah ki dok neno kit ma en paro kwede piwa. Man weko wanyikke cok bote.
18 Tika in bene iwinyo kit meno pi cokkewa kacel me woro Jehovah? Ka tye kumeno, ci mok tammi me diyo cwinyi dok imedde ki tute me bedo i cokke kare ducu. Ka itimo kit meno, ci ibinyuto ni iye lok ma Kabaka Daudi owaco ni: “Ai Rwot [Jehovah], amaro odi ka ma ibedo iye.”—Jab. 26:8.
Yenyo Lonyo me Cwiny
w06-E 7/15 28 para. 15
Jehovah Laro Jo ma Gitye ka Wok ki i Peko
15 Daudi owero ni: ‘Kadi bed wora ki maa gubwota woko, ento Jehovah gire bigwoka.’ (Jabuli 27:10) Tye me kwecwiny adada me ngeyo ni Jehovah marowa adada makato kit ma lunyodowa marowa kwede! Kadi bed ni lit adada ka lunyodowa gukwerowa, guterowa marac nyo guwekowa woko, ento man pe gudo kit ma Jehovah paro kwede piwa. (Jo Roma 8:38, 39) Wi opo ni Lubanga nyiko cok bote jo ma en maro. (Jon 3:16; 6:44) Kadi bed jo mukene guteri marac, Woru me polo marri adada!
APRIL 15-21
LONYO MA TYE I LOK PA LUBANGA | JABULI 29-31
Tira—Obedo Lanyut me Mar pa Lubanga
it-1-E 802 para. 3
Wang
Nyig lok ma kigonyo ni ‘umo nyo kano wang’ twero niange i yo mapatpat. Ka kiwaco ni Lubanga Jehovah okano nyo oumo wange, pol kare nyuto ni en dong pe tye ka miyo cwakke nyo gwokke. Jehovah twero timo man ka ngat mo nyo gurup pa jo mo gukwero bedo luwiny bote, me labolle rok me Icrael. (Yubu 34:29; Jab 30:5-8; Ic 54:8; 59:2) ento i kine mukene nyig lok man bene nyuto ni Jehovah pe tye ka timo gin mo nyo dok i lok mo, kun kuro kare ma en neno ni opore. (Jab 13:1-3) I kare ma Daudi olego Jehovah ni: “Mi [nyo um] wangi woko, pe inen rocca,” en onongo tye ka bako doge bot Lubanga ni otimme kica nyo ojwa balle woko.—Jab 51:9; por ki Jab 10:11.
Wek Jehovah Okwe Cwinyi
18 Jol tira. I kare ma Jehovah ocwalo lanebi Natan me nyuto bal pa Daudi ka maleng, Daudi pe otemo gengo ngeye nyo neno balle calo bal mo matidi. En oye cutcut ni etimo bal pe i kom cwar Batceba keken, ento makatone i kom Jehovah. Daudi ojolo tira ma oa ki bot Jehovah, dok Jehovah otimme kica. (2 Cam. 12:10-14) Ka watimo bal mo madit, omyero walok ki jo ma Jehovah ocimogi macalo lukwat. (Yak. 5:14, 15) Dok omyero wagwokke ki gengo ngewa. Ka pe wagalle ki jolo tira ma kiminiwa kun waketo i tic, ci ma pe orii wabibedo ki kuc kacel ki yomcwiny odoco.
Tyen Lokke Ngo me Ngut i kom Balli?
18 Me nyuto ni engut i kom balle, ngat ma kiryemo ki i kacokke myero owot i cokke kare ducu dok olub tira ma luelda gumine me lega ki kwan pire kene kare ki kare. En bene myero oti matek me gwokke ki i jami ma twero bolle i bal doki. Ka en otute matek me yubo watte ki Jehovah, ci twero bedo ki gen ni Jehovah bitimme kica pi balle dok luelda gibikonye me dwogo cen i kacokke. Ka luelda gitye ka tute me niang ka ngat moni ada ongut i kom balle, gingeyo ni lok ma kwako ngat acel acel pat. Pi meno gingiyo lok acel acel matut dok gigwokke ki ngolo kop ki gero.
Yenyo Lonyo me Cwiny
wp23 Nam. 1 6 para. 3
Lega—“Wuket Parwu Ducu i Kome”
Lega bot Jehovah jingo genwa i kome ni en paro piwa. Watwero winyo calo laco jabuli ma olego ni: “Dong ityeko neno can ma omaka, dok ityeko winyo koko me can ma odiya.” (Jabuli 31:7) Ngeyo ni Jehovah neno peko ma watye ka lweny kwede twero konyowa matek me medde ki kanyo pekowa. Ento en pe neno pekowa keken ci dong otum. En niang peko ma watye ka kato ki iye dok konyowa me nongo cuko cwiny kacel ki kwecwiny i Baibul.
