Amito To Woko—Tika Baibul Twero Konya ka Atye ki Tam me Kwanyo Kwona Woko?
Lagam ma Baibul miyo
Eyo! Baibul obedo buk ma oa ki bot ‘Lubanga ma kweyo cwiny jo ma can obwoyogi.’ (2 Jo Korint 7:6) Kadi bed Baibul pe obedo buk me cayan madok i kom two wic, ento dong okonyo jo mapol me loyo lweny i kom tam ma onongo gitye kwede me kwanyo kwogi woko. Tam maber ma tye i Baibul bene twero konyi.
Tam maber ango ma Baibul miyo?
● Tit kit ma iwinyo kwede
Gin ma Baibul waco: “Ngat ma larem bedo ki mar i kare ducu, ki dano ginywalo me nywako peko ki omegine.”—Carolok 17:17.
Tyen lokke: Wamito kony ki bot jo mukene ka tam maraco tye ka yelowa.
Ka pe itito ki jo mukene kit ma iwinyo kwede, ci tam maraco twero bwoni woko. Ento ka itito kit ma iwinyo kwede, ci ibicako winyo olo maber ber dok ibicako neno pekoni i yo mukene.
Tem timo man: Lok ki ngat mo tin, gwok dano mo me gangwu nyo laremi mo ma igeno.a Iromo bene coyo piny kit ma iwinyo kwede.
● Nong kony ki bot ludaktari.
Gin ma Baibul waco: “Jo ma komgi yot pe gimito daktar, ento kono jo ma komgi lit aye.”—Matayo 9:12.
Tyen lokke: Omyero wanong kony ki bot ludaktari ka komwa lit.
Bedo ki tam me denne twero bedo lanyut me two wic. Calo two mo keken, man pe obedo gin me lewic. Two wic kiromo tic iye.
Tem timo man: Nong kony ki bot daktar labongo galle.
● Wi opo ni Lubanga paro piri.
Gin ma Baibul waco: “Ojwinyojwiny abic pe gicato pi cente pyeraryo? Ento pe tye mo acel i kingi ma wi Lubanga twero wil iye. . . . Pe wulwor; pien piwu tek twatwal makato pi ojwinyojwiny mapol.”—Luka 12:6, 7.
Tyen lokke: Piri tek bot Lubanga.
Itwero winyo calo ngat mo keken pe paro piri, ento Lubanga niang gin ma itye ka kato ki iye. En paro piri—kadi bed iwinyo calo konye pe me medde ki kwo. Jabuli 51:17 waco ni “Ai Lubanga, in pe ibicayo ngat ma cwinye cwer.” Lubanga mito ni imedde ki kwo pien en mari.
Tem timo man: Kwan Baibul me neno gin ma nyuto ni Lubanga mari. Me labolle, kwan cura 24 i buk ma wiye tye ni Draw Close to Jehovah [Nyik Cok Bot Jehovah].
● Leg bot Lubanga.
Gin ma Baibul waco: “Wuket parwu ducu i kome [Lubanga], pien en tamo piwu.”—1 Petero 5:7.
Tyen lokke: Lubanga mito ni itit bote kit ma iwinyo kwede kikome ki gin ma tye ka keli par.
Lubanga twero mini kuc kacel ki teko me ciro peko ma itye ka kato ki iye. (Jo Pilipi 4:6, 7, 13) I yo ma kuman, en miyo kony bot jo ma gilego bote ki cwiny me ada.—Jabuli 55:22.
Tem timo man: Leg bot Lubanga tin. Ti ki nyinge, Jehovah, dok itit bote kit ma iwinyo kwede kikome. (Jabuli 83:18) Lege wek okonyi me medde ki kwo.
● Lwod lok i kom genwa pi anyim ma kicoyo i Baibul.
Gin ma Baibul waco: “Watye ki gen man macalo lajuk me mel, ma cwinywa cung iye matek, ma pe wawirre atata.”—Jo Ibru 6:19.
Tyen lokke: Kit ma iwinyo kwede twero bedo ka lokke atata calo meli ma tye ka tagge i nam, ento gen ma tye i Baibul twero miyo icung matek.
Gen meno pe obedo lek mamwa, ento jenge i kom cikke pa Lubanga me jwayo jami ducu ma keliwa arem.—Niyabo 21:4.
Tem timo man: Pwony lok mapol i kom gen ma tye i Baibul ki kwano pwony me 5 i brocuwa me Kwena Maber Mua ki Bot Lubanga!
● Tim gin mo ma imaro.
Gin ma Baibul waco: “Yomcwiny kelo yotkom.”—Carolok 17:22.
Tyen lokke: Ka watimo jami ma kelo yomcwiny, ci meno romo konyowa me bedo ki yotkom kacel ki wic mupye mot.
