Pwony me 7
Adwogi Ango ma Jemo Man Okelo?
1-3. Kare mukato-ni onyuto nining ni Jehovah oloko lok ada?
MA LUBBE ki kop ma mako twero me loc pa Lubanga, adwogi ango ma loc pa dano ma pe jenge i kom Lubanga pi cencwari mapol-li okelo? Dano tika gunyutu ni gin gibedo luloc mabeco loyo Lubanga? Ka waneno rekod me tim gero pa dano ci wamoko ni pe wacel.
2 I kare ma lunyodowa mukwongo gukwero loc pa Lubanga, peko aye olubu. Gukelo peko i komgi kekengi kacel ki dano ducu ma gin gunywalo. Dok onongo pe giromo kok i kom ngati mo ento i komgi kekengi. Lok pa Lubanga waco ni: “Gutimo tim aranyi i kome; pe dong gin litinone, pien komgi ki mwonyo.”—Nwoyo Cik 32:5.
3 Gin mutimme i tekwaro onyuto ni lok ma Lubanga ociko ki Adam gin ki Kawa ni ka ce gua woko ki i te locce, ci gibidoko goro ma mot mot bio wa i to-ni obedo lok ada. (Acakki 2:17; 3:19) Gin gua woko ki i te loc pa Lubanga, ci mot mot gudoko goro ci guto.
4. Pingo kinywalowa ki bal, ma miyo watwo dok wato?
4 Gin mutimme lacen i kom likwayogi ducu tye kit ma Jo Roma 5:12 otito kwede ni: “Bal yam obino i lobo kun wok ki i dano acel [Adam ma obedo lawi ot pa kwai dano ducu-ni], ka dong to obino pi bal, kit meno bene to onya oromo kin dano ducu, pien dano ducu gubalo.” Dong i kare ma lunyodowa mukwongo gujemo i kom tela pa Lubanga, gudoko lubalo. Kit ma bal onongo dong odonyo woko i remo-ni, likwayogi gulako bal meno ki botgi. Meno aye gin mumiyo wan ducu kinywalowa ki goro, ma miyo watwo dok wato.
5, 6. Gin mutimme i tekwaro nyuto gin ango i lok ma dok i kom tute pa dano me kelo kuc ki lonyo me ada?
5 Cencwari mapol dong otyeko kato. Ker madito mapol guloyo loc ci gutur. Dano gutemo kit yo me loc mo keken. Kadi bed kit meno, jami maraco aye otiko bedo ka timme i kom dano. I nge mwaki alip abicel kulu, dano onongo myero dong gukel kuc, ngolo kop atir, ki lonyo i wi lobo ducu, onongo myero dong gudong kit mabeco calo kica, paro pi dano, ki dok ribbe kacel.
6 Ento olung tukkene aye dok otimme. Pe tye kit gamente pa dano mo keken ma okelo kuc ki lonyo pi dano ducu. I karewa-ni keken, dano milion mapol ata kinekogi i kare me Holocaust kacel ki dano makato milion 100 mukene ma kinekogi i lweny mapat pat. I karewa-ni dano mapol kiunugi, kinekogi, kibologi i buc pi adegadega nyo pi lok me wibye.
Kwo i Kare-ni
7. Kiromo tito ni dano tye ka kwo nining i kare-ni?
7 Medo i kom meno, tam kong i kom kit ma kwo pa dano tye kwede i kare-ni. Turo cik ki tim gero onya ata. Tic ki jami maraco calo jayigi oromo kin piny woko. Two ma kobo pi tim me buto dong dwong ma pe larre. Two jonyo ma dano lworo tutwal-li tye ka mako dano milion mapol ata. Dano makato milion apar kulu gito ki kec nyo ki two mwaka ki mwaka, kun ki tungcel jo manok nongo gitye ki lonyo madwong ata. Dano tye ka wolo jami me lobo woko. Kwo me ot ki kit maber dong oballe i kabedo ducu. Adada, kwo me kare-ni nyuto loc marac pa ‘lubanga me lobo-ni’ ma en aye obedo Catan. Lobo ma en loyo-ni rac, opong ki tim gero kacel ki camucana.—2 Jo Korint 4:4.
8. Pingo waromo wacone ni diro ma dano gudongo-ni pe obedo pi ber-re aye?
8 Lubanga omiyo kare muromo ki dano me dongo dirogi me cayan kacel ki nongo jami ducu ma gimito pi kwogi. Ento dongo diro man mono nongo tye pi ber-re ka ce jami calo atum, aterogi-ni, kileyo kakagi ki muduku, tanka, dege lweny, kacel ki bom me niukilia? Tika kilwongo ni dongo lobo, ka ce dano tuk cito calo wa i dwe-gu ento pe giromo bedo kacel ki kuc i kingi i wi lobo? Tika ada bedo dongo lobo ka ce dano gilworo wot i gudu i dyewor, nyo kadi wa i dyeceng i kabedo mogo?
