Iromo Miyo Caden ma pe Iyubbe Iye!
1. (a) Miyo caden ma pe iyubbe iye mono kwako gin ango? (b) Dano adi ma i cokke man ma gudonyo i ada pien ngat mo omiyo caden botgi ma pe oyubbe iye?
1 Dano adi ma i kacokkewu ma gukwongo nongo ada ki i miyo caden ma nongo pe kiyubbe iye? Itwero bedo ki ur i lagam me lapeny man. Miyo caden ma pe iyubbe iye kwako nywako kwena maber-ri ki dano ma warwatte kwedgi nino ducu calo ka watye i wot, wil, limo wadi nyo jiraniwa, i cukul, i dog tic, ki i kabedo mukene. I gurup mo me Lucaden makato 200 ma dong gunongo batija woko, cok cok dano 80 i kingi giwacci gurwatte ki Lucaden i yo man! Pi man, yo me tito kwena man tiyo maber adada.
2. Labol ango me miyo caden ma pe kiyubbe iye ma tye i Ginacoya?
2 I cencwari me acel, lutit kwena onongo pol kare gimiyo caden ma pe guyubbe iye. Me labolle, i kare ma Yecu tye ka kato ki i Camaria, en omiyo caden bot dako mo ma tye ka twomo pii ki i wang it pa Yakobo. (Jon 4:6-26) Pilipo ocako lok ki Laetiopia mo ma tiyo i gang kal pa kabaka ma onongo tye ka kwano buk pa Icaya kun penye ni: “In iniang lok ma ikwano-ni?” (Tic 8:26-38) I kare ma kimake i mabuc i Pilipi, lakwena Paulo omiyo caden bot lalo ot mabuc. (Tic 16:23-34) Lacen, i kare ma kiye ni obed i ode kene ki acikari ma gwoke, Paulo onongo “jolo lwak jo ducu ma bino bote. Obedo ka tito lok me ker pa Lubanga, pwonyo bene lok kom Rwot Yecu Kricito.” (Tic 28:30, 31) In bene iromo miyo caden ma pe iyubbe iye, kadi bed ilwor. I yo ma nining?
3. Ngo ma romo konyowa me loyo lworo?
3 Kit me Cakone: Pol pa wan wanongo ni cako lok ki dano ma pe wangeyo tek. Kadi wa ki luremwa ma pe gubedo Lucaden, cako lok i kom ada romo kelo lewic. Ento, waromo nongo tekcwiny me lok ka walwodo lok i kom ber pa Jehovah, lonyo me cwiny ma en omiyo bot luticce, ki kwo marac ma dano ma gipe i ada gitye iye. (Yon 4:11; Jab. 40:5; Mat. 13:52) Medo i kom meno, waromo kwayo Jehovah me ‘miyo botwa tekcwiny.’(1 Tec. 2:2) Latin kwan acel me Gilead owacci: “Anongo ni pol kare lega konya me bedo ki tekcwiny me lok ki dano.” Ka itye ki lworo me lok, leg lega macek ki i cwinyi.—Nek. 2:4.
4. Yub ango ma waromo kong ketone piwa kenwa, dok pingo?
4 Nen ka maleng ki i nyinge ni miyo caden ma pe iyubbe iye pe mito ni wacak lok ki nyutu wang ginacoya kit ma watimo kwede jwi. Romo bedo ber ka waketo yub me cako lok i yo mayot ma pe watamo ni myero wami caden cut. Lutit kwena mapol giwacci cako lok i yo man miyo gibedo ki tekcwiny me cako tito kwena maber-ri. Ka dano moni pe tye ki miti me lok, pe myero wadi en adiya. Juk lok ki mwolo ci imedde anyim.
