Cer pa Yecu Kelo Kwo ma pe Tum!

CER pa Yecu pe obedo gin ma otimme wacon ma konye pe, ento pire tek botwa i kare-ni. Lakwena Paulo otito ka maleng gin mumiyo pire tek botwa ni: “Kricito dong gicero woko ki i kin jo muto, en tye macalo wi mwaka pa jo muto. Pien dano aye mukelo to, dok bene cer pa jo muto dano mukelo. Pien macalo dano ducu to i Adam, en i kit yo acel-lu jo ducu gibimiyogi kwo i Kricito.”​—1 Jo Korint 15:20-22.

Kicero Yecu i nino dwe 16 me Nican, 33 K.M., i nino ma Lujudaya gityero kwede wit camgi mukwongo cek calo gin tyer i nyim Lubanga Jehovah i ot pa Lubanga i Jerucalem. Kit ma Paulo olwongo Yecu ni cam me wi mwaka-ni, en onongo tye ka wacci jo mukene bene gibicerogi.

Lok ma Paulo omedo tito jami mogo ma otwere pi cer pa Yecu. Paulo owaco ni “Pien dano aye mukelo to,” dok bene ‘cer pa jo muto dano aye bikelone.’ Pi bal ki roc ma walako ki bot Adam, oweko wan ducu wato. Ento, Yecu omiyo kwone ma pe ki roc macalo ginkok me gonyowa ki i opii me bal ki to kun wok ki i nicer. Me dolo te lokke maber, Paulo ocoyo i Jo Roma 6:23 ni: “Pien mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.”

Yecu kikome otito gin mumiyo tone ki cerre pire tek botwa ni: “Wod pa dano bene myero gitinge malo kumeno, wek dano ducu ma ye en olim kwo ma pe tum. Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”​—Jon 3:14-16.

Tam kong​—Kwo me labed naka labongo arem, peko, nyo kumu! (Niyabo 21:3, 4) Man pud dong obedo kwo mamwonya ya! Laco mo acel owacci: “Kit macalo bur lyel romo poyo wiwa kit ma kwo pe rii kwede, nicer bene weko wangeyo ni to bene pe birii.” Adada, cer pa Yecu kelo kwo ma pe tum!