Yub ma Kite Dok Pat me Poko Trak i Oktoba 20–Novemba 16!

¹ Cakke i Baraja me Oktoba 20, wabinywako tic ma kite dok pat me poko trak manyen pi cabit angwen kulu, wi lok me trak man tye ni In Imito Ngeyo Lok Ada? Dok watye ki gen ni tic me pok man ma kite dok pat-ti bitugo miti pa jo mapol i kom lok me ada.—Jon 17:17.

² Trak man miyo lagam mucwiny ento macego i kom lapeny abicel ma pigi tego: “Lubanga tika ada paro piwa?” “Lweny ki peko mono bigik?” “Ngo ma timme i komwa ka wato?” “Gen mo tika dok tye pi jo muto?” “An atwero lega nining wek Lubanga owiny legana?” ki dong “An mono atwero nongo yomcwiny nining i kwona?” Dini pa Lukricitayo ata-ni pe gimiyo lagam ma yengo dano i kom lapeny magi. Lapeny magi nyamo wa wi jo mapol ma pe gubedo Lukricitayo bene, pien pe guromo bedo ki ngec ni lagamme nonge i Baibul. Pi meno, wageno ni kwena man bigudu cwiny dano mapol.

³ Tyekku Wang Ticwu: Wutem­me me tyeko wang ticwu ma wutiyo ot-ki-ot ka twerre. Ka wang ticwu tye malac, ci luelda guromo cuko cwinywu me weko kopi me trak man i odi ma kinongo dano gipe igi i limwu mukwongo. Wi myero opo me miyo kopi me trak man bot jiranini, wadini, lutic luwoti nyo lutino kwan luwoti, ki jo ma iloko kwedgi pol kare. Iromo bene keto yub me tic macalo painia pi tutunu i dwe me Oktoba nyo Novemba. Itye ki latinni nyo latin kwanni me Baibul ma tye ka dongo i yo me cwiny, dok tye mupore ma romo tic kwedwa macalo latit kwena ma peya onongo batija i poko trak man? Ka tye, ci mi ngecce bot luelda.

⁴ Gin me Aloka: Wek kwena man oo bot dano mapol, bedo ber ka loki obedo macek. Peny rwod ot lapeny acel i kin lapeny abicel ma tye i pok­ke ma i nyime-ni ci inyut bote lagamme ki i trak man. Man bimiyo kare ki lutit kwena mapol me tic ki lok ma megi wek obed ma rwat­te ki kwo me wang ticgi. Ka ngat mo onyutu miti, co nyinge piny ci idok cen ka limme. I tum pa cabit ducu, wabitic ki magajin ma tye, ki dong trak man. Wabimiyo buk me Baibul pwony inge tyeko tic man me poko trak-ki i Novemba 16. Trak mo keken ma bidong kibimiyone calo trak mukene-ni.

⁵ Cak Kwano Baibul ki Dano: Trak man kiyubo tutwalle me konyowa cako kwano Baibul ki dano. Ka idok ka limo ngat mo ma onyutu miti, iromo penye wek onyut­ti pwony me Baibul ma okele kwe cwiny? Nyut nge trak man ma cimo yubwa me kwano Baibul ki dano, ci imine buk me Baibul Pwonyo. Ka twere, wunyam macek cek paragraf mo acel nyo aryo ma lubbe ki pwony ma en oyero ki i dul ma tito tere maber.

⁶ Jehovah tye ka yenyo jo ma gibiwore i “cwiny ki ada.” (Jon 4:23) Pi meno, wan ducu myero wanywaku i tic man ma kite dok pati wek ­wakonyu ­jo mukene gunge lok me ada!