5. Gin ango ma okonyo lamego mo ma lwor me miyo caden ma pe oyubbe iye?
5 Ka en tye i cuk ka wil, lamego mo ma lwor kong neno wang dano i yo me lirem ci bwunyo. Ka dano ca bene obwunyo, en loko lok mo macek. Ka dano ca ogamo lokke maber, ci meno miye tekcwiny me medde ki lok. En ciko ite ka winyo lok me niang pwony mene ma opore pi dano-nu. Tito kwena i yo man oweko lamego-ni omiyo bukke mapol bot dano dok ocako bene kwano Baibul ki dano acel.
6. I yo ma nining ma waromo cako kwede lok ki dano ma nongo pe wayubbe iye?
6 Kit me Cako Lok: Ngo ma waromo wacone me cako lok? I kare ma Yecu obedo ka lok ki dako ma i wang it ca, en ocako ki penyo pi pii amata. (Jon 4:7) Pi man, wan bene waromo cako lok ki lapeny nyo mot i yo me lirem. Ka wumedde ki lok iromo nongo kare me miyo pwony mo ki i Ginacoya ki dong coyo kodi me ada. (Latit. 11:6) Jo mukene gunongo ni yo maber aye me waco lok ma tugo miti pa dano ma weko dano penyo lapeny. Me labolle, ka itye ka kuro daktar, iromo cako lok ki wacci, “Cwinya bibedo yom ka koma dong pe bibedo lit matwal.”
7. Bedo ki wang mabit konyowa nining me miyo caden ma pe wayubbe iye?
7 Bedo ki wang mabit konyowa bene me cako lok. Ka waneno lanyodo mo ma tye ki lutino ma kitgi beco, waromo pwoye ci wapenye ni, “Ngo ma okonyi me bedo lanyodo maber kit man?” Lamego mo acel bedo ka winyo gin ma lutic luwote giloko iye ci leyo tam kwedgi ma lubbe ki mitigi. Kare ma en oniang ni dako acel i ka ticce onongo tye ka yubbe me nyomme, en omiyo bote magajin me Awake! ma loko i kom kit me yubbe pi nyom. Man omiyo gumedde ki nyamo lok mukene ki i Baibul.
8. Waromo tic ki bukkewa nining me cako lok?
8 Yo mukene ma waromo cako kwede lok aye kwano bukkewa ka ma dano mukene romo nenowa iye. Omego mo acel yabo Watchtower nyo Awake! ci cako kwano laling ling pwony ma wi lokke tugo miti pa dano. Ka en oneno ngat mo ma tye cok kwede tye ka neno magajine-ni, ci en penyo lapeny nyo loko lok mo macek i kom pwony ma en tye ka kwano-ni. Meno pol kare yabo yo me cako lok ki miyo caden. Ka waketo bukkewa ka ma dano neno, meno romo tugo miti pa lutic nyo lutino kwan luwotwa me penyo lapeny.
9, 10. (a) I yo ango ma waromo nongo kwede kare me miyo caden ma pe wayubbe iye? (b) In dong itimo man nining?
9 Nongo Kare: Kit ma kare dong odic woko me tito kwena-ni, myero pe water miyo caden ma pe wayubbe iye calo gin mo ma warwatte iye arwata. Ma ka meno, myero watute me nongo kare me miyo caden ka watye ka timo ticwa me nino ducu. Bed ka tamo pi dano ma iromo rwatte kwedgi, dok inen kit ma iromo cako lok kwedgi i yo me lirem. Wot ki Baibul kacel ki bukkewa wek ibed atera me nyamo lok ki jo ma gunyutu miti.—1 Pet. 3:15.
10 Bedo makwiri oweko lutit kwena mapol gunongo kare me miyo caden ma pe guyubbe iye. Lamego mo acel ma bedo i odi ma kigwokogi agwoka tiyo ki ka ma dano namo iye me nyutu cal mogo me jami mamwonya. Ka dano ocung me nenone, en tiyo ki kare meno me cako lok i kom cikke me Baibul pi “polo manyen ki lobo manyen.” (Yabo 21:1-4) Tika iromo tamo yo mapat pat ma iromo tic kwede me miyo caden ma pe iyubbe iye?
