Pingo Dano Pe Gitwero Bedo ki Kuc?—Gin Ango ma Baibul Waco?

Lucungo wibye ki dong dul mogo madongo guyelle kwe me kelo kuc i lobo. I kare-ni, lweny tye ka timme i kabedo mapol loyo kare mo keken nicakke ma Lweny me Aryo me Wi Lobo ogik. Cokcok dano ma romo bilion aryo kulu gibedo ka ma lweny tye ka timme iye.

Pingo dano pe gitwero kelo kuc? Gin ango ma Baibul waco?

Tyen lok adek mumiyo dano pe gitwero kelo kuc

1. 1. Dano gitye ki kit mogo ma gengogi ki yenyo kuc. Baibul otito ni i karewa-ni, “dano bibedo ka maro komgi kengi kun gibedo lumar lim, luwakke, lucac, . . . pe gibimaro dano wadgi, . . . gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, . . . jo ma tye atata ma pe giparo piny, jo ma gikette malo kengi ki wakke.”—2 Temceo 3:2-4.

2. 2. Kadi bed dano uribbe kacel, pe gitye ki kero me cobo pekogi labongo kony pa Lacwec, Lubanga Jehovaha. Baibul nyuto ni “pe tye ngat mo ma tye ki twero me loyo kwone.”—Jeremia 10:23.

3. 3. Lobo tye i te loc pa Catan Larac-ci, ma obedo “labwol dano ma i wi lobo ducu.” (Niyabo 12:9) Ka teke ‘lobo man ducu pud tye i te loc pa Larac-ci,’ wang ma lweny ki kukukuku obedo tye.—1 Jon 5:19.

Anga ma twero kelo kuc?

Baibul wacciwa ni dano pe bikelo kuc, ento Lubanga aye bikelone.

• “An keken aye angeyo yub ma atye kwede piwu, man Rwot ma owaco, yub me berbedo ento pe yub pi gin marac, yub pi kelo botwu kare me anyim ma wutye ki gen pire-ni.”—Jeremia 29:11.

Lubanga bicobo cikke meno nining? “Lubanga won kuc binyoto Catan woko.” (Jo Roma 16:20) Lubanga bitic ki gamente me polo, ma Baibul lwongo ni “Ker pa Lubanga,” me kelo kuc i wi lobo ducu. (Luka 4:43) I te loc pa Yecu Kricito, ma obedo Kabaka me Ker meno, kibipwonyo dano kit me bedo ki kuc.—Icaya 9:6, 7.

• Me nongo ngec matut, kwan pwony ma wiye tye ni “Gin Ango ma Ker pa Lubanga Bicobone?”