Gin ma Kare Otyeko Nyutone
9, 10. (a) Cencwari mapol mukato-ni onyuto gin ango? (b) Pingo Lubanga pe bikwanyo mic me bedo agonya-ni woko?
9 Temo loc ken pi cencwari mapol mukato-ni onyuto ni dano pe twero loyo kwogi pigi kengi maber labongo loc pa Lubanga. Meno obedo gin ma pe twere botgi ma rom aroma ki bedo labongo camo cam, mato pii kacel ki yweyo yamo. Dong onen atir ka maleng: Kicweyowa me jenge i kom Lacwecwa kit macalo kicweyowa wek kwowa ojenge i kom cam, pii, kacel ki yamo-ni.
10 Pi ye ni tim maraco obed tye, Lubanga onyuto kicel pi kare ducu, adwogi marac ma bino pi tic ki bedo agonyawa i yo marac. Bedo agonya obedo mic mo ma pire tek atika ma Lubanga otamo ni me ka kwanyone woko ki bot dano, twora emiyo kun nongo eweko botgi kare me neno rac pa tic kwede i yo marac aye. Lok pa Lubanga otito lok ada me waco ni: “Dano pe loyo kwone kene nio i agikkine.” Oloko bene lok ada me wacone ni: “Dano dong oloyo dano lawote pi keto awano i kome.”—Jeremia 10:23; Latitlok 8:9, NW.
11. Tika tye kit loc pa dano mo ma dong ojwayo peko pa dano?
11 Weko twero me loc i cing dano pi mwaki alip abicel kulu-ni onyuto ka maleng ni dano adana pe romo juko peko. Pe tye kare mo ma dano ojuko iye peko. Me labolle, Kabaka Solomon me Icrael, kadi bed obedo ki ryeko, lonyo kacel ki teko madwong, ento pe orucu peko ma obino macalo adwogi me loc pa dano. (Latitlok 4:1-3) I yo acel-lu, lutela me lobo me karewa-ni bene, kadi bed diro me tet oito lamal tutwal ento jwayo peko oloyogi woko. Marac dong loyo aye ni jami mutimme i tekwaro otyeko nyuto ni nongo loc ken ki bot Lubanga omedo peko pa dano ameda me ka jwayone woko.
Lubanga Neno ka Mabor
12-14. Adwogi maber ango ma obino pien Lubanga oweko peko ni obed tye?
12 Peko ma Lubanga oye ni obed tye-ni okelo arem malit atika i komwa. Ento en onongo tye ka neno ka mabor, onongo en ngeyo adwogi maber ma bibino i anyim. Yo me neno pa Lubanga-ni bikelo adwogi maber bot gin aketane, pe pi mwaki alip manok keken, ento pi mwaki milion mapol ata, pi nakanaka.
13 Ketti ka ngat mo dok otiyo ki bedo agonyane i anyim i yo marac me pyem i kom kit ma Lubanga tiyo kwede ticce, pe nongo dong bimitte ni omyero dok kimine kare me nyuto ada pa lokke-ni. Kit ma Lubanga dong omiyo mwaki alip mapol ata ki lujemo me nyuto ada pa lokgi-ni, adwogine dong bitic macalo labol pi kabedo ducu.
14 Tim maraco kacel ki peko ma Jehovah oye ni obed tye i kare-ni, dong otyeko nyuto ka maleng ni gin mo keken ma pe kubbe ki locce pe twero bedo maber. Meno nongo dong onyuto labongo akalakala mo ni yub pa dano nyo pa cwec me cwiny mo keken me bedo ki locken, pe twero kelo adwogi marii nakanaka. Pi meno, bibedo atir ki Lubanga me jwero lajemo mo keken ma binen. “Jo maraco ducu en binekogi tyekogi woko.”—Jabuli 145:20; Jo Roma 3:4.
[Cal ma tye i pot karatac 15]
I kare ma lunyodowa mukwongo guyero me nongo locken ki bot Lubanga, mot mot gutii ci guto woko
[Cal ma tye i pot karatac 16]
Loc pa dano ma pe jenge i kom Lubanga okelo peko mapol
[Ka ma cal oa ki iye]
U.S. Coast Guard photo