Tem timo man: Tim gin mo ma imaro adada. Me labolle, winy wer mamit, kwan gin mo ma cuko cwinyi, nyo tim gin mo ma yomo cwinyi. Yomcwinyi bene bimedde ka itimo gin mo me konyo jo mukene, kadi obedo gin mo matidi.—Tic pa Lukwena 20:35.
● Gwok yot komi.
Gin ma Baibul waco: “Pwonnye me rweyo ler kom tye ki kony.”—1 Temceo 4:8.
Tyen lokke: Wanongo adwogi maber ka warweyo ler komwa, wanongo yweyo muromo, dok wacamo cam mabeco.
Tem timo man: Cit ka rwene kun iwoto oyotoyot pi dakika 15.
● Wi opo ni kit ma iwinyo kwede ki jami mukene i kwoni twero lokke woko.
Gin ma Baibul waco: ‘Pe ingeyo kit ma kwoni bibedo kwede diki.’—Yakobo 4:14.
Tyen lokke: Peko mo ma cwero cwinyi—kadi wa peko mo ma itamo ni pe tye yo mo me cobone—twero bedo pi tutunu.
Kadi bed itamo ni pekoni dit tutwal tin, ento diki jami twero lokke woko. Pi meno, yeny yo me kanyone. (2 Jo Korint 4:8) Peko mo ma itye ka kato ki iye i kare-ni, diki maca twero gik woko, ento ka ikwanyo kwoni, dong pe tye gin mo ma itwero timo iye.
Tem timo tam: Kwan lok ma kicoyo i Baibul pa jo mogo ma cwinygi otur adada ma onongo gimito to woko, ci inen kit ma kwogi olokke kwede maber—i yo ma pe gubyeko abyeka kulu. Tam i kom labol magi.
Tika Baibul loko i kom jo mogo ma onongo gimito to woko?
Eyo. Baibul tito botwa ni jo mogo onongo gimito to woko. Lubanga pe odaa i wigi, ento okonyogi. En twero konyowa bene.
Elia
● En obedo anga? Elia onongo tye lanebi ma cwinye tek. Ento en bene i kare mukene cwinye otur. Yakobo 5:17 waco ni “Elia yam obedo dano ma kite cal kwedwa.”
● Pingo en onongo mito to woko? I kare mo, Elia onongo winyo ni etye kene dok konye pe. Pi meno en obako doge ni: “Ai Rwot, tin dong ikwany kwona woko.”—1 Luker 19:4.
● Ngo ma okonye? Elia oyako lok ma i cwinye ducu bot Lubanga. Lubanga ocuko cwinye nining? Lubanga onyuto ni eparo pire dok bene onyutte tekone. En ocuko cwiny Elia kun waco bote ni pire pud tek dok omiye lakony kore ma lakica dok genne.
▸ Kwan lok madok i kom Elia: 1 Luker 19:2-18.
Yubu
● En obedo anga? Yubu obedo laco ma lalonyo ma onongo tye ki dako kacel ki lutinone. En bene onongo woro Lubanga me ada.
● Pingo en onongo mito to woko? Jami maraco ocako timme i kom Yubu atura. En orwenyo jamine weng. Lutinone ducu guto i peko ma poto atura. En onongo two mo malit adada. Lacen, kimoro adot gobagoba ni en aye okelo peko i kome kekene. Yubu owacci: ‘Adag kwona; Pe amito medde ki kwo.’—Yubu 7:16.
● Ngo ma okonye? Yubu olego bot Lubanga dok oloko ki jo mukene. (Yubu 10:1-3) En onongo cuko cwiny ki bot lareme ma lakica ma nyinge Eliu, ma okonye me tam i yo matir. Ento ma dong pire tek loyo, Yubu onongo kony ki bot Lubanga.
▸ Kwan lok madok i kom Yubu: Yubu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● En obedo anga? Moses onongo latela pa jo Icrael dok obedo lanebi ma lagen.
● Pingo en onongo mito to woko? Moses onongo tye ki tic madwong me atima, kare ducu Luicrael gubedo ka daa i wiye, dok en onongo ool adada. Pi meno, en okok bot Lubanga ni: “Ber ineka woko.”—Wel 11:11, 15.
● Ngo ma okonye? Moses otito bot Lubanga kit ma ewinyo kwede. Lubanga konyo Moses ki poko ticce mogo bot jo mukene wek en pe obed ki par madwong tutwal.
▸ Kwan lok madok i kom Moses: Wel 11:4-6, 10-17.
a Ka tam me kwanyo kwoni tye matek tutwal ma pe kanye, dok pe itwero kubbe ki jo ma igenogi, ci go cim bot lumi kony ma gunongo pwonye me konyo jo ma gitye ki tam me dene woko.