Bed ma Iyubbe Maber Adada pi Kwero Nipo

Pud dong obedo twon yomcwiny madit atika bot lulub kor Kricito me yubbe maber adada pi kwero nino me nipo me to pa Yecu Kricito ma bitimme i otyeno! (Luka 22:19) Gin ango ma waromo timone me yubbe pi kwero Nipo man?

◼ Cawa ki Kabedo: Dano ducu myero guniang cawa ki kabedo ma kwero Nipo man bibedo iye kikome. Ka kacokke makato acel bitic ki Ot me Ker acel, ci pire tek me lubu cawa me yub kikome ki bene pore me a woko con, kit macalo nongo kiweko cawa manok pi cako yub ma lubu. Myero kiwek kabedo mogo calo doggola, ki ka mukene calo kagwoko mutoka-gu pe opong ki dano.

◼ Lwongo Jo Mukene: Lutit kwena ducu tika dong mono gitye ki karatac me lwongo muromo, ki dong tika gingeyo jami ma iye ducu? Tika dong wuporo kit me miyo karatac me lwongo man? Ibimiyo karatac me lwongo bot nga? Myero kiket tek wek kipok karatac me lwongo man ducu.

◼ Giwot: Jo mogo ma gunyutu miti, kacel ki omegiwa ki lumegiwa mapol nongo gimito kony me giwot ki kony mukene-gu. Yub ango ma kiketo pi konyogi?

◼ Mugati ki Vino: Omyero kinen ni pe kicako wot ki mugati ki vino i kin dano ma peya ceng opoto. Omyero kiyub yub me tero mugati ki vino bot Lakricitayo mo ma kiwiro ma tye ki goro ma pe twero bino i cokke man. Mugati ki vino ma rwatte ma kibitic kwede omyero kinong dok kiyub obed atera.—Nen Watchtower, me Febuari 15, 2003, pot karatac 14-15, paragraf 14, 17.

◼ Ot me Ker: Ot ma kibitic kwede omyero kilwok obed maleng ma peya cawa oromo. Cwan, gilac, meja kacel ki latam maber me wiye omyero kiketgi woko con i kabedogi i ot ma yub bibedo iye. Ka kibitic ki kabedo mapatte, ci omyero kinen ni kinongo gin lakub dwan maber wek dano ducu ma gibino guwiny lalok. Lujol wele kacel ki jo ma gibiwot ki mugati ki vino i kin dano omyero kinyutigi gin ma gibitimone con, omyero gunge ni rukgi ki kit ma ginen kwede omyero obed mupore.

I nino man ma pire tek mada me kwero Nipo me to pa Yecu Kricito-ni, mitte ni wan ki acel acel myero wayubbe ki cwinywa ducu ki dok macalo kacokke. Man bimiyo Jehovah goyo laane i kom jo ducu ma ginyutu pwoc ki cwinygi ducu pi mic madit me gitum pa Wode me amara Yecu Kricito ma en omiyo.