Bed ki Pwoc i Kom Motti me Bedo Agonya

1, 2. (a) Tam mapatpat ango ma dano gitye kwede ma lubbe ki bedo agonya me moko tam pigi kengi? (b) Pwony ango ma Baibul miniwa ma lubbe ki kerowa me moko tam piwa kenwa, ki dok lapeny mene ma wabinyamo?

I KARE ma onongo mitte ni dako mo omok tamme, en owaco ki lawote ni: “Pe dok iwek abed ka tam, tita gin ma myero atim. Meno dok yot makato.” Dako meno onongo mito ni kiwacce gin me atima ma ka bedo agonya me moko tamme pire kene, tic ki mot ma pire tek ma Lacwecwa omiyo. In kono? Tika pol kare imoko tam piri keni, kece imito ni jo mukene aye gumoki? Ineno mot ma itye kwede me bedo agonya me moko tam piri keni nining?

² Dano gitye ki tam mapatpat ma lubbe ki bedo agonya me moko tam pigi kengi. Jo mukene giwaco ni bedo agonya pe twere pien Lubanga dong otyeko moko jami ducu ma bitimme. Jo mukene giwacci bedo agonya twere keken ka twero ducu tye i cingwa. Ento, Baibul waco ni kicweyowa ki kero me moko tam me ryeko. (Kwan Yocwa 24:15.) I Baibul bene, wanongo lagam pi lapeny magi: Tika kerowa me bedo agonya tye ki wang coone? Myero wati ki kerowa me bedo agonya ka watye ka moko tam nining? Tam ma wamoko nyuto ni wamaro Jehovah nining? Watwero woro tam pa jo mukene nining?

GIN ANGO MA WATWERO PWONYONE KI BOT JEHOVAH GIN KI YECU?

3. Jehovah tiyo ki twerone me bedo agonya nining?

³ Jehovah tye agonya me timo gin mo keken ma en mito, dok watwero pwonyo jami mapol ki i kom kit ma en tiyo kwede ki kero meno. Me labolle, Jehovah oyero rok me Icrael me bedo “jone kikome.” (Nwoyo Cik 7:6-8) Onongo pe tye gin mo ma twero genge ki moko tam meno. Jehovah onongo mito gwoko cikke ma en omoko gin ki lareme Abraim. (Acakki 22:15-18) Medo i kom meno, Jehovah pol kare lamar dok pe lagingi tutwal. Watwero neno meno i yo ma en otero kwede Luicrael i kare ma gudoko lujemo. I kare ma gungut i kom balgi, Jehovah onyuto botgi mar dok otimigi kica. En owaco ni: “Abimiyo niyegi magoro-ni doko tek, abimarogi pi bercwinya.” (Kocea 14:4) Jehovah onyuto lanen maber ma lubbe ki kit ma en tiyo kwede ki kerone me bedo agonya me konyo jo mukene!

4, 5. (a) Anga ma Lubanga okwongo miye mot me bedo agonya, dok en otiyo kwede nining? (b) Lapeny ango ma myero wan ducu wapenye kwede?

⁴ Jehovah oyero me cweyo lumalaika kacel ki dano kun weko gibedo agonya. Jehovah okwongo cweyo Yecu. Kicweye i cal pa Lubanga dok bene onongo tye agonya. (Jo Kolocai 1:15) Yecu otiyo ki twerone me bedo agonya nining? Ma peya Yecu obino i lobo kany, en oyero me bedo lawiny bot Lubanga ma ka cwako Catan kacel ki jemone. I kare ma Yecu obino i lobo kany en omoko tamme me kwero Catan ki bwolane ducu. (Matayo 4:10) Lacen, i dyewor ma peya kineko Yecu, en owaco ni emito timo miti pa Wonne. En olego ni: “Wora, ka imito, kwany kikopo man woko ki bota, ento pe obed macalo an amito; gin ma in imito aye myero otimme.” (Luka 22:42) Tika twere ki wan me lubo lanen pa Yecu kun watiyo ki twerowa me bedo agonya me woro ki timo miti pa Jehovah?