APRIL 22-28
LONYO MA TYE I LOK PA LUBANGA | JABULI 32-33
Pingo Mitte ni Ngat Moni Otuc ka Maleng Bal Madit ma En Otimo?
“Pe Myero Waol” Woko
16 Ento, gin ango ma myero watim ka watimo bal madit? Omyero wapeny pi kony oyotoyot. Pien ka iling woko, ci ibalo abala. Wii myero opo ni Daudi owacci i kare ma pe etuco balle, ‘kome oballe woko pi cur ma ebedo ka cur dyeceng jwi.’ (Jab. 32:3) Ada, kwero tuco balwa rwenyo yomcwinywa dok waol woko i yo me cwiny, ento “ngat ma tuco balle ka bwoto timogi matwal aye kica bimako Lubanga i kome.”—Car. 28:13.
cl-E 262 para. 8
Lubanga ma ‘Tye Atera me Weko Bal pa Dano’
8 I kare ma Daudi ongut i kom balle en owaco ni: “Cut atuco balla boti, pe amungo gin marac ducu ma onongo atimo. . . . Ci in bene iweko balla ducu.” (Jabuli 32:5) Nyig lok ni ‘weko bal’ kigonyo ki i nyig lok me leb Ibru ma niange ni “kwanyo” nyo “tingo.” Kitiyo kwede i wang Baibul man me lok i kom kwanyo “bal.” Man nyuto ni Jehovah okwanyo bal pa Daudi ci otingo otero woko cen. Labongo akalakala mo meno okweyo cwiny Daudi oweko cwinye pe obedo ka pide pi bal ma en otimo. (Jabuli 32:3) Wan bene watwero geno Lubanga ma tingo ci tero woko cen bal pa jo ma gilege pi kicane pi niyegi i kom ginkok pa Yecu.—Matayo 20:28.
w01-E 6/1 30 para. 1
Tuco Bal Weko Inongo Kwecwiny
Ma Daudi otuco balle bot Jehovah, en pe dok ocako bedo ki tam ni konye pe. Lok ma en ocoyo i jabuli madok i kom tuco bal nyuto ni cwinye okwe dok onongo omoko tamme me medde ki tic pi Lubanga ki gen. Me labolle, i Jabuli 32. I tyeng 1, wakwano ni: “Dano ma dong kiweko balle tye ki gum [nyo yomcwiny], ma balle dong gikwanyo woko.” Kadi bed ngat moni otimo bal madit adada, en pud twero bedo ki yomcwiny ka en ongut ki cwinye ducu. Yo acel ma wanyuto kwede ni wangut ki cwinywa ducu aye ki ye ni ada watimo bal, kit ma Daudi otimo kwede. (2 Camuel 12:13) En pe otemo gengo ngeye bot Jehovah nyo weyo balle i wi jo mukene. Tyeng 5 waco ni: “Cut atuco balla boti, pe amungo gin marac ducu ma onongo atimo; awaco ni, ‘Abituco balla ducu bot Rwot’; ci in bene iweko balla ducu.” Ka ngat moni otuco balle labongo kano gin mo, ci en biwinyo agonya dok cwinye pe bibedo ka pide pi balle macon.
Yenyo Lonyo me Cwiny
Pingo Watye ki Pwoc pi Mar ma Pe Lokke pa Jehovah?
14 Mar ma pe lokke pa Lubanga miniwa gwok i yo me cwiny. I legane bot Jehovah, Daudi owaco ni: “In aye kakannena, igwoka ki i ayela; igura woko dyere ki larri. . . . Jo ma gigeno Rwot [Jehovah] en gwokogi ki mar mere ma pe lokke.” (Jab. 32:7, 10) I kare macon, cel ma orumo boma onongo gwoko jo ma iye ki bot lumonegi. Mar ma pe lokke pa Jehovah tye calo cel ma gwokowa ki i kom gin mo keken ma twero balo watwa kwede. Medo i kom meno, mar ma pe lokke pa Jehovah nyikowa cok bote.—Jer. 31:3.
