In Itye Atera me Miyo Caden ma Pe Iyubbe Iye?
1. Lanen mene ma nyutu ni miyo caden ma pe wayubbe iye romo nyako nyige?
1 Miyo caden ma pe wayubbe iye romo nyako nyige. Baibul tye ki lanen mapol ma lubbe ki caden ma kimiyo ma pe kiyubbe iye ma okelo adwogi maber. (Jon 4:7-15) Ngo ma waromo timone me yubbe pi miyo caden i yo man?
2. Rukwa ki kit ma wanen kwede romo konyowa me miyo caden nining?
2 Rukwa ki Kit ma Wanen Kwede: Keto cwinywa i rukwa ki kit ma wanen kwede cawa ducu bimiyo wabedo agonya me nywako niyewa ki jo mukene. (1 Tem. 2:9, 10) Ka lewic makowa pi kit ma wanen kwede, ci wabibedo ki lworo me miyo caden. Ki tungcel, ka warukke maber dok maleng, ci romo miyo jo mukene penyowa pingo warukke ma nenowa mit. Me labolle, Lucaden mo ma gunyomme ma gurukke maber i kare ma gitye i cafari gubedo i nget laco mo ma obedo Laicilam. I kare ma oneno kit ma gurukke kwede, laco-ni openyogi ka gin gubedo Lukricitayo. Man omiyo gunyamo lok me Baibul pi cawa adek kulu.
3. Ma lubbe ki lanen pa Yecu, in dong icako lok ki dano nining?
3 Cako Lok: I kare ma Yecu orwatte ki dako me Camaria i wang it pa Yakobo, en ocako lok ki penyo dako-nu pi pii amata. I yo acel-lu, wan bene waromo cako lok ki loko lok macek cek nyo penyo lapeny mayot. Kadi bed i cawa mukene walwor, ento ka wajenge i kom Jehovah pi nongo kony, ci wabedo ki “tekcwiny” me cako lok.—1 Tec. 2:2.
4. Wan watwero bedo atera nining me miyo caden ma pe wayubbe iye?
4 Yenyo Yo me Miyo Caden: Lutit kwena mapol gunongo yo mapat pat me miyo caden ma pe guyubbe iye. Ngi kit ma kwoni tye kwede, dok tam i kom jo ma iromo rwatte kwedgi nino ducu. Wot ki bukke ma mitte ki dok ka twere Baibul. Bed ki wang mabit, dok inyut miti i kom jo ma gitye cok kwedi. Ka itamo con pi kare ma romo nen i dyeceng, ci ibibedo atera me miyo caden maber atika.—Pil. 1:12-14; 1 Pet. 3:15.
5. Pingo miyo caden ma pe wayubbe iye myero obed i yubwa?
5 Watye ki tyen lok aryo ma pigi tego atika me tic ki kare ma tye me miyo caden ma pe wayubbe iye—mar pi Lubanga ki pi luwotwa. (Mat. 22:37-39) Kit ma tic me tito kwena mitte pi oyot tutwal-li, miyo caden ma pe wayubbe iye myero obed i yubwa. Omyero wabed atera me tic ki kare mo keken ma onen me nywako kwena me Ker-ri ki jo mukene kit ma kare pud tye-ni.—Rom. 10:13, 14; 2 Tem. 4:2.