Tic ma Pire Tek Loyo Botwa
1. Yecu onyutu nining ni ticwa me pwonyi onongo pire tek bote?
1 Ticwa me pwonyi obedo tic ma pire tek loyo bot Yecu. En otiyo matek adada kun woto mairo miya ki miya ka ducu i Palestina wek etit kwena bot dano mapol kit ma twere kwede. En obedo ki rwom me kwo ma lapiny wek ecwal cawa malac kun eketo cwinye i ticwa me pwonyi. (Mat. 8:20) I kare ma lwak gutemo diye wek omedde ki cango lutwogi, en owacci: “Myero atit lok me kwena maber me ker pa Lubanga i gang mukene bene, pien giora pi lok man.”—Luka 4:43.
2. Pingo ticwa me pwonyi onongo pire tek bot Yecu?
2 Pingo ticwa me pwonyi onongo pire tek bot Yecu? Gin ma en obedo ka tamone loyo aye weko nying Jehovah bedo maleng. (Mat. 6:9) En omaro Wonne me polo dok man oweko en omito ni ecob mitine kun elubo cikke ducu. (Jon 14:31) Medo i kom man, en onyutu ni ada eparo pi dano dok emito konyogi.—Mat. 9:36, 37.
3. Watwero nyutune nining ni ticwa me pwonyi pire tek botwa adada?
3 Lub Lanen pa Yecu: Weko ticwa me pwonyi bedo tic ma pire tek kit ma Yecu otimo kwede-ni pe yot, pien lobo kwanyo cawa wa dok kelo jami mapol ma dwoyo tamwa. (Mat. 24:37-39; Luka 21:34) Pi meno, omyero wange jami ma pirgi tego loyo kun wayubbe pi cito i tic me tito kwena kare ki kare. (Pil. 1:10) Watute ki tekowa ducu me bedo ki rwom me kwo ma lapiny kun pe watiyo ki jami me lobo-ni mukato kare woko.—1 Kor. 7:31.
4. Pingo pire tek ni myero wagwok tic ma pire tek loyo-ni kombeddi?
4 Dano maryek timo gin ma pire tek mukwongo ka oneno ni cawa nok. Me lapore, ka en oniang ni yamo magwar adada tye ka bino, en cwalo cawane ki kerone me yubbe wek jo me ode gubwoti dok bene miyo ngec bot jiranine. Tic mogo ma pirgi pe tego bedo lacen. Kare ma odong ma peya yamo magwar me Armagedon obino-ni odic woko. (Jep. 1:14-16; 1 Kor. 7:29) Me laro kwowa ki pa luwinywa, omyero wagwokke kenwa dok wagwok pwonywa bene kadi bed watye i kacokke nyo woko. (1 Tem. 4:16) Ada, wek wabwoti, omyero wawek ticwa me pwonyi obed tic ma pire tek loyo botwa!