APRIL 29–MAI 5
LONYO MA TYE I LOK PA LUBANGA | JABULI 34-35
‘Pak Jehovah Kare Ducu’
w07-E 3/1 22 para. 11
Wapaku Nying Jehovah Kacel
11 “Abipwoyo Rwot [Jehovah] kare ducu; dok abibedo ka pake nakanaka.” (Jabuli 34:1) I kare ma Daudi tye ka ngwec ki bot lumonene, nen calo en obedo ki par pi kit me nongo jami me kom ma mitte, ento lok man nyuto ni par ma en tye kwede pe ogenge ki miyo pak bot Jehovah. Man lanen maber adada piwa ka watye ka wok ki i kwo matek! Kadi bed watye i gang kwan, i gang tic, kacel ki Lukricitayo luwotwa, nyo watye i tic me pwony, gin ma pire tek loyo botwa myero obed me miyo pak bot Jehovah. Watye ki tyen lok mapol me pako Jehovah. Yomcwiny ma wanongo ki dong jami ma wapwonyo ki i cwec pa Jehovah pe bigik. Tam bene i kom jami ma Jehovah ocobo kun tiyo ki dulle ma i lobo kany! Kadi bed ni watye ki roc, Jehovah otiyo ki jo ma lugen me cobo jami mapol i kare-ni. Tic pa Jehovah pe pore ki tic pa ngat mo keken ma oywek i lobo-ni. Labongo akalakala mo, in bene iye lok pa Daudi ma ocoyo ni: “Pe tye lubanga mo i kin lubanga mukene-gu macalo in, dok pe tye kit tic mo ma rom ki ticci.”—Jabuli 86:8.
w07-E 3/1 22 para. 13
Wapaku Nying Jehovah Kacel
13 ‘Abiwakke pi Jehovah; wek jo ma gitye ki can guwiny dok gubed ki yomcwiny.’ (Jabuli 34:2) Daudi pe owakke pi jami ma en ocobogi. Me labolle, en pe owakke pi kit ma ebwolo kwede kabaka me Gat. Daudi oniang ni Jehovah aye ogwoke i kare ma en tye i Gat, dok ni ebwot pi kony pa Jehovah. (Carolok 21:1) Pi meno, Daudi owakke pe i kome kekene, ento pi Jehovah. Mumiyo jo mamwol gunyikke cok bot Jehovah. Yecu bene oilo malo nying Jehovah, dok man oweko jo mamwol gunyikke cok ki Jehovah. I kare-ni, jo mamwol ma gia ki i rok ducu gibino i kacokke pa Lukricitayo ma tye i te tela pa Yecu. (Jo Kolocai 1:18) Gudo cwiny jo mamwol magi adada ka guwinyo lutic pa Jehovah gitye ka pako nyinge, ki dok ka guwinyo kwena me Baibul ma cwiny maleng pa Lubanga okonyogi me niang.—Jon 6:44; Tic pa Lukwena 16:14.
w07-E 3/1 23 para. 15
Wapaku Nying Jehovah Kacel
15 “Ayenyo Rwot [Jehovah], ci en ogamo legana dok olara ki i kit lworo ducu ma onongo atye kwede.” (Jabuli 34:4) Gin mutimme-ni onongo pire tek adada bot Daudi. Mumiyo en owacci: “An lacan akok bot Rwot [Jehovah], ci en ogamo doga, dok olara ki i canna ducu.” (Jabuli 34:6) Ka watye kacel ki luye luwotwa, wabedo ki kare mapol me titigi kit ma Jehovah okonyowa kwede me ciro pekiwa. Man jingo niyegi, kit ma lok pa Daudi ojingo kwede niye pa jo ma onongo gicwake. Lurem Daudi ‘guneno bot Jehovah ci wanggi oryeny ki yomcwiny, dok lewic pe omakogi.’ (Jabuli 34:5) Kadi bed ni onongo gitye ka ngwec ki bot Kabaka Caulo, ento lewic pe omakogi. Onongo gitye ki tekcwiny ni Lubanga tye ka konyo Daudi, dok man oweko wanggi oryeny ki yomcwiny. I yo acel-li bene, jo ma gitye ki miti me pwonyo ada kacel ki Lukricitayo ma dong gurii i ada, gijenge i kom Jehovah pi kony. Ka guneno kit ma Jehovah okonyogi kwede, gibedo ki yomcwiny. Dok yomcwiny man nyuto ni gumoko tamgi me medde ki bedo lugen bot Jehovah.
Yenyo Lonyo me Cwiny
Gin Gunongo Meciya!
9 Kitito ni lucaden ma lugoba gibimiyo caden me goba i kom Meciya. Daudi ocoyo i Jabuli ni: “Caden ma cwinygi rac gikati ka maleng pi tito lok i koma, kun gipenya pi gin ma pe angeyo.” (Jab. 35:11) Lok pa lanebi-ni ocobbe kakare, pien “Ajwagi [lulamdog] madito ki jo ma i Lukiko ducu guyenyo lok me caden me goba i kom Yecu wek gineke woko.” (Mat. 26:59) Ki lok ada, “lwak lucaden mapol gubedo ka kelo lok goba i kome, ma lokgi ducu pe rwatte.” (Mar. 14:56) Lumone pa Yecu ma giyenyo yo me nekke onongo pe giparo pi loko lok goba.