⁵ Ada, watwero lubo lanen pa Yecu pien wan bene kicweyowa i cal pa Lubanga. (Acakki 1:26) Ento, wan watye ki ka ma kerowa me moko tam piwa kenwa gik iye. Lok pa Lubanga waco ni Jehovah oketo wang coo ka ma bedo agonyawa gik iye, dok mito ni waye meno. Me labolle, i paco, dako myero omine i te loc pa cware ki lutino bene myero guwor lunyodogi. (Jo Epeco 5:22; 6:1) Man twero gudo kit ma watiyo kwede ki kerowa meno nining? Lagam pi lapeny man twero moko kodi kwo ma wabibedo kwede pi naka i anyim.

TIC KI MOTWA ME BEDO AGONYA I YO MABER NYO MARAC

6. Mi labol ma nyuto kit ma pire tek kwede me keto wang coo kadi bed watye agonya.

⁶ Ci dong ka kerowa me moko tam piwa kenwa tye ki ka ma gik iye, ci tika nongo i ada watye agonya? Ada, nongo watye agonya! Pingo? Pien wang coo twero gwokwa. Me labolle, watwero yero me dwoyo mutoka wa i boma mo ka mabor adada. Ento ket kong ni cik me gudi pe, kun ngat acel acel ngweco i cipid ma iye mito dok pe gilubo tung cinggi. Tika ibibedo agonya me ngwec i yo meno? Pe wacel. Wang coo mitte wek wabed agonya. Kong dong wanen labol mogo ma gitye i Baibul ma ginyuto wang coo ma Jehovah oketo wek wanong adwogi maber.

7. (a) Apokapoka ango ma onongo tye i kin Adam ki lee? (b) Tit kong kit ma Adam otiyo kwede ki twerone me bedo agonya.

⁷ I kare ma Jehovah ocweyo Adam, en omine bene mot me bedo agonya kit ma omiyo kwede bot lumalaika. Ento Lubanga pe omiyo ki lee kero me bedo agonya. Adam otiyo ki twerone me bedo agonya i yo maber nining? Adam onongo yomcwiny i cako nying lee. Lubanga “okelogi bot dano me neno kit ma ebicako ki nyinggi.” I kare ma Adam ongiyo lee ki acel acel, ci en ocako nying ma rwatte. Jehovah pe oloko nying ma Adam ocakogi-ni. Ma ka meno, “kit ma yam dano ocako ki nying gin makwo acel acel ducu, en aye obedo nyinggi.”​—Acakki 2:19.

8. Adam otiyo ki twerone me bedo agonya i yo marac nining, dok man okelo adwogi ango?

⁸ Jehovah omiyo ki Adam tic me loko lobo-ni ducu me doko paradic kun wacce ni: “Wunywal, wunya, wupong lobo, wulo bene; dok wulo wa rec ma i nam, ki winyo me polo, ki gin ducu makwo ma giwoto i wi lobo.” (Acakki 1:28) Ento Adam oyero me camo nyig yat ma kigengo, i timo meno en okalo wang coo ma Jehovah oketo. Dano dong gudeno can pi mwaki mapol adada pien Adam otiyo ki twero ma kimine i yo marac. (Jo Roma 5:12) Myero wiwa opo i kom adwogi marac ma tam ma Adam omoko-ni okelo. Meno biweko watiyo ki twerowa me bedo agonya i yo maber ki dok bene pe wakalo wang coo ma Jehovah oketo.

9. Gin ango ma Jehovah onongo mito ni jone guyer, dok gin ango ma gucikke me timone?

⁹ Dano ducu gulako roc kacel ki to ki bot Adam gin ki Kawa. Ento pud watye ki twero me tic ki motwa me bedo agonya. Waneno meno ki i kit ma Lubanga otero kwede Luicrael. Jehovah oweko ni Luicrael gumok tamgi ka gimito bedo jone kikome nyo pe. (Nia 19:3-6) Luicrael guyero me bedo jo pa Lubanga dok guye pe me kalo wang coo ma Lubanga oketo botgi. Gin gucikke ni: “Gin ducu ma Rwot [Jehovah] owaco, wabitiyo.” (Nia 19:8) Lacen, ki cwercwiny madit, gin guyero me turo cikkegi bot Jehovah. Wanongo pwony ma pire tek ki i labol meno. Myero wateru motwa me bedo agonya calo gin ma pire tek adada dok wamedde ki jenge i kom Jehovah kun walubo cikke.​—1 Jo Korint 10:11.

