Tango ma Otimme i Nam Makwar

I kare ma Parao owinyo ni jo Icrael guweko Ejipt, en dok oloko tamme i kom gonyogi woko. En ociko lumonye ni: ‘Wuyub gadigadi lwenya ducu, wek waryem korgi! Onongo myero pe wawek guciti.’ En kacel ki jone gucako ryemo kor jo Icrael.

Jehovah onongo tye ka telo jone kun tiyo ki wir me pol i dyeceng ki wir me mac i dyewor. En otelogi wa i Nam Makwar, ci owaco botgi ni gutong gony.

I ngeye, jo Icrael guneno Parao ki dul monnye ka giryemo korgi. Ka ngwec onongo pe, pien nam onongo tye i nyimgi ki mony pa Ejipt onongo tye ka bino ki i ngegi. Gukok bot Moses ni: ‘Wabito woko! Twora nongo iwekwa i lobo Ejipt.’ Ento Moses owaco ni: ‘Pe wubed lwor. Wucung matek wek wunen kit ma Jehovah bilarowa kwede.’ Moses onongo tye ki gen matek i kom Jehovah, pe kumeno?

Jehovah owaco bot jo Icrael ni guwot anyim. I dyewor meno, Jehovah oketo wir me pol-li i kin jo Ejipt ki jo Icrael. Ki tung bot jo Ejipt, piny onongo col licuc. Ento dero onongo tye tung bot jo Icrael.

Jehovah owaco bot Moses ni orye cinge i wi nam. Ci Jehovah oweko yamo okodo matek dyewor lung. Nam opokke iye aryo ci yo oyabbe i dyere. Jo Icrael milion mapol ata gungolo loka ca kun giwoto i lobo mutwo i kin pii ma otinge malo tung acuc ki acam.

Mony pa Parao gumwomme i kor jo Icrael i dye nam. Ci Jehovah obangogi woko. Tyen gadigadigi ocako poto woko. Lumony magi gudange ni: ‘Wek waringu walwi woko ki kany! Jehovah tye ka lweny pigi.’

Jehovah owaco bot Moses ni: ‘Rye cingi i wi nam.’ Cutcut, pii ma otinge malo-ni ocako dwogo cen ci oumo mony me Ejipt woko. Parao ki lumonye ducu guto woko. Kadi wa ngat acel pe obwot.

Ki loka tung ca, lwak dano mapol ma gubwot-ti gupako Lubanga ki wer: “Wer bot Rwot [Jehovah], pien otuc ki loc me deyo; obolo aguragura ki lait i wiye woko i nam.” I kare ma dano tye ka wer, mon gubedo ka myel kun gigoyo ajaa. Dano ducu gubedo ki yomcwiny madit mada pi bedo agonya.