Wan Wabedo Lucaden Cawa Ducu
1. Pwony ango ma wanongo ka wakwano kit ma Yecu omiyo kwede caden bot dako ma i wang pii?
1 Yecu onongo dong owoto pi cawa malac. En ool dok orwo pii onongo tye ka neke. I kare ma lupwonyene gucito ka wilo cam, en obedo piny ka yweyo i nget wang pii mo ma tye i nge gang me Camaria. Yecu onongo tye i Camaria pe pi tito kwena; en onongo tye ka cito i Galilaya ka medde ki ticce me pwony kunu. Ento, en okwanyo kare me miyo caden bot dako mo ma onongo tye ka twomo pii. (Jon 4:5-14) Pingo? Yecu pe ogiko bedo “caden ma genne ki me ada” bot Jehovah. (Yabo 3:14) Wan walubu lanen pa Yecu ki i bedo Lucaden pa Jehovah kare ducu.—1 Pet. 2:21.
2. Watwero bedo atera me miyo caden ma pe wayubbe iye nining?
2 Bed ma Iyubbe: Watwero bedo atera me miyo caden ma pe wayubbe iye ka wawoto ki bukkewa. Lucaden mapol gibedo ki trak ka macok dok giweko bot lucat wil i dukan, lutic i ka piko mo, nyo ngat mo keken ma gurwatte kwede i nino meno. (Latit. 11:6) Lamego mo ma pol kare woto i cafari tute me nenone ni etye ki Baibulwa matino-ni acel kacel ki buk me Baibul Pwonyo i kicaane, kun en temme tutwal me cako lok ki jo ma nongo gubedo ka ngete.
3. I yo ango ma watwero cako kwede lok?
3 Cak Lok: Ka watye ka miyo caden ma pe wayubbe iye omyero pe wacak ki lok ma a i Ginacoya cutcut. Yecu pe ocako lokke ki dako ma i wang pii ca ki nyute ni en aye ebedo Meciya. En openyo pi pii amata keken, ma man otugo miti pa dako-ni. (Jon 4:7-9) Lamego mo acel onongo ni tic ki yo acel-lu konye tutwal me cako lok kace kipenye ka en enongo mit pa kwero nino madit mo ma tye. Me ka gamone ni en pe ekwero kodi nino magi pien ebedo Lacaden pa Jehovah, en waco ni “An amoko tamma pira kena pe me kwero nino meno.” Lapeny peny ma kuman pol kare penyo pingone, man miyo kare bot lamego-ni me miyo caden.
4. Pingo lok ma tye i Matayo 28:18-20 cuko cwinyi?
4 Kadi bed Yecu ocobo ticce me pwony i lobo kany, en pud tye ki miti i tic me tito kwena ma kitye ka timone kit ma en otimo kwede kare ca. (Mat. 28:18-20) Dong, calo Lanenwa Yecu, wan Lucaden watye atera me lok i kom niyewa cawa mo keken.—Ibru 10:23.