Pwony me 5
Moko Tam Piwa Kenwa Obedo Mic me Aura
1, 2. Mic me aura ango ma kicweyowa kwede?
ME NIANG pingo Lubanga oye ni dano guden can ki dok ngo ma en bitimone pire, omyero kong watam i kom kit ma en ocweyowa kwede. En pe ocweyo komwa ki adamwa keken. En ocweyowa ki teko me tamo tam ma lamal.
2 Gin ma pire tek ma kicweyowa kwede aye teko me moko tam piwa kenwa. Ada, Lubanga ocweyowa ki kero me bedo agonya iyero gin ma wamito. Man obedo mic mo ma mwonya mada ma oa ki bote.
Kit ma Kicweyowa Kwede
3-5. Pingo wapwoyo bedo ki kero me moko tam piwa kenwa?
3 Kong dong wanenu kit ma bedo agonya me moko tam piwa kenwa kubbe kwede ki tyen lok mumiyo Lubanga oye ni dano oden can. Mukwongo, tam kong i kom lok man: Tika cwinyi yom me bedo agonya me loko nyo timo gin ma cwinyi oyero, me yero ngo ma myero icam nyo irukki, kit tic ango ma imito tiyone, ki kakwene ma imito kwo iye ki kit ma myero ikwo kwede? Nyo imito ni ngat mo obed ka wacci ngo ma myero iloki ki gin ma myero itim i kwoni ducu?
4 Dano mo keken ma kome yot pe mito ni ngat mo olo kwone kwicikwici. Pingo? Pi kit ma Lubanga ocweyowa kwede. Baibul tittiwa ni Lubanga ocweyo dano i ‘calle kikome,’ dong gin acel ma en Lubanga tye kwede aye bedo agonya i yero gin ma cwinye mito. (Acakki 1:26; Nwoyo Cik 7:6) I kare ma en ocweyo dano, en bene omiyo botgi kero ma mwonya meno—mic me moko tam piwa kenwa. Meno aye omiyo wanongo ni bedo i te loc me dic cwero cwinywa mada-ni.
5 Dong miti me bedo agonya pe obino pire kene ento pien Lubanga obedo Lubanga ma tye agonya. Baibul tito ni: ‘Ka ma cwiny pa Rwot tye iye, kunnu bedo agonya bene tye iye.’ (2 Jo Korint 3:17) Pi meno, Lubanga ocweyowa ki kero me moko tamwa piwa kenwa. Kit ma en onongo ngeyo kit ma tamwa ki cwinywa bitic kwede-ni, en onongo ngeyo ni moko tam piwa kenwa bikeliwa yomcwiny.
6. Lubanga oyubo adamwa me moko tam piwa kenwa nining?
6 Medo i kom mic me moko tam piwa kenwa, Lubanga omiyo botwa kero me tam, ngiyo i lok, moko tam, kacel ki poko gin maber ki marac. (Jo Ibru 5:14) Dong, moko tam piwa kenwa jenge i kom yero jami ki ryeko. Pe kiyubowa calo gar ma pe ki tam, ma lubu mere yone lato wang-ngi. Pe bene kicweyowa me kwo calo lee ma gilubu kwo ma dong tye i remogi-ni. Me ka meno, kiyubo adamwa me bedo agonya i yero gin ma wamito.
Acakki Maber Atika
7, 8. Kit kwo maber ango ma Lubanga omiyo bot lunyodowa mukwongo?
7 Me nyuto ni Lubanga paro piwa, en omiyo ki lunyodowa mukwongo, Adam ki Kawa mic me moko tam pigi kengi ki dok ominigi bene jami ducu ma dano twero mitone. Kiketogi i paradic, kabedo mo malac mamwonya. Onongo gitye ki jami mapol pi kwogi. Onongo bene gitye ki kom ki adam ma pe ki roc, pi meno onongo pe gibitii nyo gitwo nyo gito—onongo kono gukwo nakanaka. Kono gunywalo lutino ma gipe ki roc ma gibedo nakanaka ki yomcwiny. Onongo kono dano mapol ma welgi woto ki medde-ni guloko lobo-ni ducu odoko paradic.—Acakki 1:26-30; 2:15.
8 Ma lubbe ki ngo ma kiminiwa, Baibul tito ni: ‘Lubanga oneno gin ma dong otiyo ducu, ci nen, tye mabeco tutwal.’ (Acakki 1:31) Baibul bene oloko i kom Lubanga ni: ‘Ticce ducu cobbe kakare.’ (Nwoyo Cik 32:4) Adada, Lacwec omiyo dano gucako kwo labongo roc mo. Pe tye gin mo ma onongo twero bedo ber ma kato man. Lubanga pud dong onyuto ni eparo pi dano ya!