10. Labol ango ma tye i Jo Ibru cura 11 ma nyuto ni dano ma tye roc bene twero tic ki twerone me bedo agonya me woro Lubanga? (Nen cal ma tye i pot karatac 9.)

¹⁰ I Jo Ibru cura 11, wanongo nying co ki mon ma romo 16 ma gubedo lugen dok guworo wang coo ma Jehovah oketo botgi. Macalo adwogine, gunongo mot mapol ki dok gen mamwonya pi kwo me anyim. Me labolle, Nua onongo tye ki niye matek i kom Lubanga dok omoko tamme me lubo cik ma Lubanga omiye me gero yeya wek olar kwone kacel ki pa jo me ote ki yalwak me anyim. (Jo Ibru 11:7) Abraim gin ki Cara guyero me lubo lok pa Lubanga labongo dic mo ci gucito i lobo ma Lubanga ocikke me minigi. Kadi bed “gunongo yo me dok cen” i boma me Ur, gin guketo tamgi i kom cikke pa Lubanga pi anyim. Baibul waco ni gin onongo gitye ka “paro pi lobo maber makato maca ca woko.” (Jo Ibru 11:8, 13, 15, 16) Moses bene okwero lonyo me Ejipt ento “oyero me neno can kacel ki jo pa Lubanga ma ka bedo ki yomcwiny me bal.” (Jo Ibru 11:24-26) Myero walub lanen pa co ki mon magi dok wabed ki pwoc i kom motwa me bedo agonya kun watiyo kwede me cobo miti pa Lubanga.

11. (a) Mot ango ma pire tek ma watye kwede macalo adwogi me bedo agonya? (b) Gin ango ma cuko cwinywa me tic ki mot meno i yo maber?

¹¹ Twero nen calo gin mayot ka waweko ni ngat mo aye omok tam piwa, ento man weko wakeng mot me bedo agonya ma pire tek adada-ni. Meno obedo mot ango? Baibul tito pire i Nwoyo Cik 30:19, 20. (Kwan.) I tyeng 19, wanongo ni Lubanga omiyo bot Luicrael gin ma myero guyer. I tyeng 20 bene waniang ni Jehovah omiyo bot Luicrael kare me nyuto margi pire. Wan bene watwero yero ka ce wamito woro Jehovah. Dok bene watye ki kare me tic ki motwa me bedo agonya me keto deyo i kom Jehovah kun wanyuto kit ma wamarre kwede!

PE ITI KI TWERONI ME BEDO AGONYA I YO MARAC

12. Gin ango ma pe myero watim ki mic ma kiminiwa-ni?

¹² Go kong ni imiyo mic mo mamwonya adada bot laremi. Iwinyo nining ka inongo en obolo mic meno woko i bur yugi, nyo marac dong loyo en otiyo kwede me wano ngat mukene? Meno bicwero cwinyi adada. Jehovah ominiwa mot me bedo agonya. Pi meno, twero bedo ni cwinye cwer ka en neno jo mukene gitiyo ki mot meno i yo marac dok gimoko tam marac nyo gitiyo kwede me wano jo mukene. Baibul tito ni i “kare me agikki” dano “pe gibimiyo pwoc.” (2 Temceo 3:1, 2) Dong watwero nyuto nining ni watye ki pwoc pi mic man ma Jehovah ominiwa-ni? Dok watwero gwokke pe me tic ki mic meno i yo marac nining?

13. Watwero gwokke nining wek pe wati ki kerowa me bedo agonya i yo marac?

¹³ Wan ducu watye agonya me yero liremwa, rukwa, ki dong galowang. Kadi bed kit meno, i cawa mukene watwero tic ki mic man me moko tam ma pe yomo cwiny Lubanga nyo ma lubbe ki kit me lobo man. (Kwan 1 Petero 2:16.) Ma ka tic ki kerowa me bedo agonya me timo gin marac, myero ‘wati kwede me miyo deyo bot Lubanga.’​—1 Jo Korint 10:31; Jo Galatia 5:13.

