“In Itwero Tic Calo Painia Maber Adada!”
1. Ngo ma Lamego mo acel owaco ma lubbe ki ticce calo painia?
1 Kathe B. Palm owacci: “Pe tye tic mo mukene mapat ma onongo atwero nongone ma romo kela yengo madit nyo adwogi maber i yo me cwiny.” En odyere me tic calo painia kun cwalo mwaki mapol i miyo caden cakke ki i but Chile ma tye i South America nio wa i bute tungcel. Tam kong kwo maber ma jo ma gitye i tic me pwony pi kare malac gitye iye, oromo bedo ni ngat mo owacci ni: “In itwero tic calo painia maber adada!”
2. Tit gin mumiyo yengo madit bino pi tiyo tic me cwiny.
2 Yo me Kwo ma Kelo Yengo: Yecu, ma tye Lanenwa-ni, onongo yweyo me ada i tiyo gin ma Wonne mito. (Jon 4:34) Pi meno, Yecu opwonyo ki cwiny me ada jo ma lubbe ni yengo kikome bino pi tiyo tic ma kubbe ki woro Jehovah. Wan wayeng ka ce kwowa pong ki tic ma miyo wanongo cwak pa Jehovah. Medo i kom meno, ka wamiyo cawawa, kerowa, kacel ki jami ma watye kwede i konyo jo mukene, ci wamedo yomcwinywa.—Tic 20:31, 35.
3. Yomcwiny ango ma waromo nongone ka wamedo cawawa i ticwa me pwony?
3 Ka wacwalo cawa malac i ticwa me pwony, ci man miniwa kare me nongo yomcwiny i cako ki dok kwano Baibul ki dano. Kadi wa ka ma wegi odi pe gimito winyo lokwa, ka ngec ki diro i ticwa me pwony omedde, wacako nongone ni wang ticwa-ni kara nyako nyige. Painia giromo tic ki pwony ma ginongo ki i Cukul me Pwonyo Painia, dok gitwero bedo i cukul man i nge tic calo painia pi mwaka acel. (2 Tem. 2:15) Ka wadiyo cwinywa, ci nongo watye ka coyo kodi me lok ada ma binyako nyige i nge kare mo i anyim.—Latit. 11:6.
4. Bulu ma dong gicok tyeko kwangi omyero gutam i kom gin ango?
4 Bulu: Ka itye ka tyeko kwanni, tika dong itamo matut i kom kwoni me anyim? Nio wa kombeddi, tic ma kimini ki i cukul aye doro yubbi. I yo ma nining ma in ibiculo kwede bur meno inge tyeko kwanni? Ma ka yenyo tic me lobo-ni, pingo pe itam pi keto yub me tic calo painia marii? Diro ma ibipwonyogi calo miyo caden bot dano me rok mapat pat, lweny ki ariya mogo i kwoni, dongo woro i komi kekeni, ki dong dongo dironi me pwony bikonyi pi kare me kwoni ducu.
5. Lunyodo ki jo me kacokke giromo dongo cwiny me tic calo painia nining?
5 Lunyodo, tika wutye ka konyo lutinowu me donyo i tic me pwony pi kare malac? Lokwu kacel ki lanen maber ma wunyutu romo konyogi me keto pi Ker-ri bedo mukwongo. (Mat. 6:33) Ray, ma ocako tic calo painia i kare ma en cok tyeko kwanne me cinia, wiye po ni: “Mamana pol kare onongo neno bedo painia calo tic ma kelo yengo i kwo.” Jo ducu ma i kacokke giromo dongo cwiny me tic calo painia i lokgi ki dong cwak ma gimiyo. Jose, me lobo Spain owacci: “Kacokke ma atye iye neno bedo painia calo tic ma pud dong ber loyo pi jo matino. Lokgi kacel ki pwocgi pi tic calo painia medo ki kony ma gimiyo okonya omiyo cako tic calo painia obedo yot tutwal bota.”