Wang-co me Moko Tam piwa Kenwa
9, 10. Pingo myero moko tam piwa kenwa obed ma lubbe ki cik?
9 Lubanga mono onongo oyubo ni moko tam piwa kenwa-ni obed labongo wang cone? Tam kong i kom boma mo madit ma pe ki cik ma mako gudu, ma danone gingweco ki mutoka i tung cing mo keken dok i dwiro mo keken. Tika ibimaro dwoc i kodi anywena nywena ma kit meno? Pe, meno turo cik me gudu dok kelo awano mapol.
10 Dong man rom aroma ki mic pa Lubanga me moko tam piwa kenwa. Bedo angonya me yero gin ma cwinywa mito lataya kelo lanywen. Cik ma doro kit me tic pa dano myero obed tye. Lok pa Lubanga tito ni: “Wubed calo jo ma lone kengi, ento pe wuti ki locken meno pi timo gin marac.” (1 Petero 2:16) Lubanga mito ni moko tam piwa kenwa-ni omyero obed pi ber bedo pa dano ducu. En pe ocweyowa me bedo agonya kwicikwici, ento me bedo ma lubbe ki cik.
Cik pa Anga?
11. Cik pa anga ma kicweyowa me lubune-ni?
11 Cik pa anga ma kiyubowa me lubune? But ginacoya me 1 Petero 2:16 tito ni: “Wubed giwu macalo opii pa Lubanga.” Man pe te lokke ni bedo opii ma kidiyo-ni, ento tere ni kicweyowa me bedo ki yomcwiny i lubu cik pa Lubanga. (Matayo 22:35-40) Cikke ber loyo cik pa dano mo keken, tiro dano maber loyo. An Jehovah “Lubangawu amito pwonyowu wek wubed maber, kun atelowu i yo ma myero wuwot iye.”—Icaya 48:17.
12. Kit bedo agonya ango ma watye kwede ma lubbe ki cik pa Lubanga?
12 Dok cik pa Lubanga weko wabedo agonya i yero gin ma wamito labongo kato wang-co. Miyo dano pe bedo ki kit gin acel keken ma man mwonya mada. Tam kong i kom wit cam, bongi aruka, goyo wer, diro me tic cing, ki odi mapat pat ma i loboni. Adada wamito ni wan aye wayer jami magi wan kikomwa pe ngat mukene aye ma oyer itwa.
13. Cik mene ma omyero walubi pi ber bedowa?
13 Dong kicweyowa me bedo ki yomcwiny i lubu cik pa Lubanga ma kwako kitwa. Rom aroma ki lubu cik pa Lubanga ma mako jami mogo calo teko ma ywayo jami dwoko i ngom, ka wapye ki ka ma lamal, ci wawanne nyo wato. Ka pe walubu cik mogo ma mako komwa ki kwero camo cam, mato pii, nyo yweyo woko, ci wato.
14. Wangeyo nining ni dano pe kicweyo me lone kene labongo Lubanga?
14 Kit ma kicweyowa me lubu cik pa Lubanga ma mako jami ma en oketogi-ni, kicweyowa bene me lubu cik pa Lubanga ma mako kitwa ki dok kit me kwo ki luwotwa. (Matayo 4:4) Dano pe kicweyogi me lone kengi labongo Lacwecgi. Lanebi Jeremia otito ni: “Pe tye ngat mo ma tye ki twero me loyo kwone. Ai Rwot [Jehovah pwonya].” (Jeremia 10:23, 24) Dong i yo ducu, kicweyo dano me bedo ite loc pa Lubanga, pe ite locgi kengi.
15. Cik pa Lubanga mono onongo romo nuro Adam gin ki Kawa?
15 Winyo cik pa Lubanga onongo pe romo nuro lunyodowa mukwongo. Me ka meno, onongo kono obedo pi ber bedogi ki pa dano ducu. Ka onongo gulub cik pa Lubanga, kono jami ducu owoto maber. Ki lok ada, kono onongo i kareni watye ka kwo i paradic ma mwonya ki mar calo jo ot acel! Kono tim maraco, deno can ki to obedo pe.
[Cal ma tye i pot karatac 11]
Lacwec omiyo dano gucako kwo labongo roc mo
[Cal ma tye i pot karatac 12]
Tika onongo ibimaro dwoc ka ma mutoka pol iye ka cik me gudo onongo peke?