Gin Ango ma Baibul Waco i kom Gwoko Lunyodo ma Dong Guteggi?

Lagam ma Baibul miyo

Lutino madito gitye ki tic ma pire tek me neno ni lunyodogi ma guteggi gunongo gwok maber. Baibul waco ni lutino madito “myero gin kong gukwong pwonyo ticgi me dini i odigi gin kikomgi, kun gimiyo kony bot lunyodogi . . . , pien meno aye Lubanga pwoyo.” (1 Temceo 5:4) Ka lutino madito guneno ni lunyodogi muteggi gunongo gwok muromo, nongo gitye ka lubo cik ma tye i Baibul ni guwor lunyodogi.—Jo Epeco 6:2, 3.

Baibul pe tito ngo kikome ma lutino myero gutim me gwoko lunyodogi muteggi. Ento, miyo labol pa co ki mon ma onongo gitye ki niye matek ma gutimo meno. Baibul bene miyo tam maber bot jo ma gitye ka miyo kony bot lunyodo muteggi.

• I yo ma nining ma jo me odi mogo gugwoko kwede lunyodogi ma guteggi i kare me Baibul?

• Tam mabeco ango ma tye i Baibul ma twero konyo jo ma gitye ka gwoko lunyodo muteggi?

• Tika Baibul tito ni lunyodo muteggi myero gunong kony ki gang?

I yo ma nining ma jo me odi mogo gugwoko kwede lunyodogi muteggi i kare me Baibul?

Gutimo meno i yo mapol mapat pat, ma lubbe ki kony ma onongo mitte.

• Yucepu onongo bedo ka mabor ki wonne muteggi, Yakobo. I kare ma Yucepu onongo dong tye ki kero, en oketo yub me kelo Yakobo wek obed cok kwede. Man omiyo kare ki Yucepu me gwoko ki pito wonne.—Acakki 45:9-11; 47:11, 12.

• Ruth odak i lobo pa daane dok otiyo matek adada me gwoke.—Ruth 1:16; 2:2, 17, 18, 23.

• Yecu, ma dong cok to, oyero ngat ma twero gwoko minne, Maliam, ma nen calo onongo dong tye dato.—Jon 19:26, 27.a

Tam mabeco ango ma tye i Baibul ma twero konyo jo ma gitye ka gwoko lunyodo muteggi?

Baibul tye ki cik ma igi lac ma twero konyo lutino madito me lweny ki olo kacel ki turcwiny ma bino macalo adwogi me gwoko lunyodogi ma guteggi.

• Wor lunyodoni.

  Gin ma Baibul waco: “Wor woru ki meni.”—Nia 20:12.

  I yo ma nining ma watwero keto cik ma iye lac man i tic? Nyut ki lunyodoni woro kun iweko gibedo agonya me timo jami ma gimito ma lubbe ki kerogi. I yo mo keken, wek gumok tam pigi kengi i kom kit ma gimito ni kigwokgi kwede. Ki tungcel bene, nyutigi woro kun itimo gin ma itwero me konyogi.

• Nyut niango dok itim kica.

  Gin ma Baibul waco: “Dano ma tye ki ryeko maber kiniga pe mako oyot, en bedo ma cwinye tye atir pi cayo bal ma ngat mo otimo i kome.”—Carolok 19:11.

  I yo ma nining ma watwero keto kwede cik ma iye lac man i tic? Ka lanyodo mo ma oteggi owaco lok mo ma cwero cwinyi nyo pe pwoyi pi gwok ma imiye, penye kekeni, ‘Onongo abiwinyo nining ka arwatte ki pekki ma rom ki pa lanyodona?’ Ka itemme me nyuto niango ki timo kica, ci pe ibimedo peko i kin in ki lanyodoni.

• Peny tam ki bot jo mukene.

  Gin ma Baibul waco: “Yub mo ma giyubo labongo nongo tam muromo pe twero cobbe maber, dong yub ma giyubo ma kong gipenyo tam bot jo mapol cobbe kakare.”—Carolok 15:22.

  I yo ma nining ma watwero keto kwede cik ma iye lac man i tic? Tim kwed me niang kit me kemme ki two ma lunyodoni gitye kwede. Temme me niang kit kony ango ma itwero nongone i kabedowu. Lok ki jo mukene ma gugwoko lunyodogi ma guteggi. Ka itye ki omege ki lumege, nen kong ka wutwero bedo piny macalo jo me ot me nyamo kony ma lunyodoni gimito, kit me gwokogi, ki dong kit ma wutwero poko kwede ticce i wiwu.

  

• Nge ka ma keroni gik iye.

  Gin ma Baibul waco: “Jo mamwol gibibedo ki ryeko.”—Carolok 11:2.

  I yo ma nining ma watwero keto kwede cik ma iye lac man i tic? Nge ka ma kero-ni gik iye. Me labolle, dano weng gitye ki cawa kacel ki kero me timo jami mogo ento pe jami weng. Man bene gudo gin ma itwero timone pi lunyodoni. Ka iniang ni gwoko lunyodoni ocako nuri woko, peny kony ki bot jo gangwu nyo ludiro.

• Gwok yot komi.

  Gin ma Baibul waco: “Pe tye ngat mo ma dag kome kekene, ento pito ki cam dok gwoko maber.”—Jo Epeco 5:29.

  I yo ma nining ma watwero keto kwede cik ma iye lac man i tic? Kadi bed itye ki tic me gwoko lunyodoni, mitte bene ni inong jami ma mitte piri ki jo me odi ka inyomme. Omyero icam maber dok inong yweyo ki nino muromo. (Latitlok 4:6) Dok bene omyero icit ka yweyo wi ka twere. Ka itimo jami magi, ci ibibedo ki yomcwiny, wic mupye mot, ki dong kero me gwoko lunyodoni.

Tika Baibul tito ni lunyodo muteggi myero gunong kony ki gang?

Baibul pe miyo cik mo ni lutino madito myero gugwok lunyodogi ki gang. Jo me odi mogo giyero me gwoko lunyodogi ma guteggi gang pi kare malac ka twere. Ento i nge kare mo, giromo moko tam me cwalo lunyodogi ka ma kimiyo gwok maber bot jo muteggi. Jo me ot giromo bedo ki kacokke me moko tam i kom gin maber pi dano weng.—Jo Galatia 6:4, 5.