Pingo Kilwongo Yecu ni Wod pa Lubanga?
Lagam ma Baibul miyo
Baibul pol kare lwongo Yecu ni “Wod pa Lubanga.” (Jon 1:49) Lok man ni Yecu obedo ‘Wod pa Lubanga-ni’ nyuto ni Lubanga en aye obedo Lacwec, nyo Lami kwo ducu, kadi wa kwo pa Yecu bene. (Jabuli 36:9; Niyabo 4:11) Baibul pe pwonyo ni Lubanga onywalo latin kit ma dano ginywalo kwede lutino.
Baibul bene lwongo malaika ni ‘lutino pa Lubanga.’ (Yubu 1:6) Dok Baibul bene owaco ni dano me acel, Adam, obedo “wod pa Lubanga.” (Luka 3:38) Ento, kit macalo Yecu obedo cwec mukwongo pa Lubanga dok ma Lubanga aye ocweyo en kikome, Baibul lwongo Yecu ni Wod pa Lubanga mukwongo.
Tika Yecu okwo i polo ma peya kinywale i lobo?
Eyo. Yecu onongo tye cwec me cwiny i polo ma peya kinywale calo dano i lobo. Yecu kikome owacci: “Alor piny ki i polo.”—Jon 6:38; 8:23.
Lubanga ocweyo Yecu ma peya ocweyo gin mo keken. Madok i kom Yecu, Baibul owacci:
En aye obedo . . . “latin kayo me ginaketa ducu.”—Jo Kolocai 1:15.
En aye obedo ‘acakki me cwec pa Lubanga.’—Niyabo 3:14.
Yecu ocobo lok pa lanebi madok i kom ngat ma ‘acakkine obedo wacon.’—Mika 5:2; Matayo 2:4-6.
Ngo ma Yecu otimo ma peya en obino i lobo?
En onongo tye ki rwom ma lamal adada i polo. Yecu oloko i kom rwom man i kare ma olego ni: “Abana ket deyo i koma . . . deyo ma yam abedo kwede i nyimi ma peya iketo lobo.”—Jon 17:5.
En okonyo Wonne me cweyo jami mukene-ni ducu. Yecu obedo ka tic ka nget wonne “macalo ladiro tic.” (Carolok 8:30) Madok i kom Yecu, Baibul owacci: “I en Lubanga ocweyo jami ducu, gin ma tye i polo ki gin ma tye i wi lobo.”—Jo Kolocai 1:16.
Lubanga otiyo ki Yecu me cweyo jami mukene ducu. Cwec eni i kine tye iye lumalaika mukene ducu, ki dong polo ki lobo. (Niyabo 5:11) Tic man ma Lubanga otiyo kacel ki Yecu-ni obedo calo kit ma lago pulan me ot tiyo kwede kacel ki lacwe ot. Lago pulan goyo pulan me ot; ki dok lacwe ot tiyo ki pulan ma kigoyo-ni me gedo ot meno.
En otiyo macalo Lok. Ka Baibul tye ka lok i kom Yecu ma pud peya obino i lobo, lwonge ni “Lok.” (Jon 1:1) Man nyuto ni Lubanga otiyo ki Wode me miyo ngec ki tira bot lumalaika mukene-ni.
Yecu bene nen calo Lubanga otiyo kwede me lok ki dano ma i lobo. Lubanga bene nen calo oloko kun tiyo ki Yecu macalo Lok i kare ma en omiyo cik bot Adam gin ki Kawa i poto me Eden. (Acakki 2:16, 17) Yecu nen calo bene obedo lamalaika ma otelo wi Luicrael i dye aroo dok kiciko Luicrael ni guwiny lokke.—Nia 23:20-23.a
a Lok pe obedo lamalaika acel keken ma Lubanga oloko kun tiyo kwede. Me labolle, en otiyo ki lumalaika mukene mapat ki Latin kayone me miyo Cik bot Luicrael.—Tic pa Lukwena 7:53; Jo Galatia 3:19; Jo Ibru 2:2, 3.