11. Waromo lubo kor ngat ma onyutu miti ka watye ka miyo caden ma pe wayubbe iye nining?
11 Lubo Kor Ngat ma Onyutu Miti: Ka inongo ngat mo ma onyutu miti i lokki, temme me lubo kore. Ka twere iromo wacce ni: “Lok kwedi oyomo cwinya mada. Aromo nongi kwene wek wamedde ki lokwa?” Lutit kwena mukene ginyutu ka ma gibedo iye ki namba me cimgi ci giwaco ki dano-nu ni: “Lokwa-ni oyomo cwinya. Ka imito nongo ngec mapol i kom gin ma wanyamo-ni, iromo nongo an kit man.” Ka in pe itwero lubo kor dano ma onyutu miti-ni, mi ngec bot kacokke ma twero lubo kun ipongo fom me Please Follow Up (S-43) ci imi bot karan me kacokkewu.
12. (a) Pingo myero wagwok rekod dok waco ripot pi cawa ma watiyo kwede i miyo caden ma pe wayubbe iye? (b) Adwogi maber ango ma kinongo ki i miyo caden ma pe wayubbe iye? (Nen bok me “Miyo Caden ma Pe Wayubbe Iye Kelo Adwogi Maber!”)
12 Cawa ma watiyo kwede i miyo caden ma pe wayubbe iye myero waco i ripotwa. Pi man, nen ni igwoko rekod man, kadi bed ni iloko pi dakika mo manok keken i nino meno. Tam kong: Ka latit kwena acel acel omiyo caden ma pe oyubbe iye pi dakika abic keken nino ki nino, ka kiribo dakika magi ducu ci joge makato cawa milion 17 dwe ki dwe!
13. Ngo ma myero otug cwinywa me miyo caden ma pe wayubbe iye?
13 Watye ki tyen lok ma pire tek me miyo caden ma pe wayubbe iye—mar pi Lubanga ki pi jiraniwa. (Mat. 22:37-39) Ka cwinywa opong ki pwoc pi yub ki kit pa Jehovah ci meno bimiyo waloko i kom ‘deyo me dit me ker-re.’ (Jab. 145:7, 10-12) Paro pi jiraniwa miyo watute me tic ki kare mo keken ma tye me nywako kwena maber-ri ma kare pud tye. (Rom. 10:13, 14) Ka watamo anyim kun wabedo atera, wan ducu waromo miyo caden ma pe wayubbe iye dok wanongo yomcwiny ma bino pi pwonyo ngat ma cwinye atir.
[Boro buk i pot karatac 4]
Iromo nongo ni bedo me kony ka iketo yub me rwatte ki dano ki dong cako lok kwedgi
[Boro buk i pot karatac 5]
Bedo makwiri oweko lutit kwena mapol gunongo kare me miyo caden ma pe guyubbe iye
[Bok i pot karatac 5]
Yo ma Iromo Tic Kwede me Cako Lok
◼ Leg lega pi nongo kony me cako lok
◼ Yeny dano ma gitye ki wang me lirem dok pe gitye ka rune
◼ Nen wang-gi i yo me lirem, bwuny manok ci lok i kom gin mo ma miti pa dano ducu tye iye
◼ Bed ngat ma ciko ite
[Bok i pot karatac 6]
Miyo Caden ma Pe Wayubbe Iye Kelo Adwogi Maber!
• I kare ma en onongo tye ka kuro ni kiyub mutokane, omego mo acel omiyo caden bot jo ma gubedo kacel kwede kun miyogi karatac me lwongo pi pwony ma kiyubo pi lwak. I gure madit i nge mwaka acel, omego mo ma en pe ngeyo obino omote ki yomcwiny. Meno onongo obedo laco acel i kin jo ma en opoko botgi karatac me lwongo i ka yubo mutoka mwaka ma okato ca! Laco-ni onongo ocito ka winyo pwony ca ma kiyubo pi lwak ci omiyo nyinge ni kikwan kwede Baibul, kombeddi dong en kacel ki dakone gunongo batija woko.
