Kimiyo Botwa Lonyo

¹ Lakwena Paulo otero tic ma Lubanga omiye me tito pi kwena calo gin ma pire tek oweko en olwongo ni “lonyo.” (2 Kor. 4:7) En ociro peko mapol ki aunauna i timo tic meno. En otito kwena bot ngat mo keken ma ongolle labongo olo. En owoto wot maboco maraco i yo wa ki i nam-gu. Wan kono watwero poro Paulo nining ki nyuto ni watero ticwa me pwony calo gin ma pire tek? (Rom. 11:13) Ngo ma weko ticwa me pwony bedo lonyo ma lapore pe?

² Lonyo Maber Loyo Ducu: Lonyo me lobo-ni magobane nok tutwal dok pe rii ento pol kare kelo cwercwiny madwong aye. Ki tungcel, ticwa me pwony kelo magoba madwong dok marii, botwa wa bot jo mukene-ni bene. (1 Tem. 4:16) Konyo jo ma gitye ki cwiny me ada me ngeyo Jehovah, loko yo me kwogi ka dong gibedo ki gen me kwo ma pe tum. (Rom. 10:13-15) Ka watero ticwa me pwony calo gin ma pire tek, ci wanongo tyen lok me bedo kwo, wawinyo yomcwiny me cobo ticwa man, dok wabedo ki gen me kwo i anyim.—1 Kor. 15:58.

³ Nyut ni Itero Lonyoni Calo Gin ma Pire Tek: Wanyuto ni watero gin moni calo gin ma pire tek ki jalo ginwa mo pire. Jalo karewa nyo kerowa pi pako Jehovah pud dong obedo twon mot madit atika! (Ep. 5:16, 17) Kit ma watiyo kwede ki karewa myero onyut ni watero jami me cwiny calo gin ma pire tek loyo jami me kom. Kit macalo watye ki jami ma pire tek ma omyero wapwony, wamito ni wapwonyu ki mit kom kun wabedo ki wang ma twolo me tito pi kwena maber-ri teke kare mo onen.

⁴ Lonyo ma pirgi tego pol kare pe kikanogi ento kinyutogi ka maleng wek jo mukene gunen. Ka waneno ticwa me pwony calo lonyo, ci bibedo gin ma pire tek i kwowa. (Mat. 5:14-16) Dong walubu lanen pa Paulo ki cwiny me pwoc madit dok watiyu ki kare mo keken ma onen me nyuto ni wan i ada watero ticwa me pwony calo gin ma pire tek, nyo calo lonyo madit.