6. Ngo ma waromo timone i kareni ka ce wape ki miti me tic calo painia?
6 Lweny ki Ariya ma Tye: Ento iromo wacci, ‘Ape ki miti me tic calo painia.’ Ka meno aye kit ma iwinyo kwede i acakki, leg bot Jehovah kun iwacce ni, ‘Pe angeyo ka tic calo painia rwatte kweda, ento amito timo gin ma yomocwinyi.’ (Jab. 62:8; Car. 23:26) I ngeye, yeny tirane ki i Lokke kacel ki dul ma mege. Jo mapol ma gitye ka tic calo painia marii ‘gutemo’ tic calo painia pi tutunu i acakkine, dok yomcwiny ma gunongo omiyo gudonyo i tic pi kare malac.—Jab. 34:8.
7. Wan waromo lweny ki akalakala ni pe waromo cobo cawa 70 dwe ki dwe nining?
7 Ento ka itye ki akalakala ni pe iromo cobo cawa 70 ma mitte dwe ki dwe kono? Pingo pe ilok ki painia ma pekogi rwatte ki megi? (Car. 15:22) Ci coo piny yub mapol ma iromo cobogi. Ma ka balo cawa i tic mogo ma konygi pe, iromo nongone ni kwanyo kare me cito i ticwa me pwony yot loyo kit ma itamo kwede tyen mukwongo ca.—Ep. 5:15, 16.
8. Pingo omyero wangi kit me kwowa kare ki kare?
8 Ngi Kit me Kwoni: Kit me kwowa pol kare lokke. Ber me ngiyo kit me kwoni kare ki kare. Me laporre, dong icok weko dog tic pa gamente? Randy, ma oweko dog tic con owacci: “Moko tam man okonya me cako tic calo painia marii kacel ki dakona, dok man ominiwa kare me kobo kun watiyo ka ma can lutit kwena tye iye. Anongo mot mapol pi tam ma amoko, ento mot ma pud dong dit loyo ma anongo aye ni cwinya pe ngola kop.”
9. Ngo ma myero jo munyomme gutam pire?
9 I nge ngiyone matut, jo mogo ma gunyomme gunongo ni gin aryo ducu myero pe gidony i dog tic ma gik i cawa ma jwi. Ada, man mitte ni jo me ot myero gudwok yo me kwogi obed lapiny, ento dyeregi man pe poto nono. John, ma dakone oweko tic cokcok-ki wek emed ticce me pwony owacci: “Pe tye yomcwiny mo ma aromo bedo kwede me ngeyone ni dakona tye ka tiyo tic me cwiny i dyeceng.”
10. Ngo mono ma tugo cwiny Lukricitayo me tamo pi tic calo painia?
10 Nyutu Mar ki Niye: Jehovah omiyo tic me tito kwena-ni odoko tic mo ma pud dong pire tek loyo ma watwero timone. Lobo man dong kicok jwerone woko, dok jo ma gilwongo nying Jehovah keken aye gibilarre. (Rom. 10:13) Ka cwinywa pong ki mar kacel ki pwoc pi gin ma en otimo piwa, ci man biweko watiyo tic ma Wode omiyo-ni ki mit kom. (Mat. 28:19, 20; 1 Jon 5:3) Medo i kom meno, bedo ki niye ni watye ka kwo i kare me agikki bimiyo watimo jami ducu ma mitte i ticwa me pwony ka nongo kare pud tye, ma ka tic ki jami me lobo-ni mukato kare woko.—1 Kor. 7:29-31.
11. Omyero wanen nining ka ngat mo owacci wan watwero tic calo painia?
11 Tic calo painia marii pe obedo cwalo cawa malac i tito kwena keken; ento obedo nyutu dyerewa bot Lubanga. Pi meno, ka ngat mo owacci in itwero tic calo painia maber adada, nen lok man calo lok me cuko cwiny. Leg dok itam me donyo i tic man ma kelo yengo-ni kacel ki jo mukene.
[Boro buk i pot karatac 4]
Lunyodo, tika wutye ka tiyo ticwu me konyo lutinowu me donyo i tic me pwony pi kare malac?
[Boro buk i pot karatac 5]
Jehovah omiyo tic me tito kwena-ni tic mo ma pire tek ma wan ducu watwero timone.