• Lamego acel ma onongo ada pien kimiyo bote caden ma pe kiyubbe iye neno jo ma en rwatte kwedgi pi lutinone adek-ki calo wang ticce. Wang ticce-ni kwako jirani ki lunyodo ma en rwatte kwedgi i cokke pa lunyodo i cukul. Kare ki kare ka en tye ka nyutte bot ngat mo, en waco ni Baibul obedo gin ma konye me pwonyo lutinone, ci medde ki lok i kom gin mukene. Kit ma en nongo ocako lok woko-ni, en nongo ni yot me kelo lok i kom Baibul kare mukene. Bedo ka tic ki yo man oweko en okonyo dano 12 me o wa i batija.
• I kare ma laco ma cato ngec me incuareny olimo lamego mo, lamego-ni okwanyo kare me miye caden. En openyo laco-ni ka mito bedo ki yot kom, yomcwiny ki kwo ma pe tum. Laco-ni ogamo ni emito, dok openyo lamego-ni ni kit kontrak me incuareny ango ma en tye ka lok iye. Lamego-ni onyutu bote cikke me Baibul dok omiye buk acel ki i kin bukkewa, ma laco-ni okwano i otyeno acel keken. Kicako kwano kwede Baibul, ocako wot i cokke, ci lacen onongo batija.
• I kare ma en onongo tye ka wot ki dege, lamego acel ocako lok ki dako mo ma obedo cok kwede ci omiye caden. I agikki me wotgi, lamego-ni omiyo ki dako-ni canduk posta kacel ki namba cimme kun cuko cwiny dako-ni me cako kwano Baibul ka Lucaden pa Jehovah gulimme. Orwone cut, Lucaden aryo gubino i doggola pa dako-ni. Dako-ni ocako kwano Baibul, odongo i ada, onongo batija, cut cut ocako kwano Baibul ki dano adek ma en onongogi.
• Omego mo ma latowang ma tye ki mwaka 100 ma bedo ka ma kigwoko iye lutiyo pol kare maro wacci, “Wamito Ker-ri.” Man omiyo ludaktar kacel ki lutwo mogo gibedo ka penye me tito gin ma Ker-ri obedo. Dako mo ma latic kunu openye ngo ma en bitimo i Paradic. En ogamo ni: “Wanga biyabbe, abiwoto odoco dok abiwango gari pa lungolo man woko.” Kit macalo en obedo latowang-ngi, en kwayo dako-ni me kwano magajin bote. I kare ma nya pa omego-ni obino ka limme, latic-ci openye ka etwero tero magajin i gange. Daktar acel owaco ki nya pa omego-ni ni: “Wi lokwa madit manyen kany tye ni: ‘Wamito Ker-ri.’”
• Lamego mo ma ocung i lain i ot me wilo cam owinyo ka ludito mogo ma gubedo piny gitye ka lok i kom kop me wibye. Laco acel owacci gamente pe romo cobo pekki ma watye kwede. Lamego-ni otamo ki i cwinye kene ni, ‘Man aye kare ma opore pira me cako lok.’ En owaco lega macek ci olokke me lok botgi. I nge tuco nyinge, owaco botgi ni tye gamente mo ma bicobo peko pa dano ducu, meno aye Ker pa Lubanga, ci omiyo botgi brocuwa ma en onongo tye kwede. Ladit me ot cam obino. Lamego-ni otamo ni onongo kibiryeme woko. Ento, ladit-ti owacce ni ebedo ka winyo lokgi, dok bene emito ni kimiye brocuwa. Latic mo ma onongo tye ka winyo lok-ki obino ma pig wange tye ka mol. En obedo ngat ma kong okwano Baibul ci oweko woko ento dong mito cako kwan odoco.