Man Aye Obedo Kare me Tito pi Kwena!
1. Pingo man aye obedo kare me tito pi kwena?
1 “Wulwor Lubanga, wumi deyo bote.” I te tela pa lumalaika, kwena man kitye ka tito pire “bot jo ma gibedo i wi lobo, bot rok ducu ki kaka ki leb-gu ki jo mapatpat ducu.” Pingo? ‘Pien kare [pa Lubanga] me ngolo kop dong oromo.’ I kare-ni, wan watye ka kwo i ‘kare me ngolo kop,’ ma bigik ki jwero te yub me kare man. Pire tek ni dano omyero ‘guwor en Ngat ma oketo polo ki lobo ki nam ki wang it-gu.’ I kare-ni pe tye kit tic mo ma kitye ka timone ma pire tek loyo nyo ma mitte pi oyot loyo tito “lok me kwena maber.” Ada, man aye obedo kare me tito pi kwena!—Yabo. 14:6, 7.
2. Lutic pa Jehovah ginyuto nining ni kare-ni obedo kare ma mito tic me oyot?
2 I kin mwaka apar ma okato angec, lutic pa Jehovah gutiyo ki cawa macok romo bilion 12 kulu i tic me tito pi Ker-ri ki loko dano me doko lupwonye. Jo mapol guloko kwogi wek gibed ki kare muromo i tic me kayo kac i yo me cwiny. (Mat. 9:37, 38) Me labolle, i mwaka mukato-ni lutit kwena ma kato 850,000 kulu gutiyo macalo painia i dwe acel acel. Jo ma gutiyo calo Painia marii, nongo gutiyo tic me pwony-nyi pi cawa ma romo 70 dwe ki dwe. Jo ma gutiyo calo painia pi tutunu, onongo mitte ni omyero guti pi cawa 50.
3. Lutit kwena pol kare gitimo gin ango wek gibed painia?
3 Jami ma Mitte me Bedo Painia: Painia gitemme me dwoko rwom me kwogi piny pien gingeyo ni “kare dong odoko ding.” (1 Kor. 7:29, 31) Giyenyo yo me kwo i rwom ma piny ma miyo gitero cawa manok i tiyo tic me yenyo cente. Me labolle, jo mukene gukobo i odi mogo matino. Jo mukene guweko tic ki jamigi mogo ma pe pigi tego tutwal. (Mat. 6:19-21) Pol kare pe dok gibedo ki yub me timo jami mapol pi kwogi. Man ducu gitimo ki yub me bedo ki kare ma oromo me keto cwinygi i tic me pwony. (Ep. 5:15, 16) Yub ma lutit kwena mapol guketo wek gibed ki kare me tic calo painia owok maber pien ni gudiyo cwinygi dok gujenge i kom Jehovah i lega.
4. Kit yub ango ma twero konyi me donyo i tic me painia?
4 In itwero tic calo painia? Pingo pe ipeny painia ma gitye ka tiyo ticgi maber, wek gutitti gin ango ma gin gitimo? Ti tic me pwony kacel kwedgi, wek in bene inong yomcwiny ma gin ginongo-ni. Kwan lok i kom jo ma gubedo painia ma nongo kicoyogi i bukkewa. Ket yub mogo ma konyi me donyo i tic me painia. Ka tye kit peko mogo ma i komkare-ni gigengi woko me tic calo painia, leg iye bot Jehovah wek en okonyi me cobogi.—Car. 16:3.
5. Bedo painia medo dirowa i tic me pwony nining?
5 Nongo Mot Kacel ki Yomcwiny: Bedo painia medo dirowa me tic ki Lok pa Lubanga, dok keliwa yomcwiny madwong. Lamego mo matidi ma obedo painia owaco ni: “Tic ki Lok me ada pa Lubanga i yo matir obedo twon mot madit atika. Ka ibedo painia, itiyo ki Baibul i kare mapol. I kare-ni, ka dong acito i tic me dog ot ki dog ot, ci atwero tamo ginacoya ma rwatte pi won ot acel acel.”—2 Tem. 2:15.
6. Bedo painia pwonyo dano ki gin ango?
6 Bedo painia bene pwonyowa me bedo ki diro mapol i kwowa. Romo konyo jo matino me ngeyo kit me tic ki cawagi kacel ki cente i yo maber, ki dong kit me kwo ki dano mukene i yo maber. Bedo painia omiyo jo mapol gucako neno kwo ki wang me cwiny. (Ep. 4:13) Medo i kom meno, painia pol kare gibedo ki kare me neno kit ma Jehovah konyo dok miyo kwede mot botgi.—Tic. 11:21; Pil. 4:11-13.
7. Bedo painia konyowa nining me bedo ki wat macok ki Jehovah?
7 Kare mukene gin maber loyo i tic me bedo painia aye ni konyowa me bedo ki wat macok ki Jehovah. Man twero gwokowa ki i atematema. Lamego mo ma ociro peko matek pi kare malac owaco ni: “Wat macok ma abedo kwede wan ki Jehovah i kare ma atye painia okonya me ciro pekona ducu.” En dok omedo ni: “Cwinya yom adada ni atiyo ki kwona ducu pi Jehovah. Okonya bene me miine me tic i yo ma atamo ni onongo pe atwero.” (Tic. 20:35) Walego ni wan bene omyero wanong mot mabeco kun nongo watimo gin ducu ma watwero i tic me pwony man ma pire tek-ki.—Car. 10:22.