Ter Ticci Calo Mot ma Pire Tek
1. Pol pa dano i wi lobo gineno ticwa me pwony nining?
1 Pol pa dano ma gikwo i lobo ma Catan aye doro-ni gineno tic me tito kwena calo gin me “mingo.” (1 Kor. 1:18-21) Ka pe wagwokke, kodi tam man maraco-ni twero dwoyo tamwa, turo cwinywa dok rwenyo mit komwa. (Car. 24:10; Ic. 5:20) Tyen lok ango mumiyo wan Lucaden pa Jehovah watero motwa calo gin ma pire tek?—Ic. 43:10.
2. Pingo kilwongo ticwa me pwony ni ‘tic maleng’?
2 ‘Tic Maleng’: Lakwena Paulo otito ni tic me pwony obedo ‘tic maleng.’ (Rom. 15:15, 16) I yo ma nining ma tic man obedo ‘tic maleng’? Ka wanywako i tic man te lokke ni “wan lutic kacel” ki Jehovah ‘Ngat Maleng,’ kun wanywako i lonyo nyinge. (1 Kor. 3:9; 1 Pet. 1:15) Jehovah neno ticwa me tito kwena calo ‘gitum ma gityero,’ pi man ticwa me pwony obedo but worowa.—Ibru. 13:15.
3. Ngo ma oweko tic me tito kwena tye gin me deyo madit?
3 Tito lok me kwena maber-ri obedo twon deyo madit ma jo manok keken aye gitye ka nongo mitte. Lumalaika gitye ki miti me cobo tic man dok giromo tiyone maber loyo. (1 Pet. 1:12) Ento, Jehovah oyero wan dano ma luroc, “atabo ma gicweyo ki lobo” me timo tic man ma pire tek-ki!—2 Kor. 4:7.
4. Wanyutu nining ni tic me pwony obedo gin ma pire tek botwa?
4 Gin Mukwongo: Pien wamaro motwa man, waneno ticwa calo “gin maber makato” pi kwowa. (Pil. 1:10) Pi man, waketo cawa cabit ki cabit me nywako i tic man. Lago wer ma oywek tero goyo wer i gurup ma kingeyogi i lobo ducu calo gin ma pire tek, ci bedo ka temo cinge dok ciko jami me goyo wer-re ducu bedo ma rwatte dok ma ilo malo rwom me gocone. Wan bene, mito wayubbe maber ka wacito i tic me pwony wek wabed jo ma “tero lok me ada i yo [ma] atir,” dok watute me ilo malo ‘dirowa me pwony.’—2 Tem. 2:15; 4:2.
5. Anga ma pwoyo tic me pwonywa?
5 Pe iwek lok marac ma dano loko obal cwinyi. Wi myero opo ni i wang ticwa pud tye dano ma gimito ni walimgi. Ento, pe watimo man me yomo cwiny dano. Gin ma pire tek loyo botwa aye kit ma Jehovah winyo kwede, ki kit ma en pwoyo kwede tutewa i tic man.—Ic. 52:7.