14. Pingo myero wagen Jehovah ka watye ka tic ki kerowa me bedo agonya?

¹⁴ Jehovah owaco ni: “An a Rwot [Jehovah] Lubangawu amito pwonyowu wek wubed maber, kun atelowu i yo ma myero wuwot iye.” (Icaya 48:17) Myero wagen Jehovah dok waye wang coo ma en oketo wek wamok tam matir. Ki cwiny me mwolo, myero waye ni “dano pe loyo kwone kene nio i agikkine; pe tye ngat mo ma tye ki twero me loyo kwone.” (Jeremia 10:23) Adam kacel ki Luicrael ma pe lugen-ni gukalo wang coo ma Jehovah oketo ento gujenge i komgi kekengi. Myero wanong pwony ki i kom gin ma gutimo. Ma ka jenge i komwa kekenwa, myero ‘wagen Jehovah ki cwinywa ducu.’​—Carolok 3:5.

WOR TAM MA JO MUKENE GIMOKO

15. Gin ango ma wapwonyo ki i cik ma iye lac ma tye i Jo Galatia 6:5?

¹⁵ Myero bene waworo twero ma jo mukene gitye kwede me moko tam pigi kengi. Pingo? Kit macalo wan ducu watye ki mot me bedo agonya-ni, pol kare Lukricitayo pe gibimoko tam marom. Man kwako tam madok i kom kitwa ki worowa. Wi myero opo i kom cik ma iye lac ma nonge i Jo Galatia 6:5. (Kwan.) Ka waniang ni Lakricitayo acel acel bitingo yecce ma lubbe ki tam ma en moko, ci wabiworo tamgi.

16, 17. (a) Nywere nywere ango ma onongo tye i kin Lukricitayo ma i Korint? (b) Paulo okonyo Lukricitayo magi nining, dok pwony ango ma wanong ki iye?

¹⁶ Kong dong wanen labol acel ma nyuto tyen lok muweko pire tek me woro tam ma utmegiwa gimoko. Winye manok onongo tye i kin Lukricitayo ma i Korint pi lok madok i kom camo ringo ma gityero bot jogi ka lacen dok kicato i cuk. Lukricitayo mukene onongo cwinygi pe ngoligi kop ka gucamo ringo meno pien onongo gingeyo ni jogi pe gin mo wacel. Ento, jo ma onongo con kong gubedo ka woro jogi magi onongo gineno camo ringo man calo dok gitye ka woro jok. (1 Jo Korint 8:4, 7) Onongo gitye ki nywere nywere madit ma onongo twero poko kin dano ki i kacokke. Paulo okonyo Lukricitayo magi nining me cobo peko man?

¹⁷ Me acel, Paulo opoyo wigi ni cam pe bijingo watgi ki Lubanga. (1 Jo Korint 8:8) Me aryo, Paulo ocikogi ni pe myero guwek ‘twero ma gitye kwede me yero gin mo’ odok me diyo jo ma cwiny ma ngoligi kop-pi goro. (1 Jo Korint 8:9) Lacen, en owaco bot jo ma cwinygi pidogi ni pe gungol kop i wi jo ma camo ringo meno. (1 Jo Korint 10:25, 29, 30) Pi meno, madok i kom jami mogo ma rwatte ki worowa, Lakricitayo acel acel myero omok tamme pire kene. Tika bene myero pe wawor tam pa utmegiwa madok i kom jami mogo matino tino?​—1 Jo Korint 10:32, 33.

18. Ibinyuto nining ni itye ki pwoc i kom mot me bedo agonya?

¹⁸ Jehovah ominiwa mic me moko tamwa piwa kenwa ma weko wabedo agonya. (2 Jo Korint 3:17) Watye ki pwoc pi mic man pien miniwa kare me moko tam ma nyuto ni wamaro Jehovah. Pi meno, wamedde ki moko tam ma keto deyo i kom Jehovah, dok myero bene wanyuto woro i kom tam ma jo mukene gimoko ma lubbe ki mic ma gitye kwede me bedo agonya.