Tika Lubanga Oweko Kwa Kwo Mapatpat-ti Olokke ki i kom Nyig Kom Acel?
Lagam ma Baibul miyo
Pe. Baibul waco ka maleng ni Lubanga aye ocweyo dano, ki dong ‘kwayi’ lee ki ginapita ducu.a (Acakki 1:12, 21, 25, 27; Niyabo 4:11) Dok waco bene ni dano ducu gua ki i kom Adam ki Kawa, lunyodowa me acel. (Acakki 3:20; 4:1) Baibul pe cwako tam ni Lubanga oweko jami makwo ducu gucakke pigi kengi. Ento ki lok ada, Baibul pe kwero pwony me cayan ma waco ni jami makwo ducu gipatpat.
Gin ango ma jo mukene giye iye?
Jo ma giye ni Lubanga oweko jami makwo gucakke pigi kengi gitye ki tam mapatpat ma lubbe ki kit ma en otimo kwede man. Ma lubbe ki buk me Encyclopædia Britannica, jo mogo giwaco ni “lee ki ginapita ma gitwero kanyo kit ma piny ma i kabedo moni lokke kwede gimedde ki kwo dok ginya.”
Jo mukene dok gitye ki tam mapat, me labolle:
Jami makwo ducu gua ki i kom gin mo acel i kare macon.
Gin mo makwo twero lokke doko gin mukene mapat adada.
Lubanga aye weko jami magi ducu timme.
Tika pwony ni jami ducu gucakke pigi kengi-ni rwatte ki pwony me Baibul?
Pwony man weko dano gitamo ni lok ma kicoyo i buk me Acakki ma nyuto kit ma Lubanga ocweyo kwede jami ducu pe tye kakare. Kadi bed kumeno, Yecu onyuto ni lok ducu ma kicoyo i buk me Acakki tye kakare. (Acakki 1:26, 27; 2:18-24; Matayo 19:4-6) Baibul waco ni ma peya Yecu obino i lobo, en kong okwo kacel ki Lubanga i polo, dok okonyo Lubanga me cweyo “jami ducu.” (Jon 1:3) Pi meno, tam man ni Lubanga oweko jami ducu gucakke pigi kengi-ni pe rwatte ki pwony me Baibul.
Tika kero pa ginapita ki lee me loko kitgi ma lubbe ki kit ma piny lokke kwede nyuto ni kwo ocakke pire kene?
Baibul pe tito kwayi ginacweya adi ma tye. Dok pe kwero pwony man ni kwayi lee ki ginapita mapatpat gitwero loko kitgi ma lubbe ki kit ma piny ma i kabedo moni lokke kwede nyo ka giwoto ki nya. Kadi bed jo mogo gineno alokaloka i kwo pa cwec magi calo cwec mukene manyen, meno pe tye ka kare pien nongo ginacweya manyen pe ocakke.
a Pol kare, ka lucayan guwaco ni ginongo gin mo manyen ma ocakke pire kene, ki lok ada nongo gin meno pe ocakke pire kene, ento gunongo cwec mo ma kite nyo kwayine pat ki ma onongo kingeyo con, kit ma kinyuto kwede i buk me Acakki.